1-2. Maatewoosi 5:11 kultanno garinni fonqolu iillannonke woyite ma ikka hasiissannonke?

 YESUUSI harunsaanosi addinta hagiirraamma ikkitannota kulinonsa. Qoleno iso baxxannorira fonqolu iillannonsata coyiꞌrino. (Mat. 10:22, 23; Luq. 6:20-23) Yesuusi rosaano ikkanke hagiirsiissannonke. Kayinni maateꞌne gibbaꞌnera, gashshootu darantinanni gede assaꞌnera woy ledoꞌne rossannorinna loossannori gara ikkinokkire assitinanni gede xixxiibbaꞌnera dandiitannota heddinanni woyite mayi macciishshamannoꞌne? Tenne hendeemmo woyite yaandeemmoha ikkara dandaanno.

² Batinyu manni dartu hagiirsiisannore diꞌꞌikkino yee hedanno. Maganu Qaali kayinni dartu iillannonke woyite hagiidhineemmo gede kulannonke. Lawishshaho rosaanchu Yaiqoobi fonqolu iillannonke woyite quwa saꞌne dadillantenni hagiidha hasiissannonketa borreessino. (Yai. 1:2, 12) Yesuusino dartu iillannonke woyite nafa hagiidha hasiissannonketa coyiꞌrino. (Maatewoosi 5:11 nabbawi.) Ikkina fonqolu iillinkerono hagiirrinke baꞌꞌannokki gede assiꞌra dandiineemmohu hiittoonniiti? Yaiqoobi umi xibbi diri Kiristaanira borreessino sokka giddonni mite hedo xiinxalline lowore rosa dandiineemmo. Hanni balanxe kuri Kiristaanira iillinonsaha mito fonqolo laꞌno.

3. Yaiqoobi Yesuusi rosaancho ikkihunni shiima yanna gedensaanni mayi ikkino?

³ Yesuusi rodii Yaiqoobi rosaancho ikkihunni shiima yanna gedensaanni, Yerusaalamete heeꞌranno Kiristaanira dartu iillinonsa.  (Soq. 1:14; 5:17, 18) Rosaancho Isxifaanoosi shinita, batinyu Kiristaani katamunni fule xooqe ‘Yihudunna Samaariyu gobbara billaallino;’ gedensaanni insa Qophiroosinna Antsookiyu geeshsha iillitino. (Soq. 7:58–8:1; 11:19) Hatte yannara insara lowo qarri iillinonsati dihuluullissannote. Ikkirono insa martuwa baalawa quqquxante dancha duduwo kula diagurtino; konnira Roomu Gashshooti giddo duuchawa songuwa xintantino. (1 Phe. 1:1) Ikkirono hakkunni gedensaannino lowo qarri iillinonsa.

4. Umi xibbi diri Kiristaanira wolu mayi fonqoli iillinonsa?

⁴ Umi xibbi diri Kiristaanira lowo fonqoli iillinonsa. Lawishshaho 50 M.D. balla Roomu Gashshaanchi Qelawudewoosi baalunku Yihudooti Roomunni fultanno gede hajajino. Hakko daafira Kiristaana ikkino Yihudi qaensa agure wolewa haꞌra hasiissinonsa. (Soq. 18:1-3) Soqqamaasinchu Phaawuloosi 61 M.D. balla ammanate roduuwasi mannu albaanni xonnoonninsata, usurroonninsatanna jajjansa wolqatenni adhinoonnita borreessino. (Ibi. 10:32-34) Wolu manninte gede Kiristaanano buxima amaddinonsa hattono xibbu waadinonsa.—Rom. 15:26; Fil. 2:25-27.

5. Aanchine hiikkuri xaꞌmuwara dawaro afiꞌneemmo?

⁵ Yaiqoobi 62 M.D. albaanni sokka borreessi woyite, ammanate roduuwisira iillanni noonsa fonqolo seekke afino. Yihowa Yaiqoobi sokka borreessanno gede ayyaanisinni kakkayisinosi; tini sokka Kiristaanu fonqolu iillinsarono hagiirrinsa baꞌꞌannokki gede assiꞌrate kaaꞌlitinonsa. Hanni Yaiqoobi borreessino sokka xiinxalline aante noo xaꞌmuwara dawaro afiꞌrate woꞌnaallo: Yaiqoobi borreessinohu hiittoo hagiirri daafiraati? Xaa Yannara Kiristaanu hagiirrensa hooganno gede assara dandaannori maati? Iillannonke fonqoli ikkihano ikkiro hayyo, ammananna worbimma hagiirrinke baꞌꞌannokki gede kaaꞌlitannonkehu hiittoonniiti?

