ALENI a togo yiino: “Kawira daa lowo geeshsha yaachishshinoe. Qoleno ‘Kowiicho jaalla afiꞌreemmokka? Woy insa anewa aantannokka?’ yee yaadoommo.” Aleni, alba heeꞌrannowiinni 1,400 km saꞌꞌannowa noota haaro songo rosate woꞌnaalanni no.

Atino wole songo haꞌroottoha ikkiro, tini yaachishshanni nooheha ikkara dandaanno. Haaro songo rosatto gede kaaꞌlannoheri maati? Haaro songo rosa hedoottohunni aleenni qarra ikkitinoheha ikkiro maa assa dandaatto? Woy ati wole songo haroottokkiha ikkirono, songoꞌne dagginori fiile haadhanno gede kaaꞌla dandaattohu hiittoonniiti?

Hanni konne lawishsha hedi: Mitte haqqicho buqqinse haaꞌne wolewa kayinsiro, shiima yanna geeshsha qoorase digattanno. Mannu mitte haqqicho buqqise wolewa massanno wote ayirritannonsakki gede gama rumudda tattayise hoolanno. Haqqicho wolewa massine kayinsi gedensaanni wole rumudda fushshidhanno. Hatteente gede, aterano haaro songo rosa duha ikkitinoheha ikkara dandaanno. Haqqichote gede atino albi songora “rumuxxoottoha” yaano muli jaalla kalaqiroottoha woy danchu ayyaanaamittete rosichi nooheha ikkara dandaanno. Xa qole haaro songo rosate, haqqichote gede haaro rumudda fushshiꞌra hasiissannohe. Hatto assate mayi kaaꞌlannohe? Qullaawu Maxaafi biddishsha harunsa kaaꞌlitannohe. Hanni kuri giddo mito laꞌno.

Maganu Qaale ganye nabbawanno manchi “lolahanno wayi gama kaasante, gumaseno yanna yannantenni uyitanni, darchiseno giggilikkinni heedhanno haqqicho gedeeha ikkanno. Assiꞌrannori baalu qinaannosi.—Far. 1:1-3.

Mitte haqqicho danchu garinni lophitanno gede ganyite waa afiꞌra hasiissannonte gede, mittu Kiristaanchino ayyaanaamittetenni kaajjado ikke heeꞌrate Maganu Qaale sagaꞌla hasiissannosi. Konni daafira, Qullaawa Maxaafa ganyite nabbawa agurtooti, hattono Kiristaanu gambooshshe ganyite haꞌri. Maatete magansiꞌranna hojju xiinxallo ganyite assiꞌra agurtooti. Alba assattoha ayyaanaamittete coye baala, haaro songora heedheno assa hasiissannohe.

“Wole duushshannohu duuwanno.”—Law. 11:25.

Soqqansho ganyite fulattoha ikkiro, ayyaanaamittekki jawaattanno, hattono haaro songo rakke fiile haaꞌratto. Keveni yinannihu songote cimeessi togo yiino: “Aninna minaamaꞌya haaro songo marranni heeꞌnenni kaaꞌlaano suwisaano ikkanke lowo geeshsha kaaꞌlitinonke. Shiima yanna giddo, roduuwinkenna, suwisaanote ledo egennama, hattono haaro soqqanshote qoqqowonke rosa dandiinoommo.” Rojeri yinanni rodii alba heeꞌrannowiinni 1,600 km saꞌꞌannowa haꞌrino; isi togo yiino: “Baalunkurinni roore haaro songo rahe rosate kaaꞌlannori, dandiini deerrinni soqqansho ganye fulate. Qoleno, songote giddo aye loosono loosa hasidhinannita cimeeyyete kulle; lawishshaho, Gambooshshu Addaraashe feya, kifile shiqishshannori shiqisha dandiitannokkiha ikkiro insa riqiwe shiqisha, woy dhuka hoogginore gambooshshe massa dandiitinanni. Roduuwu umiꞌne horo agurtine woloota kaaꞌlitinanna laꞌuro, kiꞌnewa aana shota ikkitannonsa.”

