1. Mitte rodoo mine assidhara albaanni iseneeto mayite xaˈma hasiissannose?

BAALUNKU Kiristaanira umu guuta ikkinoho Yesuusi Kiristoosaati. Ikkirono mitte Kiristaancho mine assidhanno woyite isera umo ikkannohu guuta ikkinokki minaannaseeti. Tini maahoyye yee gala duucha woyite shota ikkitannosekki gede assitanno. Hakko daafira ise ayera assidhannoro heddanno woyite iseneeto togo yite xaˈma hasiissannose: ‘Kuni rodii albillitte dancha maatete umo ikkannota leellishannori maati? Heeshshosi giddo ayyaanaamittete coye balaxisiisanno? Hattooha ikka hoogiro, isira assiˈrummahu gedensaanni isi dancha maatete umo ikkanno yeemma gede assinoeri maati?’ Umise daafirano togo yite xaˈma hasiissannose: ‘Maatenkera kaaˈlitannoti hiitti akatta nooe? Cinceemmatenna shaqqadote? Yihowa ledo danchu jaaloomi nooe?’ (Ros. 4:9, 12) Mitte rodoo mine assidhara albaanni doodhitannori adhamase hagiirraame ikkitanno gede woy ikkitannokki gede assara dandaanno.

2. Konni birxichira maa ronseemmo?

² Lowo miliyoone ikkannori meya roduuwinke minaanninsara maahoyye yee gale dancha lawishsha ikkino. Tennera insa lowo geeshsha galanteemmonsa! Kuri ammanaminori meya roduuwi ledo Yihowara soqqama lowo geeshsha hagiirsiissannonke! Konni birxichira aante noote sase xaˈmora dawaro afiˈneemmo: (1) Minaamuwaho qarra ikkansara dandaannohu mitu coyi maati? (2) Minaama minaannisera maahoyye yite gala doodhitannohu mayiraati? (3) Kiristaana ikkino minaanninna minaama maahoyye yee galate daafira Yesuusi, Abigayeeli hattono Yesuusi ama ikkitinote Maariyaami lawishshinni maa rosa dandaanno?

3. Adhantinorira qarru iillansara dandaannohu mayiraati?

³ Adhanna adhama guuta Maganu eltooti; mannu kayinni guuntete xeˈne noonsareeti. (1 Yoh. 1:8) Maganu Qaali “adhantannore lowo qarri amadannonsa” yee adhantinore qorowisiisannohu iseraati. (1 Qor. 7:28) Hanni minaamuwaho qarra ikkansara dandaannoha mito coye laˈno.

4. Minaama minaannisera maahoyye yite galturo woffi assine laˈnanniseha lawannose gede assannoseri maa ikkara dandaanno?

⁴ Mitte minaama lophitino gari minaannisera maahoyye yite galturo woffi assine laˈnannie yite heddanno gede assasera dandaanno. Ameerikaho heedhannoti Marisooli yinanni rodoo togo yitino: “Lophoommahu, meyaati baalunku coyinni labbaahu ledo taalo ikka hasiissannose yine rosiinsanni qooxeessiraati. Umimmate silxaane heedhanno gede assinohu Yihowa ikkinota, minaamuwu minaanninsara hajajama hasiissannonsatanna minaamuwaho mini giddo ayirradu qeechi noonsata afoomma. Ikkirono umimmate silxaanera gara ikkitino lao heedhannoe gede assiˈra qarra ikkitannoe woyiti no.”

