1-2. Maatewoosi 5:11 kultanno garinni fonqolu iillannonke woyite ma ikka hasiissannonke?

YESUUSI harunsaanosi addinta hagiirraamma ikkitannota kulinonsa. Qoleno iso baxxannorira fonqolu iillannonsata coyiˈrino. (Mat. 10:22, 23; Luq. 6:20-23) Yesuusi rosaano ikkanke hagiirsiissannonke. Kayinni maateˈne gibbaˈnera, gashshootu darantinanni gede assaˈnera woy ledoˈne rossannorinna loossannori gara ikkinokkire assitinanni gede xixxiibbaˈnera dandiitannota heddinanni woyite mayi macciishshamannoˈne? Tenne hendeemmo woyite yaandeemmoha ikkara dandaanno.

² Batinyu manni dartu hagiirsiisannore diˈˈikkino yee hedanno. Maganu Qaali kayinni dartu iillannonke woyite hagiidhineemmo gede kulannonke. Lawishshaho rosaanchu Yaiqoobi fonqolu iillannonke woyite quwa saˈne dadillantenni hagiidha hasiissannonketa borreessino. (Yai. 1:2, 12) Yesuusino dartu iillannonke woyite nafa hagiidha hasiissannonketa coyiˈrino. (Maatewoosi 5:11 nabbawi.) Ikkina fonqolu iillinkerono hagiirrinke baˈˈannokki gede assiˈra dandiineemmohu hiittoonniiti? Yaiqoobi umi xibbi diri Kiristaanira borreessino sokka giddonni mite hedo xiinxalline lowore rosa dandiineemmo. Hanni balanxe kuri Kiristaanira iillinonsaha mito fonqolo laˈno.

3. Yaiqoobi Yesuusi rosaancho ikkihunni shiima yanna gedensaanni mayi ikkino?

³ Yesuusi rodii Yaiqoobi rosaancho ikkihunni shiima yanna gedensaanni, Yerusaalamete heeˈranno Kiristaanira dartu iillinonsa.  (Soq. 1:14; 5:17, 18) Rosaancho Isxifaanoosi shinita, batinyu Kiristaani katamunni fule xooqe ‘Yihudunna Samaariyu gobbara billaallino;’ gedensaanni insa Qophiroosinna Antsookiyu geeshsha iillitino. (Soq. 7:58–8:1; 11:19) Hatte yannara insara lowo qarri iillinonsati dihuluullissannote. Ikkirono insa martuwa baalawa quqquxante dancha duduwo kula diagurtino; konnira Roomu Gashshooti giddo duuchawa songuwa xintantino. (1 Phe. 1:1) Ikkirono hakkunni gedensaannino lowo qarri iillinonsa.

4. Umi xibbi diri Kiristaanira wolu mayi fonqoli iillinonsa?

⁴ Umi xibbi diri Kiristaanira lowo fonqoli iillinonsa. Lawishshaho 50 M.D. balla Roomu Gashshaanchi Qelawudewoosi baalunku Yihudooti Roomunni fultanno gede hajajino. Hakko daafira Kiristaana ikkino Yihudi qaensa agure wolewa haˈra hasiissinonsa. (Soq. 18:1-3) Soqqamaasinchu Phaawuloosi 61 M.D. balla ammanate roduuwasi mannu albaanni xonnoonninsata, usurroonninsatanna jajjansa wolqatenni adhinoonnita borreessino. (Ibi. 10:32-34) Wolu manninte gede Kiristaanano buxima amaddinonsa hattono xibbu waadinonsa.—Rom. 15:26; Fil. 2:25-27.

5. Aanchine hiikkuri xaˈmuwara dawaro afiˈneemmo?

⁵ Yaiqoobi 62 M.D. albaanni sokka borreessi woyite, ammanate roduuwisira iillanni noonsa fonqolo seekke afino. Yihowa Yaiqoobi sokka borreessanno gede ayyaanisinni kakkayisinosi; tini sokka Kiristaanu fonqolu iillinsarono hagiirrinsa baˈˈannokki gede assiˈrate kaaˈlitinonsa. Hanni Yaiqoobi borreessino sokka xiinxalline aante noo xaˈmuwara dawaro afiˈrate woˈnaallo: Yaiqoobi borreessinohu hiittoo hagiirri daafiraati? Xaa Yannara Kiristaanu hagiirrensa hooganno gede assara dandaannori maati? Iillannonke fonqoli ikkihano ikkiro hayyo, ammananna worbimma hagiirrinke baˈˈannokki gede kaaˈlitannonkehu hiittoonniiti?

