1-2. (a) Roorenkanni mitto mancho gatona yaa qarra ikkitannonkehu hiittoo woyite ikkara dandaanno? (b) Deenise maartannota ikkase leellishshinohu hiittoonniiti?

 WOLOOTA gatona yaa qarra ikkite egentinohe? Ninke giddo batinyeho roorenkanni mittu manchi coyiꞌrinori woy assinori lowo geeshsha xissiisannonke woyite iso gatona yaa qarra ikkitannonke. Ikkirono xissonke dandiine saꞌꞌanna gatona yaa dandiineemmo. Hanni lawishshaho, Deenise a yinanni rodoo woꞌnaalsha laꞌno; ise dhagge ikkanno garinni maartannota ikkase leellishshino. Deenisenna maatese 2017nni haarote fannoonnita Yihowa Farciꞌraasineta Qara Biiro daaꞌꞌattara hadhino. Insa qaera higanni heeꞌreenna mittu manchi makeenisinni mare insa makeena gani. Deenise tenne danonni kainohunni dammitino. Ise dammitinowiinni kaꞌanno woyite qaaqquullise baasa gawajjaminotanna minaannise Birayaani kayinni reyinota affu. Ise hakkawarita qaage, “Ragu tunsinoe hattono lowo geeshsha gurchaawoomma” yitino. Gedensaanni ise manchu makeenansa ganinohu ago agino daafira, jingilli assitanno xagga adhino daafira woy hedosi bebbeehanteenna ikkinokkita wodanchitu; hattono keere afiꞌrate Yihowa huuccidhino.

² Konne dano iillishino mancho lubbo shiino daafira kassansoonni. Isi yoo yinisiro usuramara dandaanno. Kayinni daanyu Deenise shiqqe farcidhanno qaali kuni manchi usuramanno woy usuramannokki gede assara dandaannota kulise. Deenise togo yitino: “Heeshshoꞌya giddo iillinoehu konni buutote qarri daafira kayise hasaawa hasiissannoeta hedummata, madaꞌya fanne maxine fincinoonnieha lawinoe.” Boode lamala gedensaanni Deenise yoote mine marte, maatesera lowo xisso abbino  manchi albaanni isi daafira farciꞌrate qixxaabbu. Ise mayituyya? Daanyu mancho maarannosi gede kultino. b Ise coyidhe gudduta daanyu wiꞌla hanafi. Isi togo yiino: “Daanya ikke loosoommohu 25 diri giddo yoote mine horonta togoore macciishshe diegennoommo. Gawajjantino maate gawajjinonsa mancho gatona yinara huuccidhanna horonta macciishshe diegennoommo. Togoo baxillinna maaro daafira macciishshe horo diegennoommo.”

 3. Deenise gatona yitanno gede kakkayisinoseri maati?

³ Deenise gatona yitanno gede kaaꞌlinoseri maati? Ise Yihowa maaro hiincitino. (Mik. 7:18) Yihowa leellishinonke maaro naandeemmoha ikkiro, ninkeno woloota gatona yaate kaꞌneemmo.

 4. Yihowa ma assinammora hasiꞌranno? (Efessooni 4:32)

⁴ Yihowa mulla gatona yiinonkente gede ninkeno woloota mulla gatona yinammora hasiꞌranno. (Efessooni 4:32 nabbawi.) Isi xissiisinonke manna gatona yaate qixxaamboommore ikkinammora hasiꞌranno. (Far. 86:5; Luq. 17:4) Konni birxichira, albinni roore maarreemmore ikkineemmo gede kaaꞌlannonkeha sase coye laꞌneemmo.

XISSOꞌNE LASHSHI ASSITINOONTE

 5. Lawishsha 12:18 kultannonte gede, mittu manchi koffi assinkero hiitto ikkinammora dandiineemmo?

⁵ Roorenkanni muli jaalinke woy maatenke miili coyiꞌrannori woy assannori lowo geeshsha xissiisankera dandaanno. (Far. 55:12-14) Mito woyite, lowo geeshsha hanqinsinkero woy xissiinsinkero siwiilunni qansoonninkeha lawankera dandaanno. (Lawishsha 12:18 nabbawi.) Xissonke hawate woy lashshi assate woꞌnaalleemmoha ikkara dandaanno. Kayinni hatto assa billawunni qansinkehu gedensaanni billawa hakko madate giddonni fushshinikki agurate gedeeti. Hatteente gede xissonke lashshi assine agurrummoro woyyimma afiꞌneemmo yine heda didandiineemmo.

