1, 2. Yihowa soqqamaanora hiittoo fonqoli iillannonsa?

UMIHU ammanamino manchi Abeelinni kayise yannanke geeshsha Maganu soqqamaano ammanansa daafira sharrantanni keeshshitino. Soqqamaasinchu Phaawuloosi Ibiraawete Kiristaanira, insa Yihowa hagiirsiisatenna isi atoote afiˈrate ‘lowo qarra adhitanni cincatenni kaajjite heedhinota’ kule borreessinonsa. (Ibi. 10:32-34) Phaawuloosi Kiristaanu sharramanno sharro, Giriikete gobbara atileetikisete heewo heewisantannori heewisantanno heewo ledo taashshino; kuri heewo giddo mitu qolchanshote, sharrotenna tuntuˈmote heewooti. (Ibi. 12:1, 4) Xaa yannara ninkeno hegere heeshsho afiˈrate heewisammanni heeˈnoommo; tenne yannara diinnanke hedonke billaallitanno gede assate, sarraaqqe karate, hagiirrenna albillittete baraarsha afiˈneemmokki gede assate woˈnaaltanno.

² Sheexaanenna isita busha alame qeelate ‘olama’ woy sharrama hasiissannonke. (Efe. 6:12) Tenne alame “qiisho” woy mishshige gede ikkinori daafannonkekki gede sharrama hasiissannonke. Kuri giddo mitu, alamete rosooti, alamete hayyoooti, bushu assooti, lawishshaho, amanyoote bainoreeti, sijaara agate, jingilli assitanno xagga adhatenna  ago quwa sayisiˈne agate. Qoleno, laanfenkenna hexxo mudhineemmo gede assannonke coye qeeˈlate sharrama hasiissannonke.—2 Qor. 10:3-6; Qol. 3:5-9.

3. Maganu diinnanke ledo sharrama dandiineemmo gede qajeelsannonkehu hiittoonniiti?

³ Ikkina, aleenni qummi assini diinna qeela dandiineemmo? Ee, dandiineemmo; kayinni sharrama hasiissannonke. Phaawuloosi isiniito tuntuˈmote heewo heewisantannori ledo taashshe togo yee coyiˈrino: “Tuntuˈmoˈya kayiseemmohu diilallo ganate diˈˈikkino.” (1 Qor. 9:26, NW) Tuntuˈmote heewo heewisamanno manchi ledosi heewisamannoha gargadhannonte gede, ninkeno diinnanke gargadha hasiissannonke. Yihowa tenne assa dandiineemmo gede qajeelsannonke; hattono kaaˈlannonke. Qoleno, Qaalisi widoonni heeshsho gatisanno biddishsha aannonke. Isi Qullaawu Maxaafi aana xintantino borruwa, songote gambooshshuwa, hattono woradunna qoqqowu gambooshshuwa widoonnino kaaˈlannonke. Ikkina ati rosatto roso harunsitanni nootto? Tenne assa hoogittoro diinnakki woˈmunni woˈma qeela didandaatto, tini qolte ‘diilallo ganate’ woˈnaalate gedeeti.

4. Bushu coyinni qeelammeemmokki gede gargadha dandiineemmohu hiittoonniiti?

⁴ Diinnanke hendoommokkinna wolqa baˈnoommo yannara gawajjitankera dandiitannohura ayewoteno baqqi yine agadha hasiissannonke. Qullaawu Maxaafi togo yee amaalannonke: “Busha danchu coyinni qeeli ikkinnina, bushu coyinni qeelantooti.” (Rom. 12:21) “Bushu coyinni qeelantooti” yitanno amaale busha coye qeela dandiineemmota leellishshannote. Busha coye qeelate agurrummokkinni sharrammeemmoha ikkiro, tenne assa dandiineemmo. Qorophanna sharrama agurrummoro kayinni, Sheexaanunna busha alamesi, hattono laanfenke qeeltankera dandiitanno. Konnira, Sheexaanu hexxo mudhite busha coye qeelate sharrama aguratto gede assahera horo wodhitooti!—1 Phe. 5:9.

5. (a) Maganu atoote afiˈrate agurrummokkinni sharramate kaaˈlannonkeri maati? (b) Aanchine Qullaawu Maxaafi giddo kulloonnihu hiikko manni dhagge ronseemmo?