6. Luqaasi 6:22, 23 kultanno garinni Kiristaanu fonqolu iillinsarono hagiirraamma ikka dandaannohu mayiraati?

⁶ Lowo manni hagiirraamma ikka dandiinannihu fayyimma, lowo woxinna keeru noo maate heedhuro calla ikkinohu gede asse hedanno. Yaiqoobi borreessinohu kayinni, Maganu ayyaani gumi wido ikkino hagiirri daafiraati ikkinnina heeshshonke giddo ikkannorinni afiˈneemmo hagiirri daafira diˈˈikkino. (Gal. 5:22) Mittu Kiristaanchi addinta hagiidhanno gede assitannositi Yihowa hagiirsiisanninna Yesuusi lawishsha harunsanni noota afasiiti. (Luqaasi 6:22, 23 nabbawi; Qol. 1:10, 11) Kiristaanu hagiirri faanoosete giddo noo caabbichi gedeeti; togoo hagiirri burqannohu wodanu giddonniiti. Kuni hagiirri dhiwammummoro woy woxe hoongummoro xoannoha woy baˈˈannoha diˈˈikkino. Maatenke woy wolu manni qacifatinkerono woy giwinkerono hagiirraamma ikka dandiineemmo. Gibbannonkeri hagiirrenke hunate woˈnaalturono, tini hagiirrinke lexxanno gede assitanno ikkinnina baˈˈanno gede diassitanno. Ammanankenni kainohunni fonqolu iillinkero tini addinta Yesuusi rosaano ikkinoommota leellishshannote. (Mat. 10:22; 24:9; Yoh. 15:20) Yaiqoobi, “Roduuwaˈya! Addi addi jifama iillituˈnero, tashshi assanno coye afidhinoonnihu gede assitine kiirre” yee borreessasi garankolla.—Yai. 1:2.

7-8. Iillannonke fonqoli ammananke kaajjitanno gede assannohu hiittoonniiti?

⁷ Yaiqoobi Kiristaanu buutote fonqolo nafa dandee saˈˈanno gede assannonsaha wole korkaatano kulino. Isi, “Ammanaˈne jifanturo, cinca afidhinanni gede assitanno” yiino. (Yai. 1:3) Fonqolu siwiila tumate kaaˈlitanno giira gedeeti. Giirate giddo worre fushshine qiissinihu gedensaanni siwiilu kaajjanno. Hatteente gede fonqolo dandiine saˈneemmo woyite ammananke kaajjitanno. Yaiqoobi togo yee borreessino: “Cincatenni kaajjaˈne mitturino xeiˈnekkinni guutanna woˈma manna assitannoˈneta ikkito.” (Yai. 1:4) Iillannonke fonqoli ammananke kaajjishinota laˈneemmo woyite fonqolo hagiirrunni dandiine saˈneemmo.

⁸ Yaiqoobi tenne sokkara hagiirrinke baˈˈanno gede assara dandaannoha mito qarrano qummi assino. Kuni qarri maati? Qeelle saˈˈa dandiineemmohu hiittoonniiti?

9. Hayyo hasiissannonkehu mayiraati?

⁹ Qarra ikkannore: Ma assineemmoro afa hooga. Fonqolu iillannonke woyite Yihowa hagiirsiisannore, roduuwanke kaaˈlannorenna ammanamme heeˈneemmo gede kaaˈlannonkere assa hasiˈneemmo; tennera qole Yihowa kaaˈlo hasiissannonke. (Erm. 10:23) Maa assa hasiissannonkeronna gibbannonkerira mayineemmoro afate hayyo hasiissannonke. Maa assineemmoro afa hoongummoro hexxo mudhinammora  dandiineemmo; tini qolte hagiirrinke baˈˈanno gede assitara dandiitanno.

10. Yaiqoobi 1:5 hayyo afiˈrate maa assa hasiissannonketa kultanno?

¹⁰ Mala: Yihowa hayyo aannohe gede huucciˈri. Iillannonke qarra dandiine saˈˈate, gara ikkinore assineemmo gede hayyo aankera balanxe Yihowa huucciˈra hasiissannonke. (Yaiqoobi 1:5 nabbawi.) Yihowa huuccattonkera bayichonko dawaro qolinokkiha lawinkero ma assa hasiissannonke? Agurrummokkinni huucciˈra hasiissannonke. Yihowa hayyo aannonke gede agurrummokkinni huucciˈneemmotera dicaaccaawanno. Hattono dihanqannonke. Iimi Anninke iillinonke fonqolo dandiine saˈˈate kaaˈlitannonke hayyo aannonke gede huucciˈnummoro aannonke. (Far. 25:12, 13) Isi iillinonke fonqolono afino daafira mararannonke, hattono ninke kaaˈlate quqquxamanno. Tini hagiidhineemmo gede assitannonke! Ikkina Yihowa hayyo aannonkehu hiittoonniiti?

