1. Ammanantinoti Maganu soqqamaasine ragidhino cubbinni kainohunni mayi macciishshamansara dandaanno?

 SOQQAMAASINCHU Phaawuloosi “Ani hiittoo qarraataamooti!” yee borreessino. (Rom. 7:24) Batinye ammanantinote Maganu soqqamaasinera Phaawuloosite gedee hedo macciishshantinonsa. Ragiꞌnoommo cubbinni kainohunninna woꞌmunni woꞌma Yihowa hagiirsiisannore assa hoogankenni Phaawuloosi gede ninkeno dadillinammora dandiineemmo. Mitu shota ikkinokki cubbo loosino Kiristaani Maganu cubbonsa horo gatona yaannonsakkiha lawinonsa.

2. (a) Faarso 34:22 Maganu soqqamaasine loossino soꞌronni kainohunni quwa saꞌe dadilla hasiissannonsakkita leellishshannohu hiittoonniiti? (b) Konni birxichira maa ronseemmo? (“ Rosohonso Caaleho?” yitanno saaxine lai.)

² Qullaawa Borro kayinni, Yihowa golonsa assidhinori loossino soꞌronni kainohunni quwa saꞌe dadilla hasiissannonsakkita buuxissanno. (Faarso 34:22 nabbawi.) Yihowa golo assiꞌrate yaa mayyaate? Yihowa maaro afiꞌratenna isi gatona yaannonke gede maa assa hasiissannonke? Hundi Israeele yannara Yihowa qixxeessinota eeggote katamma daafira xiinxallanke, kuri xaꞌmuwara dawaro afiꞌrate kaaꞌlitannonke. Eeggote katamma daafira kulanno seeri  noohu Higgete gondoori hundaati; Higgete gondoori qole 33 M.D. Phenxeqosxete barra soorramino. Ikkirono, konne seera fushshinohu Yihowa ikkinota deꞌooti. Konni daafira, Yihowa qixxeessinote eeggote katamma qixxaawonni, isi cubbo, cubbo loosanno mannanna maaro eꞌnannita ma garinni laꞌꞌannoro rosa dandiineemmo. Hanni balanxe eeggote katamma qixxeessinoonnihu mayiraatironna tini katamma maaho kaaꞌlitannotero laꞌno.

3. Israeelete daga afanni heeꞌre mannu lubbo shiino mancho ma assitanno?

³ Yihowa manna shinannita effire giwanno. Hundi Isiraeele waro, mittu manchi afanni heeꞌre mannu lubbo shiiro, reyi manchira muli fiixa ikkannohu shii mancho shee “rabbisiꞌranno.” (Kir. 35:19; Mar. 19:6) Konni garinni lubbo shii manchi, beebbate baꞌino lubbora umisi lubbo baatanno. Lubbo shiino mancho bayichonko shaa, Hexxote Gobba battaabbannokki gede assitanno; korkaatuno Yihowa togo yee hajajjino: “Heedhinanni baatto [batteessitinoonte]. Manna shaannohu baatto batteessanno daafira, shiinoha shaa agurranna baatto keereensitinanniti wole doogo dino.”—Kir. 35:33, 34.

4. Hundi Israeele yannara mittu manchi afikkinni mannu lubbo shiiro maa assinanni?

⁴ Israeele mittu manchi afikki mannu lubbo shiiro maa assitanno? Hakku manchi lubbo shiinohu afikki ikkirono, beebbaataame lubbo shiino daafira xaꞌmamasi digattanno. (Kal. 9:5) Ikkirono, kuni manchi rabbisirannohu shaannosikki gede lee eeggote katamma giddo mittenniwa xooqa dandaanno. Hakkiicho isi agarooshshe afiꞌranno. Afikkinni mannu lubbo shiino manchi, kakkalaanote biili reya geeshsha eeggote katamira keeshsha hasiissannosi.—Kir. 35:15, 28.

5. Eeggote katamma Yihowa daafira roore afate kaaꞌlitannonkehu hiittoonniiti?

⁵ Eeggote katamma qixxeessinohu manna ikkikkinni Yihowaati. Yihowa Iyyaasu Israeelete manni uminsara ‘eeggote katamma doodhanno’ gede kulara hajajino. Israeele kuri katamma ‘baddanno’ gede kulloonninsa. (Iya. 20:1, 2, 7, 8) Kuri katamma doorinohu Yihowa umosi ikkino daafira, togo yine hendammora dandiineemmo: ‘Tini Yihowa qixxeessino qixxaawo isi maaro daafira maa rosiissannonke? Tini qixxaawo xaa yannara Yihowa golonke assiꞌra dandiineemmo gara afate kaaꞌlitannonkehu hiittoonniiti?’

