Beebe annase lubbora baxxanno. Maatesera muli jaala ikkitinoti mitte mancho ise sheshifachishate yite coyidhinori roore madiissinose ikkinnina kaaˈlinoseri dino. Beebe iseneetira “Isi reyasi dancha diˈˈikkitino” yite duucha higge coyidhino. Lowo diri gedensaanni Beebe tenne borreessitino; tini ise xissiisiˈra agurtinokkita leellishshanno.

Beebente gede, mittu manchi hakko iso lubbora baxanno mancho shiiriro xisso seeda yanna keeshshitara dandiitanno. Qullaawu Maxaafi reyo ‘goofimarchu diina’ yaasi garankolla. (1 Qorontoosi 15:26) Reyo hendummokkinni heeshshonke giddora wolqisse eˈe banxeemmo manna mereerinkenni xoqoltanno. Reyo gawajjitannokki manchi dino. Konnira reyo abbitanno gawajjo dandiine heeˈneemmo gari bainkero tini dhagge assiˈnannita diˈˈikkitino.

Togo yite hedattoha ikkara dandaanno: ‘Xisso mageeshshi yanna keeshshitanno? Xisso dandiine heeˈnannihu hiittoonniiti? Shiirino manna sheshifachisha dandeemmohu ma garinniiti? Reyinohu banxeemmo mannira hexxo noonsa?