11. Hayyo afiˈrate wolere ma assa hasiissannonke?

¹¹ Yihowa Qaalisi widoonni hayyo aannonke. (Law. 2:6) Tenne hayyo afiˈrate Qaalesinna Qullaawu Maxaafi aana xintantino borro xiinxalla hasiissannonke. Ikkollana egenno gamba assiˈratenni sainore assa hasiissannonke. Maganu aannonke amaale loosu aana hosiinse isi hayyo harunsa hasiissannonke. Yaiqoobi, “Qaalesi guuttinannire ikke ikkinnina, . . . macciishshaasine calla ikkitinoonte” yiino. (Yai. 1:22) Maganu aannonke amaale harunsineemmoha ikkiro, keere banxeemmore, owaatanna gatona yineemmore ikkineemmo. (Yai. 3:17) Tini akatta hagiirrinke baikkinni iillannonke fonqolo baala dandiine saˈneemmo gede kaaˈlitannonke.

12. Qullaawu Maxaafi yaannore seekke afa hasiissannonkehu mayiraati?

¹² Maganu Qaali hincilaallote gede biddi assiˈra hasiissannonkere bande anfe biddi assiˈneemmo gede kaaˈlannonke. (Yai. 1: 23-25) Lawishshaho Maganu Qaale xiinxallinummohu gedensaanni hanqonke eemadha hasiissannonketa huwantammora dandiineemmo. Hanqisannori tuncu yaannonke woyite Yihowa kaaˈlonni jooguulle ikka dandiineemmo gara ronseemmo. Jooguulle ikkinummoro iillinonkere qeelle saˈneemmo. Qoleno heeshshi gotti assine hedanna woyyinore doodha dandiineemmo. (Yai. 3:13) Qullaawu Maxaafi yaannore seekke afa lowore kaaˈlitannonke!

13. Qullaawu Maxaafi giddo kulloonni manni lawishsha xiinxalla hasiissannonkehu mayiraati?

¹³ Mito woyite maa biddi assiˈra hasiissannonkero anfeemmohu soˈnummo gedensaanniiti. Tini qarrame rosate. Hayyo afiˈrate qarramme rosantenni wolootu assitino danchummanninna bunshenni rosa woyyitanno. Yaiqoobi Qullaawu Maxaafi giddo kulloonniri lawishshaho, Abirihaami, Reaabi, Iyyoobinna Eeliyaasi lawishshinni ronseemmo gede jawaachishinonkehu iseraati. (Yai. 2:21-26; 5:10, 11, 17, 18) Kuri ammanantinori Yihowa soqqamaano, hagiirrensa hunara dandaanno fonqolo qeelte saˈino. Tini ninkeno Yihowa kaaˈlonni fonqolo qeelle saˈˈa dandiineemmota leellishshanno.

14-15. Huluullisinonkere wodhine agura hasiissannonkekkihu mayiraati?

¹⁴ Qarra ikkannore: Huluullo. Mito woyite Maganu Qaali giddo nooha mito coye huwata qarra ikkitankera dandiitanno. Woy Yihowa huuccattonkera dawaro ninke hendoommo garinni qolinonkekkiha ikkara dandaanno. Tini huluullo kalaqqankera dandiitanno. Wodhine agurrummoro huluullo ammananke jaawishsharanna Yihowa ledo noonke jaalooma huntara dandiitanno. (Yai. 1:7, 8) Qoleno albillittete daafira noonke hexxono baˈanno gede assitara dandiitanno.