5. Mitu labballira, meentu daafira noonsati Qullaawa Borro ledo sumuu yitannokki lao hiittenneeti?

⁵ Qoleno mitte mancho assidhinohu meyaati labbaahura woriidite yee hedanno manchira ikkara dandaanno. Wodiidi Ameerikira heedhannoti Ivooni yinanni rodoo togo yitino: “Qooxeessinkera meyaati sagale ittannohu labbaahu ite kaihu gedensaanniiti. Sagale qishannorinna mine feyannori shiimmaadda seenneeti, labballo ooso towaatannori kayinni amuuwahonna meya roduuwansaati; labballu ooso mini giddo mootoolle ikkitinohu gede assine kullanninsa.” Iisiyaho heedhannoti Yingilingi yinanni rodoo togo yitino: “Ninke afiinni meyati worba woy dandoo nooseta ikka dihasiissannose yitanno sokka afidhino yaatto no. Insa loosi mini giddo looso loosate; hattono minaanninsara hedonsa coyiˈranno gede difajjinanninsa.” Togoohu baxillu noosikkihunna Qullaawa Borro ledo sumuu yitannokki lao noosi minaanni, minaamasi heeshsho qarraataame assanno; isi Yesuusi lawishsha diharunsino hattono Yihowa dadillisanno.—Efe. 5:28, 29; 1 Phe. 3:7.

6. Minaamuwu Yihowa ledo noonsa jaalooma kaajjishiˈrate ma assa hasiissannonsa?

⁶ Sai birxichira laˈnummonte gede, Yihowa Kiristaancho ikkino minaanni maatesira ayyaanaamittetenna maalaamittete hasiisannonsare wonshara hasiˈranno. (1 Xim. 5:8) Ikkirono mine assidhino rodoo loosu batiˈriserono, barru baala Maganu Qaale nabbawatenna hiincate hattono Yihowara giddoseta kulte huucciˈrate yanna gaaˈma hasiissannose. Togo assa shota ikka hooggasera dandiitanno. Minaamuwaho loosu batiˈrannonsa daafira togo assate yanna woy wolqa dinonke yee hedara dandaanno; ikkirono togo assate yanna gaaˈma lowo geya hasiissannote. Mayira? Yihowa mittu mittunku isi ledo dancha jaalooma kalaqiˈnammoranna jaaloominke baikki heeˈnammora hasiˈranno daafiraati.—Soq. 17:27.

7. Minaama minaannisera maahoyye yee gala shota ikkitannose gede assannoseri maati?

⁷ Minaama guuta ikkinokki minaannisera maahoyye yee galate sharrama hasiissannoseti egennantinote. Ikkirono Qullaawu Maxaafi minaannisera maahoyye yite gala hasiissannoseta kulannohu mayiraatiro huwatturonna ammanturo minaannisera maahoyye yee gala diqarrissannose.

8. Efesooni Sokka 5:22-24 kultannonte gede, Kiristaancho ikkitino minaama minaannisera maahoyye yite gala doodhitannohu mayiraati?

⁸ Kiristaancho ikkitino minaama minaannisera maahoyye yite gala doodhitannohu Yihowa  hatto assitara hasiˈranno daafiraati. (Efesooni Sokka 5:22-24 nabbawi.) Ise iimi Annase addaxxitanno; korkaatuno isi baalanka coye assannohu baxillunni ikkinotanna isera kaaˈlaare ikka hoogoommero hatto assi yaannosekkita affino.—Mar. 6:24; 1 Yoh. 5:3.

9. Mitte rodoo minaannise silxaane ayirrisase maaho kaaˈlitanno?

⁹ Alame meentu Yihowa biddishsha lashshi assanno gedenna minaannira maahoyye yine gala woffi assitanno yee hedanno gede jawaachishshanno. Togoo hedo tareessitannori kayinni baxillaancho Maganonke diaffinoreeti. Yihowa muxxe ikkitinore meya oososi insa woffi assannore assitara horo dihajajannonsa. Mitte rodoo Yihowa uyinose qeecha wonshate diinaggaabbe loossannoha ikkiro minise giddo keeru heeˈranno gede assitanno. (Far. 119:165) Tini minaannase, ise umosenna oosose kaaˈlitanno.

