1-2. Lawishsha 4:25 noo amaale harunsa dandiineemmohu hiittoonniiti? Lawishsha kuli.

 HANNI aane noo lawishsha hendo. Mitte jawa rodoo alba heedhinota dancha heeshsho heddanni no. Xaa heeshshose qarraataame ikkiturono, ise Yihowara soqqamate dandiiture baala assitanni no. (1 Qor. 15:58) Ise barru baala albillitte Gannatete maatesenna jaallase ledo heedhannota heddanno. Wole rodoo ammanate rodoose xissiisinoseta qaaggannoha ikkirono, koma diamaxxitino. (Qol. 3:13) Mittu rodii alba loosino soꞌro qaaggannoha ikkirono, xa Yihowara ammaname heeꞌrate murciꞌrino.—Far. 51:10.

² Kuri sasenka Kiristaana mitto assannonsari maati? Insa baalunku albi heeshshonsare qaaggannoha ikkirono, barru tuqa hakkawarire calla diheddanno. Hatteentenni insa albillittete yanna ‘dhaabbe laꞌanno.’—Lawishsha 4:25 nabbawi.

3. Albillittete yanna ‘dhaambe laꞌꞌa’ hasiissannonkehu mayiraati?

³ Albillittete yanna ‘dhaawe laꞌꞌa’ hasiissannonkehu mayiraati? Mittu manchi sammi yee badhe hige laꞌꞌanni caaqulamannoha ikkiro, alba hige haꞌre afannokkinte gede quwa saꞌne albi heeshshonke calla qangeemmoha ikkiro, Yihowara woꞌma giddonni soqqammanni heeꞌra didandiineemmo.—Luq. 9:62.

4. Konni birxichira maa xiinxallineemmo?

⁴ Konni birxichira quwa saꞌne albi heeshshonke illachinsheemmo gede woshshaado ikkannonkeha sase coye laꞌneemmo. Insano: (1) quwa saꞌne albi heeshsho qaaga, (2) koma amada hattono (3) meessaneeto quwa saꞌne bushiishate. Kuri sasenka laꞌneemmo woyite, Qullaawu Maxaafihu xintu seeri ‘badhenkeenni nooha hambe, albankeenni nooha amadate hiixanteemmo’  gede kaaꞌlannonke gara xiinxallineemmo.—Fil. 3:13.

5. Rosiisaancho 7:10 mayineemmokki gede qorowisiissannonke?

⁵ Rosiisaancho 7:10, nabbawi. Kunni qummeeshshi “Albi diri hiittoo danchaati?” yaa soꞌrote yaannokkita qaagi. Qaagate dandoo Yihowa uyinonke eltooti. Hatteentenni qummeeshshu, “‘Xaahunni roore albi diri hiittoo danchaati?’ yitooti” yaanno. Konnira, albi heeshshonke xaate ledo heewisiinse, xa coyi baalu bushanni haꞌrino yee heda dihasiissannonke. Wole Qullaawu Maxaafi tiro tenne hedo, “‘Xaatenni roore albi yanna dancha ikkitinohu mayiraati? yite xaꞌmitooti.’ Hatto yee xaꞌma hayyo diꞌꞌikkitino” yitanno.

6. Xaatenni roore albi heeshshonke woyyate yine hendanni heeꞌra hayyo ikkitinokkihu mayiraati? Lawishsha kuli.

⁶ Xaatenni roore albi heeshshonke woyyate yine hendanni heeꞌra hayyo ikkitinokkihu mayiraati? Hatto yine hendeemmoha ikkiro, alba sainoha dancha coye calla illachinsheemmo. Woy hakkawaro iillinonke qarra ajinshe laꞌneemmo gede assitankera dandiitanno. Hanni hundi Israeele lawishsha laꞌno. Insa Gibitsete gobbanni fultanni heedhenni, hakkawaro heeshshonsa qarraataame ikkitinota habbino. Hakkawaro ittannota dancha sagale calla heddino. Insa togo yitino: “Gibitsete heeꞌnoommo waro qulxuꞌme hidhinummokkinni hasiꞌnummo geeshsha intoommo; baaqula, waa afiꞌrinoha coommanno baaqula, daraamo shunkurta, duumo shunkurtanna tuma duumboommo.” (Kir. 11:5) Noore coyiꞌniro insa sagale ‘hidhitukkinni’ ittino? Deeꞌni. Israeelete manni hattee yannara Gibitsete gobbara borojje ikke noo daafira, lowo geeshsha qarramino. (Ful. 1:13, 14; 3:6-9) Ikkirono, insa iillinonsa qarra habbe albi qawaaxxonsa calla halchitino. Insa Yihowa assinonsaha dancha coye illachisha agurte, albi heeshshonsa illachishshino. Yihowa tennera dihagiidhino.—Kir. 11:10.

