1. Ammanantinoti Maganu soqqamaasine ragidhino cubbinni kainohunni mayi macciishshamansara dandaanno?

SOQQAMAASINCHU Phaawuloosi “Ani hiittoo qarraataamooti!” yee borreessino. (Rom. 7:24) Batinye ammanantinote Maganu soqqamaasinera Phaawuloosite gedee hedo macciishshantinonsa. Ragiˈnoommo cubbinni kainohunninna woˈmunni woˈma Yihowa hagiirsiisannore assa hoogankenni Phaawuloosi gede ninkeno dadillinammora dandiineemmo. Mitu shota ikkinokki cubbo loosino Kiristaani Maganu cubbonsa horo gatona yaannonsakkiha lawinonsa.

2. (a) Faarso 34:22 Maganu soqqamaasine loossino soˈronni kainohunni quwa saˈe dadilla hasiissannonsakkita leellishshannohu hiittoonniiti? (b) Konni birxichira maa ronseemmo? (“ Rosohonso Caaleho?” yitanno saaxine lai.)

² Qullaawa Borro kayinni, Yihowa golonsa assidhinori loossino soˈronni kainohunni quwa saˈe dadilla hasiissannonsakkita buuxissanno. (Faarso 34:22 nabbawi.) Yihowa golo assiˈrate yaa mayyaate? Yihowa maaro afiˈratenna isi gatona yaannonke gede maa assa hasiissannonke? Hundi Israeele yannara Yihowa qixxeessinota eeggote katamma daafira xiinxallanke, kuri xaˈmuwara dawaro afiˈrate kaaˈlitannonke. Eeggote katamma daafira kulanno seeri  noohu Higgete gondoori hundaati; Higgete gondoori qole 33 M.D. Phenxeqosxete barra soorramino. Ikkirono, konne seera fushshinohu Yihowa ikkinota deˈooti. Konni daafira, Yihowa qixxeessinote eeggote katamma qixxaawonni, isi cubbo, cubbo loosanno mannanna maaro eˈnannita ma garinni laˈˈannoro rosa dandiineemmo. Hanni balanxe eeggote katamma qixxeessinoonnihu mayiraatironna tini katamma maaho kaaˈlitannotero laˈno.

3. Israeelete daga afanni heeˈre mannu lubbo shiino mancho ma assitanno?

³ Yihowa manna shinannita effire giwanno. Hundi Isiraeele waro, mittu manchi afanni heeˈre mannu lubbo shiiro, reyi manchira muli fiixa ikkannohu shii mancho shee “rabbisiˈranno.” (Kir. 35:19; Mar. 19:6) Konni garinni lubbo shii manchi, beebbate baˈino lubbora umisi lubbo baatanno. Lubbo shiino mancho bayichonko shaa, Hexxote Gobba battaabbannokki gede assitanno; korkaatuno Yihowa togo yee hajajjino: “Heedhinanni baatto [batteessitinoonte]. Manna shaannohu baatto batteessanno daafira, shiinoha shaa agurranna baatto keereensitinanniti wole doogo dino.”—Kir. 35:33, 34.

4. Hundi Israeele yannara mittu manchi afikkinni mannu lubbo shiiro maa assinanni?

⁴ Israeele mittu manchi afikki mannu lubbo shiiro maa assitanno? Hakku manchi lubbo shiinohu afikki ikkirono, beebbaataame lubbo shiino daafira xaˈmamasi digattanno. (Kal. 9:5) Ikkirono, kuni manchi rabbisirannohu shaannosikki gede lee eeggote katamma giddo mittenniwa xooqa dandaanno. Hakkiicho isi agarooshshe afiˈranno. Afikkinni mannu lubbo shiino manchi, kakkalaanote biili reya geeshsha eeggote katamira keeshsha hasiissannosi.—Kir. 35:15, 28.

5. Eeggote katamma Yihowa daafira roore afate kaaˈlitannonkehu hiittoonniiti?

⁵ Eeggote katamma qixxeessinohu manna ikkikkinni Yihowaati. Yihowa Iyyaasu Israeelete manni uminsara ‘eeggote katamma doodhanno’ gede kulara hajajino. Israeele kuri katamma ‘baddanno’ gede kulloonninsa. (Iya. 20:1, 2, 7, 8) Kuri katamma doorinohu Yihowa umosi ikkino daafira, togo yine hendammora dandiineemmo: ‘Tini Yihowa qixxeessino qixxaawo isi maaro daafira maa rosiissannonke? Tini qixxaawo xaa yannara Yihowa golonke assiˈra dandiineemmo gara afate kaaˈlitannonkehu hiittoonniiti?’

