1. Maatewoosi 7:13, 14 kultanno garinni haꞌnanni doogo heeꞌnoommo yineemmohu mayiraati?

 NINKE baalunku haꞌnanni doogo heeꞌnoommo. Haꞌnanni heeꞌnoommohu Yihowa baxillunni gashshannota haaro alame eateeti; mixonke hakko heeꞌrate. Barru baala heeshshonniwa massitanno doogo haꞌrate sharrammeemmo. Ikkirono, Yesuusi yiinonte gede tini doogo ruukkashshotenna mito woyite haꞌrate diꞌꞌinjiitannote. (Maatewoosi 7:13, 14 nabbawi.) Guuntete xeꞌne noonkere ikkinoommo daafira, tenne doogonni fula rakkannonke.—Gal. 6:1.

2. Konni birxichira maa ronseemmo? (“ Umonke Heeshshi Assa Mito Coye Biddi Assiꞌrate Kaaꞌlitannonke” yitanno saaxineno lai.)

² Heeshshonniwa massitannote ruukkashsho doogonni fullummokkinni heeꞌra hasiꞌnummoro, hedonke, laonkenna assootenke biddi assiꞌrate sharrama hasiissannonke. Soqqamaasinchu Phaawuloosi, Qorontoosi heeꞌranno Kiristaani ‘heeshshonsa biddi assiꞌra’ agurannokki gede jawaachishinonsa. (2 Qor. 13:11) Tenne amaale ninkeno harunsa hasiissannonke. Konni birxichira, Qullaawu Maxaafi mito coye biddi assiꞌneemmo gede kaaꞌlannonke garanna ayyaanaamittetenni gikki yitino jaallanke heeshshote doogonni fulleemmokki gede kaaꞌlitannonke gara ronseemmo. Qoleno, Yihowa dirijjite uyitannonke biddishsha harunsa qarra ikkitannonke gede assara dandaanno coyi maatiro laꞌneemmo. Hattono, umonke heeshshi assa, Yihowara soqqammanni heeꞌne hagiirrinke baikkinni mito coye biddi assiꞌneemmo gede kaaꞌlitannonke gara xiinxallineemmo.

3. Maganu Qaali kaaꞌlahera dandaannohu hiittoonniiti?

³ Hedonke layiꞌra shota diꞌꞌikkitannonke. Mayira? Korkaatuno wodaninke xagaraamo ikkino daafira, mamira qole massanni noonkero nafa afa hoongammora dandiineemmo. (Erm.  17:9) Duucha woyite ‘umonke doga’ rakkannonke. (Yai. 1:22) Konnira ninkeneeto layiꞌrate Maganu Qaale horoonsiꞌra hasiissannonke. Maganu Qaali giddiidi ayimmanke yaano “wodanu giddo noo hedonna yorto” afiꞌneemmo gede kaaꞌlannonke. (Ibi. 4:12, 13) Maganu Qaali giddonketa afiꞌneemmo gede kaaꞌlannonke daafira, raajete yaa dandiineemmo. Kayinni Qullaawu Maxaafi woy Maganu shoomino manni aannonke amaale macciishshine horo afiꞌrate umonke heeshshi assineemmore ikka hasiissannonke.

4. Moote Saaooli naaxxaleessa ikkinota leellishannori maati?

⁴ Moote Saaooli lawishshi umo heeshshi assa hooga mayi qarra abbitannoro leellishanno. Saaooli naaxxaleessa ikkino daafira, hedoꞌyanna assooteꞌya biddi assiꞌra hasiissannoe yee dihedino. (Far. 36:1, 2; Imb. 2:4) Lawishshaho, Saaooli Amaaleqoota qeelihu gedensaanni, Yihowa maa assa hasiissannosiro bade kulisi woyite hajajama giwasi tenne leellishshanno. Masaalaanchu Saamueeli, Saaooli Yihowara hajajama giwinota kulisi woyite, Saaooli soꞌrosi ammana giwino. Hatteentenni isi hajajama hoogasi hakkeeshshi geeshsha qarra abbitannokkihu gede asse hede, assootesi gara lawisate woꞌnaalino; qoleno wolootaho worino. (1 Sam. 15:13-24) Saaooli hakkuyira albaannino hatto assino. (1 Sam. 13:10-14) Isi wodanisi booꞌnaleessa ikkano gede assiꞌrasi dadillissannote. Saaooli hedosi biddi assiꞌrinokki daafira Yihowa rufinosi; hattono moote ikkannota giwinosi.

