1, 2. (a) Maganu soqqamaasine hiikkonne baꞌraarsha afiꞌrate quqquxantanno? (b) Albillitte afiꞌneemmo baꞌraarshi aana illachinsheemmo gede mayi kaaꞌlannonke? (Hanafote noo misile lai.)

 MAGANU yannankera noohu ayyaanunni buuramino Kiristaanira, soqqamaasinchu Phaawuloosi gede, ‘iimi heeshsho baꞌraaꞌra’ aannonsa. (Fil. 3:14) Insa iima Yesuusi Kiristoosi ledo gashshatenna isi ledo mannu ooso guuta ikkitanno gede assate quqquxantanno. (Aju. 20:6) Maganu insara dhagge ikkitanno hexxo uyinonsa! Wolu geꞌreewirano baxxitino hexxo noonsa. Insara uullate aana hegerera heeꞌrate hexxo noonsa; tinino lowo geeshsha hagiirsiissanno hexxooti!—2 Phe. 3:13.

² Phaawuloosi buuramino Kiristaani ammaname heeꞌrannonna baꞌraarsha afiꞌranno gede togo yee amaalinonsa: “Woꞌmanka woyite iima gordoho noo coye hedde.” (Qol. 3:2) Insa woꞌmanka wote iima heeꞌrate hexxonsa aana illachisha hasiissannonsa. (Qol. 1:4, 5) Ee, iima heeꞌrate hexxo noonsarino ikko uullate aana hegerera heeꞌrate  hexxo noonsari Maganu soqqamaasine, Yihowa uyinonsa hexxo hiincansa afidhanno baꞌraarshi aana illachishshanno gede kaaꞌlitannonsa.—1 Qor. 9:24.

3. Phaawuloosi Kiristaana mayyee qorowisiisino?

³ Phaawuloosi Kiristaana baꞌraarsha afiꞌrannokki gede guficho ikkansara dandaanno coye kule qorowisiisinonsa. Lawishshaho, isi Qolasiyaasi songora heeꞌranno roduuwi, Kiristoosi ammana agure Muse Higge aana illachishe Magano hagiirsiisate woꞌnaalannohu kaphu Kiristaaniwiinni xeertiꞌranno gede kulinonsa. (Qol. 2:16-18) Phaawuloosi qummi assino coyi giddo mitu yannankerano iillankeranna baꞌraarsha afiꞌneemmokki gede guficho ikkankera dandaanno. Lawishshaho, Phaawuloosi busha yorto qeela dandiinanni gara, hattono ammanate roduuwinkenna maatenke mereero kalaqamanno qarra tira dandiinanni gara xawisino. Phaawuloosi tenne daafira amaalino amaale yannankerano kaaꞌlitannonke. Konni daafira, xa hanni Phaawuloosi Qolasiyaasi Kiristaanira baxillunni kae amaalino amaale xiinxallino.

4. Busha yorto baꞌraarsha afiꞌneemmokki gede guficho ikkitankera dandiitannohu mayiraati?

⁴ Phaawuloosi Kiristaanaho noonsata dhagge ikkitanno hexxo kuli gedensaanni, togo yee borreessino: “Uullate aana noota tenne gobba [woy, alame] yorto shiiyye. Hakkurino foorrete, battaawate, maalu yortote busha halchooti.” (Qol. 3:5) Busha yorto lowo wolqa afidhino, hattono Yihowa ledo noonke jaaloomi baꞌꞌannonna baꞌraarsha afiꞌnummokki ganteemmo gede assitankera dandiitanno. Lawishshaho mittu rodii busha yortonni qeelame songotenni fulino; isi wirro songonniwa higi gedensaanni togo yiino: “Busha coye asseemmo gede kakkayissinoe yorto lowo wolqa afidhino daafira, maaeela coye assoommota afoommohu hakkonne coye assummo gedensaanniiti.”

