1-2. Suꞌmasi hunni yannara Yihowara macciishshaminosire huwanteemmo gede kaaꞌlannonkeri maati?

 HANNI tenne hedi: Isi daafira hedattohu mittu manchi suꞌmakki hunino. Isi suꞌmakki huninohu kaphunni ikkinota afootto; ikkirono kayinni mitu manni konne kapho ammanino. Roore dadillisanno coyi, insa konne kapho tareessitino daafira batinyu manni konne kapho ammanino. Hakka woyite mayi macciishshamannohe? Mannaho hedattohanna suꞌmikkira qorophattoha ikkiro suꞌmakki hunniro xissiisiꞌrattoti dihuluullissannote.—Law. 22:1.

² Kuni lawishshi suꞌmasi hunnita Yihowara mayi macciishshaminosiro huwanteemmo gede kaaꞌlankera dandaanno. Yihowate ayyaanaame ooso giddonni mittu Heewanira Yihowa daafira kapho coyiꞌrino. Ise konne kapho ammantino. Kuni kaphi Addaaminna Heewani Yihowara finqilanno gede assino. Tini qolte baalunku manni cubbonna reyo ragiꞌranno gede assitino. (Kal. 3:1-6; Rom. 5:12) Alamete aana noo qarri baalu lawishshaho reyo, olunna shetto batidhinohu Sheexaanu Edenete kaashshu basera tareessino kaphinni kainohunniiti. Kuni kaphinna kaphu abbino coyi Yihowa xissiisiꞌranno gede assino? Assinoti dihuluullissannote. Ikkirono tennera Yihowa diaaraawino woy koma diamaxxino. Hatteentenni isi ‘hagiirraamo Magano’ ikke heeꞌrino.—1 Xim. 1:11, NW.

3. Maa assate qoosso noonke?

³ ‘Yihowa suꞌma guwisse’ yitannote qarrissannokki hajajora hajajamme isi suꞌmi qullaawa ikkanno gede kaaꞌlamate qoosso noonke. (Far. 113:1) Yihowa assinoha dancha coye baala wolootaho kulle qullaawa suꞌmasi guwisa dandiineemmo. Ati isi suꞌma guwisatto? Hanni Maganinke suꞌma woꞌma giddonkenni guwinseemmo gede kakkayisannonkeha sase kaajja coye laꞌno.

 YIHOWA SUꞌMASI GUWINSEEMMO WOYITE HAGIIDHANNO

4. Yihowa guwinseemmosi woyite hagiidhannohu mayiraati? Lawishsha kuli. (Misileno lai.)

⁴ Suꞌmasi guwinseemmo woyite iimi Anninke hagiidhanno. (Far. 119:108) Hatto yaa kayinni woꞌmanka dandaanno Maganira guuntete xeꞌne noonsari mannu ooso gede jawaante afiꞌrate guweenyu hasiisannosi yaateni? Deeꞌni. Hanni mitto lawishsha laꞌno. Mitte shiinqa qaaqqo annise goowa hanqaffe, “Alamete aana ate gedee anni dino!” yitannosi woyite annise lowo geeshsha hagiidhanno. Mayira? Isi qaaqqosi jawaachishanna guwisa hooggusiro hagiidha didandaanno yine heda hasiissannonkeni? Dihasiissannonke. Isi hagiidhinohu qaaqqosi baxanno daafiraatinna ise baxxannositanna naaddannosita leellishshino daafiraati. Isi togoo akatta ise lophitanno woyite hagiirraame ikkitanno gede kaaꞌlitannoseta afino. Taalle noosikki Anninke Yihowano guwinseemmosi woyite hagiidhannohu iseraati.