⁵ Busha coye sharramme qeelate, sharrammanni heeˈnoommohu mayiraatiro qaaga hasiissannonke. Magano hagiirsiisatenna isi atoote afiˈrate Ibiraawoota 11:6 te noo hedo qaaga hasiissannonke; qummeeshshu togo yaanno: “Maganunniwa shiqqi yaanno manchi Maganu nootanna iso hasiˈranno mannirano baˈraaˈra aannota ammana hasiissannosi.” “Hasiˈra” yine tirroonnihu Giriikete qaali mitto coye diinaggaawe hasiˈranna hakkonne coye afiˈrate sharrama yitanno tiro afiˈrino. (Soq. 15:17) Qullaawu Maxaafi giddo Yihowa atoote afiˈrate diinaggaawe sharramino manni xagge no. Lawishshaho, Yaaqoobira, Raaheelira, Yooseefiranna Phaawuloosira hedonsanna mannimmansa gawajjanno coyi tuncu yiinonsa; ikkirono insa lawishshi agurrikki sharrama Yihowawiinni lowo atoote afiˈnanni gede assitannota leellishanno. Ikkina Maganu atoote afiˈrate sharraminohu shoolunku manni lawishsha harunsa dandiineemmohu hiittoonniiti?

6. Yaaqoobi agurikkinni sharramanno gede kaaˈlinosiri maati? Tini kiissinosihu hiittoonniiti? (Hanafote noo misile lai.)

⁶ Ammanamino manchi Yaaqoobi Yihowa baxannohura, ayyaanaamittete coye naadannohuranna, Yihowa sirchosi maassiˈrate eino qaale wonshannota woˈmunni woˈma ammanannohura agurikkinni sharramino. (Kal. 28:3, 4) Yaaqoobi 100 diro meddi yiinosiha ikkirono, Maganu atoote afiˈrate dandaamisi deerrinni sharraminohu iseraati; isi maala uddiˈrino sokkaanchi ledo nafa sharramino. (Kalaqama 32:24-28 nabbawi.) Yaaqoobira wolqaataamu sokkaanchi ledo sharramanno geeshshi wolqanna jawaante noosini? Dinosi! Ikkirono, isi sokkaanchu ledo sharramate murciˈrino; qoleno Yihowa atoote afiˈrate diinaggaawannoha ikkinota leellishino. Yaaqoobi  agurikkinni sharramasi kiissinosi. Yaaqoobira Israeeli yaannoha isira malino suˈma uyinoonnisi; Israeeli yaa “Maganu ledo sharramanno”, woy “Maganu sharramanno” yaate. Ee, Yaaqoobi Yihowa hagiirsiisino, hattono isi atoote afiˈrino; ninkeno konne atoote afiˈra hasiˈneemmo.

7. (a) Raaheelira tuncu yiinosehu dadillisanno coyi maati? (b) Raaheeli agurtukkinni sharrantinohunna gedensaanni atoote afidhinohu hiittoonniiti?

⁷ Yaaqoobiti muxxe minaama Raaheeli, Yihowa minaannisera eino qaale wonshanna laˈˈate baasa quqquxantino. Ikkollana, dandiinanniha lawannokki qarri tuncu yiinose. Ise ila diafidhino. Hatte yannara ila hooga lowo geeshsha dadillisannori gede assine laˈnanni. Ikkina, Raaheeli hexxo mudhitanno gede assannohunna wolqasera aleenni ikkino coyi tuncu yiise yannara, Maganu atoote afiˈrate agurtukkinni sharrantanno gede jawaante ikkinoseri maati? Ise horo hexxo dimudhitino. Hatteentenni, ise huuccattotenni ganyite giddoseta Maganoho kuˈlite agurtukkinni sharrantino. Yihowa Raaheeli laalaatte huuccidhino huuccatto macciishshino; ise yannate gedensaanni ooso iltino. Raaheeli mitte higge hagiirrunni togo yite coyidhinohu iseraati: “Jawaata sharro . . . sharrame qeeloomma”!—Kal. 30:8, 20-24.

8. Yooseefira tuncu yiinosihu buutote qarri maati? Yooseefi qarru tuncu yiisi yannara assinorinni maa ronseemmo?

⁸ Yaaqoobinna Raaheeli lawishshi, beettinsa Yooseefi ammanasi fonqolanno coyi tuncu yaannosi yannara maa assannoro afate kaaˈlisikki digatino. Yooseefi 17 dirihu heeˈreenna buutote qarri tuncu yiinosi. Roduuwisi iso hinaassino daafira, borojjimate hirtinosi. Qoleno, yannate gedensaanni beebbate Gibitsete usuru minira eessinisi yannara, seeda yanna hakko cince keeshsha hasiissinosi. (Kal. 37:23-28; 39:7-9, 20, 21) Ikkirono Yooseefi hexxo dimudhino; woy roduuwisira koˈme insa rabbisiˈrate dikaino. Hatteentenni, isi surresinna wodanisi Yihowa ledo noosi jaaloomi aana illachishanno gede assiˈrino. (Lew. 19:18; Rom. 12:17-21) Yooseefi lawishshinni lowore ronseemmo. Lawishshaho, anje heeˈneenna qarru tuncu yiinonkeha woy xa hexxo mudhineemmo gede assannori iillinonkeha ikkiro, agurrummokkinni sharrama hasiissannonke. Tenne assineemmoha ikkiro, Yihowa maassiˈrannonketa dihuluullammeemmo.—Kalaqama 39:21-23 nabbawi.