¹⁵ Soqqamaasinchu Phaawuloosi hexxonke mokkollichu gede ikkitinota coyiˈrino. (Ibi. 6:19) Kuni mokkollichi markaawete usurroonni sansalatera woy siiwora qaccete heeˈrannoho jawa siwiilaati. Mokkollichu bubbe dagganno woyite markaawe milli miliqqi yitannokki gedenna hadhe kinnate ledo kibbantannokki gede kaaˈlanno. Mokkollichu kaaˈlannohu markaawete ledo xaadinse usurroonni sansalate woy siiwo taˈˈa hoogguro callaati. Sansalate cilturo taˈara dandiitannonte gede huluullono wodhine agurrummoro ammananke ciiggishshara dandiitanno. Huluullamanno manchi fonqolu iillannosi woyite Yihowa eino qaalira noosi ammana baˈara dandiitanno. Ammananke baˈuro hexxonkeno baˈanno. Yaiqoobi yiinonte gede “Huluullamanno manchi bubbe ganteenna shashshafaminoha baaru dambala lawanno.” (Yai. 1:6) Togoo manchi horo hagiidha hoogara dandaanno.

16. Huluullammeemmoha ikkiro ma assa hasiissannonke?

¹⁶ Mala: Huluullo hooˈlite ammanakki kaajjishiˈri. Lame wodana ikkitooti. Masaalaanchu Eeliyaasi yannara Yihowa manni lame wodana ikkino. Hakko daafira Eeliyaasi togo yiinonsa: “Lamu wodaninni dintinanni heedhinannihu mamooti geeshshaati? Kaaliiqi Maganohoro iso magansidhe! Woy Baˈˈaali Maganohoro Baˈˈaali magansidhe!” (1 Mot. 18:21) Ninkeno lame wodana ikka dihasiissannonke. Yihowa Magano ikkinota, Qullaawu Maxaafi Qaalesi ikkinotanna Yihowa Farciˈraasine isi manna ikkitinota seekkine xiinxalline buuxiˈra hasiissannonke. (1 Tes. 5:21) Togo assanke huluullo hunte ammananke kaajjishshanno. Huluullo hooˈlate kaaˈlo hasiissunkero kaaˈlitannonke gede songote cimeeyyera hasaapha dandiineemmo. Yihowara hagiirrunni soqqammanni heeˈrate huluullo ranke hooˈla hasiissannonke!

17. Hexxo mudhinummoro ma ikkinammora dandiineemmo?

¹⁷ Qarra ikkannore: Hexxo mudha. Maganu Qaali, “Qarru barra wolqiweelittoro, jawaatte diafatto” yaanno. (Law. 24:10) Hexxo mudhineemmoha ikkiro hagiirrinke mulenni baˈˈara dandaanno.

18. Cincate yaa mayyaate?

 ¹⁸ Mala: Cincite saˈˈate kaaˈlitanno worbimma aannohe gede Yihowa addaxxi. Iillannonke fonqolo dandee saˈˈate woy cincate worbuulle ikka hasiissannonke. (Yai. 5:11) Yaiqoobi kowiicho ‘cinca’ yaanno qaale horoonsiˈrinohu kaajje uurranno mancho kulateeti. Tini diinnasi qassasira dagganni noota afanni heeˈrenni worbimmatenni milli miliqqi yiikkinni uurrino olamaancho hendeemmo gede assitankera dandiitanno.

19. Soqqamaasinchu Phaawuloosi lawishshinni maa ronseemmo?

¹⁹ Soqqamaasinchu Phaawuloosi worbahonna cincaho. Isi wolqa baino woyiti nooha ikkirono, jawaante aannosi gede Yihowa addaxxino daafira cince saino. (2 Qor. 4:7; 12:8-10) Ninkeno umonke heeshshi assine Yihowa kaaˈlo hasiissannonketa ammannummoro togoo worbimmanna jawaante afiˈra dandiineemmo.—Yai. 4:10.

20-21. Maa addaxxa dandiineemmo?

²⁰ Fonqolu iillannonkehu Yihowa qorichishanni noonke daafira diˈˈikkino. Yaiqoobi togo yiino: “Ayino jifamanno yannara, ‘Maganu jifinoe’ yoonke. Maganu bushu coyinni dijifanno; horontanni isi ayeno dijifanno.” (Yai. 1:13) Tenne ammanneemmoha ikkiro, baxillaanchu iimi Anninkewa albinni roore shinqeemmo.—Yai. 4:8.

²¹ Yihowa ‘disoorramanno.’ (Yai. 1:17) Isi umi xibbi diro fonqolu iillinonsa Kiristaana kaaˈlinsante gede ninkeno kaaˈlannonke. Yihowa hayyo, ammananna worbimma afiˈratto gede kaaˈlahera jaatte huucciˈri. Isi huuccattokki macciishshannohe. Hatto assittoro fonqolu iilliherono hagiirraamo ikkatto gede kaaˈlannoheta addaxxa dandaatto!