6, 7. (a) Mittu manchi hedeweelcho lubbo shiiro geerru maa assannoro xawisi. (Hanafote noo misile lai.) (b) Hedeweelcho mannu lubbo shiino manchi geerraho mare kulasi hayyote yineemmohu mayiraati?

⁶ Mittu manchi hedeweelcho mannu lubbo shiiro, eeggote katamiwa mare “katama eˈnanni waalchira nooriwa yoo yitanno geerriwa shiqe ikkino coye baala kuˈla” hasiissannosi. Geerru iso anga fante haadhanno. (Iya. 20:4) Shiima yanna gedensaanni, hakkonne mancho lubbo shii katamira noo geerriwa sonkanni; hakkiinni insa yoo yitanno. (Kiiro 35:24, 25 nabbawi.) Kuni manchi eeggote katama higannohu, geerru isi lubbo shiinohu hedeweelcho ikkinota buuxxu gedensaanni callaati.

⁷ Lubbo shii manchi tenne geerraho kula hasiissannosihu mayiraati? Israeelete songo qullaawa ikkitannonna hedeweelcho mannu lubbo shiino manchi Yihowa maaronni horo afiˈranno gedeeti. Mittu Qullaawu Maxaafi fullahaanchi hedeweelcho mannu lubbo shiino manchi geerraho mare kula hoogiro mayi ikkara dandaannoro borreessanni togo yiino: “Kuni manchi hatto assa hoogiro shinasira dandiinanni. Maganu qixxeessinosi qixxaawo horoonsiˈra giwino daafira, mundeete xaˈmamannohu iso umosiiti.” Hedeweelcho mannu lubbo shiino mancho kaaˈlate qixxeessinoonni qixxaawo no; isi heeshshotenni heeˈra hasiˈriro tenne qixxaawo horoonsira  hasiissannosi. Kuni manchi Yihowa qixxeessinote eeggote katamma giddo mittenniwa mare maaxama hoogiro, isi shiino manchira muli fiixa ikkannohu shiisirono dixaˈmamanno.

8, 9. Cubbo loosino Kiristaani cimeeyyenniwa shiqe kaaˈlo xaˈmira hasiissannonsahu mayiraati?

⁸ Yannankerano mittu Kiristaanchi shota ikkinokki cubbo loosiro, songote cimeeyye kaaˈlo xaˈmira hasiissannosi. Mayira? Umihunni, Qaalisi giddo kulloonni garinni songote cimeeyye shota ikkinokki cubbo loosino manchi haja laˈanno gede assinohu Yihowaati. (Yai. 5:14-16) Layinkihunni, tini qixxaawo cubbo loosino manchi maaro ei gedensaanni wirro Yihowa ledo jaalooma kalaqiˈranno gedenna cubbu doogo aguranno gede kaaˈlitannosi. (Gal. 6:1; Ibi. 12:11) Sayikkihunni, cubbo loossu gedensaanni maaro eˈannore cimeeyye jawachishshannonna quwa saˈe dadillitannokki gede kaaˈlitanno gede kulloonninsa. Yihowa cimeeyye ‘wishotenni goˈlinanniwa’ ikkitinota coyirino. (Isa. 32:1, 2) Tini qixxaawo Yihowa maaranno Magano ikkinota leellishshanno yiniro sumuu diyaatto?

⁹ Batinye Maganu soqqamaano, songote cimeeyyewiinni kaaˈlo xaˈmidhe harshammo afidhino. Lawishshaho, Daanieeli yinanni rodii shota ikkinokki cubbo loosi gedensaanni, cimeeyyete shiqe kula waajje lowo agana keeshshino. Isi togo yiino: “Yanna saˈanni hadhuta xaate cimeeyye assitannoeri dino yee hedoommo. Ikkirono, barrunni mitto barra loosoommo cubbi abbinoe guma mixxaˈya digatanno yee waajjoommo. Yihowa huucciˈreemmo wote, balaxe assoommore baala kule iso maaro xaˈmira hasiissannoeta huwatoommo.” Gedensaanni Daanieeli cimeeyye kaaˈlitannosi gede xaˈmirino. Isi hakkawarita qaage togo yiino: “Insa shiqe hasaawisa waajjishinoe. Insara hasaaphummo gedensaanni kayinni duhu aaniˈyanni dirrinoeha lawinoe. Xa huxuxxi yuummokki Yihowawa shiqa dandeemmo.” Xa Daanieelira keeraanchu tiiˈˈi noosi; qoleno isi muli yannara songote soqqamaasincho ikke shoomamino.