5. Maganu suꞌma guwinseemmo woyite hiikku kaphi xawo fulanno gede assineemmo?

⁵ Iimi Annanke guwinseemmo woyite, Sheexaanu ninke mittu mittunku daafira coyiꞌrino kaphi xawo fulanno gede kaaꞌlineemmo. Sheexaanu Maganu suꞌmira ammaname halamanno manchi nookkihu gede asse coyiꞌrino. Qoleno fonqolu iillannosi woyite Maganoho ammanamannohu diheeꞌranno yiino. Sheexaanu, ninke baalunku uminke qiniitira yine Maganoho ammanama agurreemmohu gede asse coyiꞌrino. (Iyo. 1:9-11; 2:4) Kayinni ammanamino manchi Iyyoobi Sheexaanu kapho xawo fushshino. Atina Maganoho ammanante heeꞌratto? Ninke mittu mittunkura, Maganoho ammanamme soqqamme suꞌmisira halamatenna iso hagiirsiisate qoosso noonke. (Law. 27:11) Tenne assa ninkera lowo ayirrinyeeti.

6. Moote Daawitinna Leewaawootu lawishsha harunsa dandiineemmohu hiittoonniiti? (Nehimiya 9:5)

⁶ Ammanamino manni Magano baxansa, suꞌmasi woꞌma giddonni guwisanno gede assitannonsa. Moote Daawiti, “Lubboꞌya Kaaliiqa galati; woꞌma mannimmaꞌya qullaawa suꞌmasi galati” yee borreessino. (Far. 103:1) Daawiti Yihowa suꞌma guwisa Yihowa umosi guwisa ikkitinota wodanchino. Yihowa suꞌma gannanna macciishshineemmo woyite, isi hiittoohoronna assinoha dhagge ikkanno coye qaangeemmo. Daawiti Annisi suꞌmi qullaawanno gede assanna guwisa hasiꞌrino. Isi ‘woꞌma mannimmasinni’ yaano woꞌma giddosinni tenne assa hasiꞌrino. Leewaawootuno albisa ikkite Yihowa suꞌma guwissino. Insa coyidhanno qaali Yihowaha qullaawa suꞌma woꞌmunni woꞌma guwisate guutinoha ikkinokkita ammante adhitino.  (Nehimiya 9:5 nabbawi.) Insa umonsa heeshshi assite woꞌma giddonni Yihowa guwisansa iso hagiirsiissinoti dihuluullissannote.

7. Soqqanshonkenninna barru barru heeshshonkenni Yihowa guwisa dandiineemmohu hiittoonniiti?

⁷ Xaa yannara Yihowa lowo geeshsha galanteemmotanna banxeemmota woꞌma giddonkenni wolootaho kulle iso hagiirsiisa dandiineemmo. Soqqammeemmo woyite qara mixonke, mannu Yihowawa daanno gedenna ninkente gede baxillaancho Annanke afanno gede kaaꞌla ikkitinota qaaga hasiissannonke. (Yai. 4:8) Qullaawu Maxaafi Yihowa, baxillesi, taashshosi, hayyosi, wolqasinna wole baxissanno akkattasi xawisanno gara mannaho kula hagiirsiissannonke. Qoleno Yihowa lawishsha harunsate sharramme iso guwisanna hagiirsiisa dandiineemmo. (Efe. 5:1) Hatto assineemmoha ikkiro mannu tenne busha alame giddo ninke wolootuwiinni baxxinoommore ikkinoommota huwataranna baxxinoommore ikkinoommohu mayiraatiro xaꞌmara dandaanno. (Mat. 5:14-16) Barru baala mannu ledo xaande hasaambeemmo woyite baxxinoommore ikkinoommohu mayiraatiro xawinse kullammonsara dandiineemmo. Tini suwashshu wodani noonsa manni Maganinkewa daanno gede assitanno. Kuri doogganni Yihowa guwinseemmoha ikkiro isi wodana tashshi assineemmo.—1 Xim. 2:3, 4.

