Addinta Kaaꞌlanno Biddishsha
Hanni Qullaawu Maxaafi lowo miliyoone ikkanno manna kaaꞌlinota shoole doogga laꞌno.
1. Adhama
Mannaho, adhamatenna adhama hagiirru noota assiꞌrate daafira noonsa lao addi addite.
QULLAAWU MAXAAFI YAANNORE: “Mittu mittunku galtesi umisi gede asse baxo. Galteno minaannase ayirrisso.”—Efesooni Sokka 5:33.
TIRO: Adhanna adhama Maganu qixxeessino qixxaawooti; hakko daafira isi, minaanninna minaama hagiirraamma ikkanno gede mayi hasiisannonsaro afino. (Maarqoosi 10:6-9) Minaanninna minaama uminsa daafira hedantenni, kuꞌu kuꞌunni daafira roorse hedannoha ikkiro hagiirraamma ikkanno. Minaamasi baxanno minaanni baxannoseta leellishate, towaatannose hattono shaqqille leellishannose. Minaannase ayirrissanno minaama qolte coyidhannorinninna assitannorinni ayirrissannosita leellishshanno.
QULLAAWU MAXAAFI BIDDISHSHI KAAꞌLANNOHO: Veetinaamete heedhannori Kiwaanginna Tii yinanni minaanninna minaama, ‘Adhamanke hagiirru noota horo diꞌꞌikkitanno’ yee hedino. Kiwaangi duucha woyite isera shaqqille dileellishanno. Isi togo yiino: “Alba Tii dadillitakka woy koffi yitakka yee horo dihedeemmo; qoleno duucha woyite afanni heeꞌrenni saalfattanno gede asseemmo.” Konnira Tii adhamansa diigate heddino. Ise togo yitino: “Xaate minaannaꞌya ayirrisa woy addaxxa didandeemma yee hedoomma.”
Gedensoonni Kiwaanginna Tii Qullaawa Maxaafa xiinxallino; hattono Efesooni Sokka 5:33 noo amaale loosu aana hosiisa dandiinanni gara rosino. Kiwaangi togo yiino: “Kuni qummeeshshi shaqqille leellisha, Tii baxeemmoseta affanno gede assa, hattono isera hasiisannosere wonshe towaata hasiissannoeta huwateemmo gede kaaꞌlinoe. Kuri coyibba assummota ise albinni roore baxxinoe hattono ayirrissinoe.” Tiino togo yitino: “Efesooni Sokka 5:33 noo amaale roore loosu aana hosiisummanna minaannaꞌya ayirrisumma kiiro isino albinni roore baxinoe, towaatinoe, hattono keere afiꞌroomma.”
Adhanna adhamate daafira ledde afate, “Maate Seekkannoha 12 Qara Coye” yitannota Baqqi Yiiyye! yinanni metseete Kiiro 2 2018 jw.org aana nabbawi.
2. Wolootu Ledo Noonke Aante
Duucha woyite mannu manna sirchonsa lae, wole gobbaha ikkino daafira, danansa lae, woy ammaꞌnonsanni kainohunni miicanno.
QULLAAWU MAXAAFI YAANNORE: “Manna baala ayirrisse.”—1 Pheexiroosi 2:17.
TIRO: Qullaawu Maxaafi ninke sircho ikkinokki manna, woy wole gobba manna gibbe yee dirosiisanno. Hatteentenni sirchinsa, gobbansa woy dagoomu giddo noonsa bayichi ikkihano ikkiro baalanka manna ayirrisa hasiissannonketa rosiisanno. (Soqqamaasinete Looso 10:34) Wolu manni lao woy assoote banxeemmokkiha ikkiro nafa, insa ayirrisa woy shaqqille leellisha dandiineemmo.—Maatewoosi 7:12.
QULLAAWU MAXAAFI BIDDISHSHI KAAꞌLANNOHO: Daanieelira Iisiyunni daanno manni allaggaho yine rosiinsoonnisi. Konnira isi Iisiyunni dayino manna baala giwannoha ikkino; qoleno insa duucha woyite faajjete xonanno. Daanieeli togo yiino: “Hakkawaro gobbaꞌya kaaꞌlanni noommo yee hedeemmo. Hedoꞌyanna assootiꞌya gara diꞌꞌikkino yee horo hede nafa diegennoommo.”
Daanieeli gedensoonni Qullaawa Maxaafa xiinxallino. Isi togo yiino: “Hedeemmo gara woꞌmunni woꞌma biddi assiꞌra hasiissinoe. Dayino bayichi ikkihano ikkiro, baalanka manna Maganu laꞌꞌanno garinni laꞌꞌa hasiissinoe; isi albaanni baalunku manni taaloho.” Daanieeli xa mannunni xaadanno woyite hiitto ikkannoro coyiꞌranni togo yiino: “Duucha woyite insa mamiinni dagginoro heda nafa dihedeemmo. Xa duuchunku gari manna baxeemmo; hattono alamete aana duuchankawa noo manni ledo muli jaalooma kalaqiꞌroommo.”
Ledde afate, “Manna Mulla Kaꞌne Giwa Agurate Nyaau Xagichi Heeꞌrakka?” (Amaaru Afoo) yaanno birxicho afidhinota Baqqi Yiiyye! yinanni metseete Kiiro 3 2020 jw.org aana nabbawi.