6. Luqaasi 6:22, 23 kultanno garinni Kiristaanu fonqolu iillinsarono hagiirraamma ikka dandaannohu mayiraati?

⁶ Lowo manni hagiirraamma ikka dandiinannihu fayyimma, lowo woxinna keeru noo maate heedhuro calla ikkinohu gede asse hedanno. Yaiqoobi borreessinohu kayinni, Maganu ayyaani gumi wido ikkino hagiirri daafiraati ikkinnina heeshshonke giddo ikkannorinni afiꞌneemmo hagiirri daafira diꞌꞌikkino. (Gal. 5:22) Mittu Kiristaanchi addinta hagiidhanno gede assitannositi Yihowa hagiirsiisanninna Yesuusi lawishsha harunsanni noota afasiiti. (Luqaasi 6:22, 23 nabbawi; Qol. 1:10, 11) Kiristaanu hagiirri faanoosete giddo noo caabbichi gedeeti; togoo hagiirri burqannohu wodanu giddonniiti. Kuni hagiirri dhiwammummoro woy woxe hoongummoro xoannoha woy baꞌꞌannoha diꞌꞌikkino. Maatenke woy wolu manni qacifatinkerono woy giwinkerono hagiirraamma ikka dandiineemmo. Gibbannonkeri hagiirrenke hunate woꞌnaalturono, tini hagiirrinke lexxanno gede assitanno ikkinnina baꞌꞌanno gede diassitanno. Ammanankenni kainohunni fonqolu iillinkero tini addinta Yesuusi rosaano ikkinoommota leellishshannote. (Mat. 10:22; 24:9; Yoh. 15:20) Yaiqoobi, “Roduuwaꞌya! Addi addi jifama iillituꞌnero, tashshi assanno coye afidhinoonnihu gede assitine kiirre” yee borreessasi garankolla.—Yai. 1:2.

7-8. Iillannonke fonqoli ammananke kaajjitanno gede assannohu hiittoonniiti?

⁷ Yaiqoobi Kiristaanu buutote fonqolo nafa dandee saꞌꞌanno gede assannonsaha wole korkaatano kulino. Isi, “Ammanaꞌne jifanturo, cinca afidhinanni gede assitanno” yiino. (Yai. 1:3) Fonqolu siwiila tumate kaaꞌlitanno giira gedeeti. Giirate giddo worre fushshine qiissinihu gedensaanni siwiilu kaajjanno. Hatteente gede fonqolo dandiine saꞌneemmo woyite ammananke kaajjitanno. Yaiqoobi togo yee borreessino: “Cincatenni kaajjaꞌne mitturino xeiꞌnekkinni guutanna woꞌma manna assitannoꞌneta ikkito.” (Yai. 1:4) Iillannonke fonqoli ammananke kaajjishinota laꞌneemmo woyite fonqolo hagiirrunni dandiine saꞌneemmo.

⁸ Yaiqoobi tenne sokkara hagiirrinke baꞌꞌanno gede assara dandaannoha mito qarrano qummi assino. Kuni qarri maati? Qeelle saꞌꞌa dandiineemmohu hiittoonniiti?

9. Hayyo hasiissannonkehu mayiraati?

⁹ Qarra ikkannore: Ma assineemmoro afa hooga. Fonqolu iillannonke woyite Yihowa hagiirsiisannore, roduuwanke kaaꞌlannorenna ammanamme heeꞌneemmo gede kaaꞌlannonkere assa hasiꞌneemmo; tennera qole Yihowa kaaꞌlo hasiissannonke. (Erm. 10:23) Maa assa hasiissannonkeronna gibbannonkerira mayineemmoro afate hayyo hasiissannonke. Maa assineemmoro afa hoongummoro hexxo mudhinammora  dandiineemmo; tini qolte hagiirrinke baꞌꞌanno gede assitara dandiitanno.

10. Yaiqoobi 1:5 hayyo afiꞌrate maa assa hasiissannonketa kultanno?

¹⁰ Mala: Yihowa hayyo aannohe gede huucciꞌri. Iillannonke qarra dandiine saꞌꞌate, gara ikkinore assineemmo gede hayyo aankera balanxe Yihowa huucciꞌra hasiissannonke. (Yaiqoobi 1:5 nabbawi.) Yihowa huuccattonkera bayichonko dawaro qolinokkiha lawinkero ma assa hasiissannonke? Agurrummokkinni huucciꞌra hasiissannonke. Yihowa hayyo aannonke gede agurrummokkinni huucciꞌneemmotera dicaaccaawanno. Hattono dihanqannonke. Iimi Anninke iillinonke fonqolo dandiine saꞌꞌate kaaꞌlitannonke hayyo aannonke gede huucciꞌnummoro aannonke. (Far. 25:12, 13) Isi iillinonke fonqolono afino daafira mararannonke, hattono ninke kaaꞌlate quqquxamanno. Tini hagiidhineemmo gede assitannonke! Ikkina Yihowa hayyo aannonkehu hiittoonniiti?

