LUUSIYA GURACHO LEKKA NAAFFINOTE. Kuni ikkinohu anje heedheenna manninatu garunni loosannokki gede assannohu pooliyo yinannihu taraawanno dhibbi amadinose daafiraati. Ise 16 diriti heedheenna loosiissannose mancho “Amakkira hajajama giwootta daafira Maganu naafitte assinoe” yitinose. Hatto yitusenku lowo diro ikkirono, xaano Luusiya hatte yannara mageeshshi geeshsha dadillitinoro qaagganno.

DAMARIISIRA SURRETE KAANSERE NOOSETA KULLISETA annise togo yee xaꞌminose: “Kuni iillinohehu ma assiteennaati? Bushare assootta lawinoe.” Hatto yiiseta Damariisi lowo geeshsha dadillitino.

Lowo diro mannu dhibbu Maganu qorichaati yee hedanni keeshshino. Mittu maxaafi Kiristoosi waro heeꞌrinohu batinyu manni “dhibbu, hakko manchi cubbinni woy fiixisi cubbinni kainohunni daanno qorichaati” yee amanannota xawisino. (Manersi endi Kastemsi ovi Bayibili Laandisi) Qoleno mitte borro xawissino garinni hunda “mitu manni Maganu cubbinsara insa qorichishate taraawanno dhibba abbanno yee ammananno.” (Midivali Medisini endi ze Pileegi) Ikkina 14^ki sanira Awuroppaho lowo miliyoone ikkanno manni taraawanno dhibbinni reyi yannara, Maganu busha manna qorichishanni noonso, mite hikkiminnu xiinxallaano huwattino garinni kuni dhibbi dayinohu baakteeriyunniiti? Mitu manni ‘Maganu manna loosino cubbira qorichishate dhibba horoonsiꞌranno?’ yee hedara dandaanno. a

HANNI HEDI: Qarrunna dhibbu Maganu qoricha ikkoommero, Yesuusi dhiwamino manna hursannoni? Yesuusi hatto assasi, Maganu taashshonna keeraanchimma misha diꞌꞌikkitanno? (Maatewoosi 4:23, 24) Yesuusi Maganu fajjo ledo sumuu yaannokkire horo diassanno. Isi togo yiino: “Woꞌmanka woyite iso [Magano] hagiirsiisannore asseemmo. . . . Anniꞌya hajajinoere baala wonsheemmo.”—Yohaannisi 8:29; 14:31.

Qullaawu Maxaafi Maganu Yihowa ‘loosi guuta’ ikkinota xawise kulanno. (Marro 32:4) Lawishshaho Maganu horophilla gidde nooha mitto mancho qorichishate yee horophillu dano kalaqantanno gede asse lowo kume ikkanno manna horo digudanno! Ammanaminohu Maganu soqqamaanchi Abirihaami Yihowa keeraancho ikkino daafira, “keeraano cubbaataammu ledo hunatto yee dihedeemmo” yiino. (Kalaqama 18:23, 25) Qullaawu Maxaafi, Maganu “horonta busha coye diassanno” yaanno.—Iyyoobi 34:10-12.

Qarrammeemmohu Maganu loonsoommo cubbira qorichishanni noonke daafira diꞌꞌikkino. Yesuusi rosaanosi ledo heeꞌre illiweele ilamino mancho lai woyite coyiꞌrinori tenne leellishanno. “Rosaanosi Yesuusa, ‘Rosiisaancho, kuni manchi illiweele ilaminohu ayi loosino cubbinniiti? Isinso iltinosiri loossino cubbooti?’ yite xaꞌmitu. Yesuusi, ‘Kuni manchi illiweele ilaminohu, isi woy iltinosiri loossino cubbinni diꞌꞌikkino; ikkollana Maganu loosi isi aana leellanno gedeeti.’” yiino.—Yohaannisi 9:1-3.

Hakkawaro mannu hakku manchi illiweelo ikkinohu isi woy annisinna amasi cubbinniiti yee hedanno daafira, Yesuusi rosaano isi hatto yiita dhagge assidhukki digattino. Yesuusi manchu ille fanasi, qarru Maganu qorichaati yee heda soꞌro ikkitinotano  leellishshanno. (Yohaannisi 9:6, 7) Xaa yannara dhibbu waadannonsa manni, konne qarra abbinonsahu Magano ikkinokkita afansa sheshifachishshannonsa.

Qullaawu Maxaafi sheshifachishannonke

• “Maganu bushu coyinni dijifanno; horontanni isi ayeno dijifanno.” (YAIQOOBI 1:13) Dhibbu, xisso, reyonna mannu ooso mitiinsanni keeshshinohu wolu “bushu coyi” baalu muli yanna giddo baꞌꞌanno.

• Yesuusi Kiristoosi “dhiwantinore baala hursino.” (MAATEWOOSI 8:16) Maganu Beetti isiwa dagginore baala hurse, Maganu Mangiste albillitte alame woꞌmate maa assitannoro leellishino.

• “[Maganu] hindiiddo baala illensanni feyanno; albi ikkito saꞌino daafira, reyo woy dadillu woy wiꞌla woy shetto kunni kaꞌa diheedhanno.”—YOHAANNISI AJUUJA 21:3-5.

Ikkina mannu qarramannohunna mitiiꞌmannohu mayiraatiyya? Mannu ooso lowo diro tenne xaꞌmo xaꞌmitanni keeshshitino. Qarra abbinohu Magano ikka hoogina, xaꞌmamannohu ayetiyya? Aananno birxichira tenne xaꞌmora dawaro afiꞌneemmo.