1-2. Angeliito woˈnaalshi leellishanno garinni, ninke mittu mittunku maa assa hasiissannonke?

ANNIKKINNA amakki Yihowa Farciˈraasineeti? Hatto ikkiro, insa Yihowa jaalla ikkitinohura calla atino isi jaala ikkatto yaa diˈˈikkino. Anninkenna amanke Yihowa magansidhannore ikkiturono ikka hooggurono, ninke mittu mittunku Yihowa ledo jaalooma kalaqiˈra hasiissannonke.

² Hanni Angeliito yinanni rodii woˈnaalsha laˈno. Isi lophinohu Yihowa Farciˈraasine ikkitino maate giddooti. Ikkollana wedellichu noo yannara, Yihowa ledo dancha jaalooma kalaqiˈrinokkita coyiˈrino. Isi togo yino: “Yihowara soqqameemmohu maateˈya assitannore assate geeshshira calla yeeti.” Ikkollana, Angeliito Maganu Qaale nabbawatenna nabbawinore hiincate yanna gaaˈmino; hattono Yihowa ganye huucciˈra hanafino. Tini kaaˈlitinosihu hiittoonniiti? Isi togo yiino: “Baxillaanchu Anniˈya Yihowawa shiqate, ani umiˈya isi daafira seekke afa hasiissannoeta huwatoommo.” Angeliito woˈnaalshi togo yine xaˈmineemmo gede assannonke: Yihowa daafira shiimare afatenna iso seekke egennate mereero mayi badooshshi no? Yihowa afa dandiineemmohu hiittoonniiti?

3. Yihowa mito geeshsha afatenna iso seekke egennate mereero mayi badooshshi no?

³ Mittu manchi Maganu suˈma, hattono Isi coyiˈrinohanna assinoha mito coye afiro, hakku manchi Yihowa afino yaa dandiineemmo. Ikkollana, hakku manchi Yihowa seekke  afino yaa didandiinanni. Yihowa seekke afate, isi daafiranna dhagge ikkitanno akattasi daafira yanna gaaˈmine xiinxalla hasiissannonke. Isi mitto coye coyiˈranno woy assanno gede kakkayisannosiri maatiro huwata dandiineemmohu hatto assinummoro callaati. Tenne huwatanke, hedonke, doodhineemmo doorshinna assootinke iso hagiirsiisannoronna teˈee wodanchate kaaˈlitannonke. Yihowa maa assinammora hasiˈrannoro anfummoro, hakko coye assa hasiissannonke.

4. Qullaawu Maxaafi giddo kulloonni manni lawishsha xiinxallanke kaaˈlitannonkehu hiittoonniiti?

⁴ Yihowara soqqama hasiˈneemmo woyite, mitu manni arrassankeranna Kiristaanu gambooshshe haˈra hananfeemmo woyite isinni albinni roore giwankera dandaanno. Ikkirono Yihowa addaxxinummoro, isi horonta tuge diagurannonke. Magano addaxxanke, isi ledo hegerera jaalooˈmineemmo gede kaaˈlitannonke. Yihowa seekkine afa dandiineemmo? Ee, dandiineemmo! Guuntete xeˈne noonsa manni, lawishshaho, Musenna Moote Daawiti assitinori hatto assa dandiineemmota leellishanno. Insa assitinore xiinxallineemmo woyite, aante noote lame xaˈmuwara dawaro afiˈneemmo: Insa Yihowa affinohu hiittoonniiti? Ninke insa lawishshinni maa ronseemmo?

5. Muse maa assino?

⁵ Muse Maganoho soqqama doodhino. Isi 40 dirihu heeˈre, “Feriooni beetto beettooti” yinannisita giwe Maganu mannira yaano Israeelete halamino. (Ibi. 11:24) Muse noosita lowo silxaane facci asse agurino. Isi, Gibitsete gobbara borojje ikkite noo gaˈresira halaminohu, hatto assasi hatte yannara maganu gede assine laˈnanniha wolqaataamo gashshaancho Feriooni hanqissara dandiitannota afanni heeˈreeti. Tini Musera kaajjado ammana noosita leellishshanno! Muse Yihowa addaxxino. Hatto assasi, Yihowa ledo noosi jaaloomi geedonniha ikkanno gede kaaˈlitinosi.—Law. 3:5.

