XIINXALLOTE BIRXICHO 7
FAARSO 51 Heeshshonke Maganoho Sayinse Uyinoommo!
Naazirootuwiinni Ronseemmo Roso
“Isonoo bade heeꞌranno yanna baalantera isi Kaaliiqira qullaawaho.”—KIR. 6:8.
GUULCHO HEDO
Naazirootu lawishshi uminke horo agurrenna worbuulle ikkine Yihowara soqqammeemmo gede kaaꞌlannonkehu hiittoonniitiro ronseemmo.
1. Yihowa magansiꞌranno manni lowo diro hiikkonne dancha akata leellishino?
YIHOWA ledo noohe jaalooma naadatto? Naadattoti dihuluullissannote! Hundinni kayise batinyu manni atente gede Yihowa ledo noonsa jaalooma naadannota leellishino. (Far. 104:33, 34) Lowo manni Yihowa magansiꞌrate yee uminsa horo agurino. Hundi waro Israeelete heedhannori Naaziroota ikkite soqqantinorino Yihowara soqqamate yite uminsa horo agurtino. Insa ayeooti? Insa lawishshinni maa rosa dandiineemmo?
2. (a) Naazirootu ayeooti? (Kiiro 6:1, 2) (b) Mitu Israeelete manni Naaziroota ikka doodhinohu mayiraati?
2 “Naaziricha” yine tirroonnihu Ibiraawootu Afii qaali “callu heeꞌrannoha,” “baxxinoha” woy “isonooto sayise uyinoha” yitanno tiro afiꞌrinoho. Kuni qaali Yihowara diinaggaabbe baxxino garinni soqqamate mito coye agurtino Israeeloota dancha gede xawisannoho. Muse Seeri mittu manchi woy mancho mite yanna geeshsha Yihowara Naaziricha ikke soqqamate baxxino qaale ea dandaannota kulanno. a (Kiiro 6:1, 2 nabbawi.) Konne qaale woy sheemaate eanno manchi wolu Israeelete manni harunsa hasiissannonsakki biddishsha harunsanno. Ikkina mittu Israeelichi Naaziricha ikka doodhannohu mayiraati? Isi togo assannohu Yihowa lowo geeshsha baxanno daafiranna isiwiinni afiꞌrinohu lowo atootira galatu noosita leellishate ikkara dandaanno.—Mar. 6:5; 16:17.
3. Yannankera nooha Maganu mannanna Naaziroota mitto assannonsari maati?
3 Muse Seeri ‘Kiristoosi seerinni’ riqiwami yannara Naaziricha ikke soqqamate qixxaawo gattino. (Gal. 6:2; Rom. 10:4) Ikkirono Naazirootu gede Yihowa manni xaa yannarano woꞌmu wodaninsanni, woꞌma lubbonsanni, woꞌma hedonsanninna woꞌma wolqansanni isira soqqamate lowo hasatto noonsata leellishanni no. (Maq. 12:30) Ninkeneeto Yihowara sayinse uyineemmo woyite uminke fajjonni tenne assate qaale eꞌneemmo. Konne eꞌnoommo qaale agadhine heeꞌrate Yihowa fajjo assanna uminke horo agura hasiissannonke. Naazirootu eꞌino qaale agadhite heedhinohu hiittoonniitiro xiinxalline, ninkeno eꞌnoommo qaale agadhine heeꞌra dandiineemmohu hiittoonniitiro ronseemmo. b (Mat. 16:24) Hanni mito lawishsha laꞌno.
UMIꞌNE HORO AGURATE MAAHOYYE YIIYYE
4. Kiiro 6:3, 4 kultanno garinni Naazirootaho uminsa horo agura qarra ikkitannonsa gede assannori maati?
4 Kiiro 6:3, 4 nabbawi. Naazirootu dimbisanno ago aga hattono woyine yaano shama woyinenna mooshshinoonni woyineno ita dihasiissannonsa. Qooxeessinsara noo manni woꞌmanka woyite tenne sagale ita dandaanno; tini sagale qarra afidhinokkita ikkitino daafira itansa garankolla. Qullaawu Maxaafi ‘hagiirsiissannoti woyinete xajje’ Maganu elto ikkitinota kulanno. (Far. 104:14, 15) Ikkirono Naazirootu uminsa fajjonni tenne sagale ita hooga doodhitino. c
Naazirootu gede umikki horo agurate maahoyye yaatto? (Gufo 4-6 lai)