10. Kaarooli coyidhinorinni maa ronseemmo?

¹⁰ Guuta ikkinokki minaannisera maahoyye yite galtanno minaama umimmate silxaane heedhanno gede assinoha Yihowa baxxannotanna ayirrissannota leellishshanno. Wodiidi Ameerikira heedhannoti Kaarooli yinanni rodoo togo yitino: “Minaanniˈya soˈro loosara dandaannota afoomma. Qoleno isi soˈro loosanno woyite asseemmari Yihowa ledo nooe jaalooma mageeshsha naadeemmaro leellishannoha ikkinota afoomma. Iimi Annaˈya hagiirsiisa hasiˈreemma daafira minaanniˈyara maahoyye yee galate sharrameemma.”

11. Aneese yinanni rodoo gatona yitannota ikkitanno gede kaaˈlinoseri maati? Ise coyidhinorinni maa ronseemmo?

¹¹ Minaama, minaanniˈya dimararannoe hattono ane daafira dihedanno yite heddannoha ikkiro, iso ayirrisanna maahoyye yee gala qarra ikkitasera dandiitanno. Hanni Aneese yinanni rodoo hattoo coyi iillise woyite ma assitinoro laˈno. Ise togo yitino: “Aaraaweemmakki gede qoropheemma. Baalunku soˈro loonsammora dandiineemmota dideˈˈeemma. Mixoˈya Yihowa gede mulla gatona yaate. Gatona yeemma woyite giddoyidi keere afiˈreemma.” (Far. 86:5) Minaama gatona yitannoha ikkiro minaannisera maahoyye yee gala qarra diˈˈikkitannose.

12. Qullaawu Maxaafi hiittoori Yihowa soqqamaano lawishsha kulanno?

¹² Mitootu, maahoyye yee galanno manni shashaho yite heddanno. Kuni kayi waajjo kaphooti.  Qullaawu Maxaafi maahoyye yite galtinoriha worbuullu Yihowa soqqamaano lawishsha kulanno. Hanni Yesuusi, Abigayeelinna Maariyaami lawishshinni maa ronseemmoro laˈno.

13. Yesuusi Yihowara maahoyye yee galannohu mayiraati? Xawisi.

¹³ Yesuusi Yihowara maahoyye yee galanno; hatto assannohu egenno woy dandoo ajjeennasi diˈˈikkino. Yesuusi huwatate qarrisannokki garinni xawise rosiisinohu egenno noosi daafiraati. (Yoh. 7:45, 46) Yihowa kalqe alame kalaqi woyite ledosi loosanno gede assinohu Yesuusira lowo dandoo noosita afino daafiraati. (Law. 8:30; Ibi. 1:2-4) Qoleno Yesuusi reyotenni kaihu gedensaanni Yihowa “roorre baala gordohonna baattote” uyinosi. (Mat. 28:18) Yesuusira lowo dandoo noosiha ikkirono Yihowa biddishsha hasiˈranno. Hatto assannohu Annasi baxanno daafiraati.—Yoh. 14:31.

14. (a) Yihowa meentoho noosi laonni minaannuwu maa rossanno? (b) Minaannuwu Lawishsha 31te kulloonni hedonni maa rossanno?

¹⁴ Minaannuwu maa rossanno? Yihowa minaamuwu minaannuwaho maahoyye yee galanno gede assinohu meento labballoho woriidire asse laˈˈanno daafira diˈˈikkino. Yihowa Yesuusi ledo gashshitanno gede labballo calla ikkikkinni meentono doorasi tenne leellishshanno. (Gal. 3:26-29) Yihowa Beettisira silxaane oye ammanannosita leellishino. Hatteente gede hayyichu minaannino minaamasira mite silxaane aanno. Maganu Qaali mitte qarooyye minaama daafira kulanni, ise mini looso loosiissannota, baatto hidhitannotanna towaattannota hattono daddaˈlitannota xawisanno. (Lawishsha 31:15, 16, 18 nabbawi.) Ise coyiˈrate qoosso noosekki gedee borojjicho diˈˈikkitino. Hatteentenni minaannise ammanannose hattono coyidhannore macciishshanno. (Lawishsha 31:11, 26, 27 nabbawi.) Minaanni minaamasi konni garinni ayirrisannoha ikkiro, isira maahoyye yee gala hagiirsiissannose.