5. Saaooli lawishshinni maa ronseemmo?

⁵ Saaooli lawishshinni roso afiꞌrate ninkeneeto togo yine xaꞌma hasiissannonke: ‘Maganu Qaali giddo noo amaale nabbaweemmo woyite, tenne amaale macciishsha giweemmo? Assoommori hakkeeshshi geeshsha soꞌro diꞌꞌikkino yee hedeemmo? Assoommore wolootaho woreemmo?’ Kuri xaꞌmuwa giddo mittete nafa ee yine qolleemmoha ikkiro, hedonkenna laonke biddi assiꞌrate sharrama hasiissannonke. Hatto assa hoongummoro wodaninke booꞌnaleessa ikkanno daafira, Yihowa jaallasi ikkineemmota giwanno.—Yai. 4:6.

6. Moote Saaoolinna Moote Daawiti mereero noo badooshshe kuli.

⁶ Moote Saaoolinna isinni aane moohinohu Yihowa “Seera” baxannohu Moote Daawiti mereero noo badooshshe laꞌno. (Far. 1:1-3) Daawiti Yihowa umo heeshshi assitannore gatisannota, booꞌnaleeyye kayinni giwannota afino. (2 Sam. 22:28) Konnira, Daawiti Maganu seeri hedosi biddi assannosi gede assiꞌrino. Isi togo yee borreessino: “Amaalinoeha Kaaliiqa galaxxeemmo; wodaniꞌya hashsha nafa seejjannoe.”—Far. 16:7.

7. Umonke heeshshi assineemmore ikkinummoro maa assineemmo?

⁷ Umonke heeshshi assineemmore ikkinummoro, gara ikkitinokki hedo gara ikkinokkire assineemmo gede assitunkekkinni Maganu Qaali biddi assannonke gede assiꞌneemmo. Maganu Qaali “Doogo tenneetina ise higgine hadhe” yee kulannonke. Doogo soꞌne gurara woy qiniitira hinge haꞌneemmo woyite qorowisiisannonke. (Isa. 30:21) Yihowa macciishshinummoro lowo horo afiꞌneemmo. (Isa. 48:17) Lawishshaho, mittu manchi amaalinkero disaalleemmo. Hattono Yihowa mittu baxillaanchu anni gede towaatannonketa huwanteemmo daafira isiwa albinni roore shinqeemmo.—Ibi. 12:7.

8. Yaiqoobi 1:22-25 kultanno garinni Maganu Qaali hincilaallote gedeeti yineemmohu mayiraati?

⁸ Maganu Qaali hincilaallote gede ikkankera dandaanno. (Yaiqoobi 1:22-25 nabbawi.) Ninke giddo rooru barru baala mininni fullammora albaanni ninkeneeto hincilaallote layiꞌneemmo. Hatto assineemmohu wolu manninni xaandammora albaanni biddi assiꞌra hasiissannonkere biddi assiꞌrateeti. Hatteente gede barru baala Maganu Qaale nabbambeemmo woyite hedonkenna laonke biddi assiꞌneemmo gara huwanteemmo. Batinyu roduuwi mininni fultara  albaanni barru qummeeshsha nabbawa kaaꞌlitinonsata coyidhino. Insa nabbabbinorinni hedonsa biddi assidhino. Hakkiinni insa barra woꞌma Maganu Qaalinni afidhino amaale loosunni leellishate sharrantanno. Barru baala Maganu Qaale nabbambe hiinca hasiissannonke. Hatto assa shota labbara dandiitanno; kayinni hegere heeshshowa massitannote ruukkashsho doogonni fullummokkinni heeꞌrate assa hasiissannonkehu lowo geeshsha hasiisanno coyi giddo mittu konneeti.

9. Jaalikki amaalannohehu mayira ikkara dandaanno?

⁹ Yihowawiinni xeertiꞌratto gede assitannohe doogo hadhe egennootto? (Far. 73:2, 3) Ayyaanaamittetenni gikki yiino jaalikki tenne biddi assiꞌratto gede worbimmatenni amaalihe woyite, macciishshite loosu aana hosiisootto? Hatto ikkiro, assoottori garaho; hattono jaalikki qorowisiisinohe daafira galatattositi dihuluullissannote.—Law. 1:5.

