LOPHITANNI noo gobbanni woxe afiꞌrate yite Galchimi gobbuwa hadhinori batinyu roduuwi, agurte ilantino gobba higgino. Yihowaranna mannaho noonsa baxilli insa Maganu Mangiste halashshaano roore hasiissannowa hadhe sabbakkanno gede assinonsa. (Mat. 22:37-39) Kuri roduuwi hatto assate uminsa horo agurtinohu hiittoonniiti? Ikkirono mayi atoote afidhino? Hanni kuri xaꞌmuwara dawaro afiꞌrate Kaamerooni gobbara soqqantino roduuwi woꞌnaalshuwa laꞌno.

Oneesime yinanni rodii ilaminote Kaamerooni gobbanni 1998nni wole gobba haꞌrino. Isi 14 diro wole gobbara heeꞌrino. Mitto barra Kiristaanu gambooshshiwa mittu rodii sabbakate loosi daafira kulino lawishsha macciishshino. Gambooshshunniwa roduu togo yee coyiꞌrino: “Lamu jaalla addi addi bayicho qulxuꞌme woshshaaxxitanno; mittu lowo qulxuꞌme mittu kayinni shiima qulxuꞌme amaxxino; ikkina, shiima qulxuꞌme calla woshshaaxxe amaxxi manchi lowota amaxxi jaalisiwa mare diwoshshaaxxanno?”

Oneesime konne lawishsha macciishshihu gedensaanni, Qullaawa Maxaafa xiinxalla hasiꞌrannohu lowo manni noowa ilamino gobba Kaamerooni hige hakko heedhanno halashshaano kaaꞌlate hedino. Kayinni yaachishinosiri no. Oneesime lowo diro wole gobbara keeshshihu gedensaanni gobbasi hige hakko heeꞌnanni heeshsho rosa dandaanno ikka? Tenne afate isi balaxe Kaamerooni haꞌre lee agana keeshshino. Hakkiinni isi woꞌmunni woꞌma hakko heeꞌrate 2012 Kaamerooni higino.

Oneesime togo yiino: “Hakko noota iibbado ayyarenna heeꞌnanni gara rosa hasiissinoe. Gambooshshu Addaraashera xarapheessaho ofolla rosa hasiissinoe.” Isi lede, “Ikkollana woꞌmunni woꞌma roso illachinsheemmo daafira, sunu sununni wole gobbara noommo waro ofolleemmota injiitanno wombarra hawoommo” yee muushshi yaanni coyiꞌrino.

Oneesime 2013 honse diro Faransayete heedhe Kaamerooni higginota Zheeraldine yinanni rodoo adhino. Kuri minaanninna minaama Yihowara soqqamate illachishansanni mayi atoote afiꞌrino? Oneesime togo yiino: “Lamunku Maganu Mangiste Sawaakooti Rosi Mine ronsoommo; hattono Beeteelete soqqammoommo. Sai diro songonke giddo 20 Qullaawu Maxaafi rosaano cuuantino. Addinta qulxuꞌme ‘woshshaaxxate’ malino bayicho noommo yee hedeemmo.” (Maq. 1:17, 18) Zheeraldine, “Hedoommahunni aleenni lowo atoote afiꞌroomma” yitino.

Juuditi yinanni rodoo Ameerika hadhe hakko heedhanno; kayinni ise Yihowara albinni roore soqqama hasidhanno. Ise togo yitino: “Maateꞌya layiꞌrammara Kaamerooni haꞌre higeemma kiiro Qullaawa Maxaafa xiinxalliseemmaha lowo manna agure haꞌreemma daafira wiꞌleemma.” Ikkirono Juuditi Kaamerooni higge heeꞌrate hobbi ruxxi yitino.  Isera lowo woxe baantanni loosi noose daafira, Kaamerooni heeꞌranno annisera akkaꞌmanno woxe aa dandiitanno. Kayinni Juuditi Yihowa addaxxite ilantino gobba Kaamerooni higgino. Ise xa heedhanni noo heeshsho Ameerikaho noo warite gede qawaaxxaame ikkitinokkita coyidhino. Juuditi Kaamerooni heedhanno heeshsho rosa dandiitanno gede kaaꞌlasera Yihowa huuccidhino; woradu aliidi laꞌꞌaanchinna minaamasino jawaachishinose.

