MITU MANNI ‘DIKAAꞌLITANNO’ YAANNO. Mittu dokiterichi ‘Qullaawa Maxaafa biddishsha asse horoonsira, 1920 balla attammoonniha kemistirete maxaafa rosiisate horoonsiꞌrate gedeeti’ yee coyiꞌrino. Mittu Qullaawa Maxaafa ayirrisannokki manchi ‘Haaro kompiyutere horoosiꞌnanni gara afate, akkala kompiyuterera fushshinoonni biddishsha horoonsiꞌrattoni?’ yee xaꞌmahera dandaanno. Wole yaattonni mitu manni Qullaawa Maxaafa yanna saꞌinohunna yannankera kaaꞌlannokkihu gede asse hedanno.

Tenne qajeeltinonna mashalaqqe addi addi doogonni afiꞌnanni yannara, hunda borreessinoonni maxaafa biddishsha asse horoonsira hasiissannohu mayiraati? Xaa yannara addi addi amaalenna biddishsha hasiꞌni gede afiꞌnanniti haammata webisayite no. Televizhiinete pirogiraamera mannu surre daafira xiinxallitannori, heeshshotenni heeꞌnanni gara amaaltannorinna addi addi borro qixxeessitannori shiqqanno. Qoleno maxaaffa hirranni mine addi addita lowo miliyoone birra ikkitannota kaaꞌlitanno maxaaffa afiꞌra dandiinanni.

Ikkina baca mashalaqqe afiꞌnannite tenne yannara mitu 2,000 diri albaanni borreessinoonni maxaafa horoonsiꞌra hasiissannohu mayiraati? Qullaawa Maxaafa ayirrissannokkiri konne maxaafa horoonsira yaa, akkalinoha kemistirete maxaafanna akkala kompiyuterera qixxeessinoonni biddishsha horoonsiꞌrate ledo mittete yaansa garahoni? Togo assite heewisiisansa digaraho. Sayinsenna tekinooloje yannate kiiro soorrantanni no; ikkina mannu hasatto soorrantinoyya? Mannu xaano salaametenni hagiirraame heeshsho heeꞌra, maatensa hagiirru noota assiꞌranna dancha jaalla kalaqira hasiꞌranno.

Qullaawu Maxaafi hunda borreessinoonniha ikkirono, aleenni kulli coyibba afiꞌnanni garanna woleno hattoore kulano. Konne maxaafa borreessinoonnihu Maganu ayyaaninniiti. Qullaawu Maxaafi heeshshonkera hasiisanno biddishsha afiꞌneemmo gede kaaꞌlannonke, hattono iillannonke qarra dandiine saꞌneemmo gara kulannonke. (2 Ximootewoosi 3:​16, 17) Qoleno Qullaawu Maxaafi aannonke amaale yanna saꞌinota diꞌikkitino; isinni yannankera baasa kaaꞌlitannote! Qullaawu Maxaafi umisi “Maganu qaali lubbo [“heeshsho,” NW] afiꞌrinoho” yaanno.​—Ibiraawoota 4:​12.

Qullaawu Maxaafi aanno amaale kaaꞌlitannori no? Qullaawu Maxaafi yanna saꞌinohonso, yannankera kaaꞌlitannota kaajja amaale aanno maxaafaati? Tenne Agarooshshu Shae metseetera kuri xaꞌmuwara dawaro afiꞌratto; tini metseete aante aantete fultannote baxxitino ittime giddo umite.