5. Yihowa biddishsha diingeemmo gede assannori iillannonke wote maa assa hasiissannonke?

⁵ Hakko iso Yihowa fushshinoha amanyootu seera diingeemmo gede fonqolannonke coyi iillannonke wote qoropha hasiissannonke. Lawishshaho, adhamate hede mitteenni yanna sayisanno Kiristaani, hanafotenni kayise mimmito anga amada, sunqamanna mannu nookkiwa callootinsa heeꞌra lainohunni insaneeto qeeꞌla hasiissannonsa. (Law. 22:3) Mittu Kiristaanchi loosoho xeertowa haꞌranno wote woy meyate woy labbaahu ledo loosanno wote fonqolo ikkannori iillasira dandaanno. (Law. 2:10-12, 16) Hattoori iillannohe wote, Yihowa Farciꞌraasincho ikkoottota xawisse kuli, danchu amanyooti nooheta leellishi, hattono gara ikkinokki baxille leellisha shollishshannota qaagi. Dadillineemmonna callanteemmo woteno fonqolammammora dandiineemmo. Hattoo yannara, hagiidhineemmo gede assannonke mancho hasiꞌneemmoha ikkara dandaanno. Kaaꞌlannonkeha lowo geeshsha hasiꞌnoommo daafira calla, baxihano ikkiro, kaaꞌlannonkeha lawanno manchiwa shinqeemmoha ikkara dandaanno. Atera hattoori iillinoheha ikkiro, Yihowanna dagasi kaaꞌlo xaꞌmiri; togo assakki baꞌraarsha afiꞌrattokki gede guficho ikkannohe coyiwiinni xeertiꞌratto gede kaaꞌlitannohe.—Faarso 34:18; Lawishsha 13:20 nabbawi.

6. Boohaarsha doodhineemmo wote maa qoropha hasiissannonke?

⁶ Busha yorto qeelate, maaeelu boohaarshiwiinnino xeertiꞌra hasiissannonke. Yannankera noohu batinyu boohaarshi, Soddoomunna Gomooru yannara noohu gedeeho. (Yih. 7) Boohaarsha qixxeessitannori, foorre qarra afidhinokkihunna mannu baalu assanno coyi gede assite shiqishshanno. Konni daafira alame shiqishshanno boohaarsha baala boohaarreemmokki gede qoropha hasiissannonke. Albillitte afiꞌneemmo baꞌraarshi aana illachinsheemmokki gede guficho ikkannonke  boohaarsha doodha dihasiissannonke.—Law. 4:23.

7. Songote giddo hiittoo qarri iillankera dandaanno?

⁷ Kiristaanu songo miila ikkanke lowo atooteeti. Gambooshshunniwa Maganu Qaale xiinxallankenna mimmito jawaachishanke, albillitte afiꞌneemmo baraarshi aana illachinsheemmo gede kaaꞌlitannonke. Ikkollana coyi kawa kaꞌaa higannonke wote, songote noo salaame baꞌara dandiitanno. Konne qarra ranke tira hoongummoro, roduuwinkera koma amandammora dandiineemmo.—1 Pheexiroosi 3:8, 9 nabbawi.

8, 9. (a) Baꞌraarsha afiꞌneemmo gede kaaꞌlitannonke akatta hiikkuriiti? (b) Ammanate rodiinke koffi assinkero salaame kalanqeemmo gede mayi kaaꞌlannonke?

⁸ Wolootaho koma amada baꞌraarsha afiꞌneemmokki gede guficho ikkitankera dandiitanno; ikkina togoori iillannonkekki gede gargadha dandiineemmohu hiittoonniiti? Phaawuloosi Qolasiyaasi Kiristaana togo yee amaalino: “Maganu doodhino manni gede qullaawootanna baxantinoonnire ikkitine mararro, joongille, shaqqille, shooshanqenna cinca uddanote gede assitine uddidhe. Kiꞌne kiꞌneneewa koffi yitinoonni coye baala cincatenni agurre. . . . Kuri duuchunku aleenni duuchanka xaadise woꞌma mittimma aannoha baxille uddidhe.”—Qol. 3:12-14.

⁹ Baxillunna shaqqillu wolootaho gatona yineemmo gede kaaꞌlannonke. Lawishshaho, ammanate rodiinke koffi assannore coyiꞌrinkero woy assinkero, konni albaanni ninke woloota koffi assannore coyiꞌnoommo woy assinoommo yanna qaaga dandiineemmo. Hatte yannara roduuwinke soꞌronke gatona yite shaqqillenna baxille leellishshinonke daafira digalantoommonsa? (Rosiisaancho 7:21, 22 nabbawi.) Hakko iso Kiristoosi Magano halaalunni magansiꞌranno manni mittimma afiꞌranno gede asse shaqqille leellishino daafira galanteemmosi. (Qol. 3:15) Baalunku banxeemmo Magani mittoho, sabbankeemmo sokka mittete, hattono iillannonke qarri giddo duuchu mittu gariho. Mimmitinkera gatona yine baxillenna shaqqille leellishanke, songote giddo mittimma heedhanno gede assitanno, hattono albillitte afiꞌneemmo baꞌraarshi aana illachinsheemmo gede kaaꞌlitannonke.