15. Minaamuwu Yesuusi lawishshinni maa rosanno?

¹⁵ Minaamuwu maa rosanno? Yesuusi lowore loosinoha ikkirono, Yihowate umimmate silxaanera maahoyye yee gala woffi assitannosihu gede asse dihedino. (1 Qor. 15:28; Fil. 2:5, 6) Hatteente gede Yesuusi lawishsha harunsitannoti qarooyye minaama minaannisera maahoyye yee gala woffi assitannosehu gede assite diheddanno. Ise minaannase irkissanno; hatto assitannohu iso baxxanno daafira calla ikkikkinni, roorenkanni Yihowa baxxannonna ayirrissanno daafiraati.

16. Umi Saamueeli 25:3, 23-28 kultanno garinni Abigayeelira mayi qarri iillinose? (Aaniidi qoolira noo misile lai.)

¹⁶ Abigayeelira Naabaali yinanni minaanni noose. Isi umosi calla baxannoho, naaxxaleessahonna galatiweelo manchooti. Ikkirono Abigayeeli adhamase diigganno faro dihasidhino. Hasidhoommero ise Daawitinna mannisi minaannase shitara sammi yite agura dandiitanno. Ise kayinni Naabaalinna minisi manna gatisate dandiiture assitino. Abigayeeli olu uduunne qodhinohu 400 manniwa shiqatenna Daawiti ayirrinyunni coyishiishshe ammansiisate mageeshshi worbimma hasiissinosero heda dandiineemmo. Ise minaannise assino bunshera nafa xaˈmantannota coyidhino. (1 Saamueeli 25:3, 23-28 nabbawi.) Daawiti, Yihowa tenne worba mancho horoonsiˈre, lowo soˈro loosannokki gede hasiissannosi amaale aanni noosita afino.

17. Daawitinna Abigayeeli daafira kultanno xaggenni minaannuwu maa rosanno?

¹⁷ Minaannuwu maa rossanno? Abigayeeli xiinxalla manchooti. Daawitino ise amaale macciishshasi kaaˈlitinosi. Hatto assasi beebbaataamma manna shaannokki gede agartinosi. Hatteente gede mittu minaanni mitto coye assara kaˈˈanno woyite minaamasi yitannore seekke hedanno. Ise yitannore macciishshasi gara ikkinokkire assannokki gede agartasira dandiitanno.

18. Minaamuwu Abigayeeli lawishshinni maa rosanno?

 ¹⁸ Minaamuwu maa rosanno? Minaama, minaannise Yihowa Farciˈraasincho ikka hoogirono woy Qullaawu Maxaafi biddishshi garinni heeˈrannokkiha ikkirono, ise Yihowa baxasenna ayirrisase maatese kaaˈlitanno. Ise Qullaawa Borro ledo sumuu yaannokki garinni adhamase diigganno faro dihasidhanno. Hatteentenni minaannase ayirrissenna isira maahoyye yite galte, isi Yihowa daafira rosa hasiˈranno gede assate woˈnaaltanno. (1 Phe. 3:1, 2) Minaannise dancha akatase lae soorrama hoogiro nafa, ise minaannisera maahoyye yite galte Yihowara ammanantino daafira Yihowa lowo geeshsha naadannose.

19. Minaama minaannisera maahoyye yaa hasiissannosekkihu hiittoo woyiteeti?

¹⁹ Ikkollana minaannisera maahoyye yite galtannoti Kiristaancho ikkitino minaama, minaannise Qullaawu Maxaafihu xintu seeri ledo sumuu yaannokkire assi yiisero diassitanno. Lawishshaho, Yihowa Farciˈraasincho ikkinokki minaanni minaamasi kaphitanno gede, moortanno gede woy wole Qullaawa Borro ledo sumuu yaannokkire assi yaasera dandaanno. Adhaminori meya roduuwino ikko baalunku Kiristaani roore ammanamannohu Yihowaraati. Mitte rodoo Qullaawu Maxaafi ledo sumuu yaannokkire assi yinisero giwa hasiissannose; hatto assitannokkihu mayiraatiro shaqillunni kayinni kaajjishshe xawisa hasiissannose.—Soq. 5:29.

