Yesuusi masaalino garinni Maganu Mangisteha dancha duduwo uulla woꞌmate dudumbanni heeꞌnoonni. (Maatewoosi 24:14) Qullaawu Maxaafi giddo Daanieeli maxaafira tini Mangiste Maganu gashshoote ikkitinota kulloonni. Konni maxaafira fooliishsho lamete, hunda Baabiloonetenni kayise yannanke geeshsha aante aantete gashshannohu wolqaataamu mannu gashshooti daafira masaalloonni. Kiiro 44te togo yine kulloonni:

“Maganu horonta diigamannokkihanna wole daga uggitannokki gashshoote uurrisanno. Kuni wole gashshoote baala coꞌo asse hunanno. Isi kayinni hegerera kaajje heeꞌranno.”

Tininna wole Qullaawu Maxaafi masaalo, Maganu Mangiste mannu gashshoote baala hunte uullate aana heeꞌranno mannira keere abbitannota kultanno. Maganu Mangiste hunda mannu ooso hiittoo heeshsho heedhanno? Hanni muli yanna giddo afiꞌneemmoha mito dhagge ikkanno atoote laꞌno.

• OLU DIHEEꞌRANNO

  Faarso 46:9: “[Maganu] Baattote qacce geeshsha nooha ola uurrisanno; digaana hiiqqanno; amaxxo cancananno; wonqono giire hunanno.”

  Hanni yannankera olu uduunne loosate fushshinanni woxenna egenno manna shaannore agurre manna kaaꞌlannore loonsoommero alamenke hiittoota ikkitannoro hedi! Maganu Mangiste hunda Yihowa ola huneemmo yee eino qaale wonshanno.

• XIBBU DIHEEꞌRANNO

  Isayaasi 33:24: “‘Dhiwamoommo’ yaannoha dianfanni.”

  Hanni wodanu xibbi, kaansere, shekkeere woy wolu xibbi heeꞌrannokki yanna hiittoota ikkitannoro hedi. Hospitaalenna xagga dihasiissanno. Albillitte uullate aana heeꞌranno manni guuta ordu fayyimma afiꞌranno.

• HUDE DIHEEDHANNO

  Yohaannisi Ajuuja 7:16: “Kunni kaꞌa dihudidhanno; digoodhanno.”

  Mittu mittunku manchi duuwe itanno, hattono mittuno sagale dihooganno. Qoleno hudenna gatto diheedhanno.

• XISSO, DADILLUNNA REYO DIHEEDHANNO

  Yohaannisi Ajuuja 21:4: “Hindiiddo baala illensanni feyanno; albi ikkito saꞌino daafira, reyo woy dadillu woy wiꞌla woy shetto kunni kaꞌa diheedhanno.”

   Hatto ikkiro, gannate ikkitino uullara guuta ikkine hegerera heeꞌneemmo! Konne qaale einohu baxillaanchu Kalaqaanchinke Magano Yihowaati.

Maganu eino qaali baalu woꞌmannoha lawannohe? Rooru manni Qullaawu Maxaafi giddo kulloonni gedee heeshsho hagiirsiissannota ikkitinota ammanannoha ikkirono, babbaxxino korkaatinni hegerera heeꞌra didandiinanni yee hedanno. Hegerera heeꞌre egennino manchi nookki daafira, hatto yee hedansa dhagge diꞌꞌikkitannonke.

Mannu ooso cubbohonna reyote borojje ikkite, hattono xibbu, qarrunna shetto mitiinsitannansa keeshshitino; konni daafira batinyu mannira togoo heeshsho heeꞌrate kalaqammoommoha lawannonsa. Ikkollana Kalaqaanchinke Maganu Yihowa mannu ooso heedhara hedinoti togoo heeshshi diꞌꞌikkitino.

Maganu eino qaale baala wonshannota huluullammeemmokki gede togo yee buuxisinonke: “Afiiꞌyanni fulanno qaalino, hedoommo coyenna, soommo sokka wonshikkinni mulla galagale anewa dihiganno.”—Isayaasi 55:11.

Qullaawu Maxaafi Yihowa ‘kaphannokki Magano’ ikkinota kulanno. (Tiito 1:2) Maganu albillitte lowo atoote abbeemmo yee qaale eino daafira togo yine hendammora dandiineemmo: Mannu ooso Gannate ikkitino uullara hegerera heeꞌra dandiitanno? Maganu qaale eino atoote afiꞌrate maa assa hasiissannonke? Aante noo birxichuwara kuri xaꞌmuwara dawaro afiꞌratto.