“Wodana halaꞌle.”—2 Qor. 6:13.

Wodana halaꞌladda ikkitine roduuwiꞌnera baxille leellishshe. Melisanna minise manni wole songo haꞌri  gedensaanni hatte songora haaro jaalla kalaqiꞌrate woꞌnaalino. Ise togo yitino: “Gambooshshu hanafara albaanninna goofi gedensaanni roduuwunniwa shinqe hasaawate woꞌnaalleemmo. Tini qolte insa keere haaꞌra calla agurre, seekkine egennammeemmo gede kaaꞌlitinonke.” Qoleno hatto assansa hatte songora noo roduuwi suꞌma rahe amadanno gede kaaꞌlitinonsa. Hattono wodanansa halashshidhe wosina adhansa, roduuwu ledo kalaqidhino jaaloomi kaajjanno gede assitino. Melisa ledde togo yitino: “Roduuwunnita silkete kiiro adhanke, insa ledo xaandeemmonna ayyaanaamittete coyenna wole coye mitteenni assineemmo gede kaaꞌlitinonke.”

Afoottokki manna shiqe hasaawisa waajjattoha ikkiro, shiimare assite hanafa dandaatto. Lawishshaho, muushshi yaakki wolootu atewa shiqqanno gede assitara dandiitanno; umi qara togo assa shota ikkitinokkiti egennantinote. Ikkirono, Qullaawu Maxaafi “Hisataamo alba laꞌꞌa wodana hagiirsiissanno” yaannota qaagi. (Law. 15:30) Lophitino qooxeessinni xeertowa hadhinoti Richeeli yinanni rodoo togo yitino: “Ani kalaqamunni manna ille qase lae diafeemmate. Mito wote, haaro songora noo roduuwa hasaawiseemmahu aneneeto giddeesseeti. Gambooshshu Addaraashera callinsa ofollino roduuwa hasaawisate woꞌnaaleemma. Insano anente gede manna ille qasse laꞌe affannokkiha ikkara dandaanno.” Lamalate kiiro gambooshshu hanafara albaanninna goofi gedensaanni haaruuddu ledo egennamate mayira diwoꞌnaalatto?

Boode lamala geeshsha haaru roduuwi ledo egennama hagiirsiissahera dandiitanno. Yanna saꞌanni hadhanno wote kayinni, sinsinne gudattora dandaatto. Ikkirono, wole jaalla kalaqiꞌrate woꞌnaala agurtooti.

Mite haqqera haaro baattora rumuxxate, wole haqqenni roore yanna hasiissanno. Hatteente gede, haaro songo rosa mannu mannu garinni babbaxxitara dandiitanno. Atera haaro songo rahe rosa qarra ikkitinoheha ikkiro, aane nooha Qullaawu Maxaafi biddishsha harunsa kaaꞌlitannohe:

“Dancha looso loosa ceeꞌminoonke. Hexxo mudha hoongummoro yanna iillitanno woyite mixxineemmo.”—Gal. 6:9.

Haaro songo rosittokki, hedoottohunni aleenni keeshshattora dandaatto. Lawishshaho, Giliyaadi Rosi Mine rossino misiyoone ayiddensa layiꞌrate gobbansa hadhannohu sonkoonninsa gobbara boode diro keeshshitu gedensaanniiti. Hatto assansa, hakko qooxeessira noo roduuwiwa aantannonna haaro bude rossanno gede kaaꞌlitannonsa.

Alehandiro yinanni rodii duuchu qooxeessiꞌra heeꞌrino; isi haaro qooxeessa rosate yanna hasiissannota huwatino. Isi togo yiino: “Muli yannara wole qooxeessa haꞌnummota minaamaꞌya, ‘Jaallaꞌya baalanti noohu albi songoraati’ yitino.” Alehandiro minaamasira, lamu diri albaanni wole qooxeessa haꞌri woteno hatto yitinota qaagiissinose. Ikkirono lamu diri giddo ise roduuwunniwa aanate woꞌnaaltino daafira haaro jaalla kalaqidhino.