6, 7. (a) Mittu manchi hedeweelcho lubbo shiiro geerru maa assannoro xawisi. (Hanafote noo misile lai.) (b) Hedeweelcho mannu lubbo shiino manchi geerraho mare kulasi hayyote yineemmohu mayiraati?

⁶ Mittu manchi hedeweelcho mannu lubbo shiiro, eeggote katamiwa mare “katama eꞌnanni waalchira nooriwa yoo yitanno geerriwa shiqe ikkino coye baala kuꞌla” hasiissannosi. Geerru iso anga fante haadhanno. (Iya. 20:4) Shiima yanna gedensaanni, hakkonne mancho lubbo shii katamira noo geerriwa sonkanni; hakkiinni insa yoo yitanno. (Kiiro 35:24, 25 nabbawi.) Kuni manchi eeggote katama higannohu, geerru isi lubbo shiinohu hedeweelcho ikkinota buuxxu gedensaanni callaati.

⁷ Lubbo shii manchi tenne geerraho kula hasiissannosihu mayiraati? Israeelete songo qullaawa ikkitannonna hedeweelcho mannu lubbo shiino manchi Yihowa maaronni horo afiꞌranno gedeeti. Mittu Qullaawu Maxaafi fullahaanchi hedeweelcho mannu lubbo shiino manchi geerraho mare kula hoogiro mayi ikkara dandaannoro borreessanni togo yiino: “Kuni manchi hatto assa hoogiro shinasira dandiinanni. Maganu qixxeessinosi qixxaawo horoonsiꞌra giwino daafira, mundeete xaꞌmamannohu iso umosiiti.” Hedeweelcho mannu lubbo shiino mancho kaaꞌlate qixxeessinoonni qixxaawo no; isi heeshshotenni heeꞌra hasiꞌriro tenne qixxaawo horoonsira  hasiissannosi. Kuni manchi Yihowa qixxeessinote eeggote katamma giddo mittenniwa mare maaxama hoogiro, isi shiino manchira muli fiixa ikkannohu shiisirono dixaꞌmamanno.

8, 9. Cubbo loosino Kiristaani cimeeyyenniwa shiqe kaaꞌlo xaꞌmira hasiissannonsahu mayiraati?

⁸ Yannankerano mittu Kiristaanchi shota ikkinokki cubbo loosiro, songote cimeeyye kaaꞌlo xaꞌmira hasiissannosi. Mayira? Umihunni, Qaalisi giddo kulloonni garinni songote cimeeyye shota ikkinokki cubbo loosino manchi haja laꞌanno gede assinohu Yihowaati. (Yai. 5:14-16) Layinkihunni, tini qixxaawo cubbo loosino manchi maaro ei gedensaanni wirro Yihowa ledo jaalooma kalaqiꞌranno gedenna cubbu doogo aguranno gede kaaꞌlitannosi. (Gal. 6:1; Ibi. 12:11) Sayikkihunni, cubbo loossu gedensaanni maaro eꞌannore cimeeyye jawachishshannonna quwa saꞌe dadillitannokki gede kaaꞌlitanno gede kulloonninsa. Yihowa cimeeyye ‘wishotenni goꞌlinanniwa’ ikkitinota coyirino. (Isa. 32:1, 2) Tini qixxaawo Yihowa maaranno Magano ikkinota leellishshanno yiniro sumuu diyaatto?

⁹ Batinye Maganu soqqamaano, songote cimeeyyewiinni kaaꞌlo xaꞌmidhe harshammo afidhino. Lawishshaho, Daanieeli yinanni rodii shota ikkinokki cubbo loosi gedensaanni, cimeeyyete shiqe kula waajje lowo agana keeshshino. Isi togo yiino: “Yanna saꞌanni hadhuta xaate cimeeyye assitannoeri dino yee hedoommo. Ikkirono, barrunni mitto barra loosoommo cubbi abbinoe guma mixxaꞌya digatanno yee waajjoommo. Yihowa huucciꞌreemmo wote, balaxe assoommore baala kule iso maaro xaꞌmira hasiissannoeta huwatoommo.” Gedensaanni Daanieeli cimeeyye kaaꞌlitannosi gede xaꞌmirino. Isi hakkawarita qaage togo yiino: “Insa shiqe hasaawisa waajjishinoe. Insara hasaaphummo gedensaanni kayinni duhu aaniꞌyanni dirrinoeha lawinoe. Xa huxuxxi yuummokki Yihowawa shiqa dandeemmo.” Xa Daanieelira keeraanchu tiiꞌꞌi noosi; qoleno isi muli yannara songote soqqamaasincho ikke shoomamino.