 6. Mittu manchi koffi assannonke woyite ma assinammora dandiineemmo?

⁶ Mittu manchi koffi assannonke woyite hanqa rakkankera dandiitanno. Qullaawu Maxaafi mito woyite hanqinammora dandiineemmota kulanno. Ikkirono hanqine higa giwa woy keeshsha hasiissannonkekkita kuleno qorowisiisannonke. (Far. 4:4; Efe. 4:26) Mayira? Korkaatuno hanqine keeshsha qaafo adhineemmo gede assitannonke. Hanqu mito woyite dancha guma abbara dandaanno. (Yai. 1:20) Mittu coyira hanqa nooreeti; hanqine higa giwa woy keeshsha kayi ninke doorshaati.

 7. Mittu manchi xissiisannonke woyite hiitto ikkinammora dandiineemmo?

⁷ Miincanninke woyite wolu garinnino xissiisiꞌnammora dandiineemmo. Lawishshaho Aani yinanni rodoo togo yitino: “Ani shiima noomma waro anniꞌya amaꞌya agure haꞌrino; hattono minenke soqqantannota awuuttannoe mancho adhino. Facci assine agurroonniehu gede asse hedoomma. Insa ooso ilita ane agurinoehunna hasiꞌrannoekkihu gede asse hedoomma.” Joorjeeti yinanni rodoo minaannise foorinota affuti hiitto ikkitinoro kultanni togo yitino: “Anjenni kayinse jaalla ikkine keeshshinoommo. Mitteenni suwisaano ikkinoommo! Wodaniꞌya hiiqqamino.” Naaoomi yinanni rodoono togo yitino: “Minaanniꞌya xissiisannoe yee horo hede diegennoomma. Hakko daafira isi ane maaxame teeda baꞌino misilla laꞌꞌanni keeshshinota kulieta, awaawurinohunna kaadinoehu gede asse hedoomma.”

 8. (a) Woloota gatona yineemmo gede assannonkehu mitu korkaati maati? (b) Gatona yinummoro afiꞌneemmo atooti maati? (“ Mittu Manchi Lowo Geeshsha Xissiisinonkehalla Ikki?” yitanno saaxine lai.)

 ⁸ Wolu manni coyiꞌrannonkere woy assannonkere hoola didandiineemmo; kayinni ninkeneeto eemadha dandiineemmo. Duucha woyite qole woyyanno coyi gatona yaate. Mayira? Korkaatuno Yihowa banxeemmo hattono isi gatona yinammora hasiꞌranno. Hanqine keeshshineemmohanna gatona yineemmokkiha ikkiro, gowwimmate looso loonsammoranna mannimmanke gawajjannore assinammora dandiineemmo. (Law. 14:17, 29, 30) Hanni Kiristiini yinanni rodoo woꞌnaalsha laꞌno. Ise togo yitino: “Xissiisinoe coye calla hedeemma woyite hakkeya hagiirraame diꞌꞌikkeemma. Kaaꞌlitannokki sagale iteemma. Gari goxicho digoxeemma; hattono hanqo hooꞌla qarra ikkitannoe; tini qolte minaanniꞌyanna wolootu ledo nooe aante gawajjitanno.”

 9. Koma amada agura hasiissannonkehu mayiraati?

⁹ Xissiisinonke manchi maaro xaꞌmiꞌra hoogiro nafa, xissonke ajisha dandiineemmo. Hiittoonni? Aleenni kulliti Joorjeeti togo yitino: “Mito geeshsha keeshshoommaha ikkirono, albi minaanniꞌyara koma amaxxanna hanqa aguroomma. Tini lowo keere afiꞌreemma gede assitinoe.” Koma amandeemmokkiha ikkiro xissiisiꞌne woloota digawajjineemmo. Qoleno umonke kaaꞌlannoha dancha coye assineemmo yaano xissonke heda agurre bashshonte gede hagiirsiisannonke coye assa hananfeemmo. (Law. 11:17) Kayinni gatona yaate qixxaawoottokkiha ikkiro maa assa hasiissannohe?