11. Hayyo afiꞌrate wolere ma assa hasiissannonke?

¹¹ Yihowa Qaalisi widoonni hayyo aannonke. (Law. 2:6) Tenne hayyo afiꞌrate Qaalesinna Qullaawu Maxaafi aana xintantino borro xiinxalla hasiissannonke. Ikkollana egenno gamba assiꞌratenni sainore assa hasiissannonke. Maganu aannonke amaale loosu aana hosiinse isi hayyo harunsa hasiissannonke. Yaiqoobi, “Qaalesi guuttinannire ikke ikkinnina, . . . macciishshaasine calla ikkitinoonte” yiino. (Yai. 1:22) Maganu aannonke amaale harunsineemmoha ikkiro, keere banxeemmore, owaatanna gatona yineemmore ikkineemmo. (Yai. 3:17) Tini akatta hagiirrinke baikkinni iillannonke fonqolo baala dandiine saꞌneemmo gede kaaꞌlitannonke.

12. Qullaawu Maxaafi yaannore seekke afa hasiissannonkehu mayiraati?

¹² Maganu Qaali hincilaallote gede biddi assiꞌra hasiissannonkere bande anfe biddi assiꞌneemmo gede kaaꞌlannonke. (Yai. 1: 23-25) Lawishshaho Maganu Qaale xiinxallinummohu gedensaanni hanqonke eemadha hasiissannonketa huwantammora dandiineemmo. Hanqisannori tuncu yaannonke woyite Yihowa kaaꞌlonni jooguulle ikka dandiineemmo gara ronseemmo. Jooguulle ikkinummoro iillinonkere qeelle saꞌneemmo. Qoleno heeshshi gotti assine hedanna woyyinore doodha dandiineemmo. (Yai. 3:13) Qullaawu Maxaafi yaannore seekke afa lowore kaaꞌlitannonke!

13. Qullaawu Maxaafi giddo kulloonni manni lawishsha xiinxalla hasiissannonkehu mayiraati?

¹³ Mito woyite maa biddi assiꞌra hasiissannonkero anfeemmohu soꞌnummo gedensaanniiti. Tini qarrame rosate. Hayyo afiꞌrate qarramme rosantenni wolootu assitino danchummanninna bunshenni rosa woyyitanno. Yaiqoobi Qullaawu Maxaafi giddo kulloonniri lawishshaho, Abirihaami, Reaabi, Iyyoobinna Eeliyaasi lawishshinni ronseemmo gede jawaachishinonkehu iseraati. (Yai. 2:21-26; 5:10, 11, 17, 18) Kuri ammanantinori Yihowa soqqamaano, hagiirrensa hunara dandaanno fonqolo qeelte saꞌino. Tini ninkeno Yihowa kaaꞌlonni fonqolo qeelle saꞌꞌa dandiineemmota leellishshanno.

14-15. Huluullisinonkere wodhine agura hasiissannonkekkihu mayiraati?

¹⁴ Qarra ikkannore: Huluullo. Mito woyite Maganu Qaali giddo nooha mito coye huwata qarra ikkitankera dandiitanno. Woy Yihowa huuccattonkera dawaro ninke hendoommo garinni qolinonkekkiha ikkara dandaanno. Tini huluullo kalaqqankera dandiitanno. Wodhine agurrummoro huluullo ammananke jaawishsharanna Yihowa ledo noonke jaalooma huntara dandiitanno. (Yai. 1:7, 8) Qoleno albillittete daafira noonke hexxono baꞌanno gede assitara dandiitanno.