Juuditi hakkawarita qaagge “Sasu diri giddo shoole ayyaanaamittete ooso afiꞌraꞌyanni lowo geeshsha hagiidhoomma” yitino. Ise baxxitino suwisaancho ikkite soqqama hanaffino. Xa ise minaannise Saami Kasteli ledo woradu looso loossanni no. Juuditi anni makkiyya? Isenna maatese wole gobbara annase woxe adhitukkinni darte gobbanno hospitaale hase afiꞌrino. Annase qarru nookkiha darre akkammoonni; tini hagiirsiissannote.

Vikitori yinanni rodii Kanaadaho heeꞌrara haꞌrino. Isi Agarooshshu Shaera yuniversite eꞌꞌe rosate daafira kulanno birxicho nabbawihu gedensaanni, tenne daafira seekke hedino. Isi yuniversitete rosanni noo roso facci asse agure harancho yanna giddo ogimma rosa hanafino. Isi togo yiino: “Tenne ogimma rosaꞌya mulenni looso afiꞌreemmo gede kaaꞌlitinoe; hattono suwisaancho ikke soqqama hanafoommo; tini halchanni keeshshoommote.” Vikitori gedensaanni Kaaroolini yinanni rodoo adhino; insa lamunku Kaamerooni haꞌrino. Insa hakkiicho sinu biiro daaꞌꞌati woyite, mitu roduuwi Kaamerooni soqqamate daafira heddanno gede jawaachishshinonsa. Vikitori togo yiino: “Tenne maahoyye yineemmokki gede assannonkeri dino; heeshshonke bikkunnita assiꞌne heeꞌnoommo daafira, konne koyishsha adhinoommo.” Kaaroolini mito woyite dhiwannoseha ikkirono, insa Kaamerooni haꞌrate murciꞌrino.

Vikitorinna Kaaroolini dancha duduwo macciishsha hasiꞌrannohu lowo manni noo daafira insa kaaꞌlate suwisaano ikke soqqama hanafino. Insara codhino woxi noonsa daafira umi qara looso diloosino. Hakkunni gedensaanni, insa Kanaada hadhe boode agana looso loossino; hakko loosse afidhino woxinni xaano Kaamerooni higge suwisaano ikkite soqqama hanaffino. Insa mayi atoote afidhino? Maganu Mangiste Sawaakooti Rosi Mine eꞌe rossino; hakkiinni baxxitino suwisaano ikkite soqqama hanaffino; xa insa gimbaataho soqqantanni no. Vikitori, “injiitino heeshsho aguranke Yihowa atoote afiꞌneemmo gede assitinonke” yiino.

Aaleni yinannihu 2002 Jarmanete yuniversitera rosanni heeꞌre Wedella Heeshshoꞌne Giddo Maa Assate Doodhitinanni? yitanno tiraakte nabbawino. Nabbawinori wole mixo fushshiꞌranno gede assinosi. Isi 2006 Soqqamaanote Qajeelshi Rosi Mine eꞌꞌe rosino; hakkiinni ilamino gobba Kaamerooni haꞌre soqqamanno gede kulloonnisi.

Aaleni Kaamerooni gobbara gama barra calla loosanno looso afiꞌrino. Gedensaanni isi lowo woxe baantanni looso afiꞌrinoha ikkirono, kuni loosi Yihowara albi geeshsha soqqameemmota hoolannoe yee yaadino. Konnira, baxxino suwisaancho ikke soqqamara koyinsisita konne koyishsha hobbi ruxxi yiikkinni adhino. Loosiisaanchisi damooza ledinosiha ikkirono, isi kayinni giwe baxxino suwisaancho ikkino. Gedensaanni Aaleni Isteefani yinannita Faransayete gobbara lowo diro heedhino rodoo adhino. Ise Kaamerooni hadhuhu gedensaanni qarra ikkannori mayi iillinose?

