BAAGIYO yinannihu Filippiinsete katamira lame seenni dikkiˈrara haˈranni no. Insa gudumaaleho gaare worre sabbankanna lainoha ikkirono shiqe dimarino. Gaarete mule uurrite nooti Heleni yinanni rodoo insa laˈanni muushshi yitu. Seennu sae haˈrinoha ikkirono Heleni muushshi yitino gari dhagge ikkinonsa.

Seennu gedensoonni otobisetenni qaera higanni heeˈre, Gambooshshu Addaraashera gannoonniha jw.org malaate lai. Insa konne malaate wona gaarete aana lainota qaagi. Lamenti otobisetenni dirre Gambooshshu Addaraashe ei; hakkiicho xullote songuwa gambooshshe assidhanno pirogiraame gannoonnita lai.

Lamenti hakkunni gedensaanni assinoonni gambooshshe haˈri. Gambooshshu Addaraashe haˈrinowa Heleninni xaadi! Insa muushshi yitinoti ise ikkitinota bayichonko afi. Heleni, “Insa anewa dayita ma assoomma ikka yee shiima geya masoomma” yitino. Seennu kayinni mayira dayinoro Helenira kulise.

Lamenti seenni gambooshshe lowo geeshsha baxino; qoleno roduuwa diborsino. Roduuwu Gambooshshu Addaraashe fiitanna laiti ‘Kaaˈlinoˈneni?’ yee xaˈmino. Mitte wole gobba hadhinoha ikkirono, tiˈi kayinni gambooshshe haˈranna Qullaawa Maxaafa xiinxalla hanaffino. Kuni baalu ikkinohu Heleni muushshi yitino daafiraati!