Heeshshokki Waaga Afidhinota Huluullantooti!
SAꞌU birxichuwara laꞌnummonte gede, iillannonkehu buutote qarri, heeshsho waagu nookkita labbannonke gede assara dandaanno. Qarru batiꞌrannohe woyite, heeshshokki waaga afidhinokkihanna ate daafira hedannohu nookkiha lawahera dandaanno. Ikkirono Maganoho qarrikki leellannosita huluullantooti. Korkaatuno isi ate lowo geeshsha baxannohe.
Faarso 86te borreessaanchi, “Huucciꞌreemmore wonshattoe daafira, qarrameemmo barra ate woshshiꞌreemmo” yee Magano addaxxannota coyiꞌrino. (Faarso 86:7) Ikkollana, ‘Maganu “qarrameemmo barra” huuccattoꞌyara dawaro qolannohu hiittoonniiti?’ yite hedattoha ikkara dandaanno.
Maganu qarrakki bayichonko hoolannoha ikka hoogirono, qarrakki dandaatto gede kaaꞌlannoheha giddiidi keere aannohe; Qaalisi Qullaawu Maxaafi tenne kulanni togo yaanno: “Baalunku coyira galaxxitinanninna huuccidhinanni hasidhinoonni coye Maganoho kuꞌle ikkinnina, mittu coyirano yaaddinoonte. Mannu hedora aleenni ikkinohu Maganu keeri, Kiristoosi Yesuusinni wodanaꞌnenna hedoꞌne agaranno.” (Filiphisiyusi Sokka 4:6, 7) Hanni aante nooti Qullaawu Maxaafi qummeeshshuwa Maganu ninke daafira hedannota leellishshanno gara hedi.
Maganu Ate Daafira Addinta Hedanno
“Maganu . . . mitticho [gurraicho] nafa dihawanno. . . . Kiꞌne lowo gurraenni roortinanni.”—Luqaasi 12:6, 7.
HANNI HEDI: Maganu gurraenna wole shiimmaadda cea nafa dihawanno. Isi mitte gurraicho nafa ille wore laꞌꞌanno; korkaatuno mitte mittenti ceicho isi albaanni muxxe kalaqamaati. Mannu ooso Maganu albaanni gurraetenni lowo geeshsha roorino waaga afidhino. Uullate aana noohu Maganu kalaqami giddo mannu ooso baxxitinoreeti; korkaatuno mannu Maganu ‘daninni’ kalaqamino daafira, Maganunnita dhagge ikkitanno akatta lossiꞌranna leellisha dandaanno.—Kalaqama 1:26, 27.
“Kaaliiqaꞌya fonqolte laoottoe. Ati . . . hedoꞌya baala xeertote heedhe afootto. . . . Jiffe laie; hedoꞌyano afi.”—Faarso 139:1, 2, 23.
HANNI HEDI: Maganu ate bade egenninohe. Isi wodanikkira noota dahaabbino hedonna yaaddokki baala afino. Qarrikkinna yaaddokki wolootaho leella hoogguro nafa, Maganu ate daafira hedanno; qoleno kaaꞌlahera hasiꞌranno. Konni daafira heeshshokki waaga afidhinote yaate.
Maganu Irkisannohe Hattono Massagannohe
“Kaaliiqa ballo, huuccattoꞌya macciishshie! . . . Maccakki ane widira qolte, woshshiꞌreemmohe woyite rakke dawarie. . . . [Isi] hawaminohunnita mannisi kuꞌlo macciishshanno.”—Faarso 102:1, 2, 17.
HANNI HEDI: Mannu ooso qarru heeshsho heeꞌra hanaffu yannanni kayise, Yihowa mittu mittunku manchi hindiiddo laino. (Faarso 56:8) Isi ate hindiiddono laino. Maganu albaanni muxxe ikkootto daafira, isi iillannohe qarranna hindiiddokki baala qaaganno.
“Ani ledokki noommona waajjitooti; . . . ani jawaachisheemmohe, kaaꞌleemmohe; . . . ‘Kaaꞌleemmohena waajjitooti’ yeemmohehu, Maganikki ani Kaaliiqaati.”—Isayaasi 41:10, 13.
HANNI HEDI: Maganu ate kaaꞌlate qixxaawinoho. Qoleno uwittoro kayisannohe.
Maganu Dancha Yanna Abbara Hexxo Uyino
“Maganu baattote aana noo manna baala baxino daafira, iso ammaꞌninohu baalu hegere heeshsho afiꞌranno gede ikkinnina baꞌꞌannokki gede, Maganu mitto Beettosi uyino.”—Yohaannisi 3:16.
HANNI HEDI: Maganu albaanni muxxe ikkootto daafira, isi Beettisi Yesuusi atera kakkalo ikke reyanno gede assino. Tini kakkalo hegerera hagiirru noo heeshsho heeꞌratto faro fantinohe. a
Buutote qarri iilleennahe heeshshokki waagu nookkita labbuherono, ballo Maganu Qaale seekkite xiinxallatenna Maganu uyinohe hexxora noohe ammana kaajjishiꞌrate sharrami. Hatto assittoro, hagiirraamo ikkatto, hattono heeshshokki waaga afidhinota huwatatto.
a Yesuusiti wodote kakkalo kaaꞌlitannohe gara ledde afate, www.pr418.com/sid aana noota Yesuusi Reyo Qaagi yitanno viidiyo lai. Tini viidiyo NINKE DAAFIRA > QAAGOOSHSHU AYYAANA yaannohu hunda no.
Kurino Lai
NINKE DAAFIRA
Qullaawa Maxaafa Xiinxalla Hasiissannohu Mayiraati?
Alamete aana lowo miliyoone ikkanno manni huluullitannonsa xaꞌmora Qullaawu Maxaafinni dawaro afiꞌranni no. Atino xaꞌmokkira dawaro afiꞌra hasiꞌratto?
AGAROOSHSHU SHAE
Huuccatto Kaaꞌlitannohe Gara
Ganyite huuccatto assiꞌrattoha ikkiro, mayi atoote afiꞌrattora dandaatto?
AGAROOSHSHU SHAE
Maganu Ninke Daafira Hedannota Afanke Kaaꞌlitannonke Gara
Qullaawu Maxaafi Maganu eino qaale wonshannota addaxxineemmo gede kaaꞌlannonke.
AGAROOSHSHU SHAE
Maganu Uyinonke Elto Muxxete Yineemmohu Mayiraati?
Mittore ellihero hakkoricho naadatto gede assannoheri maati? Tenne afanke Maganu uyinonketa muxxe elto yaano wodo albinni roore naandeemmo gede assitannonke.