10. Hedeweelcho lubbo shiino manchi maaro afiꞌra hasiꞌriro maa assa hasiissannosi?

¹⁰ Hedeweelcho mannu lubbo shiino manchi maaro afiꞌrate assa hasiissannosiri no. Isi  mule noohu eeggote katamiwa xooqa hasiissannosi. (Iyyaasu 20:4 nabbawi.) Kuni manchi noowiinni rahe fula hasiissannosi; gata hasiꞌriro dandaamisi deerrinni eeggote katama haꞌre kakkalaanote biili reya geeshsha hakko heeꞌra hasiissannosi! Hatto ikkiro qole isi agure haꞌra hasiissannosi coyi no. Isi loososinna qaesira noo injo agura hasiissannosi; qoleno kakkalaanote biili reya geeshsha bayichunni bayicho haꞌra didandaanno. a (Kir. 35:25) Ikkirono hatto assasi gaabbissannota diꞌꞌikkitino. Isi eeggote kataminni fule haꞌriro, tini lubbo shaasinni gaabbinokkita leellishshanno; qoleno hatto assiro heeshshosi nafa hoogara dandaanno.

11. Cubbo loosino Kiristaanchi maaro ei gedensaanni Maganu maaro ajishe laꞌꞌannokkita leellisha dandaannohu hiittoonniiti?

¹¹ Yannankerano cubbo loosino manchi maaro ei gedensaanni Maganu maaro afiꞌrate assa hasiissannosiri no. Shota ikkinokki cubbiwiinni xeertiꞌra calla ikkikkinni, togoo cubbiwa qolte massitannote shiimmaadda soꞌrowiinnino xeertiꞌra hasiissannonke. Soqqamaasinchu Phaawuloosi, Qorontoosi heeꞌrannohu maaro eino Kiristaani daafira togo yee ayyaanunni borreessino: “Maganu hedo garinni ikkino dadilli: hiittoo hixamanya, kiꞌnenee keeꞌreensirate hiittoo diinaggaawa, hiittoo hanqo, hiittoo waajja, hiittoo quqquxama, hiittoo laala, hiittoo qoricha mereeroꞌne wori!” (2 Qor. 7:10, 11) Cubbo loosa agurate sharrammeemmoha ikkiro, loonsoommo cubbira gaabbinoommotanna ‘Cubbo loosummoro Yihowa maarannoella’ yine hendeemmokkita leellinsheemmo.

12. Mittu Kiristaanchi Maganu maaro afiꞌrate maa agura hasiissannosi?

¹² Mittu Kiristaanchi Maganu maaro afiꞌrate maa agura hasiissannosi? Lowo geeshsha baxannore ikkirono, cubbunniwa qole massannosire baala agura hasiissannosi. (Mat. 18:8, 9) Mite jaallakki Yihowa dadillisannore assatto gede xixxiibbannoheha ikkiro, insawa aana aguratto? Ago bikkunni aga qarra ikkitinoheha ikkiro, quwa sayisidhe agatto gede assannoheriwiinni xeertiꞌratto? Busha yorto qeelate sharrantanni noottoha ikkiro, giddokki busha hedo kalaqantanno gede assitanno filmewiinni, webisayitewiinni, woy togoo assootiwiinni xeertiꞌratto? Yihowara ammaname heeꞌrate yine agurreemmori baalu digaabbisannonke. Maganu ledo noonke jaalooma huꞌna saꞌino busha dino. Qoleno, isiha ‘hegere baxille’ afiꞌra roorinori dino.—Isa. 54:7, 8.

13. Eeggote katama xooqe eino manchi, beꞌe yiikki hagiirrunni heeꞌra dandaanno yineemmohu mayiraatiro xawisi.

¹³ Eeggote katama eino manchi, hakkiicho salaametenni heeꞌra dandaanno. Yihowa eeggote katamma daafira coyiꞌranni kuri katamma ‘xooqqine gattinanniwa’ ikkitannoꞌne yiino. (Iya. 20:2, 3) Yihowa hedeweelcho mannu lubbo shiino manchi tenne soꞌrora wirro xaꞌmamara dihasiꞌranno; qoleno rabbisiꞌranno manchi eeggote katama eꞌꞌe hakkonne mancho shaara difajjinannisi. Konni daafira, xooqe eeggote katama eino manchi rabbisiꞌnannie yee diwaajjanno. Isi konni katamira heeꞌri geeshsha Yihowa agarooshshe afiꞌre beꞌe yiikki heeꞌra dandaanno. Eeggote katami usuru mine diꞌꞌikkino. Kuni manchi katamu giddo looso loosa, woloota kaaꞌlanna salaametenni Yihowara soqqama dandaanno. Ee, isi hagiirru noo heeshsho heeꞌra dandaanno!