6. Muse lawishshinni maa ronseemmo?

⁶ Muse lawishshinni maa ronseemmo? Isi gede ninke baalunku doodha hasiissannonkeri no: Maganoho soqqamanna mannisi ledo gamba yaa doodhineemmo? Maganoho soqqamate yine uminke horo agura hasiissannonkeha ikkara dandaanno; qoleno Yihowa afinokki manni giwankera dandaanno. Ikkollana, iimi Annanke Yihowa addaxxinummoro, isi kaaˈlannonke!

7-8. Muse mayi daafira rosa diagurino?

⁷ Muse Yihowa akatta daafira rosanna fajjosi assa diagurino. Lawishshaho, Muse Israeelete daga Gibitsete borojjimmanni massage fushshanno gede hajanjisi yannara, hatto assate ikkado diˈˈikkoommo yee Yihowara marro marro hige kulino. Maganu Muse xaˈmora shaqqillunni dawarino; hattono kaaˈlinosi. (Ful. 4:10-16) Hakko daafira Muse, kaajjado yoote sokka Ferioonira kula dandiino. Hakkiinni Yihowa wolqasi horoonsiˈre Israeele gatisanna hattono Feriooninna olantosi Duumu Baarira hunanna laino.—Ful. 14:26-31; Far. 136:15.

⁸ Muse Israeele Gibitsetenni fushshihu gedensaanni, insa gunguntanni qarrissino. Ikkirono Muse, Yihowa Gibitsetenni fushshinoha konne manna cince kaaˈlino gara laino. (Far. 78:40-43) Qoleno Muse, Yihowa isi xaˈmiˈrinore assate yee hedinore agure umosi heeshshi assanno Magano ikkasi leellishinota huwatino.—Ful. 32:9-14.

9. Ibiraawoota 11:27 kultanno garinni Musenna Yihowa mereero noo jaaloomi hiittooho?

 ⁹ Muse Israeele borojjimmatenni fushshi gedensaanni, iimi Annisi ledo albinni roore lubbora jaalooˈmino daafira, Iso illetenni lainohu gede assine kulloonni. (Ibiraawoota 11:27 nabbawi.) Qullaawu Maxaafi Yihowanna Muse mereero noo jaaloomi mageeshsha kaajjado ikkinoro kulanni togo yaanno: “Kaaliiqi jaalu ledo hasaambannihu gede ikke alba Musewa hige hasaawanno.”—Ful. 33:11.

10. Yihowa seekke afate maa assa hasiissannonke?

¹⁰ Muse lawishshinni maa ronseemmo? Yihowa seekke afate yaa, akattasi daafira rosa calla ikkitukkinni, fajjosino assate. Yannankera Yihowa fajjo duuchunku gari ‘manni gatannonna halaale afanno gedeeti.’ (1 Xim. 2:3, 4) Maganu fajjo assa dandiineemmo doogga giddo mitte, mannaho Yihowa daafira rosiisate.

11. Wolootaho Yihowa daafira rosiisanke iso albinni roore anfeemmo gede kaaˈlitannonkehu hiittoonniiti?

¹¹ Wolootaho Yihowa daafira rosiinseemmo woyite, ninkeno iso albinni roore egennineemmo. Yihowa gara ikkitinoti wodanu dooˈˈo noonsa manniwa massannonke woyite, isi mararannoha ikkinota huwanteemmo. (Yoh. 6:44; Soq. 13:48) Qullaawa Maxaafa xiinxallinseemmo manni busha rosichonsa agure haaro mannimma uddiˈranna laˈneemmo woyite Maganu Qaali afiˈrino wolqa wodanchineemmo. (Qol. 3:9, 10) Qoleno, Yihowa qoqqowinkera heeˈrannohu batinyu manni isi daafira rose gato afiˈranno gede duucha faro fanasi cincanno Magano ikkinota buuxissannonke.—Rom. 10:13-15.

12. Fulo 33:13 kultanno garinni Muse maa huucciˈrino? Mayira?

¹² Muse Yihowa ledo noosi jaalooma naadino. Isi, Yihowa suˈminni maalale loosi gedensaanni nafa, Maganu daafira lede afa hasiˈrino daafira, Yihowa ayimmasi lede leellishannosi gede ayirrinyunni xaˈmiˈrino. (Fulo 33:13 nabbawi.) Muse hatto yee xaˈmiˈri yannara 80 diro saˈˈannosi; ikkollana, isi iima heeˈrannohu baxillaanchu Annisi daafira rosannori lowori noota huwatino.

