Meerinna minaannise Jooni a heeꞌrannohu Filippiinsete gobbanni loosoho dayinohu lowo manni heeꞌranno qooxeessiraati; insa konni mannira sabbaka dandiino daafira hagiidhino. Meeri Koroonu fayya yannara ise heedhanno gobbara noo mannira calla ikkikkinni, wole gobbara heeꞌranno mannirano Qullaawu Maxaafi xiinxallo hanafisiisa dandiitino. Ise tenne assitinohu hiittoonniiti?

Meeri Qullaawu Maxaafi rosaanose, “Qullaawa Maxaafa xiinxalla hasiꞌrannohu affinoonnihu wolu manni no?” yite xaꞌmitanno. Rosaanoseno ee no yitusero, insa ledo egensiissannose gede xaꞌmitanno. Tenne harancho xaꞌmo xaꞌma duucha woyite dancha guma abbitanno. Mayira? Korkaatuno Maganu Qaale baxxannori duucha woyite mininsa mannira woy baxxanno jaallansara rossinori daafira kula hasidhanno. Tenne xaꞌmo xaꞌma mayi guma abbituyya?

Meeri Qullaawa Maxaafa xiinxallissannoti Jaazmiini yinanni rosaancho Qullaawa Maxaafa xiinxalla hasiꞌrannoha shoole manna egensiissinose. Insa giddonni Kiristiini yinanniti rossanni noore lowo geeshsha baxxino daafira Meeri lamalate giddo lame higge xiinxallissannose gede xaꞌmidhino. Meeri, Kiristiini Qullaawa Maxaafa xiinxalla hasiꞌrannohu affinohu wolu manni nooro xaꞌmituseta Kiristiini “Ee jaallaꞌyanni egensiiseemmahena” yitino. Hakkiinni boode lamala giddo Kiristiini Meerira Qullaawa Maxaafa xiinxalla hasidhannore shoole jaallase egensiissinose. Gedensoonni Kiristiini wole jaalase ledono egensiissinose; kuri jaallaseno wolootu ledo egensiissinose.

Kiristiini Filippiinsete heedhanno maateseno Qullaawu Maxaafi daafira rossara hasidhino. Hakko daafira beettose Andiriyaara kultino. Andiriya umi qara ‘Yihowa Farciꞌraasine hashshi-gedeno daggino ammaꞌnooti, Yesuusa diammantanno hattono Akkala Gondooro calla horoonsidhanno’ yitino. Kayinni ise mitte higge calla xiinxallituhu gedensaanni Yihowa Farciꞌraasine daafira noose lao biddi assidhino. Ise xiinxallitanni heedhe haarore affuro, “Qullaawu Maxaafi yii geeshsha tini halaaleho” yitanno!

Gedensoonni Andiriya Meerira lame jaallasenna mitte ledose loossanno beetto egensiissinose; insano Qullaawa Maxaafa xiinxalla hanafino. Qoleno Meeri affinokkiha ikkirono, ille ballitinoti Anjeela yinanniti Andiriya ada insa xiinxallanno woyite macciishshitanno. Hakkiinni mitto barra Anjeela Andiriya Meeri ledo egensiissannose gedenna iseno Qullaawa Maxaafa xiinxalla hasidhannota kultuse. Anjeela rossanni noore baxxino. Ise mittu agani giddo lowo qummeeshshuwa qaaga dandiitino hattono lamalate giddo shoole higge xiinxalla hasidhino! Anjeela, Andiriya kaaꞌlitannase  viidiyote widoonni ganyite gambooshshe ea hanaffino.

Meeri Kiristiina xiinxallissanni heedheenna Kiristiina minaanni Jooshuwa mine heeꞌrannota affuti, hasiꞌriro isino xiinxalla dandaannota kultusi. Jooshuwa togo yiino: “Ani ofollella macciishsheemmo; xaꞌmo dixaꞌmattae; xaꞌmattaeha ikkiro kayi agure haꞌreemmo.” Isi, insa xiinxallo hanafihunni ontu daqiiqi gedensaanni, Kiristiina xaꞌmitanno xaꞌmonni roore duucha xaꞌmo xaꞌmino; hattono Qullaawa Maxaafa xiinxalla hasiꞌrino.

Meeri xaꞌmitannoti harancho xaꞌmo batinyu manni Qullaawa Maxaafa xiinxallanno gede assitino. Ise kuri rosaano giddo batinye ammanate roduuwise xiinxallisa kaaꞌlitannose gede assitino. Xaphoomunni Meeri shoole gobbara heeꞌrannohu 28 mannira Qullaawu Maxaafi xiinxallo hanafisiissino.

Konni woꞌnaalshira kulliti Qullaawa Maxaafa umo xiinxalla hanaffuti Jaazmiini Dotteessa 2021 cuuantino. Kiristiini Onkoleessa 2022 cuuantino hattono maatese ledo heeꞌrate Filippiinsi higgino. Kiristiini Meeri ledo egensiissinori lame rosaanono cuuantino. Boodu agani gedensaanni Anjeelano cuuantino; hattono xa woꞌma yanna suwisaancho ikkite soqqantanni no. Xa Kiristiina minaanni Jooshuwa, beettonsa Andiriya hattono wole batinye rosaano ayyaanaamittetenni dancha gede lophitanni no.

Umi xibbi diro batinyu manni rosinore maatensaranna jaallansara kulino daafira danchu duduwi rahe halaꞌlino. (Yoh. 1:41, 42a; Soq. 10:24, 27, 48; 16:25-33) Qullaawa Maxaafa xiinxallissinannihanna wole hasatto noonsa manna, “Qullaawa Maxaafa xiinxalla hasiꞌrannohu affinoonnihu wolu manni no?” yitine xaꞌma dandiitinanni. Tini ayi manchino xaꞌma dandaannoti harancho xaꞌmo Qullaawa Maxaafa mageeshshi manni xiinxallanno gede assitara dandaannoro mayi afino?