9. Yaaqoobi, Raaheelinna Yooseefi faale harunsine Yihowa atoote afiˈrate maa assa hasiissannonke?

⁹ Hanni xa atera tuncu yiinohe qarra hedi. Miteekkine taashsho xeˈinore assinoonniheha, mulla kaˈne gimboonniheha, woy qacifantoonniheha ikkara dandaanno. Woy mittu manchi hinaase beebbate suˈmakki huninoha ikkara dandaanno. Qeelante sharrama agurantenni, Yaaqoobi, Raaheelinna Yooseefi Yihowara hagiirrunni soqqamanni heeˈranno gede kaaˈlinonsari maatiro qaagate woˈnaali. Insa ayyaanaamittete coye lowo geeshsha naadannohura Maganu jaawaachishinonsa; hattono maassiˈrinonsa. Insa sharrama diagurino; hattono huucciˈrino huuccatto ledo sumuu yaannore assino. Heeˈnoommohu tini busha alame baˈara rakkino yannaraati; hakko daafira albillittete noonketa huluullissannokki hexxo seekkine cuˈmineemmo gede assannonkehu gari korkaati noonke! Ikkina ati Yihowawiinni atoote afiˈratenna iso hagiirsiisate sharrantanni nootto?

10, 11. (a) Maganu atoote afiˈrate sharrama hasiissannonkehu mayiraati? (b) Hexxo mudhineemmonna hedonke billaallitanno gede assitanno coyibba qeelle dancha doorsha doodhate mayi kaaˈlannonke?

¹⁰ Yihowa atoote afiˈrate sharrama hasiissannonkehu mayiraati? Batinyu mannira laanfensa qeeˈla qarra ikkitinonsa. Wolootu qolte, soqqanshote noonsati gara ikkitino lao baˈannonsakki gede sharrama hasiissinonsa. Ate qole fayyimmate qarri woy callimma amaddinohehanna tenne dandiite heeˈra hasiissinoheha ikkara dandaanno. Mitootaho qole koffi assinonsa mannira gatona yaa qarra ikkitannonsa. Yihowara soqqammoommo  diri aye geeshshiha ikkirono, baalinke ammanantinore kiisanno Magani Yihowara soqqammeemmokki gede guficho ikkitannonke coyibba qeelate sharrama hasiissannonke.

¹¹ Dancha doorsha doodhanna Maganu fajjo ledo sumuu yee heeˈra shota ikkitinokkiti egennantinote. Hakko iso xagaraamu wodaninke gara ikkinokkire assineemmo gede xixxiiwannonkeha ikkiro tenne assa qarra ikkitankera dandiitanno. (Erm. 17:9) Wodanikki gara ikkinokkire assatto gede xixxiiwanni nooheta wodanchitoro, qullaawa ayyaana afiˈrate huuccatto assiˈri. Huuccattonna qullaawu ayyaani gara ikkinota afoottore assattonna Yihowa hagiirsiisannore doodhatto gede kaaˈlannohe. Huucciˈrootto huuccatto ledo sumuu yaannore assi. Barru baala mito Qullaawu Maxaafi gafa nabbawate woˈnaali; hattono hojju xiinxallo xiinxallate woy ganyite Maatete Magansiˈra assiˈrate yanna gaaˈmi.—Faarso 119:32 nabbawi.

12, 13. Lamu Kiristaani busha yorto qeeˈlanno gede kaaˈlinonsari maati?

¹² Lowo roduuwa Maganu Qaali, qullaawu ayyaanisinna Qullaawu Maxaafi aana xintantino borruwanke gara ikkitinokki hedo qeeˈlanno gede kaaˈlitinonsa. Mittu 17 diri beetti Sadaasa 8, 2003nni fultinote Baqqi Yiiyye! (Amaaru Afoo) yinanni metseete giddo “Gara Ikkitinokki Yorto Sharrante Qeela Dandaattohu Hiittoonniiti?” yaanno birxicho nabbawino. Tenne assasi maaho kaaˈlitusi? Isi togo yiino: “Gara ikkitinokki hedo hooˈlate sharramanni keeshshoommo. Hakkonni birxichi giddo ‘Batinyu mannira busha yorto qeela qarra ikkitinonsa’ yitanno hedo nabbawaˈya  wolu roduuwirano togoo coyi iillannonsata huwateemmo gede kaaˈlitinoe. Togoo yorto qeelate sharrameemmohu ane calla ikkoommokkita huwatoommo.” Konne beetto Birra 8, 2003nni fulinohu “Adhanna Adhama Lainohunni Mannu Doodhannori Maganoho Dhiwannosi?” yaanno birxichino kaaˈlinosi. Isi hakkonne birxicho nabbawi yannara mitootaho iillannonsa qarri ‘mannimmansa utu gede qasannoha’ ikkinota wodanchino. (2 Qor. 12:7 ) Insa danchu amanyootinsa baˈˈannokki gede assiˈrate sharrama hasiissinonsaha ikkirono, albillittete dancha hexxo noonsa. Isi togo yiino: “Konni daafira barru baala ammanama dandeemmo yee hedeemmo. Tenne busha alame giddo Yihowa ninke barru barrunkunni ammanamme heeˈneemmo gede dirijjitesi widoonni kaaˈlannonkehura lowo geeshsha galateemmosi.”