5. Madiyaninna Maarsela uminsa fajjonni maa agura doodhino? Mayira?
5 Naazirootu gede ninkeno albinni roore Yihowara soqqamate uminke horo agurreemmo. Hanni Madiyaninna Maarsela yinanni roduuwi lawishsha laꞌno. d Kuri Kiristaana ikkino minaanninna minaama qawaaxxote heeshsho heeꞌrannoreeti. Madiyanira danchu loosi noosi daafira insa biifadu minira heeꞌranno. Ikkirono insa Yihowara albinni roore soqqama hasidhino. Tenne mixonsa wonshiꞌrate insa mito coye biddi assiꞌrate murcidhino. Insa togo yiino: “Woxe kaꞌnummo gede fushsha agurrummo. Shiimu minira heeꞌrate hingummo, hattono makeenanke hirroommo.” Madiyaniranna Maarselara tenne assate giddeeti dinonsa; kayinni insa tenne assa doodhitinohu hatto assansa Yihowara albinni roore soqqamate injiitannonsa daafiraati. Insa tenne assansanni hagiirraamma ikkitino; hattono harshammi yitino.
6. Xaa yannara Kiristaanu uminsa horo agurannohu mayiraati? (Misileno lai.)
6 Xaa yannara Yihowa manni albinni roore isira soqqamate ikkitanno yanna afiꞌrate uminsa horo aguranno daafira hagiirraammaho. (1 Qor. 9:3-6) Yihowa umiꞌne horo agurre diyaannonke; qoleno agurreemmo coyi umisi soꞌro afiꞌrinoha diꞌꞌikkino. Lawishshaho mitu roduuwi baxxanno loosonsa hattono minensa agurtino. Batinyu roduuwi mite yanna geeshsha adhantukkinni woy ooso iltukkinni heeꞌra doodhitino. Wolootu qolte jaallansanna maatensa noowiinni lowo geeshsha xeertiꞌrannoha ikkirono, sabbakkannori roore hasiissannowa hadhe soqqama doodhitino. Ninke giddo batinyu konni garinni uminke horo agurroommohu Yihowara soqqamate dandiinummore baala assa hasiꞌneemmo daafiraati. Yihowara soqqamate yitine agurtinoonni coyi jawa woy shiimano ikkiro, isi tenne lowo geeshsha naadannota huluullantinoonte.—Ibi. 6:10.
BAXXITINOONNIRE IKKITINE HEEꞌRATE MAAHOYYE YIIYYE
7. Mittu Naazirichira eino qaale agadha qarra ikkitannosi gede assannori maa ikkara dandaanno? (Kiiro 6:5) (Misileno lai.)
7 Kiiro 6:5 nabbawi. Naazirootu dananchonsa haxira hoogate qaale eꞌanno. Tini insa woꞌmunni woꞌma Yihowara galtinore ikkansa leellishshanno doogooti. Mittu manchi Naaziricha ikke seeda yanna keeshshiro, dananchisi lophanno daafira mannu isi Naaziricha ikkinota bade afa dandaanno. Wolootu isi Naaziricha ikki woyite eino qaale agadhanno gede kaaꞌlitannosiha ikkiro baxxinoha ikke heeꞌra qarra diꞌꞌikkitannosi. Kayinni hunda Israeelete waro mannu Naaziroota naadinokki woy kaaꞌlinokki woyiti no. Masaalaanchu Amootsi yannara kaadaasine Israeele, ‘Naazirootaho woyinete xajje hayikkissino’; insa tenne assitannohu, Naazirootu woyinete xajje aga hoogate eꞌino qaale agadhitannokki gede assate hedde ikkara dandaanno. (Amo. 2:12) Mito woyite Naazirootaho eꞌino qaale agadhe heeꞌratenna baxxitinore ikkite heeꞌrate worbimma hasiissinonsa.
