Togoo hasatto haaqete halchootini? Deeꞌni! Qullaawu Maxaafi Maganu giddonke togoo hasatto heedhanno gede asse kalaqinonketa kulano. (Rosiisaancho 3:11) Qoleno Qullaawu Maxaafi “Maganu baxilleho” yaanno. (1 Yohaannisi 4:8) Ikkina baxillaanchu Magani giddonke hegerera heeꞌrate hasatto wore kalaqe, tini haaqete halcho calla ikkite gattanno gede assannoha lawannohe?

Reya hasiꞌranno manchi nookkiti egennantinote. Isinni Qullaawu Maxaafi reyo “diinanke” ikkitinota kulanno. (1 Qorontoosi 15:26) Mitootu anjensanni reyitanno; wolootu kayinni jawooꞌmite reyitanno. Ikkihano ikkiro, reyo daase digattanno. Mitu manni reyote daafira heda nafa dihasiꞌranno; hattono reyo waajjishshannonsa. Ikkina kuni diininke baꞌꞌanno yanna dagga ikka?

Maganu hedo mannu reyanno gede ikkitinokkita afootto? Kalaqamu maxaafi, Maganu hedo mannu ooso hegerera heedhanno gede ikkinota leellishshanno taje kulanno. Maganu Yihowa uulla kalaqinohu, mannu oosora injiitino qae asseeti. Hakkiinni umi mancho Addaami kalaqe Edeni Gannatete worino. Hakkunni gedensaanni “Maganu kalaqinoha baala lai; lowo geeshsha dancha ikkinota lai.”—Kalaqama 1:26, 31.

Maganu daninni kalaqaminohu Addaami guuta manchooti. (Marro 32:4) Addaami minaama Heewanino kullannire afidhinota diꞌꞌikkitino; ise guuta mannimmanna guuta surre noosete. Yihowa insara togo yiino: “Ille ilamme, sirchiꞌne baatto woꞌmo; baattono kiꞌne gashshitinannita ikkito; baaru giddo heeꞌranno qulxuꞌmira, gordoho buubbanno cearanna baattote aana milli yaanno kalaqami lubbo afiꞌrinohu baalu aana roorre afidhe.”—Kalaqama 1:28.

Addaaminna Heewani sirchi uulla woꞌmanno gede lowo diri hasiisannoti egennantinote. Heewani ooso iltanno; oososeno ooso iltanno; hatto ikkiro, Maganu hedino garinni mannu ooso uulla woꞌmitanno. (Isayaasi 45:18) Ikkina Maganu Addaaminna Heewani kalaqinohu oosonsanna oosonsa  ooso calla laꞌe reyitara ikkoommero togoo hexxo aannonsani?

Qoleno, Maganu Addaaminna Heewani saada gashshitanno gede hajajinonsa. Maganu, Addaami saadate suꞌma fushshanno gede kulinosi; togo assate lowo yanna hasiissanno. (Kalaqama 2:19) Addaami tenne saada gashshate insa daafira afanna towaatannonsa gara rosa hasiissannosi. Saadate suꞌma fushshatenni roore lowo yanna hasiissannohu insa daafira rosateeti.

Maganu Addaaminna Heewani uulla woꞌmannonna saada gashshanno gede hajajasi, insa kalaqinohu seeda diro heedhara hede ikkinota leellishshanno. Qoleno Addaami seeda diro heeꞌrino.

Qullaawu Maxaafi mannu ooso lowo diro heedhino yanna noota kulanno. Maganu Qaali, “[Addaami] 930 diro ikkisita reyi” yaanno. Hakkiinni 900 saꞌꞌanno diro heeꞌrinoha wole lee manna kulanno. Insano, Seeti, Heenoosi, Qayinaani, Yaareedi, Maatusaalanna Nohiiti. Insa baalunku heedhinohu Nohi waro Baote Wayi dirrara albaanniiti; Baote Wayi daara albaanni Nohi 600 diro heeꞌrino. (Kalaqama 5:5-27; 7:6; 9:29) Insa seeda diro heeꞌra dandiitinohu hiittoonniiti?

Kuni manni heeꞌrinohu, Addaaminna Heewani guuta ikke heeꞌri ballaati. Seeda diro heedhanno gede assinonsahu qaru coyi konne ikkikki digatino. Ikkollana guuta ikkanna seeda diro heeꞌra mayi xaadooshshe afidhino? Reyo baꞌannohu hiittoonniiti? Kuri xaꞌmuwara dawaro afiꞌrate, balanxe geedhineemmohunna reyineemmohu mayiraatiro laꞌno.