10. Hedeweelcho lubbo shiino manchi maaro afiˈra hasiˈriro maa assa hasiissannosi?

¹⁰ Hedeweelcho mannu lubbo shiino manchi maaro afiˈrate assa hasiissannosiri no. Isi  mule noohu eeggote katamiwa xooqa hasiissannosi. (Iyyaasu 20:4 nabbawi.) Kuni manchi noowiinni rahe fula hasiissannosi; gata hasiˈriro dandaamisi deerrinni eeggote katama haˈre kakkalaanote biili reya geeshsha hakko heeˈra hasiissannosi! Hatto ikkiro qole isi agure haˈra hasiissannosi coyi no. Isi loososinna qaesira noo injo agura hasiissannosi; qoleno kakkalaanote biili reya geeshsha bayichunni bayicho haˈra didandaanno. * (Kir. 35:25) Ikkirono hatto assasi gaabbissannota diˈˈikkitino. Isi eeggote kataminni fule haˈriro, tini lubbo shaasinni gaabbinokkita leellishshanno; qoleno hatto assiro heeshshosi nafa hoogara dandaanno.

11. Cubbo loosino Kiristaanchi maaro ei gedensaanni Maganu maaro ajishe laˈˈannokkita leellisha dandaannohu hiittoonniiti?

¹¹ Yannankerano cubbo loosino manchi maaro ei gedensaanni Maganu maaro afiˈrate assa hasiissannosiri no. Shota ikkinokki cubbiwiinni xeertiˈra calla ikkikkinni, togoo cubbiwa qolte massitannote shiimmaadda soˈrowiinnino xeertiˈra hasiissannonke. Soqqamaasinchu Phaawuloosi, Qorontoosi heeˈrannohu maaro eino Kiristaani daafira togo yee ayyaanunni borreessino: “Maganu hedo garinni ikkino dadilli: hiittoo hixamanya, kiˈnenee keeˈreensirate hiittoo diinaggaawa, hiittoo hanqo, hiittoo waajja, hiittoo quqquxama, hiittoo laala, hiittoo qoricha mereeroˈne wori!” (2 Qor. 7:10, 11) Cubbo loosa agurate sharrammeemmoha ikkiro, loonsoommo cubbira gaabbinoommotanna ‘Cubbo loosummoro Yihowa maarannoella’ yine hendeemmokkita leellinsheemmo.

12. Mittu Kiristaanchi Maganu maaro afiˈrate maa agura hasiissannosi?

¹² Mittu Kiristaanchi Maganu maaro afiˈrate maa agura hasiissannosi? Lowo geeshsha baxannore ikkirono, cubbunniwa qole massannosire baala agura hasiissannosi. (Mat. 18:8, 9) Mite jaallakki Yihowa dadillisannore assatto gede xixxiibbannoheha ikkiro, insawa aana aguratto? Ago bikkunni aga qarra ikkitinoheha ikkiro, quwa sayisidhe agatto gede assannoheriwiinni xeertiˈratto? Busha yorto qeelate sharrantanni noottoha ikkiro, giddokki busha hedo kalaqantanno gede assitanno filmewiinni, webisayitewiinni, woy togoo assootiwiinni xeertiˈratto? Yihowara ammaname heeˈrate yine agurreemmori baalu digaabbisannonke. Maganu ledo noonke jaalooma huˈna saˈino busha dino. Qoleno, isiha ‘hegere baxille’ afiˈra roorinori dino.—Isa. 54:7, 8.

13. Eeggote katama xooqe eino manchi, beˈe yiikki hagiirrunni heeˈra dandaanno yineemmohu mayiraatiro xawisi.

¹³ Eeggote katama eino manchi, hakkiicho salaametenni heeˈra dandaanno. Yihowa eeggote katamma daafira coyiˈranni kuri katamma ‘xooqqine gattinanniwa’ ikkitannoˈne yiino. (Iya. 20:2, 3) Yihowa hedeweelcho mannu lubbo shiino manchi tenne soˈrora wirro xaˈmamara dihasiˈranno; qoleno rabbisiˈranno manchi eeggote katama eˈˈe hakkonne mancho shaara difajjinannisi. Konni daafira, xooqe eeggote katama eino manchi rabbisiˈnannie yee diwaajjanno. Isi konni katamira heeˈri geeshsha Yihowa agarooshshe afiˈre beˈe yiikki heeˈra dandaanno. Eeggote katami usuru mine diˈˈikkino. Kuni manchi katamu giddo looso loosa, woloota kaaˈlanna salaametenni Yihowara soqqama dandaanno. Ee, isi hagiirru noo heeshsho heeˈra dandaanno!