“‘Xaahunni roore albi diri hiittoo danchaati’? yitooti. Egennaamu togoo coye dicoyiꞌranno.”—Ros. 7:10.

Albi songo, haaro songokki ledo heewisiissooti. Lawishshaho, haaro songora noo roduuwi albi songora noo roduuwi geeshsha fante coyidhannore ikka hooggara dandiitanno; woy albi songora noo roduuwinni roore hedonsa xawisse coyidhannokkire  ikkitara dandiitanno. Dancha akattansa aana illachishate woꞌnaali; ate ikkoottorono hatto assinahera hasiꞌrattota qaagi. Mitu wole songo haꞌrino roduuwi “Isi ani addinta alamete doyichora noo ‘roduuwa’ baala baxeemmo” yite insaneeto xaꞌma hasiissannonsata huwattino.—1 Phe. 2:17.

“Hasidhe afidhinannina.”—Luq. 11:9.

Yihowa kaaꞌlannohe gede huucciꞌra agurtooti. Deevidi yinanni cimeessi togo yiino: “Qarra ikkinoꞌnere umiꞌnenni calla tirate woꞌnaaltinoonte. Hatteentenni huuccatto assidhe!” Aleenni kulliti Richeelino togo yitino: “Aninna minaanniꞌya haaro songo rosa hongoommoha lawinkero, ‘Hendummokki wolootaho ninkewa shiqa qarra ikkitannonsa gede assinoommoha ikkiro, maa assa hasiissannonkero kulinke’ yine Yihowa huucciꞌneemmo. Hakkiinni roduuwinke ledo albinni roore yanna sayisate woꞌnaaleemmo.”

Oosoꞌnera haaro songo rosa qarra ikkitinonsaha ikkiro, tenne haja kayissine mitteenni huuccatto assidhe. Roduuwu ledo dancha yanna sayissanno gede assitine, haaro jaala kalaqidhanno gede kaaꞌlensa.

Songoꞌne haarote dagginore kaaꞌla dandaattohu hiittoonniiti? Umonni hanaffe addu jaala ikkate woꞌnaali. Hatto assate, ati haaro qooxeessa haroottoha ikkoommero maa assinahera hasiꞌrattoro hedi; hakkiinni atera assinahera hasiꞌrattore insara assi. (Mat. 7:12) Ledonsa maatete magansiꞌra assiꞌra woy JW Birodikaaste laꞌꞌa dandaatto. Ledokki soqqantanno gede koyisano dandaatto. Sagale qixxeessite wosinsattonsaha ikkiro, konni kaꞌa hattenne dihabbanno. Haaruuddu songoꞌne dagganno wote wolere maa assa dandaatto?

Kaarloosi yinanni rodii togo yiino: “Haaro songo haꞌnummo wote, mitte rodoo hira iibbinokki waaginni hidha dandiineemmo suuqe kultinonke. Tini ninkera lowo kaaꞌlooti.” Wolu qooxeessinni dagginorira, iibbillu, qiidu, woy xeenu yannara hiittoo uddanno uddiꞌra hasiissannonsaro kultinansara dandiitinanni. Woy qooxeessiꞌnera heeꞌranno manni budenna xagge, hattono ammaꞌnonsa kultine soqqanshonsanni dancha guma afidhanno gede kaaꞌla dandiitinanni.

Hanafote qummi assinihu Aleni haaro songo haꞌrinku diro sainosi. Isi togo yiino: “Umi qara roduuwu ledo egennamate aneneeto giddeessa hasiissinoe. Xa kayinni insa maateꞌya gede ikkitino daafira, tashshi yiinoe.” Aleni haaro songo haꞌrasi alba noosi jaalla hooganno gede assitinosikkita huwatino. Hatteentenni isi lubbora baxxannosita wole jaalla afiꞌrino.