Yesuusi masaalino garinni Maganu Mangisteha dancha duduwo uulla woˈmate dudumbanni heeˈnoonni. (Maatewoosi 24:14) Qullaawu Maxaafi giddo Daanieeli maxaafira tini Mangiste Maganu gashshoote ikkitinota kulloonni. Konni maxaafira fooliishsho lamete, hunda Baabiloonetenni kayise yannanke geeshsha aante aantete gashshannohu wolqaataamu mannu gashshooti daafira masaalloonni. Kiiro 44te togo yine kulloonni:

“Maganu horonta diigamannokkihanna wole daga uggitannokki gashshoote uurrisanno. Kuni wole gashshoote baala coˈo asse hunanno. Isi kayinni hegerera kaajje heeˈranno.”

Tininna wole Qullaawu Maxaafi masaalo, Maganu Mangiste mannu gashshoote baala hunte uullate aana heeˈranno mannira keere abbitannota kultanno. Maganu Mangiste hunda mannu ooso hiittoo heeshsho heedhanno? Hanni muli yanna giddo afiˈneemmoha mito dhagge ikkanno atoote laˈno.

• OLU DIHEEˈRANNO

  Faarso 46:9: “[Maganu] Baattote qacce geeshsha nooha ola uurrisanno; digaana hiiqqanno; amaxxo cancananno; wonqono giire hunanno.”

  Hanni yannankera olu uduunne loosate fushshinanni woxenna egenno manna shaannore agurre manna kaaˈlannore loonsoommero alamenke hiittoota ikkitannoro hedi! Maganu Mangiste hunda Yihowa ola huneemmo yee eino qaale wonshanno.

• XIBBU DIHEEˈRANNO

  Isayaasi 33:24: “‘Dhiwamoommo’ yaannoha dianfanni.”

  Hanni wodanu xibbi, kaansere, shekkeere woy wolu xibbi heeˈrannokki yanna hiittoota ikkitannoro hedi. Hospitaalenna xagga dihasiissanno. Albillitte uullate aana heeˈranno manni guuta ordu fayyimma afiˈranno.

• HUDE DIHEEDHANNO

  Yohaannisi Ajuuja 7:16: “Kunni kaˈa dihudidhanno; digoodhanno.”

  Mittu mittunku manchi duuwe itanno, hattono mittuno sagale dihooganno. Qoleno hudenna gatto diheedhanno.

• XISSO, DADILLUNNA REYO DIHEEDHANNO

  Yohaannisi Ajuuja 21:4: “Hindiiddo baala illensanni feyanno; albi ikkito saˈino daafira, reyo woy dadillu woy wiˈla woy shetto kunni kaˈa diheedhanno.”

   Hatto ikkiro, gannate ikkitino uullara guuta ikkine hegerera heeˈneemmo! Konne qaale einohu baxillaanchu Kalaqaanchinke Magano Yihowaati.

Maganu eino qaali baalu woˈmannoha lawannohe? Rooru manni Qullaawu Maxaafi giddo kulloonni gedee heeshsho hagiirsiissannota ikkitinota ammanannoha ikkirono, babbaxxino korkaatinni hegerera heeˈra didandiinanni yee hedanno. Hegerera heeˈre egennino manchi nookki daafira, hatto yee hedansa dhagge diˈˈikkitannonke.

Mannu ooso cubbohonna reyote borojje ikkite, hattono xibbu, qarrunna shetto mitiinsitannansa keeshshitino; konni daafira batinyu mannira togoo heeshsho heeˈrate kalaqammoommoha lawannonsa. Ikkollana Kalaqaanchinke Maganu Yihowa mannu ooso heedhara hedinoti togoo heeshshi diˈˈikkitino.

Maganu eino qaale baala wonshannota huluullammeemmokki gede togo yee buuxisinonke: “Afiiˈyanni fulanno qaalino, hedoommo coyenna, soommo sokka wonshikkinni mulla galagale anewa dihiganno.”—Isayaasi 55:11.

Qullaawu Maxaafi Yihowa ‘kaphannokki Magano’ ikkinota kulanno. (Tiito 1:2) Maganu albillitte lowo atoote abbeemmo yee qaale eino daafira togo yine hendammora dandiineemmo: Mannu ooso Gannate ikkitino uullara hegerera heeˈra dandiitanno? Maganu qaale eino atoote afiˈrate maa assa hasiissannonke? Aante noo birxichuwara kuri xaˈmuwara dawaro afiˈratto.