HANQO WOY KOFFI YAA AGURATE KAAꞌLANNOHERE

10. Hanqo woy koffi yaa agurate yanna hasiissannonkehu mayiraati? (Misillano lai.)

¹⁰ Hanqo woy koffi yaa aguratto gede kaaꞌlannoheri maati? Tennera kaaꞌlannohehu mittu coyi mite yanna saꞌa geeshsha agarate. Lowo geeshsha madiꞌrino manchi akimete minira haꞌre xagisiꞌrihu gedensaanni hurate yanna hasiissannosi. Hatteente gede mitto mancho godowinta gatona yaate yanna hasiissannonkeha ikkara dandaanno.—Ros. 3:3; 1 Phe. 1:22.

11. Huuccatto gatona yaattoha ikkatto gede kaaꞌlitannohehu hiittoonniiti?

¹¹ Yihowa gatona yaattoha ikkatto gede  kaaꞌlahera huucciꞌri. c Aleenni qummi assiniti Aani huuccatto kaaꞌlitinose gara coyidhino. Ise togo yitino: “Yihowa coyiꞌnoommohu woy assinoommohu gara ikkinokki coyira gatona yaannonke gede, mittu mittunku maatenke miilira huuccatto assoomma. Hakkiinni anniꞌyaranna haarote adhino minaamasira borrote sokka borreesse gatona yoommansata kulummansa.” Aani hatto assa shota ikkitinosekkita maaxxukkinni coyidhino. Togo yitino: “Gatona yaate Yihowa lawishsha haꞌrunsate woꞌnaaloomma daafira, anniꞌyanna minaamasi Yihowa daafira ledde afa hasidhanno yee hexxeemma.”

12. Uminke hedo agurre Yihowa addaxxa hasiissannonkehu mayiraati? (Lawishsha 3:5, 6)

¹² Umiꞌne hedo ikkikki Yihowa addaxxe. (Lawishsha 3:5, 6 nabbawi.) Yihowa woꞌmanka woyite woyyannonkere afino. (Isa. 55:8, 9) Isi horontanni gawajjannonkere asse diyaannonke. Hakko daafira isi maarreemmore ikkineemmo gede kulannonke woyite, tenne assa kaaꞌlitannonketa addaxxa dandiineemmo. (Far. 40:4; Isa. 48:17, 18) Ikkirono uminke hedo addaxxineemmoha ikkiro gatona yaa hoongammora dandiineemmo. (Law. 14:12; Erm. 17:9) Aleenni qummi assiniti Naaoomi togo yitino: “Minaanniꞌya teeda baꞌino misilla laino daafira, umi qara iso gatona diyeemma yee hedoomma. Isi galagale xissiisiꞌreemma gede assannoe woy mageeshshi geeshsha xissiisiꞌroommaro hawanno yee waajjoomma. Yihowara xissoꞌya leeltannosi yee hedoomma. Kayinni Yihowara xissoꞌya leeltannosi yaa isi ane hedora sumuu yaanno yaa ikkitinokkita wodanchoomma. Isi xissoꞌyanna hanqo agurate yanna hasiissannoeta afinoha ikkirono gatona d yeemmata ikkammarano hasiꞌranno.”

DANCHA DANCHARE HEDI

13. Rooma 12:18-21 kultanno garinni maa assa hasiissannonke?

¹³ Lowo geeshsha xissiisinonke mancho gatona yineemmo woyite, hatte hajo kayise hasaawa aguratenni sainore assa hasiꞌneemmo. Xissiisinonke manchi ammanate rodoonke ikkiro mixonke keere kalaqate. (Mat. 5:23, 24) Hanqo agurre maaranna koma amada agurre gatona yaa doodhineemmo. (Rooma 12:18-21  nabbawi; 1 Phe. 3:9) Tenne assineemmo gede kaaꞌlannonkeri maati?

