ADDAAMINNA Heewanni Maganoho hajajama hoogansanni mannu oosora cubbonna reyo ragisiissinoha ikkirono, Maganu mannaho hedinore diagurino. Maganu hedinore agurinokkita Qaalisi Qullaawu Maxaafi giddo hige hige xawisino.

• “Keeraano baatto ragidhanno; ise aanano hegerera heedhanno.”—Faarso 37:29.

• “Mootichu Kaaliiqi reyo coˈo asse hunanno; mannu baalunku albinni hindiiddo feyanno.”—Isayaasi 25:8.

• “Goofimarchoho baˈˈanno diini reyote.”—1 Qorontoosi 15:26.

• “Reyo woy dadillu woy wiˈla woy shetto kunni kaˈa diheedhanno.”—Yohaannisi Ajuuja 21:4.

Maganu ‘reyo coˈo asse hunannohu’ hiittoonniiti? Aleenni kulloonninte gede, Qullaawu Maxaafi “Keeraano . . . hegerera heedhanno” yaanno. Ikkollana, “Mitte soˈrono assikkinni, woˈmanka woyite dancha looso calla loosannohu baattote aana mittuno dino” yaanno. (Rosiisaancho 7:20) Ikkina Maganu reyo hunate yee, fushshino biddishsha aguranno yaateni? Hatto yaa diˈˈikkino! Isi “Kaphannokki Magano” ikkino daafira, horo hatto diassanno. (Tiito 1:2) Ikkina Maganu mannu ooso kalaqi woyite noosi hedo wonshannohu hiittoonniiti?

Yihowa baxillunni wodo baate cubbu borojjimmanni fulleemmo faro fanino. Wodo gawajjaminoha kiisate woy taashsho heedhanno gede assate baantanni waagaati. Mannu ooso baala cubbaataamma ikkitino daafira reyo hasiissannonsareeti; konnira Qullaawu Maxaafi togo yee xawisanno: “Mannu umosi gatisa didandaanno; lubbosi woxxate Maganoho oye afannori dino. Reyikkinni hegerera heeˈrate, baantanniri dandiinannikkiha ikkino daafira, ikkanno geeshshire ee diafanno.”—Faarso 49:7-9.

Guuta ikkinokki manchi reyanno woyite, umisi cubbira ikkanno waaga calla baatanno; qoleno, umosi gatisa woy wole manna woda didandaanno. (Roomu Sokka 6:7) Reyote borojjimmanni gata dandiineemmohu, guutunna cubbu noosikki manchi ninke cubbira yee reyinkero callaati.—Ibiraawoota 10:1-4.

Maganu togoo wodo qixxeessino. Beettisi Yesuusi cubbu noosikkiha guuta mancho ikke ilamanno gede iiminni soyino. (1 Pheexiroosi 2:22) Yesuusi “lowo manna wode gatisate lubbosi sayise aara” dayinota coyiˈrino. (Maarqoosi 10:45) Yesuusi reyinohu, diinanke ikkitinota reyo hune heeshsho afiˈneemmo gede assateeti.—Yohaannisi 3:16.

Xa heeˈnoommohu, ‘qarrissanno yannaraati’; qoleno, Qullaawu Maxaafi masaalo garinni, tenne busha alamehu “goofimarchu barra” heeˈnoommo. (2 Ximootewoosi 3:1) Magano magansidhannokkiri ‘yoote barra baˈanno’ woyite, goofimarchu barri goofanno. (2 Pheexiroosi 3:3, 7) Magano baxxannori kayinni tenne baonni gatte, “hegere heeshsho” afidhanno.—Maatewoosi 25:46.

Lowo miliyoone ikkanno manni reyotenni kae hegerera heeˈrate hexxo afiˈranno. Yesuusi Nayini yinanni katama haˈri yannara, reyitinori kaˈannota  leellishino. Yesuusi mitto tole qaaqqose shiidhino manchonni xaadino; hakkiinni “marare” qaaqqose reyotenni kayisino. (Luqaasi 7:11-15) Soqqamaasinchu Phaawuloosino togo yiino: “Anino insante gede Maganu cubbaataammanna keeraano reyotenni kayisanno hexxo afiˈroommo.” Tini huluullammannikki hexxo, Maganu mannu ooso baxannota leellishshanno.—Soqqamaasinete Looso 24:15.

Lowo biliyoone ikkanno manni hegerera heeˈranno hexxo afiˈranno. Qullaawu Maxaafi togo yaanno: “Keeraano baatto ragidhanno; ise aanano hegerera heedhanno.” (Faarso 37:29) Hatte yannara soqqamaasinchu Phaawuloosi mito 2,000 diri albaanni coyiˈrinohu jawaachishanno qaali woˈmanna laˈanno; isi “Tee reyo, qeellekki hiikko no? Tee reyo, gawajjattati wolqakki hiikko no?” yiino. (1 Qorontoosi 15:55) Hatte yannara mannu ooso diina ikkitinoti reyo qeelantanno!