HAYYICHU Moote Salamooni hunda coyiꞌrinoti tini yaatto, mannu ooso hasatto dancha gede assite xawissanno. Mannu ooso lowo diro heeꞌra halchitanno; kuni ikkinohu heeshsho harancho ikkitinohuranna reyo gata dandiinannikki daafira ikkara dandaanno. Hundinni kayise, mannu lowo diro heeꞌranno gede assannonsare afiꞌrate sharramanni keeshshino.

Lawishshaho, hanni Sumeeri moote Gilgaameeshi xagge laꞌno. Isi daafira kultannoti batinye afuu xagge no. Kuri xagge kultanno garinni Gilgaameeshi reyo gata dandiinanni gara afate haqqa reejje yiino. Ikkirono, diqiniinosi.

Shoolki sanira Chayinaho heedhinori kemistirete fullahaano (alchemists) hegerera heeꞌnanni gede assanno xagicho loosate woꞌnaaltino. Hakkiinni insa merkuriinna arseniki yinanni shiilo afiꞌrino xagicho loossino. Kuni xagichi batinye Chayinu gashshaano shiino yine hendanni. Mereerimu dirrara qole Awuroppaho heedhannori kemistirete fullahaano mannu culka sagallimmate horoonsiꞌranno gede assate woꞌnaaltino; insa hatto assitinohu culka baꞌannokki daafira, mannu ooso diro seedissanno yite heddeeti.

Xaa yannara, kalaqamu daafira xiinxallitanno egennaammi mannu geedhannohu mayiraatiro afate sharrantanni no. Tini, hunda mannu “hegerera heeꞌnanni gede assanno xagicho” hasiꞌrinte gede xaano geedhimmanna reyo hunate sharrama agurinokkita leellishshanno. Ikkina hatto assansa tirtinori nooyya?

Mannu seele daafira xiinxallitannori sayinsete fullahaano, geedhineemmohunna reyineemmohu mayiraatiro xawissannota 300 saꞌanno hedo shiqishshino. Muli yanna kawa, egennaammu mannunna saadate seele seeda yanna keeshshitanno gede assitino. Konnira, mite hoqqino dureeyye sayinsete fullahaano reyineemmohu mayiraatiro afate xiinxallitanno gede lowo woxe uyitino. Ikkina xiinxallo maa leellishshanno?

 Diro seedisa. Mite kalaqama xiinxallitanno fullahaano, geedhimma teloomeeri yinannite kiromoozemete birxe ledo xaadooshshe afidhinota coyidhanno. Seelenke sirtanno woyite teloomeere seelete giddo noo mashalaqqe baꞌannokki gede gargartanno. Ikkollana seele sirtanni hadhu kiiro teloomeere haraꞌmitanni hadhanno. Yannate gedensaanni, seele sira agurtanno daafira, geedhimma dagganno.

Sayinsete fullankesenni 2009nni baꞌraarsha adhitinoti pirofeeseri Elizaabeti Bilaakiberninna gaamose miilla, teloomeere rakke haꞌraꞌmitannokki gede assite seele rakke geedhitannokki gede assitanno inzaayime affino. Ikkollana insa borreessitino rippoorte aana xawissino garinni, teloomeere “maalaletenni seeda diro heeꞌneemmo gede woy mannu ooso heedhanno diri aleenni heeꞌneemmo gede assa didandiitanno.”

Seele soorra. Seele soorratenni geedhimma hunate woꞌnaalloonni. Seelenke geedhite sira agurtanno yannara, qooxeessinsara noote dhibba gargartanno seellara soꞌrote sokka sokkara dandiitanno; tini bisinke fuuganno gede, bodirannonkenna dhiwanu amadannonke gede assitara dandiitanno. Muli yannara Faransayete heedhannori sayinsete fullahaano geerru bisinni haadhino seella soorritino; mite seele haaꞌnoonnihu 100 diro saꞌꞌannonsa geerriwiinniiti. Xiinxallaanote gaamo massagaanchi pirofeeseri Zhaani Maarki Lemetire coyiꞌrino garinni, tini xiinxallo seele “geedhitannokki gede assa dandiinannita leellishshanno.”

Lowoti sayinsete fullahaano, geedhimma hunate qixxeessinanni xagga, mannu ooso diri xaahunni roore seedanno gede assitanno yite diammantanno. Mannu ooso heedhanno diri seendilli 19^ki saninni kayise lexxanni dayinoti egennantinote. Ikkollana kuni ikkinohu mannu albinni roore keeraanchimmansa agadhannohura, taraawanno dhibba gargara dandiinoonnihuranna kittiwaate qixxeessinoonnihuraati. Mitu egennaammi, mannu ooso diro xaahunni seedisa dandiinannikkita coyidhanno.

Mitu 3,500 diri albaanni Qullaawu Maxaafi borreessaanchi Muse togo yiino: “Heeꞌneemmohu 70 dirooti; batiꞌraa batiꞌriro 80 ikkanno; ikki garano ikkiro, heeshshonke qarru woꞌminote; dirinke rahe goofannoho; ninkeno saꞌneemmoreeti.” (Faarso 90:10) Mannu ooso seeda diro heeꞌrate sharranturono, heeꞌneemmo diri Muse yii geeshshinni sae diyaanno.

Mannu ooso heedhannohu haranchu diri ledo heewisiinsiro seeda diro heeꞌranno kalaqami no; lawishshaho, arze-libaanoosi yinanni gedee haqqe kumunni kiirranni diro heedhanno. Ninke heeꞌneemmo diro kuri kalaqami ledo heewisiinseemmo woyite “Heeshshote yaa 70 woy 80 diro calla heeꞌnannite?” yine hedanke digattanno.