ATI woloota galata baxatto? Tini ninke mittu mittunku heda hasiissannonke xaꞌmooti. Qullaawu Maxaafi giddo, yannankera heeꞌrannohu batinyu manni “galata afiꞌrinokkiha” ikkannota masaalloonni. (2 Xim. 3:2) Atino, noonsa coyira galatannokkiha woy mannu anera konne coye assa hasiissannonsa yee hedanno manna afoottoha ikkara dandaanno. Insa, mannu assinonsarira galata hasiissannonsaha dilawannonsa. Togoo manni ledo hosa digiwisannohe?

Yihowa soqqamaano kayinni “galatu manna ikke” hattono “baalunku coyira galaxxe” yine amaalloonninsa. (Qol. 3:15; 1 Tes. 5:18) Galanteemmore ikkanke, ninke uminkera kaaꞌlitannonke. Hatto yineemmo gede assannonkehu batinyu korkaati no.

Galatu noonke manna ikkineemmo gede assannonke korkaati giddo mittu, tini ninkeneetira ayirrinyu heeꞌrannonke gede assitanno daafiraati. Assinoonnisi coyira galatanno manchira, isiniitira gara ikkitino lao heedhasira dandiitanno; qoleno galantannisi manchirano tashshi yaannosi. Galatu lamenka mancho hagiirsiisannohu hiittoonniiti? Hanni konne lawishsha hedi: Mannu atera dancha coye assate hasiꞌrannohu, hakku coyi hasiisannohe yee hedanno daafiraati. Hatto ikkiro, insa atera heddannohe yaate. Tenne afakki, ateneetira ayirrinyu heeꞌrannohe gede assitannohe. Ruuti lawishshi tenne leellishanno. Booeezi Ruutira danchumma assinose. Ruuti ise daafira hedannohu noota afase, lowo geeshsha hagiirsiissinoseti egennantinote.—Rut. 2:10-13.

Roorenkanni Magano galatanke lowo geeshsha hasiissannote. Yihowa xa assinohehano ikko albillitte assannoheha ayyaanaamittetenna maalaamittete coye hedatto yanna nooheti egennantinote. (Mar. 8:17, 18; Soq. 14:17) Ikkollana, Yihowa danchumma daafira shiima yanna calla hedantenni, aterano ikko maatekkira uyinoꞌneha falahino atoote yanna gaaꞌmite hiinca hasiissannohe. Kalaqaanchikki assinohe danchumma hiincakki iso albinni roore galatattonna mageeshshi geeshsha baxannohero huwatatto gede kaaꞌlitannohe.—1 Yoh. 4:9.

Maganu uyinohe eltonna atoote hedde calla agurantenni, danchummasi daafira Yihowa galati. (Far. 100:4, 5) Qoleno mannu “galantannire ikka, hagiirraamma ikkinanni gede assitanno” yaanno.

Galata kaaꞌlitanno yineemmo gede assannonkehu wolu korkaati, hatto assa jaalooma kaajjishshannohuraati. Ninke baalunku galantankera hasiꞌneemmo. Mittu manchi assinoherira wodaninni galatattosiha ikkiro, isi ledo noohe aante lexxitanno. (Rom. 16:3, 4) Galatanno manni duucha woyite woloota kaaꞌla baxanno. Wolootu assitinonsa danchumma huwattanno daafira, insano danchumma assa hasidhanno. Addanko, manna kaaꞌla hagiirsiissanno. Yesuusi yiino garinni, “Adhannonkunni aannohu baꞌraaꞌrinoho.”—Soq. 20:35.