10, 11. (a) Hinaasa bushate yineemmohu mayiraati? (b) Hinaaso baꞌraarsha afiꞌneemmokki gede guficho ikkitannonketa gargadha dandiineemmohu hiittoonniiti?

¹⁰ Qullaawu Maxaafi giddo nooti mite xagge, hinaasa baꞌraarsha afiꞌneemmokki gede guficho ikkitankera dandiitannota leellishshanno. Lawishshaho, Qaayeeli rodoosi Abeeli hinaase shiino. Qore, Daataaninna Aberooni Muse hinaasse gibbinosi. Moote Saaooli Daawitira coyi qiniinosi daafira hinaasinosi, hattono shaasira woꞌnaalino. Qullaawu Maxaafi “Dhiibbe . . . noowa cancunna bunshe baala heedhanno” yaannohu iseraati.—Yai. 3:16.

¹¹ Giddonke baxillunna shaqqillu heeꞌriro, woloota dihinaanseemmo. Maganu Qaali “Baxillu cincanno; baxillu elanno; baxillu dihinaasanno” yaanno. (1 Qor. 13:4) Giddonke hinaaso rumuxxitannokki gede, Maganoho noosi gedee lao heedhannonke gede assiꞌra hasiissannonke; roduuwinke ledo mittu bisi kifilla yaano mitte songo miilla ikkinoommohu gede assine heda hasiissannonke. Qullaawu Maxaafi “Mittu bisi ayirrinye afiꞌriro, wolu bisi qole hattennenni hagiidhanno” yaanno. (1 Qor. 12:16-18, 26) Konni daafira, roduuwinke danchare afidhuro hinaasa agurre, insa ledo hagiidha hasiissannonke. Moote Saaooli beetti Yoonaataani lawishsha heda dandiineemmo. Yoonaataani, Daawiti moote ikke shoomamino daafira dihinaasino. Hatteentenni isi Daawiti jawaachishino. (1 Sam. 23:16-18) Ninkeno Yoonaataani gede shaqqillenna baxille leellisha dandiineemmo?

12. Maatenke ledo baꞌraarsha afiꞌneemmo gede kaaꞌlitannonketi hiittenne Qullaawa Borro amaale harunsate?

¹² Maate Qullaawu Maxaafi biddishsha harunsituro salaamenna hagiirre, hattono albillitte baꞌraarsha afidhanno. Phaawuloosi Qolasiyaasi heedhannota Kiristaana ikkitino maate mayyee amaalino? Togo yiino: “Kiꞌne meento! Mootichu albaanni hasiisanno coye ikkino daafira minaanniꞌnera hajajamme. Kiꞌne labballo! Minaamaꞌne baxxe; kakkachoota ikkitinoontensa. Kiꞌne ooso! Mooticha hagiirsiisanno coye ikkino daafira, baalunku coyinni iltinoꞌnerira hajajammensa. Kiꞌne iltinoonniri! Dadillaamma ikkitannokki gede, oosoꞌne caacceessitinoontensa.” (Qol. 3:18-21) Yannankerano Phaawuloosi ayyaanunni amaalino amaale harunsa minaannuwa, minaamuwanna ooso kaaꞌlitannoti dihuluullissannote.

13. Mitte Kiristaancho minaannise halaalu minira daanno gede kaaꞌla dandiitannohu hiittoonniiti?

¹³ Minaannikki Yihowa Farciꞌraasincho ikka hoogironna isi garunni amadannohekkiha lawihero maa assatta? Konninni kainohunni giwamittaro amalisi woyyaawannoha lawannohe? Togo assiteenna isi hasiꞌroottare assihero nafa, halaalu minira kayinni daa hoogara dandaanno. Minaannikki umimma ayirrisittaro kayinni, maateꞌne giddo salaame heedhannonna Yihowa ayirranno gede assatta; qoleno minaannikki halaalu minira daara dandaanno;  konni garinni lamunku baꞌraarsha afidhinara dandiitinanni.—1 Pheexiroosi 3:1, 2 nabbawi.

