TINI DHAGGE IKKITANNO HEXXOOTI! Kalaqaanchinke uullate aana hegere heeshsho eemmoꞌne yee qaale einonke. Batinyu manni kayinni tenne diammananno. Insa togo yaanno: ‘Mittu mittunku manchi barrunni mitto barra reyasi digattanno. Mannu ooso kalaqantinohu shiima yanna heedhu gedensaanni reyitaraati.’ Mitootu qolte hegerera heeꞌra dandiinannita ammantannoha ikkirono, uullate aana kayinni hegerera heeꞌra dandiinannikkiha lawannonsa. Insa hegerera heeꞌra dandiinannihu reyine iimira haꞌni gedensaanniiti yitanno. Atera maa lawannohe?

Tenne xaꞌmora dawaro qolattora albaanni hanni Qullaawu Maxaafi aante noote sase xaꞌmuwara qolanno dawaro lai: Mannu ooso kalaqantino gari, mageeshshi diro heeꞌrate kalaqantinota leellishanno? Maganu umo mannu oosoranna uullate hedinori maati? Mannu ooso reyitannore ikkitinohu hiittoonniiti?

Maganu uullate aana kalaqinori baalu giddo mannu ooso addinta baxxitino kalaqamaati. Togo yineemmohu mayiraati? Qullaawu Maxaafi Maganu ‘daninninna suudinni’ kalaqantinori mannu ooso calla ikkitinota kulanno. (Kalaqama 1:26, 27) Hatto yaa, mannu Maganoho noosi akatta lawishshaho baxillenna taashsho leellisha dandaanno yaate.

Qoleno mannu oosora hedatenna wodanchate, bushanna dancha ikkinore bade afate, hattono Maganunnire rosatenna isi jaala ikkate dandoo noonsa. Kalqete alame biinfillenna dhagge ikkannoha Maganu kalaqama, hattono angate ogimma, muuziiqanna kiiro woy gixima banxeemmohu iseraati. Baalunkunni roore, mannu oosora Kalaqaanchonsa magansiꞌrate dandoo noonsa. Kuri dandoo, mannu ooso uullate aana noori wolu baalu kalaqaminni baxxitinore ikkitanno gede assitinonsa.

Hanni hedi: Maganu mannu ooso kalaqinohu shiima diro calla heedhara ikkoommero, kuri akatta heedhannonsa gedenna dandoonsa lexxitanni hadhanno gede assiꞌra dandiitanno gede asse kalaqannonsani? Maganu kuri akattanna dandoo oye kalaqinonkehu, uullate aana hagiidhinanni hegerera heeꞌneemmo gedeeti.

Mitu manni Maganu mannu ooso kalaqinohu uullate aana hegerera heedhara diꞌꞌikkino yaanno. Insa uulla kalaqantinohu iimira haꞌre Maganu ledo hegerera heeꞌra dandaanno manna bandanni bayicho ikkitanno  gedeete yite heddanno. Hatto yee heda uullate aana woꞌmitino bunshera xaꞌmamannohu Maganoho yaate gede diꞌꞌikkitino? Tini hedo Maganu akati ledo sumuu diyitanno. Qullaawu Maxaafi Maganu daafira kulanni togo yaanno: “Doogosi baalanti suwashshote; halaalaanchohonna ammanammo Maganooti.”—Marro 32:4.

Qullaawu Maxaafi Maganu mannu oosora umo hedinore xawisanni togo yaanno: “Gordu Maganunniho; baatto kayinni mannaho uyinote.” (Faarso 115:16) Ee, Maganu uulla biifado asse kalaqinohu qaenke ikkitanno gedeeti; qoleno hagiidhinanni hegerera heeꞌneemmo gede uullate aana hasiisannonkere baala kalaqino.—Kalaqama 2:8, 9.

“Gordu Maganunniho; baatto kayinni mannaho uyinote.”​—Faarso 115:16

Qullaawu Maxaafi, Maganu mannu oosora hedinoreno kulanno. Isi Addaamiranna Heewanira ‘baatto woꞌmannonna gashshanno gede, hattono baattote aana milli yaanno kalaqama baala’ gashshanno gede kulinonsa. (Kalaqama 1:28) Qaensa ikkitino uulla woꞌma Gannate ikkitanno gede assa kaajja qoossooti! Ee, Maganu hedinohu Addaaminna Heewani, hattono sirchinsa iimira haꞌre baraarsha adhanno gede ikkikkinni, uullate aana hegerera heeꞌranno gedeeti.

Ikkina reyineemmohu mayiraatiyya? Qullaawu Maxaafi, yannate gedensaanni finqile Sheexaane Daawuloosi ikkinohu Maganunnite ayyaanu kalaqo giddo mittu, Yihowa Edenete qixxeessino qixxaawo daafate woꞌnaalinota kulanno. Isi hatto assate woꞌnaalinohu hiittoonniiti?

Sheexaanu umi annankenna amanke yaano Addaaminna Heewani sorisiise isi ledo Maganoho finqiltanno gede assino. Sheexaanu, Maganu insara danchare hoꞌlinonsahu yaano insaneetira danchanna busha doodhate qoosso hoꞌlinonsata kulinsata insa Maganoho finqilte Sheexaanu wido ikkitino. Tini mayi guma abbituyya? Maganu balaxe qorowisiisinonsa garinni insa reyitino. Qoleno Gannate ikkitino uullara hegerera heeꞌrate qoosso hooggino.—Kalaqama 2:17; 3:1-6; 5:5.

Addaaminna Heewani finqilansa mannu ooso baala qarrantanno gede assitino. Maganu Qaali togo yaano: “Mittu manchinni [Addaaminni] kainohunni cubbu tenne alame eino; reyo cubbu widoonni higge daggino.” (Roomu Sokka 5:12) Konnira, reyineemmohu umi anninkewiinninna amankewiinni cubbonna reyo ragiꞌnoommo daafiraati ikkinninna, Maganu balaxe mannu ooso reyitanno yee ‘murino’ daafira diꞌꞌikkino.

Addaaminna Heewani finqilansa Maganu mannu oosoranna uullate hedinori soorramanno gede diassitino. Maganu baxillaanchonna taashsho baxannoha ikkino daafira, cubbunna reyote borojjimmanni wolaphineemmo qixxaawo qixxeessinonke. Soqqamaasinchu Phaawuloosi togo yiino: “Cubbu laalchi reyote; Maganuwiinni afiꞌnanni baꞌraaꞌri kayinni, Mootichinke Kiristoosi Yesuusi widoonni hegere heeshshooti.” (Roomu Sokka 6:23) “Baattote aana noo manna baala baxino daafira, iso ammaꞌninohu baalu hegere heeshsho afiꞌranno gede ikkinnina baꞌꞌannokki gede, Maganu mitto Beettosi uyino.” (Yohaannisi 3:16) Yesuusi heeshshosi wodote kakkalo asse oye, Addaami huninore baala qolino. a

Muli yanna giddo, Maganu uulla gannate asseemmo yee eino qaale wonshanno. Konne dhagge ikkanno atoote afiꞌrate Yesuusi togo yee hajajinore assa hasiissannohe: “Ruukkashsho waalcho higgine eꞌe! Baote widira massanno waalchi halaꞌladoho. Doogono halaꞌladote; hakkaanni higge eꞌannorino batinyeho. Heeshshote widira massanno waalchi ruukkashshoho; doogono gurchote; ise afiꞌranno manni kiiro shiimaho.” (Maatewoosi 7:13, 14) Ee, lamente giddo mitte doodha dandaatto. Ikkina ati maa doodhatto?