7. Mitte rodoo albi heeshshose quwa saꞌe heddannokki gede kaaꞌlinoseri maati?

⁷ Quwa saꞌne albi heeshshonke qaaga  woshshaado ikkitannonkekki gede qoropha dandiineemmohu hiittoonniiti? Hanni 1945nni Birukiliini Beeteelera soqqama hanaffino rodoo lawishsha laꞌno. Boodu diri gedensaanni, ise hakkonni Beeteelete soqqamanno rodiira assidhino; insa mitteenni Yihowara lowo diro soqqamino. Ikkollana, 1976nni minaannise dhiwamino. Isi reyara kainota afino daafira, albillitte kaaꞌlitannoseta dancha amaale amaalinoseta coyidhino. Isi togo yee amaalinose: “Adhamanke lowo geeshsha hagiirraamete. Lowo manni togoo hagiirre diafiꞌrino. Ledo sayinsoommota dancha yanna hawattakkiha ikkirono, hatte yannare calla heddooti. Yanna saꞌu kiiro dadillekki hawatta. Iillinohe coye quwa saꞌe heddanni hexxo mudhitooti. Yihowara soqqammanni dancha yanna sayinsoommotera hagiidhi. . . . Qaagate dandoo Maganu uyinonke eltooti.” Tini lowo geeshsha dancha amaaleeti.

8. Rodoonke albi heeshshose quwa saꞌe illachisha hoogase kaaꞌlitinosehu hiittoonniiti?

⁸ Rodoonke tenne amaale loosu aana hosiissino. Ise 92 dirisenni mannu aalo ikkita geeshsha Yihowara ammanante soqqantino. Ise reyitara boodu dirira albaanni togo yitino: “Yihowara woꞌma yanna soqqamoommaha 63 diro hedeemma woyite, hagiirraame heeshsho heeꞌroomma yaa dandeemma.” Mayira? Ise ledde togo yitino: “Heeshshoꞌya hagiirraame assinohu dhagge ikkannohu roduuwu maamaraatinna albillitte gannate ikkitanno uullara roduuwiꞌya ledo Bayiru Kalaqaanchinkenna halaalaanchu Magani Yihowara hegerera soqqammanni heeꞌrate hexxooti.” b Tini rodoo albillittete yanna illachishate daafira dancha lawishsha ikkitannonke.

9. Leewaawoota 19:18 kulloonnire harunsa qarra ikkitankera dandiitannohu hiittoo woyiteeti?

⁹ Leewaawoota 19:18 nabbawi. Duucha woyite, hakko iso gara ikkinokkire assinonkehu  ammanate rodoonke, muli jaalanke woy fiixanke ikkiro, koma amada rakkankera dandiitanno. Lawishshaho mitte rodoo ammanate rodoose woxe moortinoe yite beebbate suꞌmase huntino. Gedensoonni suꞌma huntu rodoo maaro xaꞌmidhinoha ikkirono, beebbate suꞌmase hunni rodoo kayinni tenne daafira heda diagurtino. Atera togoori tuncu yee egenninohe? Togoori tuncu yaa hooginkerono, ninke giddo rooreho koffi assinonke manchira koma amada rakkankeranna gatona yaa qarrissankera dandiitanno.

10. Koma amandeemmokki gede mayi kaaꞌlannonke?

¹⁰ Koma amandeemmokki gede mayi kaaꞌlannonke? Yihowa baalankare laꞌꞌannota dea dihasiissannonke. Isi iillannonkere baala hattono miincanninketa afanno. (Ibi. 4:13) Isi qarrammeemmo woyite ledonke qarramanno. (Isa. 63:9) Yihowa iillitannonke miico baala huneemmo yee qaale eino.—Aju. 21:3, 4.

11. Koma amada hooganke kaaꞌlitannonkehu hiittoonniiti?

¹¹ Koma amada hooganke ninke umonke kaaꞌlitannota dea dihasiissannonke. Aleenni laꞌnummoti beebbate suꞌmase hunni rodoo tini halaale ikkase buuxxino. Yannate gedensaanni ise gatona yitino. Ise wolootaho gatona yinummoro Yihowa ninkerano gatona yaannonketa wodanchitino. (Mat. 6:14) Suꞌmase hunni rodoo xissiisidhinoha ikkirono gatona yitino. Hatto assasenni tini rodoo hagiirraame ikkitino; hattono Yihowara soqqamate illachisha dandiitino.