Kaalfoorniyu yuniversitera galatu daafira xiinxallinoonni xiinxallora sooreessa ikkinohu Rooberti Emensi togo yiino: “Galanteemmore ikkate, mimmitu kaaꞌlo hasiissannonketa, yaano wolootaho uyineemmo woyiti noonte gede ninkeno adhineemmo woyiti noota huwata hasiissannonke.” Heeshshotenni heeꞌrateno ikko hagiirraamma ikkate duucha doogganni wolootu kaaꞌlo hasiissannonketa ammana hasiissannonke. Lawishshaho inteemmo sagale woy xagicho afiꞌrate wolootu kaaꞌlo hasiissannonke. (1 Qor. 12:21) Galatanno manchi wolootu assitinosire naadanno. Atera mannu assinoherira galatate rosichi noohe?

Galatu manna ikkineemmo gede assannonkehu wolu korkaati, togoo manna ikka dadillisannore agurre hagiirsiisannore illachinsheemmo gede kaaꞌlitannonke daafiraati. Surrenke ximbiiwaanchu gedeeti. Hasiisannokkire ximbiibbe gatisse, dancha coye illachinsheemmo gede assitara dandiitanno. Galatanno manchi duucha woyite qarra ikkikkinni dancha coye illachishanno. Atino galatattoha ikkittoro, dancha coye illachisha dandaatto; tini qolte albinni roore galatattoha ikkatto gede assitannohe. Galatatto gede assannohe coye illachishattoha ikkiro, Phaawuloosi “Woꞌmanka woyite Mootichunni hagiidhe” yee amaalino amaale harunsitanni nootto.—Fil. 4:4.

Galatattoha ikkakki, gara ikkinokkire hedattokki gede kaaꞌlitannohe. Galantanni heeꞌne hinaasa, dadillanna giirama dandiinannini? Qoleno, galatanno manchi duucha woyite maalaamittete coye quwa sae dibaxanno. Noosirira galatanno daafira, lexxate kabbi facci diyaanno.—Fil. 4:12.

Kiristaana ikkinoommo daafira, Sheexaanu tenne goofimarchu yannara iillannonke qarrinni kainohunni hexxo mudhinammora hasiꞌrannota anfoommo. Isi, gara ikkitinokki hedo heedhunkeronna gungummeemmore ikkinummoro hagiidhanno. Togoo akati, soqqanshonkenni dancha guma afiꞌneemmokki gede assara dandaanno. Galatu, qullaawu ayyaani gumi ledo xaadooshshe afiꞌrino; lawishshaho galatanno manchi Maganu uyinosihu danchu coyinni hagiidhanno, hattono Yihowa uyino hexxo baala ammananno.—Gal. 5:22, 23.

Yihowa soqqamaancho ikkootto daafira, konni birxichira galatu daafira kulloonnire sumuu yaattoti egennantinote. Ikkollana, woꞌmante yannara galatanna hagiirraamo ikka shota diꞌꞌikkitino. Kayinni hexxo mudha dihasiissannohe. Galatattoha ikkanna kuni akati baihekkinni heeꞌra dandaatto! Hiittoonni? Barru baala, heeshshokki giddo tuncu yiinoheha galatatto gede assannohe coye hedate yanna gaaꞌmi. Hatto assate rosichi heeꞌrihero, galata shota ikkitannohe. Tini qarransa calla illachishanno manninni roore hagiirraamo ikkatto gede assitannohe. Maganunna mannu ate jawaachishatenna hagiirsiisate assinoha dancha coye hiinci. Hattono kuri coyibba borreessa dandaatto. Barru baala galatatto gede assannoheha afiꞌroottoha lame woy sase coye borreessi.

Mitu galatu daafira xiinxallino manni coyiꞌranno garinni, “galatate rosichi heeꞌrinkero, surrenke seella hagiirsiisanno coye illachinsheemmo gede assanno garinni loosa hanaffanno.” Galatanno manchi roore hagiirraamoho. Konnira, afiꞌrootto atoote hedi; hattono galatu mancho ikki! Heeshshokki giddo afiꞌroottoha dancha coye mulluri gede assite laꞌooti; hatteentenni, Yihowa ‘shaqqado ikkino daafira galatisi.’ Hattono ‘baalunku coyira galaxxi.’—1 Dud. 16:34; 1 Tes. 5:18.