Mararrote yaa, “wolu manchira iillinore wodanchatenna meessaneeto hakko manchi bayicho worre isira macciishshaminosiri macciishshamannonke gede assiꞌrate.” Surrete fayyimma egennaami dokiteri Riiki Hanseni “mararro kalaqamunni afiꞌnoommo dandooti” yee xawisino.

HANNI HEDI: Wolu uullate kalaqamira nookkihu mararrote akati giddonke noohu mayiraati? Qullaawu Maxaafi Maganu manna danisinni kalaqinota kulanno. (Kalaqama 1:26) Maganu daninni kalaqammoommo daafira, mito geeshsha isi akatta leellisha dandiineemmo. Konnira mannu mararrotenni kae woloota kaaꞌlansa, Kalaqaanchinke Maganu Yihowa mararannoha ikkinota leellishshanno.—Lawishsha 14:31.

Maganu mararannonke daafira, qarrammanna laꞌꞌa dibaxanno. Israeele Gibitsete gobbara borojje ikkite qarrante heedhu gedensaanni 40 diro halalla shettino; Qullaawu Maxaafi hatte yannara Maganoho macciishshaminosire kulanni “Qarrinsa yanna baalantera ledonsa qarramino” yaanno. (Isayaasi 63:9) Maganu iillinonsa qarra afe calla diagurino. Insara macciishshaminonsari isirano macciishshaminosi. Isi “Manniꞌya qarrame noo gara laoommo” yiino. (Fulo 3:7) Qoleno Maganu “Kiꞌne kisannohu illeꞌya diikkicho kiisannoho” yiino. (Zakkaariyaasi 2:8) Wolootu miiccannonke woyite, Maganuno lowo geeshsha dadillanno.

Qullaawu Maxaafi, ninkeneeto bushiinsheemmoha ikkironna Maganu mararannonkekkiha lawinkero nafa, “Maganu wodaninkera aliidiho” yee jawaachishannonke. (1 Yohaannisi 3:19, 20) Maganu ninke umonke anfoommohunni roore afinonke. Isi heeꞌnoommo gara, hedonkenna giddonketa afino. Qoleno isi mararannonke.

 Qullaawu Maxaafi sheshifachishannonke

• “Huuccidhiniero, anino huuccattoꞌne macciishsheemmoꞌne. Kaaꞌlo hasidhine raartinanni woyite raareꞌne hidheemmo.”—ISAYAASI 58:9.

• “Kiꞌnera hedoommore ani egennoommo; hedoꞌyano . . . keerunnite ikkinnina bunshennita diꞌꞌikkitino. Hatte yannara woshshidhinannie; anino macciishsheemmoꞌne.”—ERMIYAASI 29:11, 12.

• “Mageeshsha qarramoommoro ati afootto; mageeshshi hindiiddo duꞌnoommoro egennootto. Baalunku coyi maxaafikkirawe borreessame no!”—FAARSO 56:8.

Maganu mararannonketa afanke qarra dandee saꞌꞌate kaaꞌlitannonke? Hanni Mariya lawishsha laꞌno. Ise togo yitino:

“Qaaqqiꞌya lame diro woꞌma kaanserete dhibbinni qarrame 18 dirisinni reyi gedensaanni, heeshsho qarraataamenna taashsho xeꞌinota ikkitinohu gede asse hedoomma. Yihowa qaaqqoꞌya mayira dihursino yee Isira hanqoomma!

“Lewu diri gedensaanni, mitte songote nooti baxillaanchonna shaqqado rodoo Yihowa baxannoeha lawannoekkita kuꞌlanna seekkite macciishshitinoe. Ise mereero eꞌukki haammata saate macciishshitue gedensaanni, ‘Maganu wodaninkera aliidiho’ yitannota 1 Yohaannisi 3:19, 20 noo hedo qummi assitue; kuni qummeeshshi baasa jawaachishinoe. Ise Yihowara iillannonke qarri leellannosita xawissinoe.

“Ikkirono giirama agura qarra ikkitinoe. Hakkiinni ‘Yaaddonna dadillu amadie yannara, sheshifachishshe hagiirsiisoottoe’ yaannoha Faarso 94:19 te noo qummeeshsha nabbawumma. Konne qummeeshsha ane hende borreessinoonniha lawinoe! Yannate gedensaanni Yihowa macciishshannoetanna qarriꞌya leellannosita wodanchoomma daafira isira hasaaphe furgaoomma.”

Maganoho qarrinke leellannositanna mararannonketa afanke lowo geeshsha sheshifachishshannonke! Ikkina qarru batiꞌrinohu mayiraati? Qarru iillannonkehu Maganu cubbinkera qorichishanni noonke daafiraatini? Maganu qarra baala hunanno yanna dagga ikka? Aante noo birxichuwara kuri xaꞌmuwara dawaro afiꞌneemmo.