YIHOWA SUꞌMA GUWINSEEMMO WOYITE YESUUSA HAGIIRSIINSEEMMO

8. Yihowa suꞌma guwisate Yesuusi kaajja lawishsha ikkinonkehu hiittoonniiti?

⁸ Iimano ikko uulla noohu hedate dandoo noonsa kalaqami baalu giddo Yesuusi geeshsha Annasi afinohu dino. (Mat. 11:27) Yesuusi Annasi baxanno; hattono Yihowa suꞌma guwisate dancha lawishsha ikkinonke. (Yoh. 14:31) Isi reyara albaanni noo hashsha Annisiwa huucciꞌri woyite uullate aani soqqanshosi, “Suꞌmakki egensiisoommo” yee gumulino. (Yoh. 17:26, NW) Isi hatto yaasi mayyaate?

9. Yesuusi Annisi daafira xawise kulate hiikkonne lawishsha horoonsiꞌrino?

⁹ Yesuusi mannaho Maganu suꞌmi Yihowa ikkinota kule calla diagurino. Yesuusi rosiisinohu Yihudu manni wonanni Yihowa suꞌma afinoho. Kayinni Yesuusi mannaho Yihowa daafira ‘egensiisate’ dancha lawishsha ikkinonke. (Yoh. 1:17, 18) Lawishshaho Ibiraawootu Afiiti Qullaawa Borro Yihowa maarannohanna mararannoha ikkinota kultanno. (Ful. 34:5-7) Yesuusi mittu qaetenni fule baino beettinna annisi lawishsha horoonsiꞌre tini halaale ikkase xawise kulino. Kuni anni maaro eino beettisi ‘fafowa heeꞌre daanna’ afe dodanni mare hanqafe godowinta gatona yiinosita kultanno xagge nabbambeemmo woyite, Yihowa maaronna mararro roore xabbe leeltannonke. (Luq. 15:11-32) Yesuusi wolootu Annisi addinta hiittoohoro huwattanno gede kaaꞌlino.

10. (a) Yesuusi Annisi suꞌma horoonsiꞌrinotanna wolootuno hatto assitara hasiꞌrannota anfeemmohu hiittoonniiti? (Maarqoosi 5:19) (Misileno lai.) (b) Yesuusi xaa yannara ninke ma assinammora hasiꞌranno?

¹⁰ Yesuusi wolootuno Annisi suꞌma horoonsidhara hasiꞌranno? Ee hasiꞌranno. Hatte yannara heedhinori mite ammaꞌnote massagaano lowo geeshsha qullaawa ikkino daafira Maganu suꞌma gana dihasiissanno yite ammantannoha ikkara dandaanno; Yesuusi kayinni kuni Qullaawa Borro ledo sumuu yaannokki budi Annisi suꞌma ayirrisannokki gede assasira diwodhino. Hanni Yesuusi Gergesenooni yinanni qooxeessira mitto agaaninte amaddino mancho hursi woyite ikkinore laꞌno. Hakko qooxeessi manni lowo geeshsha waajjino daafira Yesuusi qooxeessinsanni agure haꞌranno gede huucciꞌrino; hakko daafira Yesuusi hakko dikeeshshino. (Maq. 5:16, 17) Ikkirono isi hakko heeꞌranno manni Yihowa suꞌma afara  hasiꞌrino. Hakko daafira Yesuusi konne hurino mancho isi assinosire ikkikkinni Yihowa assinosire haꞌre mannaho kulanno gede hajajino. (Maarqoosi 5:19 nabbawi.) a Xaa yannarano Yesuusi Annisi suꞌma alame woꞌmate kullammora hasiꞌranno! (Mat. 24:14; 28:19, 20) Hatto assineemmo woyite Mootenke Yesuusa hagiirsiinseemmo

11. Yesuusi harunsaanosi mayite huuccidhanno gede rosiisino? Tini lowo geeshsha hasiissannota ikkitinohu mayiraati? (Hiziqeeli 36:23)