Isteefani togo yitino: “Hakkeeshshi geeshsha batiꞌrinokki dhibbi dhiwannoehanna alaarje qarrissinoeha ikkirono, ganye akkaꞌmanni woyyimma afiꞌroomma.” Kuri minaanninna minaama cincite soqqantino daafira Yihowa maassiꞌrinonsa. Aaleni  togo yiino: “Katee yinanniwa xeertote noo qooxeessa haꞌne sabbankummo woyite, Qullaawa Maxaafa xiinxalla hasiꞌrannohunni lowo manninni xaandoommo. Gedensaanni insa Qullaawa Maxaafa silketenni xiinxallinsoommonsa. Insa giddo lamu cuuantino; hattono hakkiicho onte halashshaano noo gaamo xintantino.” Isteefani ledde togo yitino: “Mannu heeshshonsa Yihowara sayise aano gede kaaꞌline afiꞌnanni hagiirrinni sainori woluri dino. Kowiicho soqqamankenni togoo hagiirre duucha hinge afiꞌnoommo.” Xa Aaleninna Isteefani woradu looso loosanni no.

Zhizeeli yinanni rodoo Ixaaliyaho hikkiminnu roso rossanni heedhe cuuantino. Ise Qullaawa Maxaafa xiinxallisise minaanninna minaama bikku heeshsho heeꞌrannota laꞌe dhagge assidhino; konnira, iseno Yihowara albinni roore soqqama hasidhino. Zhizeeli rossanni noo roso guddara kaꞌe heedhe woꞌma yanna suwisaancho ikkite soqqama hanaffino.

Zhizeeli Kaamerooni higge Yihowara albinni roore soqqama hasidhino; ikkirono ise yaachishinori no. Ise togo yitino: “Ixaaliyaho heeꞌrate fajjoꞌya hoogeemma hattono hakko noo jaallaꞌyawiinninna maateꞌyawiinni baxxeemma yee yaadoomma.” Ikkirono, Zhizeeli Onkoleessa 2016 Kaamerooni higgino. Yannate gedensaanni ise Leeyonse yinanni rodiira assidhino; Kaamerooni nooti sinu biiro insa Maganu Mangiste halashshaano roore hasiissannowa Ayosi yinanni katama haꞌre soqqamanno gede jawaachishshinonsa.

Ayosi heeꞌnanni heeshsho hiittoote? Zhizeeli togo yitino: “Duucha woyite korreente baꞌe lowo barra keeshshitanno daafira, silkenke chaarje assiꞌrate qarrammeemmo. Silkenke roore yanna diloossanno. Haqqete qishiꞌra rosoomma; waa dirrirate gaare adhine hashsha baatiretenni haꞌneemmo; hashsha haꞌneemmohu mannu batiꞌrannokki daafiraati.” Insa tenne baala cince heeꞌranno gede kaaꞌlinonsari maati? Zhizeeli togo yitino: “Yihowa ayyaani, minaanniꞌya ledo kaaꞌlamaꞌya, hattono roduuwu ayyaanaamittetenni jawaachishshinonke daafira, tenne baala cincine saꞌꞌa dandiinoommo; qoleno maatenkenna jaallanke mito woyite woxunni kaaꞌlitinonke.”

Ikkina, Zhizeeli ilantino gobba higasenni hagiidhitino? Ise “Ee hagiidhoomma” yitino. Ise ledde togo yitino: “Umi qara qarramme hexxo mudhinoommoha ikkirono, tenne dandiine saꞌnummohu gedensaanni, minaanniꞌyanna ani assa hasiissannonkerella assinoommo yine hendoommo. Yihowa addaxxinoommo daafira isiwa albinni roore shinqoommo yaa dandiineemmo.” Leeyonsenna Zhizeeli Maganu Mangiste Sawaakooti Rosi Mine eꞌꞌe rosino; insa xa baxxitino suwisaano ikke soqqamanni no.

Mittu qulxuꞌme woshshaaxxanno manchi lowo qulxuꞌme woshshaaxxate yee qarra ikkannore worbimmatenni dandee saꞌꞌannonte gede, Maganu mangiste sokka macciishsha hasiꞌranno manna kaaꞌlate yite ilantino gobba higginori uminsa horo agurtino. Yihowa, suꞌmisira yite baxille leellishate diinaggaabbe loossino halashshaano horo hawannokkiti egennantinote. (Neh. 5:19; Ibi. 6:10) Heeꞌrattohu wole gobbara ikkironna, ilamootto gobbara Maganu Mangiste halashshaano roore hasiissannoha ikkiro, ilamootto gobba higge soqqama dandaatto? Hatto assittoro lowo atoote afiꞌratto.—Law. 10:22.