MANNU SIRCHI

Qullaawu Maxaafi yaannore: Maganu baatto “kalaqinosehu fano heedhara ikkikkinni, mannu heeꞌranno gedeeti.”—ISAYAASI 45:18.

BAATTO

Qullaawu Maxaafi yaannore: “Ilama saꞌeenna ilama riqiwantanno; kalqe [“baatto,” NW] kayinni noowa heedhanno.”—ROSIISAANCHO 1:4.

HATTO YAA MAYYAATE? Qullaawu Maxaafi kulanno garinni, baatto horonta dibaꞌanno; hattono mannu oosora qae ikkite heedhanno. Ikkina alamete goofimarcho yaa mayyaateyya?

HANNI TENNE HEDI: Qullaawu Maxaafi tenne alame goofimarcho Nohi waro ikkinori ledo heewisiisanno. Nohi waro baatto ‘barshu woꞌminota’ ikkitino. (Kalaqama 6:13) Ikkirono, Nohi keeraancho manchooti. Hakko daafira Maganu Nohinna maatesi gatise, busha manna kayinni wayinni gudino. Qullaawu Maxaafi hakkawaro ikkinore kulanni, “Hatte yannara noo alame wayinni egemmante baꞌino” yaanno. (2 Pheexiroosi 3:6, NW) Addanko, hakku hatte yannara noo alame goofimarchooti. Ikkina hakkawaro bainori maati? Baattote aana noohu bushu mannilla baino ikkinnina baatto dibaꞌino. Hakko daafira, Qullaawu Maxaafi alamete goofimarcho yaannohu baatto baꞌannota kulate diꞌꞌikkino. Hatteentenni uullate aana noohu bushu manninna bushu coyi baꞌꞌannota kulateeti.

QARRUNNA BUNSHE

Qullaawu Maxaafi yaannore: “Bushuullu shiima yannalla keeshshitanno; dargaho laꞌe hoogatto. Shaqqaddu kayinni baatto ragidhanno; atootenna keere afidhe hagiidhitanno.”—FAARSO 37:10, 11.

HATTO YAA MAYYAATE? Nohi waro dayihu Baote Wayi bunshe hegerera dihunino. Baote Wayi gedensaanni, bushu manni mannu heeshsho wirro qarraataame assino. Muli yannara kayinni, Maganu bunshe baala hunanno. Faarsaasinchu yiinonte gede, “Bushuullu shiima yannalla keeshshitanno.” Maganu Mangistesi widoonni bunshe baala hunanno; Maganu Mangiste owaata mannu ooso gashshannoho iimi gashshooteeti.

HANNI TENNE HEDI: Xaa yannara uulla gashshite noori Maganu Mangistera halanta ikka? Qullaawu Maxaafi halantannokkita kulanno. Insa beebba Maganu Mangistera finqiltanno. (Yohaannisi Ajuuja 19:19) Hakkiinni mayi ikkannoyya? Maganu Gashshooti mannu gashshoote baalanka hune, “isi kayinni hegerera kaajje heeꞌranno.” (Daanieeli 2:44) Kayinni mannu gashshooti baꞌꞌa hasiissannosihu mayiraati?

Qullaawu Maxaafi yaannore: “Haꞌrinshosino mannu umisi qineessiꞌre [didandaanno].”—ERMIYAASI 10:23.

HATTO YAA MAYYAATE? Mannu kalaqaminohu uminsa umonsa gashshara diꞌꞌikkino. Hakko daafira, mannu manna gashshe diafanno hattono qarransa uminsa tidha didandaanno.

HANNI TENNE HEDI: Biritaanika Akaademik yinanni maxaafi, mangistubba “buxima, hude, dhibba, kalaqamu dano, hattono olanna wole finqille hoola” dandiitinokkita xawisino. Hakkiinni lede togo yaanno: “Mitootu . . . togoo qarra tira dandaannohu alame woꞌma gashshannoho mitto gashshooteeti yitanno.” Ikkollana, mannu gashshooti gudisame sumuu yee mitto ikkiro nafa, xaano alame gashshannohu guuta ikkinokki mannaantilla; hakko daafira aleenni kulli qarra tira didandaanno. Alame woꞌmate noo qarra hegerera huna dandiitannoti Maganu Mangiste callate.

Konni daafira, Qullaawu Maxaafi kulanno garinni, tenne busha alame goofimarcho danchu manni waajja dihasiissannonsa. Hatteentenni, hattee yanna quqquxamme agadhineemmo; mayira yiniro, hakkawoyite tini anganni fultinoti akkala alame baꞌeenna, Maganu abbannoti kaajja haaro alame dagganno!

Kuni baalu ikkannohu kayi mamarooti? Aananno birxichira Qullaawu Maxaafi tenne xaꞌmora qolanno dawaro laꞌneemmo.