HANNI mitte filme laˈanni nootto yine hendo: Tini filme kultannohu mitte lowo geeshsha baxatto sirbaancho daafiraati. Filmete hanafora, hatti sirbaancho lophitino gara, muuziiqa qajeeltino garanna hashsha barra yitukki rosiisidhino gara leellinshanni. Hakkiinni babbaxxitino gobba hadhe sirbitanni alame woˈmate egennantinota laitto. Shiima yanna gedensaanni kayinni geedhitu; hakkiinni filmete jeefora tini sirbaancho reyitu.

Tini filme qalote borro ikkitukkinni, mitte yannara heedhino manchote addu xaggeeti. Sirbaanote, sayinsete fullahaano, qolchamaanote woy wolu maccaha ikkino manni daafira filme qixxeessiniro, xaggensa tennenni baxxitinota diˈˈikkitanno. Insa heeshshote noo yannara lowore loossinoha ikkara dandaanno; kayinni geedhimmanna reyo hooggoommero mageeshshire loossannoha lawannohe?

Ninke baalunku heeˈne heeˈne reyanke gattannokkita hendeemmo woyite dadillineemmo. (Rosiisaancho 9:5) Aye geeshsha shelleggammummorono, geedhimmanna reyo hooˈla didandiineemmo. Qoleno, hedeweelcho danonni woy buutote dhibbinni dirinke haˈraˈmara dandaanno. Qullaawu Maxaafi kulanno garinni mannu ooso, “shiima yanna leelte baˈanno guunjo” gedeeti.—Yaiqoobi 4:14.

Mitu manni “Gaˈa reyineemmo daafira, into ango” yaanno. (1 Qorontoosi 15:32) Insa hatto yitannohu reyansa gattannokkita affinohuranna hexxo noonsakki daafiraati. Atino, roorenkanni buuto qarramatto woyite ‘Heeshshote yaa tenneetilla?’ yite hedakki digattanno. Tenne xaˈmora dawaro afiˈra dandiinannihu hiikkiinniitiyya?

Yannankera lowo manni sayinse tenne xaˈmora dawaro qoltanno yee hedanno. Sayinsetenna hikkiminnu lopho mannu albinni roore seeda diro heeˈranno gede assitinoti dihuluullissannote. Mite sayinsete fullahaano, mannu ooso heedhanno diro xaahunni roore seedisate sharrantanni no. Insara qiniinsarono qinaa hooginsarono aante noo xaˈmuwara dawaro afiˈra hasiissannonke: Geedhineemmohunna reyineemmohu isi mayiraati? Diinanke ikkitinoti reyo baˈanno yanna dagga ikka? Aantanno birxichuwara tenne hajo daafira xawinsoonni; hattono ‘Heeshshote yaa tenneetilla?’ yitanno xaˈmora dawaro qolloonni.