Maganu Kalaqinonkehu Hegerera Heeˈnammoraati
HAGIIDHANNI hegerera heeˈra giwannohu nooni? Fayyo ikkine hagiirrunni hegerera heeˈra dandiinanniha ikkoommero, heeshsho hiittoota ikkitannoro hanni hedi. Hatto ikkiro, maatenkenna jaallanke ledo boohaarate, alame woˈma doyate, haaro coye rosatenna lowo egenno afiˈrate yanna heedhannonke.
Togoo hasatto haaqete halchootini? Deeˈni! Qullaawu Maxaafi Maganu giddonke togoo hasatto heedhanno gede asse kalaqinonketa kulano. (Rosiisaancho 3:11) Qoleno Qullaawu Maxaafi “Maganu baxilleho” yaanno. (1 Yohaannisi 4:8) Ikkina baxillaanchu Magani giddonke hegerera heeˈrate hasatto wore kalaqe, tini haaqete halcho calla ikkite gattanno gede assannoha lawannohe?
Reya hasiˈranno manchi nookkiti egennantinote. Isinni Qullaawu Maxaafi reyo “diinanke” ikkitinota kulanno. (1 Qorontoosi 15:26) Mitootu anjensanni reyitanno; wolootu kayinni jawooˈmite reyitanno. Ikkihano ikkiro, reyo daase digattanno. Mitu manni reyote daafira heda nafa dihasiˈranno; hattono reyo waajjishshannonsa. Ikkina kuni diininke baˈˈanno yanna dagga ikka?
HEXXO NOONKETA LEELLISHSHANNO TAJE
Maganu hedo mannu reyanno gede ikkitinokkita afootto? Kalaqamu maxaafi, Maganu hedo mannu ooso hegerera heedhanno gede ikkinota leellishshanno taje kulanno. Maganu Yihowa uulla kalaqinohu, mannu oosora injiitino qae asseeti. Hakkiinni umi mancho Addaami kalaqe Edeni Gannatete worino. Hakkunni gedensaanni “Maganu kalaqinoha baala lai; lowo geeshsha dancha ikkinota lai.”—Kalaqama 1:26, 31.
Maganu daninni kalaqaminohu Addaami guuta manchooti. (Marro 32:4) Addaami minaama Heewanino kullannire afidhinota diˈˈikkitino; ise guuta mannimmanna guuta surre noosete. Yihowa insara togo yiino: “Ille ilamme, sirchiˈne baatto woˈmo; baattono kiˈne gashshitinannita ikkito; baaru giddo heeˈranno qulxuˈmira, gordoho buubbanno cearanna baattote aana milli yaanno kalaqami lubbo afiˈrinohu baalu aana roorre afidhe.”—Kalaqama 1:28.
Addaaminna Heewani sirchi uulla woˈmanno gede lowo diri hasiisannoti egennantinote. Heewani ooso iltanno; oososeno ooso iltanno; hatto ikkiro, Maganu hedino garinni mannu ooso uulla woˈmitanno. (Isayaasi 45:18) Ikkina Maganu Addaaminna Heewani kalaqinohu oosonsanna oosonsa ooso calla laˈe reyitara ikkoommero togoo hexxo aannonsani?
Qoleno, Maganu Addaaminna Heewani saada gashshitanno gede hajajinonsa. Maganu, Addaami saadate suˈma fushshanno gede kulinosi; togo assate lowo yanna hasiissanno. (Kalaqama 2:19) Addaami tenne saada gashshate insa daafira afanna towaatannonsa gara rosa hasiissannosi. Saadate suˈma fushshatenni roore lowo yanna hasiissannohu insa daafira rosateeti.
Maganu Addaaminna Heewani uulla woˈmannonna saada gashshanno gede hajajasi, insa kalaqinohu seeda diro heedhara hede ikkinota leellishshanno. Qoleno Addaami seeda diro heeˈrino.
MAGANU HEDINOHU MANNU UULLATE AANA HEGERERA HEEˈRARAATI
LOWO DIRO HEEDHINO
Addaami, 930 diro
Maatusaala, 969 diro
Nohi, 950 diro
Xa yannara, 70-80 diro
Qullaawu Maxaafi mannu ooso lowo diro heedhino yanna noota kulanno. Maganu Qaali, “[Addaami] 930 diro ikkisita reyi” yaanno. Hakkiinni 900 saˈˈanno diro heeˈrinoha wole lee manna kulanno. Insano, Seeti, Heenoosi, Qayinaani, Yaareedi, Maatusaalanna Nohiiti. Insa baalunku heedhinohu Nohi waro Baote Wayi dirrara albaanniiti; Baote Wayi daara albaanni Nohi 600 diro heeˈrino. (Kalaqama 5:5-27; 7:6; 9:29) Insa seeda diro heeˈra dandiitinohu hiittoonniiti?
Kuni manni heeˈrinohu, Addaaminna Heewani guuta ikke heeˈri ballaati. Seeda diro heedhanno gede assinonsahu qaru coyi konne ikkikki digatino. Ikkollana guuta ikkanna seeda diro heeˈra mayi xaadooshshe afidhino? Reyo baˈannohu hiittoonniiti? Kuri xaˈmuwara dawaro afiˈrate, balanxe geedhineemmohunna reyineemmohu mayiraatiro laˈno.