ALEKISAANDIRA Wodiidi Ameeriki giddo mitte gobbanni wole gobba hadhara otobisete giddo ofolte heedheenna togo yinanna macca gantinose: “Otobise hadhona, Chayinichu kayinni kowiicho keeshsho!” Ise coye buuxate Otobisetenni dirrite laꞌanno wote, mittu aju Chayinichi Ispeenete Afiinni mommoddanni iillinosi qarra dannu agaaraanchira hasaaphate woꞌnaalanni no. Alekisaandira alba Chayinu Afiinni massangannite Yihowa Farciꞌraasine songo giddo soqqantanno daafira, Chayinichu coyiꞌrannore dannu agaraanchira Ispeenete Afiinni tirte kultusi.

Hakkiinni, Chayinichu mangiste affeenna heeꞌrannotanna woxenna sanade kayinni mulqiꞌnoonnisita kulisi. Umi qara dannu agaraanchi Chayinichu coyiꞌrinore diammanino; isinni Alekisaandira mangiste affukki manna wole gobba haadhe hadhannota labbinosi. Gedensaanni isi Chayinichu kulinosire ammaninoha ikkirono, sanade noosikki daafira woxe baata hasiissannosita kulinosi. Isira woxu noosikki daafira Alekisaandira 20 doolaare liqiissitusi. Tennera Chayinichu lowo geeshsha galatise gedensaanni 20 doolaare aana lede qolannoseta kulise. Alekisaandira tenne assitinohu qallo hasidhe ikkikkinni wole manna kaaꞌla dancha coyeeti yite ammantannohura ikkinota kultusi. Hakkiinni ise Qullaawu Maxaafi aana xintantinota mite borro uyitesi Yihowa Farciꞌraasine ledo Qullaawa Maxaafa xiinxallanno gede koyissusi.

Mannu egenninokki manchira togoo danchumma leellishannota macciishsha lowo geeshsha hagiirsiissanno; ammaꞌninohuno ammaꞌninokkihuno tenne assanno. Ati qarraminoha kaaꞌlatto faro afiꞌroottoro hatto assatto? Yesuusi “Adhannonkunni aannohu baꞌraaꞌrinoho” yiino daafira togo assa danchate. (Soqqamaasinete Looso 20:35) Qoleno, sayinsete fullahaano aa dancha ikkitinota huwattino. Hanni aa kaaꞌlitannohu hiittoonniitiro laꞌno.

Addi addi xagge, woleho aanna hagiirru xaadooshshe afiꞌrinota leellishshanno. Soqqamaasinchu Phaawuloosi “Maganu hagiidhe aannoha baxanno” yee borreessino. Phaawuloosi togo yiinohu qarramino roduuwansa kaaꞌlino Kiristaanire coyiꞌranniiti. (2 Qorontoosi 8:4; 9:7) Phaawuloosi uyitinohu hagiidhitino daafiraati diyiino. Hatteentenni hagiidhitinohu uyitino daafiraati yiino.

Mitte xiinxallo leellishshino garinni aa “hagiirru, mannunniwa aanatenna insa ammanate ledo xaadooshshe afidhinota surrete kifilla kakkayissanno; tini qolte lowo geeshsha hagiidhinanni gede assitanno.” Wole xiinxallono “xiinxallaano woxe uminsara horoonsiꞌrantenni woleho aansa hagiirsiissinonsata” xawissino.

Coyi injaa hooginohe daafira, ee afeemmori dinoe yite hedde egennootto? Noore coyiꞌniro kayinni baalunku manni “hagiidhe aa” dandaanno. Mittu manchi gara ikkitino laonni uyi geeshsha, uyinori ikki geeshshiha ikkirono hagiidha dandaanno. Mitte Yihowa Farciꞌraasincho tenne metseete qixxeessitannorira woxu ledo togo yite sokka borreessite sokkino: “Mangistete  Addaraashera woreemma woxi shiimaho. Ikkollana, Yihowa ani oommahunni roorse uyinoe. . . . Konne aamamooshshe eemma faro fantinoonnie daafira galaxxeemmaꞌne. Tenne assa jawaante ikkitinoe.”

Kayinni woleho aa dandiineemmohu woxe calla diꞌꞌikkino. Aa dandiineemmohu lowo coyi no.

Qullaawu Maxaafi togo yaanno: “Wolootaho shaqqa meessanaa kaaꞌlitanno; mararro hooga kayinni anna umosi gawajjitanno.” (Lawishsha 11:17) Shaqqaddu yannansanna wolqansa woleho uyitanno, hattono wole manna towaattanno. Togo assa duucha doogganni kaaꞌlitannonsa; lawishshaho shaqqillunni aa fayyimmate kaaꞌlitannonsa.

Addi addi xiinxallo manna kaaꞌlitannori rakke dhiwantannokkitanna yaaddannokkita xawissanno. Insa ordu fayyimma afidhanno. Darga assiꞌrino dhibbi lawishshaho, Meltipili iskeleroosisi woy HIV dhibbi amadinonsari nafa woleho uyitannoha ikkiro, beya afidhara dandiitanno. Qoleno, agu araadonni gatate sharrantanni noori woloota kaaꞌlansa yaaddo ajishshannonsatanna araadonsa qeeltannonsakki gede assitannota buunxoonni.

