Qullaawu Maxaafi amaale: “Woxu baxille qorophe; nooꞌnehu ikkoꞌne!”—Ibiraawoota 13:5.

Xa yannara mannu lowo jiro afiꞌra hasiissannonke yee hedanno. Qullaawu Maxaafi kayinni noonkerinni kassi yine heeꞌra dandiineemmota kulanno. Hiittoonni?

“Woxu baxille qorophe.” Lowo manni ‘woxu baxillinni’ kainohunni, fayyimmansa, maatensa, jaallansa, amanyootensanna ayirrinyensa hooganno. (1 Ximootewoosi 6:10) Kuni mulla daafurooti! Woxe baxanno manchi horo “diduuwanno.”—Rosiisaancho 5:10.

Mannu woxe roorannota deꞌinoonte. Woxu hasiissannonketi egennantinote. Ikkirono woxu baxankera woy galatankera didandaanno; hatto assara dandaannohu manna callaho. Addu ‘jaali’ heeshshonke hagiirru noota ikkitanno gede kaaꞌlannonke.—Lawishsha 17:17.

Qullaawu Maxaafi amaale: “Hagiirraamu wodani mannimmate fayyimma aanno.”—Lawishsha 17:22.

Hagiirru danchu xagichi gede, fayyimmate hoonge cince heeꞌrate kaaꞌlannonke. Ikkollana fayyimmate qarri heeꞌreenna hagiirraamma ikka dandiineemmohu hiittoonniiti?

Galattinannire ikke. Qarrasi calla illachishanno manchira “barru baalu yaaddo” ikkannosi. (Lawishsha 15:15) Konnira Qullaawu Maxaafi “Galatu manna ikke” yee amaalannonke. (Qolasiyaasi Sokka 3:15) Heeshshoꞌne giddo afidhinoonnihu shiimmaaddu coyiꞌra nafa galattinannire ikke. Arrishsho eꞌanno yannara noo biinfille laꞌneemmo woyite, bubbe bubbisanno woyite gantannonketi qiidado ayyare, hattono banxeemmo manchi muushshi yee hasaawisannonke woyite wodaninke hagiidhara dandaanno.

Woloota kaaꞌle. Fayyimmate qarri heeꞌrihero nafa, “Adhannonkunni aannohu” hagiirraamo ikkinota qaagi. (Soqqamaasinete Looso 20:35) Mannu insa kaaꞌlate assineemmore naadanno woyite tashshi yaannonke; tini qarranke hambeemmo gede assitanno. Wolootu heeshsho woyyaabbanno gede kaaꞌlineemmo woyite ninke heeshshono hagiirru noota ikkitanno.

Qullaawu Maxaafi amaale: “Woyyanno coye baddine affinoonnire [ikke].”—Filiphisiyusi Sokka 1:10.

Mitteenni yanna sayisannokki minaanninna minaama gale hose godowa xeertiꞌrara dandaanno. Hakko daafira, minaanninna minaama galtensa balaxisiisa hasiissannonsa; korkaatuno roore hasiisannonsa coyi giddo mittu konneeti.

Mito coye mitteenni asse. Baxxinanni coye callootiꞌne assantenni, mitteenni assate yanna gaaꞌma dandiitinanni. Qullaawu Maxaafi “Mitto ikkantenni lame ikka woyyitanno” yaanno. Lawishshaho, mitteenni sagaꞌla, ispoorte loosa, buna aga, waa dirra dandiitinanni.

Mimmitoho baxilleꞌne leellishshe. Qullaawu Maxaafi minaanninna minaama mimmito baxanna ayirrisa hasiissannonsata kulanno. (Efesooni Sokka 5:28, 33) Kuꞌu koꞌoye faasiiqe hasaawisansa, hanqafansa woy mitore aansa galtensa kaajjishshara dandiitanno. Ikkollana, minaanninna minaama, meyatenna labbaahu baxille leellisha hasiissannonsahu galtensara calla ikkinota dea dihasiissannonsa.—Ibiraawoota 13:4.