Qullaawu Maxaafi amaale: “Woxu baxille qorophe; nooˈnehu ikkoˈne!”—Ibiraawoota 13:5.

Xa yannara mannu lowo jiro afiˈra hasiissannonke yee hedanno. Qullaawu Maxaafi kayinni noonkerinni kassi yine heeˈra dandiineemmota kulanno. Hiittoonni?

“Woxu baxille qorophe.” Lowo manni ‘woxu baxillinni’ kainohunni, fayyimmansa, maatensa, jaallansa, amanyootensanna ayirrinyensa hooganno. (1 Ximootewoosi 6:10) Kuni mulla daafurooti! Woxe baxanno manchi horo “diduuwanno.”—Rosiisaancho 5:10.

Mannu woxe roorannota deˈinoonte. Woxu hasiissannonketi egennantinote. Ikkirono woxu baxankera woy galatankera didandaanno; hatto assara dandaannohu manna callaho. Addu ‘jaali’ heeshshonke hagiirru noota ikkitanno gede kaaˈlannonke.—Lawishsha 17:17.

Qullaawu Maxaafi amaale: “Hagiirraamu wodani mannimmate fayyimma aanno.”—Lawishsha 17:22.

Hagiirru danchu xagichi gede, fayyimmate hoonge cince heeˈrate kaaˈlannonke. Ikkollana fayyimmate qarri heeˈreenna hagiirraamma ikka dandiineemmohu hiittoonniiti?

Galattinannire ikke. Qarrasi calla illachishanno manchira “barru baalu yaaddo” ikkannosi. (Lawishsha 15:15) Konnira Qullaawu Maxaafi “Galatu manna ikke” yee amaalannonke. (Qolasiyaasi Sokka 3:15) Heeshshoˈne giddo afidhinoonnihu shiimmaaddu coyiˈra nafa galattinannire ikke. Arrishsho eˈanno yannara noo biinfille laˈneemmo woyite, bubbe bubbisanno woyite gantannonketi qiidado ayyare, hattono banxeemmo manchi muushshi yee hasaawisannonke woyite wodaninke hagiidhara dandaanno.

Woloota kaaˈle. Fayyimmate qarri heeˈrihero nafa, “Adhannonkunni aannohu” hagiirraamo ikkinota qaagi. (Soqqamaasinete Looso 20:35) Mannu insa kaaˈlate assineemmore naadanno woyite tashshi yaannonke; tini qarranke hambeemmo gede assitanno. Wolootu heeshsho woyyaabbanno gede kaaˈlineemmo woyite ninke heeshshono hagiirru noota ikkitanno.

Qullaawu Maxaafi amaale: “Woyyanno coye baddine affinoonnire [ikke].”—Filiphisiyusi Sokka 1:10.

Mitteenni yanna sayisannokki minaanninna minaama gale hose godowa xeertiˈrara dandaanno. Hakko daafira, minaanninna minaama galtensa balaxisiisa hasiissannonsa; korkaatuno roore hasiisannonsa coyi giddo mittu konneeti.

Mito coye mitteenni asse. Baxxinanni coye callootiˈne assantenni, mitteenni assate yanna gaaˈma dandiitinanni. Qullaawu Maxaafi “Mitto ikkantenni lame ikka woyyitanno” yaanno. Lawishshaho, mitteenni sagaˈla, ispoorte loosa, buna aga, waa dirra dandiitinanni.

Mimmitoho baxilleˈne leellishshe. Qullaawu Maxaafi minaanninna minaama mimmito baxanna ayirrisa hasiissannonsata kulanno. (Efesooni Sokka 5:28, 33) Kuˈu koˈoye faasiiqe hasaawisansa, hanqafansa woy mitore aansa galtensa kaajjishshara dandiitanno. Ikkollana, minaanninna minaama, meyatenna labbaahu baxille leellisha hasiissannonsahu galtensara calla ikkinota dea dihasiissannonsa.—Ibiraawoota 13:4.