Naaziricha ikkino manchi eino qaale wonshate wolootuwiinni baxxinoha ikke heeꞌrate maahoyye yaanno (Gufo 7 lai)
8. Benjaamiini yinanni qaaqqi woꞌnaalshi jawaachishinohehu hiittoonniiti?
8 Manna ille qanse laꞌꞌa waajjineemmore woy huta ikkinummoro nafa, Yihowa kaaꞌlonni ninkeno baxxinoommore ikkine heeꞌra dandiineemmo. Hanni Noorweyete heeꞌrannohu tonne diro ikkannosihu Benjaamiini yinanni qaaqqi woꞌnaalsha laꞌno. Isi rosanno rosi mini Yukireenete olu kaino daafira hakko heeꞌranno mannira kaaꞌlamate mitte qixxaawo qixxeessino. Rosaano Yukireenete baandiiri dana afidhino uddano uddidhe faarso faarsitanno gede kulloonninsa. Benjaamiini konni coyira anga wodha giwino daafira faarso faarsinanni bayichinni xeertiꞌre uurrino. Kayinni rosiisaancho iso laꞌe cancite woshshitanni, “Dagge ninke ledo faarsa hasiissannohe. Baalunku agarre heeꞌnoommohena amo!” yitinosi. Benjaamiini waajjikkinni rosiisaanchonniwa mare togo yiino: “Ani poletiku coyira anga wodheemmokki daafira konni coyira dikarsameemmo. Isinni batinye Yihowa Farciꞌraasine olaho haꞌra gibbino daafira usuru mine no.” Rosiisaancho kulinosere macciishshitino; hattono konni coyira karsama hasiissannosikkita kultinosi. Ikkirono ledosi rossanno ooso isi faarsannokkihu mayiraatiro xaꞌma hanaffu. Benjaamiini lowo geeshsha waajje wiꞌla nafa hanafino; ikkirono rosiisaanchote kulinore worbimmatenni ledosi rossanno ooso baalateno kulino. Gedensoonni Benjaamiini annisiranna amasira ammanasira gaaramanno gede Yihowa kaaꞌlinosita kulino.
9. Yihowa wodana tashshi assa dandiineemmohu hiittoonniiti?
9 Yihowa fajjo assa doodhinoommo daafira qooxeessinke manni insawiinni baxxinoommore ikkinoommota afanno. Loosunniwa woy rosu mine mannu Yihowa Farciꞌraasine ikkinoommota afanno gede assate worbimma hasiissannonke. Tenne alame akatinna amanyooti roore bushanni haꞌri kiiro, Qullaawu Maxaafihu xintu seeri garinni heeꞌranna mannaho dancha duduwo kula roore qarra ikkitankera dandiitanno. (2 Xim. 1:8; 3:13) Ikkirono, Yihowara soqqamannokki manniwiinni baxxinoommore ikkine heeꞌneemmo woyite ‘Yihowa hagiirsiinseemmota’ woꞌmanka woyite qaagge.—Law. 27:11; Mil. 3:18.
YIHOWA FAJJO BALAXISIISA AGURTINOONTE
10. Kiiro 6:6, 7 kulloonni biddishsha harunsa Naazirootaho qarra ikkitannonsahu mayiraati?
10 Kiiro 6:6, 7 nabbawi. Naazirootu reeshshunniwa mara dihasiissannonsa. Iimi adda laꞌnanni woyite kuni coyi hakkeeshsha qarra ikkannoha dilawanno. Ikkollana hundi waro, Naazirootaho muli fiixi reyanno woyite tenne hajajo agadha lowo geeshsha qarra ikkitannonsa. Hakka waro madaarshu amanyoote wonshate reeshshunniwa gamba yaa hasiissanno. (Yoh. 19:39, 40; Soq. 9:36-40) Naaziricha ikkate qaale eino manchi kayinni konne bude harunsa didandaanno. Mininsa manni reyenna lowo geeshsha xissiisidhanno woyite nafa, Naazirootu eꞌino qaale agadhite kaajjado ammana noonsata leellishshanno. Yihowa kuri iso magansiꞌrate murcidhinore iillinonsa fonqolo dandiita saꞌanno gede kaaꞌlinonsati dihuluullissannote.