¹¹ Yesuusi, Yihowa hedinori suꞌmisi qullaawa ikkanno gedenna isi daafira kaphinoonni kaphi xawo fulanno gede assa ikkitinota afino. Mootichinke harunsaanosi, “Iima heeꞌrattohu Annanke, suꞌmikki qullaawa ikko” yite huuccidhanno gede rosiisinonsahu iseraati. (Mat. 6:9) Yesuusi tini lowo geeshsha hasiissanno hajo baalanka kalaqama laꞌannota ikkitinota afino. (Hiziqeeli 36:23 nabbawi.) Hedate dandoo noonsa kalaqami giddo Yihowa suꞌmi qullaawanno gede assate Yesuusi geeshsha sharraminohu dino. Ikkollana Yesuusa amandi yannara diinnasi iso mayi cubbo loosino yite kassassino? Magano xonino yite kassassino. Yesuusi, qullaawa Annisi suꞌma huna woy misha lowo cubbo ikkitinota afinoti dihuluullissannote. Isi togoo jaddo loosino yine kassansoonnisi daafira lowo geeshsha dadillino. Amandasira albaanni noo saatera ‘lowo geeshsha yaadanno’ gede assinosihu qaru korkaati konne ikkara dandaanno.—Luq. 22:41-44.

12. Yesuusi baalantenni roortino doogonni Annisi suꞌmi qullaawanno gede assinohu hiittoonniiti?

¹² Yesuusi Annisi suꞌmi qullaawa ikkanno gede assate shetinsoonnisita, xonnoonnisitanna kaphunni kassansoonnisita baala dandee saino. Isi Annisira baalunku coyinni hajajaminota afino daafira saalanno gede assannosiri mitturino dino. (Ibi. 12:2) Qoleno isi hattee qarru yannara Sheexaanu xaaddotenni sianni noosita afino. (Luq. 22:2-4; 23:33, 34) Sheexaanu Yesuusi ammanamannokki gede asseemmo yee hexxinoti dihuluullissannote; ikkirono irraawe gatino! Yesuusi jeefote Sheexaanu waajjo kapho kaphannoha ikkinotanna buutote qarri iillinsarono Yihowara ammanante soqqantanno soqqamaano noosita buuxisino!

13. Gashshe noo Mootekki hagiirsiisa dandaattohu hiittoonniiti?

 ¹³ Gashshe noo Mootekki hagiirsiisa hasiꞌratto? Wolootu Maganinke ayimma affanno gede assite woꞌmanka woyite Yihowa suꞌma guwisi. Hatto assatto woyite Yesuusi faale hadhanni nootto. (1 Phe. 2:21) Yesuusi gede Yihowa hagiirsiisanna diinasi ikkinohu Sheexaanu waajjo kapho kaphannoha ikkinoti leeltanno gede assatto!

YIHOWA SUꞌMA GUWINSEEMMO WOYITE MANNU HEESHSHO AFIꞌRANNO GEDE KAAꞌLINEEMMO

14-15. Mannaho Yihowa daafira rosiinseemmo woyite hiikku hagiirsiisanno coyi ikkanno?

¹⁴ Yihowa suꞌma guwinseemmo woyite mannu heeshsho afiꞌranno gede kaaꞌlineemmo. Hiittoonni? Sheexaanu ‘ammantannokkiri wodana beeshshino.’ (2 Qor. 4:4) Hakko daafira insa Sheexaanu tareessanno kapho ammantanno; isi, Maganu dino, Maganunniwa shiqa didandiinanni, isi mannaho dihedannoho, kaajjadoho hattono cubbo loossinore hegerera qorichishanno yee kaphanno. Isi tenne assannohu Yihowa suꞌma hune hattono mishamanno gede asse mannu Maganunniwa shiqannokki gede assateeti. Kayinni sabbakate loosinke Sheexaanu hedinori qinaannokki gede assanno. Mannaho Maganinke daafira halaale rosiinseemmo woyite isi suꞌmi qullaawanno gede assineemmo. Tini mayi guma abbitannoyya?

