Maganu Addaami togo yiino: “Tenne haqqicho laalo itootto barra, halaalinta reyatto.” (Kalaqama 2:17) Addaami geedhannohanna reyannoha ikkoommero, Maganu hatto yee dihajajannosi. Addaami tenne haqqicholla ita hoogiro reyannokkita afino.

Edenete kaashshu basera guma laaltannoti lowo haqqe noo daafira, Addaaminna Heewani Maganu ittinoonte yiinonsa haqqicho laalo itinohu itannore hoogge diˈˈikkino. (Kalaqama 2:9) Kuri minaanninna minaama tenne haqqicho laalo itansa, heeshsho uyinonsa Maganira hajajantannokkita leellishshanno. Qoleno insa tenne laalo ita hooggoommero, Maganu massagansara hasidhannota leellishshanno.

Addaaminna Heewani reyinohu mayiraatiro huwatate, Sheexaanunna Heewani hasaabbino hasaawa heda hasiissannonke. Sheexaanu hamashshu widoonni gawajjanno kapho coyiˈrino. Qullaawu Maxaafi togo yaanno: “Hamashshu Maganu kalaqino moyichi baalunkunni roore xagaraamoho; hamashshu manchote, ‘Halaalintanni Maganu Edeni Gannatete noo haqqe baalante laalo ittinannikki gede hoolinoˈneni?’ yee xaˈmise.”—Kalaqama 3:1.

Heewani togo yite qoltino: “Edeni Gennetete noo haqqe laalo ita dandiineemmo; ikkollana Maganu, ‘Edeni Gennetete giddo noo haqqicho laalo ittinoonte; kissinoonte; gibbine kissiniro kayinni reyitinanni’ yiinonke.” Hamashshu qole Heewanira togo yiino: “Reyo nafa direyitinanni; Maganu hatto yiinohu, hattenne haqqicho laalo ittinanni barra illeˈne faˈnitannotanna isi gede danchanna busha baddine affinannire ikkitinannita afinohuraati.” Konni garinni Sheexaanu, Yihowa kaphaancho ikkinohunna Isi Addaamiranna Heewanira dancha coye hoˈlinohu gede asse coyiˈrino.—Kalaqama 3:2-5.

Heewaani Sheexaanu kulinose kapho ammantino. Ise haqqicho seekkite laˈu yannara laalo itate halchishshannotenna illete biiffinote! Hakkiinni haadhe ittu. Qullaawu Maxaafi hakkunni gedensaanni ikkinore kulanni, “Ayiddaanniserano uyitusi; isino iti” yaanno.—Kalaqama 3:6.

Baxanno oososi affanni heedhenni hajajosi diiggu yannara, Maganu mageeshshi geeshsha dadillinoro hanni hedi! Ikkina isi maa assiyya? Yihowa Addaamira togo yiino: “Ati bushshahona, galagalte bushsha higatto.” (Kalaqama 3:17-19)  Konnira Addaami “930 diro ikkisita reyi.” (Kalaqama 5:5) Addaami reyi gedensaanni iimira woy wole ayyaanaame alame dihaˈrino. Addaami Maganu bushshunni kalaqasira albaanni mittowano diheeˈrino. Hakko daafira, reyi gedensaannino bushshu gede heeshsho noosikkiha ikkino. Tini lowo geeshsha dadillissannote!

Addaaminna Heewani affanni heedhenni Maganu hajajo diiggino daafira guuntensanna hegerera heeˈrate hexxonsa huˈnitino. Cubbo loosansa manninatensa gawajjitino; hattono guunte noonsakkirenna cubbaataamma ikkitanno gede assitino. Qoleno loossino cubbi gawajjinohu insa calla diˈˈikkino. Insa sirchinsa baalaho cubbo ragisiissino. Roomu Sokka 5:12 togo yitanno: “Mittu manchinni kainohunni cubbu tenne alame eino; reyo cubbu widoonni higge daggino. Mannu baalu cubbo loosino daafira, reyo manna baala amaddino.”

Qullaawu Maxaafi cubbonna reyo lawishshunni xawisanni, ‘gosa baala guggushshe amadino gomicho’ yaanno. (Isayaasi 25:7) Hatto yaa mannu ooso cubbonna reyo goˈlite gata didandiitanno yaate. Addanko, “Addaaminni kainohunni mannu baalu reyanno.” (1 Qorontoosi 15:22) Ninkeno Phaawuloosi yee xaˈmihu gede yinammora dandiineemmo; isi “Tenne reyote massitannoe mannimmawiinni ayi gatisannoe?” yiino.—Roomu Sokka 7:24.