Lame Haaro Aliidi Bisi Miilla
ROOWE Arfaasa 18, 2023 jw.org aana mittu baxxino egensiishshi fulino; kuni egensiishshi Roduu Geeji Filiigelinna Roduu Jeefirii Winderi Yihowa Farciꞌraasineha Aliidi Bisi miilla ikkite shoomantinota kulannoho. Kuri lamunku roduuwi lowo diro Yihowara ammanante soqqantinoreeti.
Geeji Filiigelinna minaamasi Naadiya
Roduu Filiigeli lophinohu Yunayitidi Isteetisete galchimi Pensiliveeniyiraati; isi halaale macciishshinohu annisinna amasiwiinniiti. Isi shiimu noo yannara maatesi sabbakkannori roore hasiissannowa baadiyyete nooha shiima katama hadhino. Roduu Filiigeli shiima yanna gedensaanni Bocaasa 20, 1988nni cuuamino.
Roduu Filiigeli anninna ama isi woꞌma yanna soqqamaancho ikkanno gede woꞌmanka woyite jawaachishshannosi. Insa duucha woyite woradu aliidi laꞌꞌaanonna Beeteelete soqqantanno roduuwa mininsara koyissanno; hakko daafira Roduu Filiigeli kuri roduuwi mageeshshi geeshsha hagiirraamma ikkitinoro wodanchino. Isi cuuamihunni shiima yanna gedensaanni Wocawaaro 1, 1989nni woꞌma yanna suwisaancho ikkino. Qoleno lamu diri gedensaanni 12 dirihu heeꞌre Beeteelete soqqamate fushshiꞌrino mixo wonshiꞌrino. Isi Birra 1991nni Birukiliini noo Beeteelera soqqama hanafino.
Roduu Filiigeli Beeteelete 8 diro borro xarranzanniwa loosino; hakkunni gedensaanni Soqqanshote Golira loosino. Hatte yannara isi boode diro Ruusiyu Afiinni massanganni songora soqqamino. Hakkiinni 2006 Naadiya yinanni rodoo ledo adhamihu gedensaanni lamunku Beeteelete mitteenni soqqama hanafino. Insa lamunku Porchugaalete Afoo coyiꞌnanni qoqqowira sabbakino; hattono tonne diro saꞌanno yanna Ispeenete Afoo coyiꞌnanni qoqqowira sabbakino. Roduu Filiigeli Soqqanshote Golira lowo diro soqqamihu gedensaanni Rosu Komite Biiroranna hattono gedensaanni Soqqanshote Komite Biirora soqqamanno gede gaammoonnisi. Hattono Badheessa 2022 Aliidi Bisite Soqqanshote Komite kaaꞌlaancho ikkanno gede shoommoonnisi.
Jeefirii Winderinna minaamasi Anjeela
Roduu Winderi lophinohu Yunayitidi Isteetisete Kalifoorniyaho Mureeta yinanni qooxeessiraati. Isi halaale macciishshinohu annisinna amasiwiinniiti; hakkiinni Badheessa 29, 1986nni cuuamino. Isi aane noo aganira kaaꞌlaancho suwisaancho ikkate murciꞌrino. Kaaꞌlaancho suwisaancho ikke soqqama lowo geeshsha baxino daafira agura dihasiꞌrino. Boode agana kaaꞌlaancho suwisaancho ikke soqqamihu gedensaanni Birra 1, 1986nni woꞌma yanna suwisaancho ikkino.
Roduu Winderi shiimu noo yannara hakka waro Beeteelete soqqantannori lamu bayiruuddu roduuwisiwa haꞌrino. Tini albillitte isino Beeteelete soqqama hasiꞌranno gede assitinosi. Hakkiinni Onkoleessa 1990 Wolkiili noo Beeteelera soqqamanno gede koyinsoonnisi
Roduu Winderi Beeteelete addi addi golira loosino; lawishshaho Mine Fiinanni Golira, Irshu Goliranna Beeteelete Biirora loosino. Isi 1997nni Anjeela yinanni rodoo ledo adhamino; insa hatte yannanni hanafe Beeteelete mitteenni soqqamino. Hakkiinni 2014 insa Woorwiiki noo Beeteele haꞌrino; hakkiicho qara biirora Roduu Winderi gimbaatu looso kaaꞌlino. Qoleno 2016nni insa Paaterseni noohuwa Agarooshshu Shaehu Rosu Mereersha hadhino; hakkiicho Roduu Winderi Qoonqonna Viidiyo Qixxeessinanni Golira loosino. Shoolu diri gedensaanni insa galagalte Woorwiiki higgino; hakkiicho roduu Winderi Personeelete Komite Biirora soqqamanno gede gaammoonnisi. Badheessa 2022 qole Aliidi Bisite Personeelete Komite Kaaꞌlaancho ikkanno gede shoommoonnisi.
Kuri “elto” ikkitino labballi Maganu Gashshooti looso diinaggaabbe loossanno woyite Yihowa woꞌmanka woyite maassiꞌrannonsa gede huuccineemmo.—Efe. 4:8.
Kurino Lai
DUUCHU MANNI XAꞌMANNO XAꞌMO
Yihowa Farciꞌraasinehu Aliidi Bisi Ayeti?
Aliidi Bisi miilla dirijjitenkera murrootaho?