3. Woxe
Batinyu manni hagiirraamma ikkatenna albillitte dancha heeshsho heeꞌrate yee jiro shorranno.
QULLAAWU MAXAAFI YAANNORE: “Egenno woxu gedee caaleeti. Egenno kayinni egennaammu lubbo gargaratenni roortanno.”—Rosiisaancho 7:12.
TIRO: Woxu hasiisannonke; kayinni woxu hagiirraamma ikkineemmo gede woy albillitte teense heeꞌneemmo gede assa didandaanno. (Lawishsha 18:11; 23:4, 5) Hatteentenni, addu hagiirre afiꞌranna albillitte teense heeꞌra dandiinannihu Maganu Qaali giddo noo amaale loosu aana hosiinsirooti.—1 Ximootewoosi 6:17-19.
QULLAAWU MAXAAFI BIDDISHSHI KAAꞌLANNOHO: Indooneezhiyaho heeꞌrannohu Kaardo yinanni manchi jiro duuꞌnate murciꞌrino. Isi togo yiino: “Lowo manni halchanno coyi baalu nooe. Baxummowa haꞌra dandeemmo; lowo waaginni hirranni uduunni, makeennanna minna nooe.” Tini qawaaxxo kayinni digeeddino. Kaardo togo yiino: “Woxeꞌya hanaanqe adhinie; hakko daafira, lowo diro dafe daafure afiꞌroommo woxe illete lipheessi giddo hoogoommo.” Ledeno togo yiino: “Lowo diro jiro shorranni heeꞌroommo; kayinni jeefote mulla anganni gatoommo daafira, hexxo mudhe waagu dinoe yee hedoommo.”
Kaardo Qullaawu Maxaafi woxu daafira kulanno amaale loosu aana hosiisa hanafino. Isi jiro duuꞌnate wolqasi guda agure bikku heeshsho heeꞌra doodhino. Isi togo yiino: “Xa Maganu ledo danchu jaaloomi nooe daafira addu jiro afiꞌroommo. Hashshu kiiro dancha goxicho goxeemmo hattono addu hagiirre afiꞌroommo.”
Qullaawu Maxaafi woxu daafira mayyaannoro ledde afate, Kiiro 3 2021 Agarooshshu Shaera fulinoha “Rosunna Jiro Teense Heeꞌnanni Gede Assitanno?” yaanno birxicho jw.org aana nabbawi.
4. Siimu Xaadooshshe
Mannaho siimu xaadooshshi daafira noonsa lao addi addite.
QULLAAWU MAXAAFI YAANNORE: “Maganu halcho, kiꞌne qullaawoota ikkitinanni gedeetinna horonta foorretewiinni xeertidhinanni gedeeti. Mittu mittunku galteꞌne ledo hiitto ikkitine qullaawanna ayirrado heeshsho heedhinanniro afa hasiissannoꞌne. Magano affinokki daga gede foorrete hamaande heedhoonkeꞌne.”—1 Teselonqe 4:3-5.
TIRO: Qullaawu Maxaafi siimu xaadooshshi hasattonkera dannu heeꞌra hasiissannota kulanno. Soorro, fotaancho ikka (woxeho yine foora), galtenke ikkinokkihu ledo siimu xaadooshshe assa, labbaahu labbaahu ledo woy meyaati meyate ledo adhamanna saadate ledo akkimala foorrete. (1 Qorontoosi 6:9, 10) Siimu xaadooshshi Maganu minaanniranna minaamara calla uyino eltooti.—Lawishsha 5:18, 19.
QULLAAWU MAXAAFI BIDDISHSHI KAAꞌLANNOHO: Awustiraaliyaho heedhannoti Kiyile togo yitino: “Mine assiꞌroommakki yannara, mittu manchi ledo siimu xaadooshshe assummaro hakku manchi albinni roore baxannoehanna towaatannoeha lawinoe. Kayinni coyi ani hedoomma gede diꞌꞌikkino. Dadillaame ikkoomma, halchoomma baxilleno diafiꞌroomma.”
Gedensoonni Kiyile Qullaawu Maxaafi siimu xaadooshshi daafira mayyaannoro rossino hattono rossinore loosu aana hosiissino. Togo yitino: “Maganu biddishsha uyinonkehu xissiisiꞌneemmonna qarrammeemmo gede assannonke coyiwiinni agarankera yee ikkinota xa wodanchoomma. Xa Yihowa hasiꞌrannore asseemma daafira beꞌe diyeemma; qoleno baxannoe minaanni nooe. Qullaawu Maxaafi biddishsha harunsaꞌya lowo qarrinni gatissinoe!”
Tenne daafira ledde afate, jw.org aana fulinoha “Qullaawu Maxaafi Adhammikki Mitteenni Heeꞌrate Daafira Mayyaanno?” yaanno birxicho nabbawi.
Kalaqaanchinke garanna gara ikkinokkire bande anfeemmo gede kaaꞌlannonke. Isi fushshino biddishsha harunsa woꞌma woyite shota ikka hooggurono, tenne assate sharrama kayinni gaabbissannota diꞌꞌikkitino. Hatto assinummoro, woꞌmanka woyite geedote hagiirre afiꞌneemmota addaxxa dandiineemmo.
