Soqqamaasinchu Phaawuloosi, Yihowa * ‘jawaante baalate Maganonna qarrinke baalu giddo jawaachishannonkeha’ ikkinota coyiˈrino. (2 Qorontoosi 1:3, 4) Konnira Qullaawu Maxaafi Maganu kaaˈlo hasiissannokki manchi nookkitanna iimi Anninke sheshifachishannonkekki gede wolqasira aleenni higanno qarri nookkita buuxisannonke.

Maganu sheshifachishankera hasiˈnummoro, assa hasiissannonkeri nooti egennantinote. Lawishshaho, akimete minira haˈra hoongummoro akimootu kaaˈlitannonke gari nooni? Qullaawu Maxaafi, “Maganunniwa shiqqi yiiyye; isino kiˈnewa shiqqi yaanno” yee jawaachishannonkehu iseraati.—Yaiqoobi 4:8.

Maganu ninkewa shiqannota afa dandiineemmohu hiittoonniiti? Umihunni, isi ninke kaaˈla hasiˈrannota marro marro hige coyiˈrino. ( Saaxine lai.) Layinkihunni, Maganu sheshifachishinonsahu biˈreno yannankerano noo manni coyiˈrinori tenne buuxisannonke.

Maganuwiinni kaaˈlo afiˈra hasiˈrannohu yannankera noohu batinyu manninte gede Moote Daawitira lowo qarri iillinosi. Isi Yihowa, “Kaaˈlote huucciˈreemmo huuccatto macciishshie” yee huucciˈrino. Yihowa huuccattosi macciishshiyya? Ee, macciishshino. Daawiti lede togo yiino: ‘Kaaˈlinoe daafira tashshi yaannoe.’—Faarso 28:2, 7.

Maganu Yesuusi manna sheshifachishanno gede assino. Maganu Yesuusira uyino loosi giddo mitu “wodana hiiqqantinore dhaawatenna” “wiˈlitannore baala [jawaachishate].” (Isayaasi 61:1, 2) Masaalotenni kulloonninte gede Yesuusi ‘daafurtinorenna duhu ayirrinonsare’ haja asse kaaˈlino.—Maatewoosi 11:28-30.

Yesuusi manna dancha gede amaale, insa shaqqillunni amadenna mito xiwamino manna hurse sheshifachishinonsa. Mitto barra dhiigu dhibbi amadinosi manchi Yesuusa, “Baxittoero hursattoera dandaatto” yee huucciˈri. Yesuusi konne mancho mararino daafira, “Baxoommohena huri!” yiinosi. (Maarqoosi 1:40, 41) Hakkiinnino hakku dhiigu dhibbi amadinosi manchi hurino.

Yannankera Maganu Beetti mitto mittonka sheshifachishannonkekki gede uullate aana dino. Ikkirono, “Jawaante baalate Magani” Annisi Yihowa, kaaˈlo afiˈra hasidhannore kaaˈla diagurino. (2 Qorontoosi 1:3) Hanni, Maganu manna sheshifachishannota shoole qara qara doogga laˈno.

• Qullaawa Maxaafa. “Umo assine Qullaawa Maxaaffa giddo borreessinoonnire baala rosiisankera borreessinoonni. Qullaawa Maxaaffa widoonni afiˈneemmo cincanna jawaante hexxo uyitannonke.”—Roomu Sokka 15:4.

• Qullaawa Ayyaana. Yesuusi reyihunni shiima yanna gedensaanni Kiristaanu Songo keere afidhino. Songo keere afidhanno gede assinori maati? ‘Magano waajjansaatinna Qullaawu Ayyaani kaaˈlo afiˈransaati.’ (Soqqamaasinete Looso 9:31) Maganunnihu qullaawu ayyaani lowo wolqa afiˈrino. Maganu ayyaanasi addi addi qarri giddo noore baala sheshifachishate horoonsiˈra dandaanno.

• Huuccatto. Qullaawu Maxaafi togo yee amaalannonke: “[Huuccattotenni] hasidhinoonni coye Maganoho kuˈle ikkinnina, mittu coyirano yaaddinoonte. Mannu hedora aleenni ikkinohu Maganu keeri, . . . wodanaˈnenna surreˈne agaranno.”—Filiphisiyusi Sokka 4:6, 7.

• Ammanate Roduuwinke qarru barra dodde iillitannonke. Soqqamaasinchu Phaawuloosi ledosi soqqantannori “qarrunna mitiimma” amaddusi yannara ‘jawaachishshinosita’ coyiˈrino.—Qolasiyaasi Sokka 4:11; 1 Teselonqe 3:7.

Miteekkite, ‘Tini baalanti doogo kaaˈlitannoehu hiittoonniiti’ yite hedattoha ikkara dandaanno. Hanni sai birxichira qummi assinihu addi addi qarri iillinonsa manni woˈnaalsha laˈno. Atino insa gede Maganu qarrantinore sheshifachishate eino qaale aye woteno wonshannota huwatatto; isi togo yiino: “Ama qaaqqose dogisiisidhannohu gede, anino kiˈne . . . hagiidhitinanni heedhinanni gede asseemmoˈne [“sheshifachisheemmoˈne,” NW].”—Isayaasi 66:13.