14. Mittu Kiristaanchi maaro ei gedensaanni maa addaxxa dandaanno?

¹⁴ Mite Maganu soqqamaasine shota ikkinokki cubbo loosse maaro eꞌu gedensaannino lowo geeshsha dadillitanno, hattono Yihowa  cubbonsa horo gatona yaannonsakkiha lawannonsa. Aterano hatto lawannoheha ikkiro, Yihowa gatona yiihe gedensaanni, cubbokki woꞌmunni woꞌma agurannota huluullantooti! Aleenni qummi assinihu Daanieeli tenne buuxino. Isi cimeeyye seejjitinosi seejjo macciishshe wirro keeraancho tiia afiꞌri gedensaanni togo yiino: “Hakkunni gedensaanni fooliishsho afiꞌroommo. Kalaqamino qarra tirri gedensaanni, loosoommo cubbira dadilla aguroommo. Maganu cubbonke gatona yiiro, wirro qaaga dihasiꞌranno. Yihowa yiino garinni, soꞌronke haare hoolanno. Hakkunni gedensaanni loonsoommo soꞌronni kainohunni dadilla dihasiissannonke.” Mittu manchi xooqe eeggote katama ei gedensaanni rabbisiꞌnannie yee diwaajjanno. Hatteente gede, Yihowa cubbonke gatona yii gedensaanni, wirro hakko cubbinni kainohunni qorichishannonke yine waajja dihasiissannonke.—Faarso 103:8-12 nabbawi.

15, 16. Yesuusi wodo ikke reyasinna Kakkalaanote Biilonke ikkasi Maganu maaro addaxxineemmo gede kaaꞌlitannonkehu hiittoonniiti?

¹⁵ Israeele Yihowa maaro addaxxitanno gede assannonsahu lowo korkaati noonsa; ninkera isinni hakkiinni saino korkaati noonke. Phaawuloosi Yihowara woꞌmunni woꞌma hajajama dandaannokki daafira qarraataamo ikkinota coyiꞌri gedensaanni “Mootichinke Yesuusi Kiristoosi widoonni Maganoho galatu iillosi!” yiino. (Rom. 7:25) Phaawuloosi cubbo qeelate sharramino, hattono alba soꞌro loosino; ikkirono isi maaro eino daafira Maganu Yesuusi widoonni gatona yiinosita addaxxino. Yesuusi wodo ikkinonke daafira, keeraancho tiianna giddoyidi salaame afiꞌra dandiineemmo. (Ibi. 9:13, 14) Yesuusi Kakkalaanote Biilonke ikkinohura, “isi widoonni Maganunniwa daggannore baala . . . gatisansara dandaanno.” (Ibi. 7:24, 25) Hunda kakkalaanote biili, Israeele Maganu cubbonsa gatona yaannonsata addaxxitanno gede kaaꞌlinonsa; Kakkalaanote Biilonke ikkinohu Yesuusi widoonni isinni “maaronna . . . hasiissannonke yannara kaaꞌlitannonke elto” afiꞌneemmota addaxxa dandiineemmo.—Ibi. 4:15, 16.

¹⁶ Yihowa golonke ikkanno gede, Yesuusita wodote kakkalo ammana hasiissannonke. Wodo mannu ooso baalate shiqqinohu gede assite calla laꞌooti. Hatteentenni wodo ate umikkira shiqqinota ammani. (Gal. 2:20, 21) Cubbikkira maaro afiꞌrattohu wodote widoonni ikkinota ammani. Wodo hegerera heeꞌrate hexxo afiꞌratto gede assitinoheta ammani. Yesuusiti wodote kakkalo Yihowa atera uyinohe eltooti.

17. Yihowa golokki assiꞌroottohu mayiraati?

¹⁷ Eeggote katamma Yihowa maaranno Magano ikkinota leellishshanno. Tini qixxaawo, heeshsho qullaawa ikkitinota leellishshanno; qoleno cimeeyye kaaꞌlitannonke gara, addu maaro hiittooteronna Yihowa maaro addaxxa dandiineemmohu mayiraatiro xawissanno. Yihowa goloꞌne assidhinanni heedhinoonni? Isi geeshsha golo ikkannonkeri woluri horo dino! (Far. 91:1, 2) Aane noo birxichira eeggote katamma taashshotenninna maarotenni Yihowa lawishsha harunsineemmo gede kaaꞌlitannonkehu hiittoonniitiro ronseemmo.