¹⁵ Soqqamaasinchu Phaawuloosi hexxonke mokkollichu gede ikkitinota coyiꞌrino. (Ibi. 6:19) Kuni mokkollichi markaawete usurroonni sansalatera woy siiwora qaccete heeꞌrannoho jawa siwiilaati. Mokkollichu bubbe dagganno woyite markaawe milli miliqqi yitannokki gedenna hadhe kinnate ledo kibbantannokki gede kaaꞌlanno. Mokkollichu kaaꞌlannohu markaawete ledo xaadinse usurroonni sansalate woy siiwo taꞌꞌa hoogguro callaati. Sansalate cilturo taꞌara dandiitannonte gede huluullono wodhine agurrummoro ammananke ciiggishshara dandiitanno. Huluullamanno manchi fonqolu iillannosi woyite Yihowa eino qaalira noosi ammana baꞌara dandiitanno. Ammananke baꞌuro hexxonkeno baꞌanno. Yaiqoobi yiinonte gede “Huluullamanno manchi bubbe ganteenna shashshafaminoha baaru dambala lawanno.” (Yai. 1:6) Togoo manchi horo hagiidha hoogara dandaanno.

16. Huluullammeemmoha ikkiro ma assa hasiissannonke?

¹⁶ Mala: Huluullo hooꞌlite ammanakki kaajjishiꞌri. Lame wodana ikkitooti. Masaalaanchu Eeliyaasi yannara Yihowa manni lame wodana ikkino. Hakko daafira Eeliyaasi togo yiinonsa: “Lamu wodaninni dintinanni heedhinannihu mamooti geeshshaati? Kaaliiqi Maganohoro iso magansidhe! Woy Baꞌꞌaali Maganohoro Baꞌꞌaali magansidhe!” (1 Mot. 18:21) Ninkeno lame wodana ikka dihasiissannonke. Yihowa Magano ikkinota, Qullaawu Maxaafi Qaalesi ikkinotanna Yihowa Farciꞌraasine isi manna ikkitinota seekkine xiinxalline buuxiꞌra hasiissannonke. (1 Tes. 5:21) Togo assanke huluullo hunte ammananke kaajjishshanno. Huluullo hooꞌlate kaaꞌlo hasiissunkero kaaꞌlitannonke gede songote cimeeyyera hasaapha dandiineemmo. Yihowara hagiirrunni soqqammanni heeꞌrate huluullo ranke hooꞌla hasiissannonke!

17. Hexxo mudhinummoro ma ikkinammora dandiineemmo?

¹⁷ Qarra ikkannore: Hexxo mudha. Maganu Qaali, “Qarru barra wolqiweelittoro, jawaatte diafatto” yaanno. (Law. 24:10) Hexxo mudhineemmoha ikkiro hagiirrinke mulenni baꞌꞌara dandaanno.

18. Cincate yaa mayyaate?

 ¹⁸ Mala: Cincite saꞌꞌate kaaꞌlitanno worbimma aannohe gede Yihowa addaxxi. Iillannonke fonqolo dandee saꞌꞌate woy cincate worbuulle ikka hasiissannonke. (Yai. 5:11) Yaiqoobi kowiicho ‘cinca’ yaanno qaale horoonsiꞌrinohu kaajje uurranno mancho kulateeti. Tini diinnasi qassasira dagganni noota afanni heeꞌrenni worbimmatenni milli miliqqi yiikkinni uurrino olamaancho hendeemmo gede assitankera dandiitanno.

19. Soqqamaasinchu Phaawuloosi lawishshinni maa ronseemmo?

¹⁹ Soqqamaasinchu Phaawuloosi worbahonna cincaho. Isi wolqa baino woyiti nooha ikkirono, jawaante aannosi gede Yihowa addaxxino daafira cince saino. (2 Qor. 4:7; 12:8-10) Ninkeno umonke heeshshi assine Yihowa kaaꞌlo hasiissannonketa ammannummoro togoo worbimmanna jawaante afiꞌra dandiineemmo.—Yai. 4:10.

20-21. Maa addaxxa dandiineemmo?

²⁰ Fonqolu iillannonkehu Yihowa qorichishanni noonke daafira diꞌꞌikkino. Yaiqoobi togo yiino: “Ayino jifamanno yannara, ‘Maganu jifinoe’ yoonke. Maganu bushu coyinni dijifanno; horontanni isi ayeno dijifanno.” (Yai. 1:13) Tenne ammanneemmoha ikkiro, baxillaanchu iimi Anninkewa albinni roore shinqeemmo.—Yai. 4:8.

²¹ Yihowa ‘disoorramanno.’ (Yai. 1:17) Isi umi xibbi diro fonqolu iillinonsa Kiristaana kaaꞌlinsante gede ninkeno kaaꞌlannonke. Yihowa hayyo, ammananna worbimma afiꞌratto gede kaaꞌlahera jaatte huucciꞌri. Isi huuccattokki macciishshannohe. Hatto assittoro fonqolu iilliherono hagiirraamo ikkatto gede kaaꞌlannoheta addaxxa dandaatto!