Mannu togoo kaaꞌlo afiꞌrannohu “mararro, shaqqillu, danchummanna wole togoo akatta gara ikkitinokki hedo hooꞌlate kaaꞌlitanno daafiraati.” Mannaho aa yaaddonna mundee huffannota ajishshara dandiitanno. Galtensa shiidhinori mannaho danchare assitanoha ikkiro, dadillinsa ajara dandaanno.

Ee, mannaho mitore assa woy aa lowo geeshsha kaaꞌlitannohe.

Yesuusi harunsaanosira togo yiino: “Maganu [“mannu,” NW] aannoꞌnena, kiꞌneno uuyye. Woleho safartine uyitinanni safaraanchinni safarranniꞌne. Hakkiinni roorsine xiimbenna qanse, woꞌme duꞌnamanna safarre uyinanniꞌne.” (Luqaasi 6:38) Woleho aa insano galattannorenna eltannore ikkitanno gede assitansara dandiitanno. Konni daafira, aa mimmito kaaꞌlinanni gedenna jaaloomu kaajjanno gede assitanno.

Mannu mimmitu ledo noonsa aante daafira xiinxallitannori, meessi horo woleho sayise aa wolu mannino hatto assanno gede assitannota coyidhino. Wole agurina “wolu manni shaqqille leellishinota nabbawa shaqqadda ikkinanni gede assitara dandiitanno.” Konni daafira, mitte xiinxallo leellishshino garinni “mittu manchi assannori batinyu manni isi lawishsha harunsanno gede assara dandaanno; isi lawishsha harunsitannori giddo mitu iso affe woy xaadde egentinokkire ikkitara dandiitanno.” Konnira mittu manchi dancha coye assanno wote wolu mannino iso lae hatto assaranna, tini dagooma woꞌma soorritara dandiitanno. Ati togoo dagoomi mereero heeꞌra dihasiꞌratto? Ee, mannu aannoha ikkansa lowo geeshsha kaaꞌlitanno.

Ameerikaho Filoorida yinanniwa ikkinori tenne leellishanno. Hakko qooxeessiꞌra hambabalatte kaꞌuta mite Yihowa Farciꞌraasine  gawajjo iillitinonsa manna kaaꞌlitino. Insa mitto barra mine gatamarate hasiisanno uduunne abbinansa geeshsha agarte heedhe, hakko qachira heeꞌranno manchihu kinchu huxxi diigaminoha laꞌe biddi assitu. Huxxasi biddi assitusi manchi, gedensaanni Yihowa Farciꞌraasinete qara biirora togo yee sokka borreessino: “Assitinoonnierira lowo geeshsha galateemmoꞌne. Togooha dancha manna horo afe diegennoommo.” Kuni manchi “Yihowa Farciꞌraasine loossannohu danchu loosira” galatate, lowo woxe qara biirora soyino.

Sayinsete xiinxallo leellishshanno garinni “mannu ooso wole manna kaaꞌlate hasatto noonsa.” Xiinxallo ledde qaaqquullu “afoo nafa dadhitukki uminsare woleho aate akati noonsata” xawissino. Mayira? Korkaatuno Qullaawu Maxaafi mannu ‘Maganu daninni’ kalaqaminota xawisanno; togo yaa Maganunnita qara qara akatta leellisha dandaanno yaate.—Kalaqama 1:27.

Kalaqaanchinke Yihowate dhaggete akatta giddo mittu shaqqilleho. Isi heeshshonna hagiirsiissanno coyibba uyinonke. (Soqqamaasinete Looso 14:17; 17:26-28) Qullaawa Maxaafa xiinxalline iimi Anninke daafiranna isi ninkera hedinore afa dandiineemmo. Qoleno Qullaawu Maxaafi Maganu albillitte hagiirsiissanno qixxaawo qixxeessinonketa kulanno. a (1 Yohaannisi 4:9, 10) Yihowa shaqqado Maganooti; ninkeno isi daninni kalaqammoommore ikkinoommo daafira, isi lawishsha harunsine wolu mannira aanke ninkeno wole mannano kaaꞌlitanno, hattono Yihowa hagiirsiissanno.—Ibiraawoota 13:16.

Konni birxichi hanafora kullita Alekisaandira qaagatto? Ise assitinori mayi guma abbino? Otobisete giddo ledose noo manni ise woxese beebbate huꞌnitino yee coyiꞌrino; ikkirono, woxe uyite kaaꞌlitusi Chayinichi otobise uurritanno katamiwa noo jaallasi ledo xaade 20nta doolaare bayichonko qolinose. Qoleno isi Alekisaandira yitinosire macciishshe Qullaawa Maxaafa xiinxalla hanafino. Sasu agani gedensaanni Alekisaandira Peeru gobbara Chayinu Afiinni assinoonnihu jawu gambooshshiwa hakko manchinni xaadde lowo geeshsha hagiidhitino. Manchu Alekisaandira assitinosirira galata qolate isenna ledose gambooshshe hadhinore hoteelesi masse koyisinonsa.

Woleho aanna manna kaaꞌla lowo geeshsha hagiirsiissanno. Togo assitinanniha ikkiro, mannu danchu coyi baalunku Buicho ikkinohu Maganu Yihowa daafira rosanno gede kaaꞌlitinara dandiitinanni; tini qolte roore hagiirsiissannoꞌne! (Yaiqoobi 1:17) Ikkina aatenni afiꞌnanni atoote mixxitinanni heedhinoonni?