11. Mittu Kiristaanchi maatesi lainohunni mitto coye doodhanno woyite maa assa hasiissannosi? (Misileno lai.)
11 Kiristaana ikkinoommo daafira ninkeneeto Yihowara sayinse uyinummo woyite eꞌnoommo qaale mulluri gede assine dilaꞌneemmo. Maatenke lainohunni mitto coye doodhineemmonna assineemmo woyiteno tenne heda hasiissannonke. Maatenkera hasiisannore wonshate diinaggaambe loonseemmo; ikkirono mininke manni hasattonni roore Yihowa fajjo balaxisiinseemmo. (Mat. 10:35-37; 1 Xim. 5:8) Hatto yaa mito woyite, Yihowa hagiirsiisate assineemmo coyi fiixanke hagiirsiisannokkiha ikkiro nafa hakko coye assa hasiissannonke yaate.
Buutote qarri iillihero nafa Yihowa fajjo balaxisiisate maahoyye yaatto? (Gufo 11 lai) e
12. Mini giddo qarra ikkanno coyi tuncu yiisirono Aleksaandiru ma assino? Isi assinokki coyi maatiyya?
12 Hanni Aleksaandiru yinanni rodiinna minaamasi Dooriina woꞌnaalsha laꞌno. Kuri minaanninna minaama mittu diri geeshsha Qullaawa Maxaafa xiinxallihu gedensaanni Dooriina xiinxallo agurate murcidhino; Aleksaandiruno agurara hasidhino. Ikkirono isi wodanaaꞌme hayyotenni xiinxalla agurannokkita kulinose. Dooriina tenne dibaxxino; hakko daafira isi xiinxallo aguranno gede giddeessate woꞌnaaltino. Aleksaandiru ise togo ikkitannohu mayiraatiro afate woꞌnaalino; ikkirono hakka woyite coyi shota diꞌꞌikkinosi. Isi Dooriina qacifattannosinna hanqite coyidhanno woyite isino Qullaawa Maxaafa xiinxalla agurate hedino woyiti no. Ikkirono Aleksaandiru minaamasi lowo geeshsha baxannosetanna ayirrisannoseta leellishanni heeꞌrenni Yihowa fajjo balaxisiisino. Jeefote isihu danchu lawishshi ise galagalte Qullaawa Maxaafa xiinxalla hanaffanno gedenna gedensoonni cuuante Yihowa Farciꞌraasincho ikkitanno gede kakkayisinose. JW.ORG aana noota Aleksaandirunna Doorina Vakaari—“Baxillu Cincahonna Shaqqadoho” yitanno viidiyo lai.
13. Yihowaranna maatenkera baxille leellisha dandiineemmohu hiittoonniiti?
13 Maate kalaqinohu Yihowaati; isi hagiirru noo maate heedhankera hasiꞌranno. (Efe. 3:14, 15) Addinta hagiirraamma ikka hasiꞌnummoro mitto coye Yihowa hasiꞌranno garinni assa hasiissannonke. Maatekkira hasiisannore wonshitanni hattono insa baxattotanna ayirrisattota leellishanni heedhenni isira soqqamate assattore Yihowa horonta hawannokkita addaxxa dandaatto.—Rom. 12:10.
NAAZIROOTU GEDEERE IKKATE MIMMITO JAWAACHISHSHE
14. Coyiꞌneemmo coyinni roorenkanni ayeoo jawaachisha hasiissannonke?
14 Xaa yannara Yihowa magansiꞌra doodhitannori baalu isira noonsa baxillinni uminsa horo agurate maahoyye yaa hasiissannonsa. Mito woyite tenne assa shota diꞌꞌikkitanno. Togoo akata leellishate mimmito kaaꞌla dandiineemmohu hiittoonniiti? Coyiꞌneemmo coyinni mimmito jawaachinshe tenne assa dandiineemmo. (Iyo. 16:5) Albinni roore Yihowara soqqamate songoꞌne giddo heeshshosi bikkunnita assiꞌrate sharramanni noohu no? Rosu mine wolootuwiinni baxxinoha ikke heeꞌra lowo geeshsha qarra ikkitusirono baxxinoha ikke heeꞌrate sharramanni noohu afootto wedellichi no? Maatensa gibbunsarono Yihowara ammanante heeꞌrate sharrantanni noo roduuwi woy Qullaawu Maxaafi rosaano no? Togoore muxxe roduuwa naandeemmonsatanna uminsa horo agurte Yihowara soqqamate assitannorira galanteemmonsata kulle jawaachishate afiꞌnummo faro baala horoonsiꞌno.—Film. 4, 5, 7.