¹⁵ Maganu Qaali giddo noo halaali lowo wolqa afiꞌrino. Mannaho Yihowa daafira rosiinsenna isi ayimma afanno gede kaaꞌline lowo geeshsha hagiirsiisanno guma afiꞌneemmo. Hakkunni gedensaanni mannu Sheexaanu kaphinni didogamanno; hattono ninkente gede baxillaancho Annanke afanno. Insa taalle nookki wolqasi affe dhagge assidhanno. (Isa. 40:26) Yihowa taashshannoha ikkino daafira iso addaxxa rossanno. (Mar. 32:4) Insa Yihowate lowo hayyonni lowore rossanno. (Isa. 55:9; Rom. 11:33) Qoleno Yihowa baxille ikkinota affanno woyite sheshifattanno. (1 Yoh. 4:8) Yihowawa shiqqanno woyite oososi ikkite hegerera heeꞌrate hexxonsa xabbe leeltannonsa. Mannu iimi Anninsawa shiqanno gede kaaꞌla ninkera lowo ayirrinyeeti! Hatto assineemmo woyite Yihowa ‘ledosi loonseemmori’ gede asse laꞌꞌannonke.—1 Qor. 3:5, 9.

16. Maganu suꞌma afa mito manna kaaꞌlitinonsahu hiittoonniiti? Lawishsha kuli.

 ¹⁶ Mannaho umi qara Maganu suꞌmi Yihowa ikkinota calla rosiinseemmoha ikkara dandaanno. Tini umise suwashshu wodani noonsare lowo geeshsha kaaꞌlitara dandiitanno. Lawishshaho Aaliya b yinanni wedellitte Kiristaana ikkitinokki maate giddo lophitino. Ise ammaꞌnosenni kassi diyitino; woy Maganunniwa shiqqinohu gede assite diheddanno. Kayinni Yihowa Farciꞌraasine ledo xiinxallase kaaꞌlitinose. Ise Magano Jaalise gede assite laꞌꞌa hanaffino. Qoleno Maganu suꞌma batinye Qullaawu Maxaafi tiro giddonni fushshine hoolle guwishshu suꞌma lawishshaho, Mooticha yaannoha worroonnita affuti dhagge assidhino. Ise Maganu suꞌmi Yihowa ikkinota afase heeshshose soorritino. Ise dhagge assidhe, “Ada muxxe jaaliꞌyara suꞌmu noosi!” yitino. Tini mayi guma abbituyya? Ise ledde, “Xa harshammi yoomma; tini anera lowo ayirrinyeeti” yitino. Istiivi yinannihu muuziiqa ganate dandoo noosi manchi kayinni Yihudu ammaꞌnora laalaattanno maate giddo lophino. Isi batinye ammaꞌno lawisiisaano ikkitinota afino daafira insawa shiqa dihasiꞌranno. Kayinni isi amasi shiiꞌre xissiisiꞌre noo yannara, Yihowa Farciꞌraasinchi mitto mancho Qullaawa Maxaafa xiinxallisanna ofolle macciishshate sumuu yiino. Isi Maganoho suꞌmu noosita afiti lowo geeshsha dhagge assiꞌrino. Isi togo yiino: “Maganoho suꞌmu noosi yinanna horo macciishshe diegennoommo. Mite yee Maganu addinta nooha ikkinota huwatoommo; hakkiinni iso jaaliꞌya gede asse laꞌꞌa hanafoommo.”

17. Woꞌmanka woyite Yihowa suꞌma guwisate murciꞌroottohu mayiraati? (Misileno lai.)

¹⁷ Sabbakattonna rosiisatto woyite Yihowaha qullaawa suꞌma mannaho kulatto? Maganinke addinta hiittoohoro affanno gede kaaꞌlattonsa? Hatto assatto woyite Maganu suꞌma guwisatto. Mannu Yihowa ayimma seekke afanno gede kaaꞌlite woꞌmanka woyite Yihowaha qullaawa suꞌma guwisi. Konni garinni mannu heeshsho gatisatto. Qoleno Mootekki Kiristoosi Yesuusi lawishsha harunsatto. Baalunkunni roore kayinni baxillaancho Annakki Yihowa hagiirsiisatto! “Hegere hegerera” isi suꞌma guwisiꞌri!—Far. 145:2.