Hatto dilawanno. Sheexaanu Heewani ‘Maganu hoolino laalo itittaro maalikki reyanno, lubbokki kayinni wolewa hadhe heedhanno’ diyiinose. Sheexaanu hamashshu widoonni Heewanira, hatte haqqicho laalo itturo horo ‘reyitannokkita’ kulinose. Isi Maganu kaaˈlihekki uullate aana hegerera hagiirraame heeshsho heeˈra dandaatta yaanni noose.—Kal. 2:17; 3:3-5.

Yannankera noohu ‘Lubbo direyitanno’ yaanno rosi hanafinohu Edeni Gannatete ikka hoogina, mamaro hanafinoyya? Dianfoommo. Ikkollana, kaphu ammaˈno baala Nohi waro Baote Wayinni baˈinota anfoommo. Baote wayinni gattinori Magano halaalunni magansidhannori yaano Nohinna maatesi calla ikkitino daafira, gate sainohu mittuno kaphu rosi dino.

Hakko daafira yannankera noohu, ‘Mannu lubbo direyitanno’ yaanno rosi hanafinohu Baote Wayi gedensaanniiti. Maganu Baabeeli yannara coyiˈnanni qaale burduuqita mannu ‘baatto baalate aana billaallino’; hatte yannara insa ‘Mannu reyitannokki lubbo afiˈrino’ yaanno roso hadhuwa haadhe hadhinoti dihuluullissannote. (Kal. 11:8, 9) Kuni kaphu rosi hanafino yanna ikkitutano ikkituro, konni rosira buicho ‘Kaphu anna’ ikkinoho Sheexaane Daawuloosiiti; qoleno isi kuni rosi gobba woˈmate halaˈlanna laˈˈanno woyite hagiidhannoti egennantinote!—Yoh. 8:44.