20. Maariyaamira Yihowa ledo muli jaaloomi noose yineemmohu mayiraati?

²⁰ Maariyaami Yihowa ledo muli jaalooma kalaqidhino. Ise Qullaawa Borro seekkite affinoti dihuluullissannote. Ise Cuuaanchu Yohaannisi ama Elsaabeexi ledo hasaabbu woyite, Ibiraawootu Afiite Qullaawa Borro giddonni 20 saˈanno hedo qummi assitino. (Luq. 1:46-55) Hanni tenneno hendo: Yooseefi Maariyaami huucciˈrinoha ikkirono, Yihowa sokkaasinchi balaxe leellinohu isira diˈˈikkino. Sokkaasinchu umo Maariyaami xaaddotenni hasaawisinose; hattono Maganu Beetto iltannota kulinose. (Luq. 1:26-33) Yihowa Maariyaami seekke afinose; hattono Beettosi baxillunni towaatte lossitannota afino. Maariyaami Yesuusi reyihunna  reyotenni kaihu gedensaannino, Yihowa ledo danchu jaaloomi heeˈrannose gede assidhinoti dihuluullissannote.—Soq. 1:14.

21. Minaannuwu Maariyaami xaggenni maa rossanno?

²¹ Minaannuwu maa rossanno? Hayyicha ikkino minaanni, minaamasi Qullaawa Borro seekkite affinota ikkituro hagiidhanno. Isi ise roortanni nooe woy maatete umo ikkate woˈnaaltanni no yee dihedanno. Hatteentenni Qullaawa Maxaafanna Qullaawu Maxaafiha xintu seera seekkite affino minaama maatesera atoote ikkitinota wodanchanno. Minaamara, minaannisenni roore egenno nooseha ikkiro nafa, maatete magansiˈranna wole ayyaanaamittete coye albisa ikke massagate qeechi noosihu minaannaati.—Efe. 6:4.

22. Minaamuwu Maariyaami xaggenni maa rosanno?

²² Minaamuwu maa rosanno? Minaama minaannisera maahoyye yite gala hasiissannoseha ikkirono, ayyaanaamittese agadha hasiissannoseti ise umoseeti. (Gal. 6:5) Hatto assate hojju xiinxalloranna hiincate yanna gaaˈma hasiissannose. Tini Yihowara noose baxillinna ayirrinyi baˈˈannosekki gede assiˈratenna minaannisera hagiirrunni maahoyye yite galate kaaˈlitannose.

23. Minaamuwu, minaannuwinsara maahoyye yee galansa insa umonsa, maatensanna songo kaaˈlitannohu hiittoonniiti?

²³ Yihowa baxanno daafira woˈmanka woyite minaannuwinsara maahoyye galanno minaamuwi hagiirrenna harshammo afiˈranno; Yihowa qixxeessinota umimmate silxaane ayirrisannokkiri kayinni togoo hagiirre diafiˈranno. Minaannuwinsara maahoyye yee galanno minaamuwi seennehonna wedellu labballira dancha lawishsha ikkanno. Togoo minaamuwi maatensa giddo calla ikkikkinni songote giddono baxillunna keeru heeˈranno gede assanno. (Tit. 2:3-5) Xaa yannara Yihowara soqqamanno manni giddo rooru meya roduuwaati. (Far. 68:11) Ninke baalunku yaano labbaahuno meyatino songote giddo lowore kaaˈla dandiineemmo. Aananno birxichira mittu mittunku hatto assa dandiineemmohu hiittoonniitiro ronseemmo.