10. Jaalikki amaalihero maa assa hasiissannohe?

¹⁰ Maganu Qaali “madiissirono jaalu woyyanno” yaanno. (Law. 27:6) Hatto yaa mayyaate? Hanni aane noo lawishsha hendo: Makiinu batiꞌranno doogo tayisse saꞌꞌattora agadhite nootto yine hendo; mobayilekki qaqqassanni nootto daafira wodanikki bebbeehame no. Kawa kaꞌa laittokkinni tayisse saꞌanni heedheenna jaalikki angakki xissiise amade badhera qole goshooshe qaccera fushshihe. Isi biqe amadinohe daafira anga xissitinoheha ikkirono, isi rahe hatto assasinni makiinu ganihekkinni gatootto. Isi biqe amadinohe bayichi lowo barra dhiwinoheha ikkirono, jaalikki hatto assino daafira koffi yaattoni? Koffi yaattokkiti egennantinote. Assinoherira galatattosi. Hatteente gede jaalikki coyiꞌrattori woy assattori Maganunnihu xalalu biddishshi ledo sumuu yiinokkita kule qorowisiisihero, umi qara xissiisiꞌrattoha ikkara dandaanno. Ikkirono amaalinohe daafira hanqitooti woy koffi yitooti. Hatto assa gowwimmate. (Ros. 7:9) Hatteentenni jaalikki waajja agure amaalinohe daafira galatisi.

11. Mittu manchi jaalisi amaale macciishsha giwanno gede assannosiri maati?

¹¹ Mittu manchi lubbote jaalisi amaalinosi amaale macciishsha giwanno gede assannosiri maati? Naaxxate. Naaxxanno manni “kulleenna macciishsha” dibaxanno. Togoo manni “halaale agurte, maatto macciishsha baxxanno.” (2 Xim. 4:3, 4) Insa wolu manninni roore egennaamma ikkitinohu gede assite heddanno daafira, amaale macciishsha dihasidhanno. Ikkollana, Soqqamaasinchu Phaawuloosi togo yee borreessino: “Woluwiinni woyyannori nookkiha, ‘Wole manna ani rooreemmo’ yee hedannohu, umosi doganno.” (Gal. 6:3) Moote Selemooni tenne dancha gede asse xawisanni togo yee borreessino: “Seejjo adhannokkihunni gowwu geerchu mootenni, busulu buxichu wedellichi woyyanno.”—Ros. 4:13.

12. Galatiyu Sokka 2:11-14 noo xaggenni, Pheexiroosi lawishshinni maa ronseemmo?

¹² Hanni soqqamaasinchu Pheexiroosi lawishsha laꞌno; Phaawuloosi iso mannu albaanni boroorinosi. (Galatiyu Sokka 2:11-14 nabbawi.) Pheexiroosi, Phaawuloosi amaalinosi garanna mannu albaanni amaalinosita hede koma amaxxa dandaanno. Pheexiroosi kayinni hayyicha ikkino daafira, amaale macciishshino. Isi tennera Phaawuloosi dikoꞌmino. Hatteentenni gedensaanni isi Phaawuloosi “baxaminohu rodiinke” yiino.—2 Phe. 3:15.

13. Mitto mancho amaallammora albaanni balanxe maa heda hasiissannonke?

¹³ Jaalakki amaala hasiissannoheta hedittoro, balaxxe maa heda hasiissannohe? Jaalakki amaalattora albaanni ateneeto togo yite xaꞌmi: ‘Quwa sae “keeraancho” ikkanni noommo ikka?’ (Ros. 7:16) Quwa sae keeraancho ikkanno manchi, Yihowa biddishshi garinni ikkikkinni  umisi biddishshi garinni wolootaho yoo yaanno; qoleno wolootaho gatona yaa qarra ikkitasira dandiitanno. Ateneeto layiꞌrittohu gedensaannino jaalakki amaala hasiissannoheha ikkiro, soꞌrosi badde kulisi; hattono soꞌrosi wodanchanno gede assitanno xaꞌmo xaꞌmi. Jaalikkira yoo yaannohu Yihowaati ikkinnina ate ikkoottokkita qaagi; konnira coyiꞌrattori Qullaawa Borro aana xintaminoha ikka hasiissannosi. (Rom. 14:10) Maganu Qaali giddo noo hayyo horoonsidhe mitto mancho amaalatto woyite, Yesuusi gede mararattoha ikki. (Law. 3:5; Mat. 12:20) Mayira? Korkaatuno Yihowa ninke laꞌꞌannonkehu ninke woloota laꞌneemmo garinniiti.—Yai. 2:13.