¹³ Hanni Ameerikaho heedhannote mitte rodoo woˈnaalsha laˈno. Ise togo yite borreessitino: “Hasiissannonke sagale hasiisse noo yannara ayewoteno shiqishshinanninke daafira galateemmaˈne. Fultanno birxichuwa duucha wote anera borreessinoonnihu gede asse hedeemma. Lowo diro, Yihowa giwannota busha yorto qeelate sharramanni keeshshoomma. Mito wote hexxo mudhe sharrama agurate hedeemma. Yihowa maarannohanna gatona yaannoha ikkinota afoommaha ikkirono, hattenne busha yorto woˈmunni woˈma giwoommakkihura isi kaaˈlo hasiissannoekkiha lawinoe. Tini heeshshoˈya qarraataame ikkitanno gede assitinoe. . . . Badheessa 15, 2013nnite Agarooshshu Shaera ‘Yihowa Egennino Wodani Noohe?’ yaanno birxicho nabbawumma gedensaanni Yihowa kaaˈlaera hasiˈrannota huwatoomma.”

14. (a) Phaawuloosi sharramino sharro ma garinni laino? (b) Laanfenke sharramme qeela dandiineemmohu hiittoonniiti?

¹⁴ Roomu Sokka 7:21-25 nabbawi. Phaawuloosi heeshshosi giddo tuncu yiinosirinni laanfenkenna busha yortonke qeeˈlate sharrama shota ikkitinokkita afino. Ikkollana, isi huuccattotenni Yihowa addaxxenna Yesuusite wodote kakkalora ammana noosita leellishe tenne yorto qeela dandaannota huwatino. Ninkena? Laanfenke qeeltannonkekki gede sharrammeemmoha ikkiro qeela dandiineemmo. Hiittoonni? Phaawuloosi lawishsha harunsine, umonke addaxxa agurre Yihowa addaxxineemmohanna wodote kakkalora ammana noonketa leellinsheemmoha ikkiro tenne assa dandiineemmo.

15. Huuccatto ammanamme heeˈneemmonna qarra dandiine heeˈneemmo gede kaaˈlitannonkehu hiittoonniiti?

¹⁵ Maganu mitto coye mageeshshi geeshsha hasiˈnoommoro leellinshammora hasiˈranno woti no. Lawishshaho, ninke woy maatenke miila buutote dhibbi amadiro, woy mannu taashsho xeˈinore assinkero maa assa hasiissannonke? Ammanamme heeˈneemmo gede, hagiirrinke baˈˈannokki gedenna ayyaanaamittetenni jawaante heeˈneemmo gede kaaˈlankera huuccattotenni Yihowara kuˈline iso addaxxineemmota leellisha dandiineemmo. (Isa. 12:2) Phaawuloosi yannarano ikko xaa yannara noo manni woˈnaalshi huuccatto wolqanke haaˈroomitanno gedenna kaajjine heeˈneemmo gede kaaˈlitannonketa leellishanno.

16, 17. Ma assate murciˈrootto?

¹⁶ Daawuloosi hexxo mudhite woy qeelante sharrama agurittoro baasa hagiidhanno. Hakko daafira, ‘dancha ikkinoha adhi’ woy seekkite cuˈmiri. (1 Tes. 5:21) Sheexaane, isita busha alamenna busha yorto sharrante qeela dandaattota huluullantooti. Maganu ate jawaachishate dandoo noosita woˈmunni woˈma ammanakki tenne assate kaaˈlitannohe.—2 Qor. 4:7-9; Gal. 6:9.

¹⁷ Konni daafira, hexxo mudhitooti; hattono Yihowa atoote afiˈrate sharramakki agurtooti. Qoleno, Yihowa ‘dancha atoote batise aannoheta’ horo huluullantooti.—Mil. 3:10.