14. Mittu Kiristaanchi minaamasi ayirrissannosikkiha ikkiro maa assa hasiissannosi?

¹⁴ Yihowa Farciꞌraasincho ikkitinokki minaamakki ayirrissannohekkiha lawihero maa assa hasiissannohe? Ise boroorittoro ayirrissannoheha lawannohe? Diayirrissannohe! Maganu, Yesuusi gede umimmate silxaane baxillunni horoonsiꞌrattora hasiꞌranno. (Efe. 5:23) Yesuusi songote noosita umimmate silxaane baxillunninna cincatenni horoonsiꞌranno. (Luq. 9:46-48) Minaanni Yesuusi gede baxillenna cinca leellishannoha ikkiro, minaamasi halaalu minira daggara dandiitanno.

15. Kiristaancho ikkino minaanni, minaamasi baxannota leellisha dandaannohu hiittoonniiti?

¹⁵ Qullaawu Maxaafi minaannuwa “Minaamuwaꞌne baxxe; kakkachoota ikkitinoontensa” yee amaalanno. (Qol. 3:19) Baxillaanchu minaanni minaamasi giddoseta coyidhanno wote seekke macciishshannohanna hedose mishannokkiha ikkiro ayirrisannoseta leellishanno. (1 Phe. 3:7) Woꞌmanka wote ise xaꞌmitannore assanno yaa ikka hoogirono, mitto coye muꞌrara albaanni ise ledo amaalamannoha ikkiro dancha doorsha doodhara dandaanno. (Law. 15:22) Baxillaanchu minaanni, minaamasi ayirrissannosi gede xaꞌmirante, danchu garinni amadisero umisenni kaꞌe ayirrissasira dandiitanno. Mittu minaanni minaamasinna oososi baxannoha ikkiro, insa Yihowara hagiirrunni soqqantanno, hattono hegere heeshsho baꞌraarsha afidhanno.

16, 17. Annikkinna amakkinni kainohunni quwa saꞌe hanqattokki gede mayi kaaꞌlannohe?

¹⁶ Ati wedellichahoro, annikkinna amakki hedokki huwatannokihanna eo fulo hoꞌlinoheha lawahera dandaanno. Isinni, insanni kainohunni lowo geeshsha giiramootto daafira, Yihowara soqqama agurittoro woyyannoha lawahera dandaanno. Ikkollana, konninni kainohunni Yihowara soqqama agurittoro, galte hosse annikkinna amakki, hattono songote giddo noo roduuwi geeshsha atera wodaninni kae hedannohu nookkita huwatakki digatanno.

¹⁷ Annikkinna amakki horo seejjannohekkiha ikkoommero, insa baxxannoheta dihuluullamatto? (Ibi. 12:8) Hanqisinohehu annikkinna amakki amaalinohe gari ikkara dandaanno. Insa amaalinohe gari aana illachisha agurte mayira amaalinohero hedate woꞌnaali. Wodanaaꞌmite hedi, hattono insa seejjitannohe wote quwa saꞌe hanqitooti. Maganu Qaali togo yaanno: “Egennaamu manchi batinyere dicoyiꞌranno; wodancha afiꞌrino manchi geinoho.” (Law. 17:27) Seejjinoonnihe gari ikkihano ikkiro, hattee seejjo macciishshi; hatto assittoro geoottoha woy egennaamo ikkoottota leellishatto. (Law. 1:8) Yihowa baxanno annanna ama afiꞌra atoote ikkitinota deꞌooti. Insa ati hegere heeshsho baꞌraarsha afiꞌratto gede kaaꞌla hasidhanno.

18. Albillitte afiꞌratto baꞌraarshi aana illachishate murciꞌroottohu mayiraati?

¹⁸ Hexxonke iimira haꞌra woy gannate ikkitino uullara hegerera heeꞌra ikkiturono, albillitte afiꞌneemmo baꞌraarshi taalle nookkiho. Tenne hexxo uyinonkehu Kalaqaanchonke ikkino daafira, konne baꞌraarsha afiꞌneemmota dihuluullammeemmo. Maganu Gannate ikkitanno uulla daafira coyiꞌranni, “Kaaliiqa [“Yihowa,” NW] egennino mannino baatto woꞌmanno” yaanno. (Isa. 11:9) Hatte yannara uullate aana heeꞌrannohu baalu Maganuwiinni rosanno. Ee, konne baꞌraarsha afiꞌrate dandiinummore baala assa hasiissannonke. Konni daafira woꞌmanka wote Yihowa eino qaale hiince; qoleno mittu coyino isi aanno baꞌraarsha adhitinannikki gede guficho ikkaꞌnera wodhitinoonte!