Muli yannara, Maganunnihu gordu gashshooti mannu ooso baala gashshanno woyite, baatto mannu baalunku sumuu yee hagiidhanni heeˈranno bayicho ikkitanno; qoleno mannu hakkawoyite danchanna hagiirsiisanno looso loosanno. Maganu uulla woˈma gashshanno gede Yesuusi Kiristoosi shoomino. Xaa yannara batinye gashshaano manninsa daafira diheddanno; Yesuusi kayinni gashshino mannira woyyannore assanno. Isi baxillunni gashshanno; qoleno isi shaqqadoho, maarannohonna taashshanno Mooteeti.—Isayaasi 11:4.

Baattote aana heeˈrannohu haaru dagoomi sirchunninna gaˈretenni dibebbeehamanno. Mannu sirchi baalunku mitto manna ikkanno. (Yohaannisi Ajuuja 7:9, 10) Baattote aana heeˈranno manni baalunku Maganonna manna baxannoha ikkanno; qoleno mannu baalunku Maganu hunda hedino garinni qaensa ikkitino baatto towaatate mitteenni sumuu yee loosanno.—Faarso 115:16.

Maganu Mangiste baatto gashshitanno woyite, Kalaqaanchu kalaqamu dano heedhannokki gede assanno. (Faarso 24:1, 2) Yesuusi uullate aana noo waro, waajjishshanno hombobalatte sammi yitanno gede asse Maganu uyinosi wolqanni maa assa dandaannoro leellishino. (Maarqoosi 4:39, 41) Kiristoosi gashshooti yannara, mittu manchino kalaqamu dano gawajjitannoe yee diyaadanno. Qoleno Maganu Mangiste gashshitanno woyite, mannunna saada sumuu yite heedhanno; hattono mannu qooxeessa didaafanno.—Hoosei 2:18.

Mannu baalunku guuta ordu fayyimma afiˈranno. Dhiwamoommo yaannohu, geedhannohunna reyannohu diheeˈranno. (Isayaasi 35:5, 6) Mannu umi minaanninna minaama Edeni Gannatete heeˈri qooxeessi gedeewa baxisannonna biifino qarqarira heeˈranno. Haaro alamera, baatto Edenete gede lowo sagale fushshitanno; hakko daafira, uullate aana heeˈranno manni baalunku sagale duuwanno. (Kalaqama 2:9) Hundite Maganu daga Israeelete gede, Gannatete heeˈranno manni baalunku ‘sagale duuwa geeshsha itanno.’—Leewaawoota 26:4, 5.

Maganu Mangiste uulla woˈma gashshitanno woyite, mannu baalunku keere heeˈranno; qoleno kuˈu kuˈuyira danchare assanno ikkinnina gawajjannore diassanno. Olu diheeˈranno, hattono silxaanesi doogimale horoonsiˈrannohu diheeˈranno; qoleno heeshshote hasiisannore afiˈrate yee daafurannohu diheeˈranno. Qullaawu Maxaafi togo yee hexxo aanno: “Mannu annu annunkunni kaasiˈrino balasenna woyinete caali hunda, harshammi yite fooliishshidhanno; masisannonsari diheeˈranno.”—Mikiyaasi 4:3, 4.

Mitte mittente maatera uminsa mini heeˈrannonsa; hattono qaenkenni fushshine shorrinanninke yee diyaadanno. Qoleno hatte yannara loonseemmo loosi baalunku guma afiˈrinoho. Qullaawu Maxaafi kulannonte gede, Maganu abbannote haaro alamera heedhannorira “assidhannori baalu qinaannonsa.”—Isayaasi 65:21-23.

Qullaawu Maxaafi, “Kaaliiqa egennino mannino baatto woˈmanno” yaanno. (Isayaasi 11:9) Maganu Mangiste giddo heeˈranno manni, gawalo nookkite Kalaqaanchinsa Yihowa hayyonni rosanno; qoleno isi kalaqinohu dhagge ikkanno kalaqami daafira rosanno. Insa egennonsanni olu uduunne diseekkitanno woy manna digawajjitanno. (Isayaasi 2:4) Hatteentenni, mimmitu ledo sumuu yite heedhanno garanna baatto towaata dandiitanno gara rossanno.—Faarso 37:11.

Maganu barru baala tashshi yaannanke heeˈnammora hasiˈrino daafira, baatto kalaqi woyite baalankare haja asse seekke kalaqino. Isi mannu ooso baattote aana hegerera heedhara hedino. (Faarso 37:29; Isayaasi 45:18) Maganu tenne hedosi wonshate, “reyo coˈo asse hunanno.” (Isayaasi 25:8) Qullaawu Maxaafi “Reyo woy dadillu woy wiˈla woy shetto kunni kaˈa diheedhanno” yaanno. (Yohaannisi Ajuuja 21:4) Maganu mannu baalunkura yaano tenne busha alame hunanno woyite gatise sayisanno mannirano ikko haaro alamera reyotenni kaˈˈannohura kiirre tunqannikki mannira hegerera heeˈranno faro fanannonsa.—Yohaannisi 5:28, 29; Soqqamaasinete Looso 24:15.

 Xa nafa lowo miliyoone ikkanno manni, daggara kaˈe noote Maganu Mangiste giddo heeˈrate qixxaawanni no. Insa guuta ikka hooggurono, Maganu haaro alamera heeˈrara hasiˈranno manni gedeere ikkate sharrantanni no. Hiittoonni? Maganu Yihowarenna isi soyinohu Yesuusi Kiristoosi daafira rosatenniiti.—Yohaannisi 17:3.

Tenne alame goofimarcho gatte saˈe muli yannara daggannote haaro alamera heeˈra dandaatto gara ledde rosi. Mittu Yihowa Farciˈraasinchi Hegerera Hagiidhitanni Heeˈra Dandaatto! yaanno maxaafinni Qullaawa Maxaafa woxe baaxxittokki xiinxallisannohe gede kuˈli.