13. Yihowa ledo noonke jaalooma naandeemmota leellisha dandiineemmo doogga giddo mitte maati?

¹³ Tenne xaggenni maa ronseemmo? Yihowara soqqammoommo diri ikki geeshshihano ikkiro, isi ledo noonke jaalooma mulluri gede assine laˈˈa dihasiissannonke. Isi ledo noonke jaalooma naandeemmota leellinsheemmo doogga giddo mitte, huuccattotenni isi ledo hasaawate.

14. Yihowa daafira seekke afate huuccatto lowo geeshsha kaaˈlitanno yineemmohu mayiraati?

¹⁴ Jaalla mimmitu ledo hasaawansa jaaloominsa albinni roore kaajjanno gede assitanno. Hakko daafira, ganyite huuccatto assidhe Yihowawa shiqi; hattono giddokkita isira hasaapha waajjitooti. (Efe. 6:18) Kirista yinanniti Turkete heedhanno rodoo togo yitino: “Giddoˈyata Yihowara hasaapheemmanna isi kaaˈlinoe gara laeemma woyite, isira nooe baxilli lexxanni haˈranno; hattono iso albinni roore addaxxeemma. Yihowa huuccattoˈyara dawaro qolanna laˈˈaˈya, iso Anniˈyanna Jaaliˈya gede asse laeemma gede kaaˈlitinoe.”

15. Yihowa Moote Daawiti daafira mayino?

¹⁵ Moote Daawiti ilaminohu heeshshonsa Maganu Yihowara sayisse uyitino daga mereerooti. Ikkollana isi Yihowa magansiˈrinohu, maatesi Yihowa magansidhannore ikkitino daafira calla diˈˈikkino. Isi umisinni Maganu ledo jaalooma kalaqiˈrino; Yihowano  Daawiti lowo geeshsha baxanno. Yihowa umisi Daawiti daafira coyiˈranni isi “wodaniˈyata [wonshannoho]” yiino. (Soq. 13:22) Ikkina, Daawiti Yihowa ledo lubbora jaaloominohu hiittoonniiti?

16. Daawiti kalaqama lae Yihowa daafira maa rosino?

¹⁶ Daawiti kalaqama lae Yihowa daafira rosino. Isi wedellichu heeˈre, annisi geˈreewo allaalanni gobba lowo yanna sayisanno. Isi, Yihowa kalaqama hiinca hanafinohu hattee yannara ikkara dandaanno. Lawishshaho, Daawiti hashsha iima hige laˈˈanno woyite gordo woˈmitino beeddahe lainoha calla ikkikkinni, beeddahe kalaqino Kalaqaanchira noosi akattano huwatino. Hakko daafira Daawiti togo yee borreessino: “Gordu Maganu ayirrinye kulanno; gordu dukkani angasi looso duduwanno.” (Far. 19:1, 2) Daawiti, mannu ooso kalaqantino gara hiincasi, Yihowata taalle nookki hayyo wodanchanno gede kaaˈlitinosi. (Far. 139:14) Isi, Yihowa kalaqami daafira wodanchate sharramasi Yihowa albaanni bukicho ikkinota huwatanno gede assitinosi.—Far. 139:6.

17. Maganu kalaqinore hiincinummoro maa ronseemmo?

¹⁷ Daawiti lawishshinni maa ronseemmo? Kalaqamu daafira rosate hasatto heedhoˈne. Yihowa biifise kalaqino uullara noo kalaqama hiince, hattono dhagge assidhe! Qooxeessiˈnera noo muˈro, saadanna manni Yihowa daafira maa rosiisannoˈnero hiince. Hatto assitiniro, barru baala baxillaanchu Anniˈne daafira rossinanniri heeˈranno. (Rom. 1:20) Qoleno barru baala Yihowara nooˈne baxilli lexxanni haˈranno.