15. Mitu roduuwi woꞌma yanna soqqansho giddo noo roduuwa kaaꞌlitinohu hiittoonniiti?
15 Mito woyite woꞌma yanna soqqansho giddo noori ammanate roduuwinkera mitore assine kaaꞌla dandiineemmoha ikkara dandaanno. (Law. 19:17; Ibi. 13:16) Mitte Sirilaankaho heedhannoti ammanantinoti jawa rodoo roduuwa konni garinni kaaꞌla hasidhino. Ise xuratu woxe lendiseta soqqanshonsa agurannokki gede angate anje noonsare suwisaano ikke soqqamannore lame meya roduuwa kaaꞌla hasidhino. Hakko daafira ise insara, silketenni hasaawate ikkannoha shiima woxe aganu kiiro soyate heddino. Tini rodoo dancha akata leellishshino!
16. Hundi waro heedhino Naazirooti lawishshinni maa ronseemmo?
16 Hundi waro uminsa fajjonni Naaziroota ikkite soqqantinori lawishshinni lowore ronseemmo! Ikkirono tini qixxaawo iimi Anninke Yihowa daafirano rosiissannonkeri no. Isi, addinta iso hagiirsiisa hasiꞌneemmotanna ninkeneeto isira sayinse uyinummo woyite eꞌnoommo qaale wonsha hasiꞌneemmota afino. Yihowa ninke mittu mittunku isira noonke baxille leellisha dandiineemmo faro fane ayirrisinonke. (Law. 23:15, 16; Maq. 10:28-30; 1 Yoh. 4:19) Naaziricha ikke soqqamate qixxaawo Yihowa isira soqqamate yine uminke horo agurreemmota afannotanna naadannota leellishshanno. Hakko daafira uminke fajjonni woꞌmanka woyite Yihowara soqqamate dandiinummore baala assino.
MAYITE QOLATTO?
-
Naazirootu uminsa horo agurtannorenna worbuulle ikkansa leellishshinohu hiittoonniiti?
-
Xaa yannara Naazirootu gedeere ikkate mimmito jawaachisha dandiineemmohu hiittoonniiti?
-
Naaziricha ikkate qixxaawo Yihowa iso magansidhannori daafira maa afinota leellishshanno?
FAARSO 124 Woꞌmanka Woyite Ammanamme Heeꞌno
a Mitu manni Naaziroota ikkanno gede shoominohu Yihowa ikkirono, rooru Israeelete manni Naaziroota ikke soqqama doodhannohu uminsa fajjonni ikkikki digatino.—“ Naaziroota Shoominohu Yihowaati” yitanno saaxine lai.
b Mito woyite borruwanke giddo Naaziroota woꞌma yanna soqqamaano ledo heewisiinsoonni. Ikkirono konni birxichira, insaneeto Yihowara sayise uyitino soqqamaano baalanti Naazirootu gedeere ikka dandiitanno gara xawinsoonni.
c Naazirootu eꞌino qaali ledo xaadooshshe afiꞌrinohu wolu loosi noonsakkiha ikkara dandaanno.
d JW.ORG aana “Yihowa Farciꞌraasine Woꞌnaalsha” yaannohu hunda nooha “Bikku Heeshsho Heeꞌrate Kaꞌnummo” yaanno birxicho lai.
e MISILETE XAWISHSHA: Mittu Naazirichi fooqete aana heeꞌre maatesi miili reenna madaarrara haaꞌne haꞌnanna laꞌꞌanni no. Isi Naaziricha ikkino daafira reeshshu noowa mara didandaanno.