14. Mittu Kiristaanchi maaro ei gedensaanni maa addaxxa dandaanno?

¹⁴ Mite Maganu soqqamaasine shota ikkinokki cubbo loosse maaro eˈu gedensaannino lowo geeshsha dadillitanno, hattono Yihowa  cubbonsa horo gatona yaannonsakkiha lawannonsa. Aterano hatto lawannoheha ikkiro, Yihowa gatona yiihe gedensaanni, cubbokki woˈmunni woˈma agurannota huluullantooti! Aleenni qummi assinihu Daanieeli tenne buuxino. Isi cimeeyye seejjitinosi seejjo macciishshe wirro keeraancho tiia afiˈri gedensaanni togo yiino: “Hakkunni gedensaanni fooliishsho afiˈroommo. Kalaqamino qarra tirri gedensaanni, loosoommo cubbira dadilla aguroommo. Maganu cubbonke gatona yiiro, wirro qaaga dihasiˈranno. Yihowa yiino garinni, soˈronke haare hoolanno. Hakkunni gedensaanni loonsoommo soˈronni kainohunni dadilla dihasiissannonke.” Mittu manchi xooqe eeggote katama ei gedensaanni rabbisiˈnannie yee diwaajjanno. Hatteente gede, Yihowa cubbonke gatona yii gedensaanni, wirro hakko cubbinni kainohunni qorichishannonke yine waajja dihasiissannonke.—Faarso 103:8-12 nabbawi.

15, 16. Yesuusi wodo ikke reyasinna Kakkalaanote Biilonke ikkasi Maganu maaro addaxxineemmo gede kaaˈlitannonkehu hiittoonniiti?

¹⁵ Israeele Yihowa maaro addaxxitanno gede assannonsahu lowo korkaati noonsa; ninkera isinni hakkiinni saino korkaati noonke. Phaawuloosi Yihowara woˈmunni woˈma hajajama dandaannokki daafira qarraataamo ikkinota coyiˈri gedensaanni “Mootichinke Yesuusi Kiristoosi widoonni Maganoho galatu iillosi!” yiino. (Rom. 7:25) Phaawuloosi cubbo qeelate sharramino, hattono alba soˈro loosino; ikkirono isi maaro eino daafira Maganu Yesuusi widoonni gatona yiinosita addaxxino. Yesuusi wodo ikkinonke daafira, keeraancho tiianna giddoyidi salaame afiˈra dandiineemmo. (Ibi. 9:13, 14) Yesuusi Kakkalaanote Biilonke ikkinohura, “isi widoonni Maganunniwa daggannore baala . . . gatisansara dandaanno.” (Ibi. 7:24, 25) Hunda kakkalaanote biili, Israeele Maganu cubbonsa gatona yaannonsata addaxxitanno gede kaaˈlinonsa; Kakkalaanote Biilonke ikkinohu Yesuusi widoonni isinni “maaronna . . . hasiissannonke yannara kaaˈlitannonke elto” afiˈneemmota addaxxa dandiineemmo.—Ibi. 4:15, 16.

¹⁶ Yihowa golonke ikkanno gede, Yesuusita wodote kakkalo ammana hasiissannonke. Wodo mannu ooso baalate shiqqinohu gede assite calla laˈooti. Hatteentenni wodo ate umikkira shiqqinota ammani. (Gal. 2:20, 21) Cubbikkira maaro afiˈrattohu wodote widoonni ikkinota ammani. Wodo hegerera heeˈrate hexxo afiˈratto gede assitinoheta ammani. Yesuusiti wodote kakkalo Yihowa atera uyinohe eltooti.

17. Yihowa golokki assiˈroottohu mayiraati?

¹⁷ Eeggote katamma Yihowa maaranno Magano ikkinota leellishshanno. Tini qixxaawo, heeshsho qullaawa ikkitinota leellishshanno; qoleno cimeeyye kaaˈlitannonke gara, addu maaro hiittooteronna Yihowa maaro addaxxa dandiineemmohu mayiraatiro xawissanno. Yihowa goloˈne assidhinanni heedhinoonni? Isi geeshsha golo ikkannonkeri woluri horo dino! (Far. 91:1, 2) Aane noo birxichira eeggote katamma taashshotenninna maarotenni Yihowa lawishsha harunsineemmo gede kaaˈlitannonkehu hiittoonniitiro ronseemmo.