14. Maganu dirijjite maa qixxeessitannonke?

¹⁴ Yihowa dirijjitesite uullayidi kifile widoonni heeshshote doogora haꞌneemmo gede massagannonke; dirijjitesi Maganu Qaali giddo noo amaale loosu aana hosiisate kaaꞌlitannonke viidiyo, borronna gambooshshe qixxeessitannonke. Tini dirijjitesi qixxeessitanno borro ammannannite; korkaatuno Qullaawa Borro aana xintantinote. Aliidi Bisi sabbakate looso woyyaawino garinni sabbaka dandiinanni gara muranno woyite qullaawa ayyaana addaxxanno. Ikkirono, Aliidi Bisi sabbakate looso loonsanni gara biddi assa hasiissanno woyite wirro lae biddi assanno. Mayira? “Korkaatuno tenne alame ikkito soorrantanni no.” Konnira Maganu dirijjite haaru garinni loosa rosa hasiissannose.—1 Qor. 7:31, NW.

15. Mite halashshaanora mayi tuncu yaannonsa?

¹⁵ Yihowa dirijjite amanyootu woy mittu rosi daafira, Qullaawu Maxaafi aana xintamino biddishsha uyitannonke woyite harunsineemmoti dihuluullissannote. Ikkina Maganu dirijjite assitannori heeshshonke ledo xaado afiꞌrinoha ikkiro maa assineemmo? Lawishshaho, muli diri kawa Yihowa magansiꞌnanni minna minatenna gatamarate fushshinanni woxi lowo geeshsha lexxanni haꞌrino. Konnira, Aliidi Bisi duucha songuwa mitte Addaraashe horoonsidhanno gede biddishsha uyino. Konninni kainohunni, mite songuwa mitte ikkitanno gede assine, mite Gambooshshu Addaraashuwa hirroonni. Woxe Gambooshshu Addaraashe roore hasiissannowa minate horoonsiꞌnoonni. Heeꞌrattohu Addaraashe hirroonniwanna songuwa mitte assinoonniwa ikkiro, haarore rosa qarra ikkitahera dandiitanno. Mite halashshaano gambooshshe assiꞌrate xeertowa haꞌra hasiissannonsaha ikkara  dandaanno. Addaraashe minate woy gatamarate daafurte loossino roduuwi hirroonni daafira, dadillitara dandiitanno. Insa yannansanna wolqansa beebba guxxitinohu gede assite heddara dandiitanno. Ikkirono insa tenne qixxaawora kaaꞌlantanno; tennera galanteemmonsa.

16. Qolasiyaasi Sokka 3:23, 24 noo amaale harunsanke hagiirraamma ikkine heeꞌrate kaaꞌlitannonkehu hiittoonniiti?

¹⁶ Loonseemmohu Yihowara ikkinotanna isi dirijjitesi massaganni noota qaangeemmoha ikkiro, hagiirrinke baikkinni heeꞌneemmo. (Qolasiyaasi Sokka 3:23, 24 nabbawi.) Moote Daawiti qullaawa mine minate woxe fushshi woyite coyiꞌrinori dancha lawishsha ikkannonke. Isi togo yiino: “Baalankare oottonkehu ateeti; aninna manniꞌya kageeshsha hige maminni abbinoommo? Atenkalla qolle uyinoommohe.” (1 Dud. 29:14) Ninkeno woxe fushshineemmo woyite Yihowawiinni afiꞌnoommoha isira qole uyinanni heeꞌnoommo. Ikkirono, Yihowa loonsara hasiꞌranno looso kaaꞌlate yannanke, wolqankenna woxenke uyineemmo woyite hagiidhanno.—2 Qor. 9:7.

17. Biddi assiꞌra hasiissannoheri noota afittoro hexxo mudha hasiissannohekkihu mayiraati?

¹⁷ Heeshshonniwa massitannote ruukkashsho dogoonni fullummokkinni heeꞌrate, Yesuusi lawishsha seekkine harunsa hasiissannonke. (1 Phe. 2:21) Biddi assiꞌra hasiissannoheri noota afiꞌrittoro hexxo mudhitooti. Tini isinni Yihowa biddishsha harunsa hasiꞌrattota leellishshannota ikkitara dandiitanno. Yihowa guuntete xeꞌne noonkere ikkinoommota afino daafira, Yesuusi lawishsha guutu garinni harunsa dandiineemmokkita huwatannota deꞌnoonke.

18. Hendoommowa iillate maa assa hasiissannonke?

¹⁸ Baalunku albillitte afiꞌneemmo atoote illachinsho; hedonke, laonkenna assootenke biddi assiꞌrate sharrammo. (Law. 4:25; Luq. 9:62) Umonke heeshshi assine, ‘keerunni [hagiidhinanni] heeꞌno; seejjo adhino.’ (2 Qor. 13:11) Hatto assinummoro “baxillunna keeru Magani” ledonke ikkano. Hattono xaa yannara hagiirraamma ikkine heeꞌneemmonna albillitte hegere heeshsho afiꞌneemmo gede kaaꞌlannonke.