18. Faarso 18 kultanno garinni Daawiti maa huwatino?

¹⁸ Daawiti Yihowa kaaˈlanni noosita huwatino. Lawishshaho, isi annisi geˈreewo doobbiichunna dibi yinanni moyichi afiinni gatisi yannara, kaaˈlinosihu Yihowa ikkinota wodanchino. Qoleno isi, jigeessa olamaancho Gooliyaadi qeeli yannara Yihowa kaaˈlanni noosita huwatino. (1 Sam. 17:37) Daawiti hinaasaanchu Moote Saaooliwiinni xooqanni noo yannara, Yihowa konni diinisi anganni gatisinosita wodanchino. (Far. 18 umoonni noo hedo lai.) Daawiti naaxxaleessa mancho ikkoommero, konne qarra umiˈyanni saoommo yee hedara dandaanno. Ikkollana, isi umosi heeshshi assannoha ikkino daafira, Yihowa kaaˈlinosita ammanino.—Far. 138:6.

19. Daawiti lawishshinni maa ronseemmo?

¹⁹ Tennenni maa ronseemmo? Yihowa kaaˈlannonke gede huucciˈratenni sainore assa hasiissannonke. Isi hiitte yannara kaaˈlinonkeronna ma garinni kaaˈlinonkero huwata hasiissannonke. Assa dandiineemmokkiri noota ammannummoro, Yihowa wolqankera aleenni ikkinore assineemmo gede kaaˈlannonke gara laˈneemmo. Yihowa kaaˈlinonke gara laˈneemmo woyite, isi ledo noonke jaaloomi kaajjanni haˈranno. Ayisaaki yinannihu Fijii gobbara heeˈranno rodii tini halaale ikkitinota umisi heeshshonni laino. Isi togo yino: “Albita qaageemmo woyite, Qullaawa Maxaafa xiinxalla hanafummo yannanni kayisse techo geeshsha Yihowa duucha doogonni kaaˈlinoeta huwatoommo. Tini, Yihowa albinni roore xawe leellannoe gede assitinoe.”

20. Daawitinna Yihowa mereero noo jaaloominni maa ronseemmo?

²⁰ Daawitira Yihowate gedee akatta noosi. Yihowa isite gedee akatta heedhannonke gede asse kalaqinonke. (Kal. 1:26) Maganu akatta daafira ronsummo kiiro, albinni roore isi faale haˈneemmo. Daawiti iimi Annasi seekke afino daafira, wole manna Yihowa laˈˈanno garinni laˈˈa dandiino. Hanni  mitto lawishsha laˈno. Daawiti Bersaabehi ledo foorinna minaannase shiishiishi yannara Yihowa baddalino. (2 Sam. 11:1-4, 15) Ikkollana, Daawiti wolootaho maarannoha ikkino daafira, Yihowano maarinosi. Daawiti Yihowa ledo lubbora jaalooˈmino daafira, Israeelete daga lowo geeshsha baxxannosi; Yihowano wole Israeelete mootoollara Daawiti lawishsha asse horoonsiˈrinosi.—1 Mot. 15:11; 2 Mot. 14:1-3.

21. Efesooni Sokka 4:24 nna 5:1 kultanno garinni, Maganu faale haˈra kaaˈlitannonkehu hiittoonniiti?

²¹ Daawiti lawishshinni maa ronseemmo? Ninkeno Maganu faale haˈra hasiissannonke. Hatto assanke kaaˈlitannonke, hattono iso seekkine anfeemmo gede assitannonke. Maganu akatta heedhannonke gede assiˈrate sharrammeemmoha ikkiro, isi ooso ikkanke leellinsheemmo.—Efesooni Sokka 4:24; 5:1 nabbawi.

22-23. Yihowa daafira ronsoommore loosunni leellishanke kaaˈlitannonkehu hiittoonniiti?

²² Xaa geeshsha ronsummonte gede, Yihowa kalaqamunna Qaalisi widoonni ayimmasi xawisinonke. Qullaawu Maxaafi giddo Musenna Daawiti gedeehu dancha lawishsha ikkannonke manni no. Yihowa iso anfeemmo gede kuri doogganni kaaˈlinonke. Isi daafira rosate, illenke, maccankenna wodananke qixxeessiˈra ninke qeechaati.

²³ Yihowa daafira anfe guda didandiineemmo. (Ros. 3:11) Qaru coyi Yihowa daafira lowore afa calla ikkitukkinni anfoommore loosunni leellishate. Ronsoommo garinni heeˈneemmohanna baxillaanchu Anninke faale haˈrate sharrammeemmoha ikkiro, isi ninkewa shiqqi yaanno. (Yai. 4:8) Qullaawu Maxaafi, Yihowa iso hasiˈranno manna tuge agurannokkita buuxisannonke.