14. Maa assate sharrama hasiissannonke? Mayira?

¹⁴ Koffi assinonke mancho Yihowa laꞌꞌanno garinni laꞌꞌate sharrama hasiissannonke. Yihowa mannunnita dancha akatta laꞌꞌa doodhanno. (2 Dud. 16:9; Far. 130:3) Duucha woyite mannunnita dancha akatta illachinshummoro dancha akattansa laꞌꞌa dandiineemmo. Busha akattansa illachinshummoro kayinni busha akattansa laꞌꞌa dandiineemmo. Wolootunnita dancha akattansa illachinsheemmoha ikkiro insa gatona yaa shota ikkitannonke. Lawishshaho, Jaareedi yinanni rodii togo yiino: “Mittu koffi assinoe rodii soꞌro isihu baxeemmohu batinyu danchu coyi ledo heewisiiseemmo woyite iso gatona yaa shota ikkitannoe.”

15. Mittu manchira gatona yinoommosita kula dancha ikkitinohu mayiraati?

¹⁵ Wolu heda hasiissannonkehu lowo geeshsha hasiisanno coyi mittu manchira gatona yinoommosita kulate. Mayira? Aleenni qummi assiniti Naaoomi yitinore wodanchi. Togo yitino: “Minaanniꞌya ‘Gatona yoottae?’ yee xaꞌminoe.  Anino ‘Ee yoommahe’ yee coyiꞌrate hedummata afuunni fula gibbue. Iso godowinta gatona yoommakkita wodanchoomma. Gatona yoommasita kula qarra ikkituerono, gedensoonni kayinni iso ‘gatona yoommahe’ yaa dandoomma. Hatto yuummata minaannaꞌya hindiiddo qalxitusi; hattono duhu hawacci yiinosita wodanchoomma; anino fooliishsho afiꞌroomma. Hatte yannanni kayise iso albinte gede ammaꞌna hanafoomma; qoleno galagalle dancha jaalla ikkinoommo.”

16. Gatona yaate daafira maa rosootto?

¹⁶ Yihowa gatona yineemmore ikkinammora hasiꞌranno. (Qol. 3:13) Ikkirono woloota gatona yaa qarra ikkitankera dandiitanno. Kayinni xissonke lashshi assineemmokkihanna hanqo agurate sharrammeemmoha ikkiro, gatona yaa qarra diꞌꞌikkitannonke. Hakkiinni haaro ikkine danchare heda dandiineemmo.—“ Gatona Yaate Kaaꞌlannonkeha Sase Coye” yitanno saaxine lai.

GATONA YINUMMORO AFIꞌNEEMMO ATOOTE HEDDE

17. Gatona yineemmore ikka kaaꞌlitannonkehu hiittoonniiti?

¹⁷ Gatona yineemmore ikkineemmo gede assannonkehu batinyu korkaati no. Hanni kuri giddo mito laꞌno. Umihunni, maaranno Anninke Yihowa lawishsha haꞌrunsineemmo hattono iso hagiirsiinseemmo. (Luq. 6:36) Layinkihunni, Yihowa leellishinonke maarora galatu noonketa leellinsheemmo. (Mat. 6:12) Sayikkihunni, dancha ordu fayyimma heedhannonke hattono jaaloominke kaajje heeꞌranno.

18-19. Woloota gatona yinummoro afiꞌneemmo gumi maati?

¹⁸ Woloota gatona yineemmoha ikkiro hendoommokki atoote afiꞌnammora dandiineemmo. Hanni aleenni qummi assinite Deenise woꞌnaalsha laꞌno. Ise hakka woyite affinokkiha ikkirono, dano iillishino manchi yoote albira shiqihu gedensaanni isonooto shaate hedino. Ikkirono Deenise gatona yitinositera dhagge assiꞌrino daafira Yihowa Farciꞌraasine ledo Qullaawa Maxaafa xiinxalla hanafino.

¹⁹ Mitto mancho gatona yaa wolu baalunku coyinni roore lowo geya qarrisanno coye labbankera dandiitanno; kayinni tini baalunkunni roorino baꞌraaꞌra afiꞌneemmo gedeno assitankera dandiitanno. (Mat. 5:7) Hakko daafira baalunku Yihowa lawishsha haꞌrunsine gatona yaate dandiinummore baala assino.