Roozi “Surreꞌya giddo bushare woy qarrisannore hedanni quwa sae yaadeemma” yite coyidhino. Ise kaaꞌlitinoseti Qullaawu Maxaafi qummeeshshuwa hiikkuriiti? Kaaꞌlitinose qummeeshshuwa giddo mitte Maatewoosi 6:34 te; qummeeshshu togo yaanno: “Gaꞌa umisira yaadannona, gaꞌara yaaddinoonte. Mittu mittunku barrira umisi qarri ikkannosi.” Yesuusi coyiꞌrinori, Roozi gaꞌa ikkannori daafira yaada agurtanno gede kaaꞌlinose. Ise ledde togo yitino: “Xa yaachishannoehu lowo coyi heeꞌreenna konni kaꞌa ikkannorira yaadaꞌya gara ikkitinokkita wodanchoomma; qoleno kuni coyi ikka hoogarano dandaanno.”

Yaasmiinino alba quwa saꞌe yaaddannote. Ise togo yitino: “Yaaddote batinyinni hururame wiꞌleemma barri no; mito hashsha isinni goxummakki galeemma. Gara ikkitinokki hedo heeshshoꞌya baasa gawajjitanni noota huwatoomma.” Ikkina ise kaaꞌlinose qummeeshshi hiikkonneeti? Ise 1 Pheexiroosi 5:7 kaaꞌlitinoseta coyidhino; qummeeshshu, “Kiꞌnera malannohu isootina qarrisannoꞌnere baala [Maganu] aana tuqqe” yaanno. Yaasmiini togo yitino: “Hakkunni gedensaanni ganye Yihowa huucciꞌrumma; Isino huuccattoꞌya macciishshinoe. Qotiꞌyanni ayirranno duhi hoꞌlinoeha lawinoe. Mito wote gara ikkitinokki hedo dagganni qarrissannoeha ikkirono, xa kayinni togoo hedo hiitto asse qeela dandeemmaro afoomma.”

Izabeela yinanni beetto togo yitino: “Techo gaꞌa yaate rosichi sirchunni ragiꞌnannire lawannoe; korkaatuno anniꞌya duucha wote mitto coye assate techo gaꞌa yaanno. Boohaarate woy televizhiine laꞌꞌate yee roore loosa hasiissannoere agure haꞌreemma. Togoo rosichi bushaho; korkaatuno loosu batiꞌrannonkenna isilancho looso loonseemmokki gede assanno.” Izabeela 2 Ximootewoosi 2:15 aana noo amaale kaaꞌlitinose; qummeeshshu togo yaanno: “Halaalu qaale taashshite coyiꞌrattoha fokkisiisoottokki loosaasincho ikkite, atenee haaꞌnannihe gedeeha assite Maganoho shiqishate jawaati.” Izabeella togo yitino: “Techo gaꞌa yeemmata ikke looseemma loosinni Yihowa fokkisiisa dihasiꞌreemma.” Ise xa konne rosicho qeeltino.

Kelsii yinannitino togo yitino: “Murroonni yannanni goofa hasiissannosi looso techo gaꞌa yaanni jeefote saate geeshsha gudumakkinni keeshsheemma. Konninni kainohunni wiꞌleemma, goxicho hoogeemma, hattono dadilleemma. Kuni busha rosichooti.” Kelsii Lawishsha 13:16 aana noo hedo kaaꞌlitinose; qummeeshshu togo yaanno: “Egannaamu manchi looso hayyotenni loosanno; gowwu kayinni gowwimmasi leellishanno.” Ise konne qummeeshsha hiincitu gedensaanni togo yitino: “Pirogiraame fushshiꞌranna hakko garinni loosa hayyote. Xa looseemmare pirogiraame fushshiꞌre kurseꞌya aana wodheemma; togo assaꞌya pirogiraamete looseemma gedenna yanna gooffu gedensaanni kachaachameemmakki gede kaaꞌlitinoe.”

Kiristeeni yinanni mancho “Minaanniꞌya shoole qaaqquulleꞌya anga hune mininni fule haꞌrino” yite coyidhino. Ikkina ise kaaꞌlitinoseti Qullaawu Maxaafi amaale hiittenneeti? Lawishsha 17:17 “Jaalu woꞌmanka wote jaalaholla; roduuno qarru barra iillanno” yitanno. Kiristeeni isente gede Yihowara soqqamanno roduuwiwiinni kaaꞌlo xaꞌmidhino. Tini kaaꞌlitinosehu hiittoonniiti? Kiristeeni togo yitino: “Jaallaꞌya duucha doogganni kaaꞌlitinoe. Mitootu addi addi sagalenna awawa waalchiꞌyara abbite wortanno. Sase hige mine soorrirumma wote boodu roduuwi anenna oosoꞌya kaaꞌlinoe. Mittu manchi looso afiꞌreemma gede kaaꞌlinoe. Jaallaꞌya woꞌmanka wote dodde iillitannoe.”

Sai birxichira qummi assinite Soofiyarano callimma macciishshantinose. Ise noosere baala hooggu yanna qaagge togo yitino: “Wolu manni hagiirraame heeshsho heeꞌranna ani kayinni xeertote uurre insa laꞌꞌa aguranna asse afeemmari nookkiha lawannoe. Hatte yannara callimma macciishshantinoe.” “Maganu callattinorira mine aannonsa” yaannohu Faarso 68:6 aana noo qummeeshshi Soofiya baasa kaaꞌlinose. Soofiya togo yitino: “Kuni qummeeshshi kulannohu xaa yannara heeꞌneemmo mine afiꞌrate daafira calla diꞌꞌikkino. Hatteentenni, Maganu ayyaanaamittete mine aannoeta yaano, Iso baxxannori ledo jaalooꞌmanna insawa aana dandeemma gede kaaꞌlannoeta huwatoomma. Ikkollana balaxe Yihowawa shiqa hoogummaro wolootunniwa shiqa dandeemmakkita afoomma. Konnira Faarso 37:4 kaaꞌlitinoe; qummeeshshu ‘Kaaliiqinni tashshi yoohe; isino wodanikki halcho wonshannohe’” yaanno.

Ise ledde togo yitino: “Baalunku coyinni roorse Yihowawa shiqa hasiissannoeta buuxoomma. Isi baalunkunni roore Jaalaati. Yihowa baxxannoriwa aana dandeemma gede insa ledo mitteenni loosa dandeemmare borreesse amaxxoomma. Qoleno roduuwaho noonsahu danchu akati aana illachishanna insa soꞌro lashshi asse saꞌꞌa rosoomma.”

Magano magansidhanno jaallankerano guuntete xeꞌne noonsati egennantinote. Yihowa Farciꞌraasinera wolu manninte gede qarru iillannonsa. Ikkollana Qullaawu Maxaafi dandiineemmoha ikkiro woloota kaaꞌlineemmo gede jawaachishannonke. Qullaawu Maxaafi amaale harunsanno manni ledo jaalooꞌma hayyote. Ikkollana xaa yannara tira dandiinannikki qarri iillankera dandaanno; lawishshaho darga assiꞌrino dhibbi waadannonkeha woy shiiꞌnoommoha ikkara dandaanno; tenne yannara Qullaawu Maxaafi amaale kaaꞌlitannonkehu hiittoonniiti?