12. Umi Yohaannisi 3:19, 20 noo hedonni maa ronseemmo?

¹² Umi Yohaannisi 3:19, 20 nabbawi. Ninke baalunku mito woyite ninkeneeto bushiinsheemmo. Lawishshaho, mitootu halaale macciishshitara albaanni assitino coyinni insaneeto bushiishshanno. Wolootu kayinni cuuantu gedensaanni loossino soꞌronni insaneeto bushiishshanno. (Rom. 3:23) Ninke baalunku gara ikkinore assa hasiꞌneemmoti egennantinote. Ikkirono, “ninke baalunku woꞌmanka woyite soꞌneemmo.” (Yai. 3:2; Rom. 7:21-23) Meessaneeto bushiisha hagiirsiissannota ikka hooggurono, dancha ikkitara dandiitanno woyiti no. Hatto yineemmohu mayiraati? Korkaatuno meessaneeto bushiisha assootenke biddi assiꞌneemmo gedenna wirro soꞌro loosa hoogate murciꞌneemmo gede assitankera dandiitanno.—Ibi. 12:12, 13.

13. Meessaneeto quwa saꞌne bushiisha hasiissannonkekkihu mayiraati?

¹³ Wole widoonni kayinni, quwa saꞌne meessaneeto bushiinsheemmoha yaano, maaro eꞌneenna Yihowa gatona yiinkehu gedensaanni nafa, ninkeneeto bushiisha agurreemmokkiha ikkara dandaanno. Konni garinni meessaneeto bushiisha gawajjitara dandiitanno. (Far. 31:10; 38:3, 4) Hiittoonni? Hanni alba loossino cubbira iseneeto bushiishshino rodoo lawishsha laꞌno. Ise togo yitino: “Yihowa gatona diyaannoe yee hedoomma daafira, isira soqqamanni daafuraꞌya assitannori dino yee hedoomma.” Ninke giddo batinyu hatto yee hedanno. Konnira, meessaneeto quwa saꞌne bushiinsheemmokki gede qoropha hasiissannonke. Baalunkunni roore, Yihowa baxanni heeꞌreennanke ninke hexxo mudhine Yihowara soqqama agurrummoro, Sheexaanu mageeshshi geeshsha hagiidhannoro hendo.—2 Qorontoosi 2:5-7, 11 ledo heewisiisi.

14. Yihowa gatona yaankera hasiꞌrannota afa dandiineemmohu hiittoonniiti?

¹⁴ Ikkirono, ‘Yihowa baxannoeta afa dandeemmohu hiittoonniiti?’ yite hedattoha ikkara dandaanno. Hatto yite hedakki umise Yihowa gatona yaannoheta leellishshannote. Lowo dirira albaanni fultinoti mitte Agarooshshu  Shae togo yitanno: “Alba loonsoommo soꞌro, duucha hinge loonseemmohanna tenne qeeꞌla qarra ikkitinonkeha [ikkara dandaanno]. . . . Hexxo mudhitooti. Gatona yinannikki cubbo loosommo yite heddooti. Hatto yite hedattora hasiꞌrannohu Sheexaaneho. Loosootto soꞌrora yaadakki busha mancho ikkoottokkitanna Yihowa gatona yaahera dandaannota leellishshanno. Umokki heeshshi assite Maganu gatona yaannohenna xalalu tiiꞌꞌi heeꞌrannohe gede hattono soꞌro loosattokki gede kaaꞌlahera seekkite huucciꞌri. Mittu qaaqqi mittu gari soꞌro duucha hige loosiꞌro nafa kaaꞌlasira annisiwa dodannonte gede, atino kaaꞌlahera Yihowa huucciꞌrittoro isi shaqqillunni kaaꞌlannohe.”

15-16. Mito Yihowa manna isi baxannonsata afansa ma assitinonsa?

¹⁵ Batinye Yihowa manna isi baxannonsata huwatansa sheshifachishinonsa. Lawishshaho, mittu rodii “Qullaawu Maxaafi Heeshsho Biddi Assanno” yaannohu hunda fulino woꞌnaalsha nabbawe jawaatino. Konni woꞌnaalshira mitte rodoo alba iillinose coyinni kainohunni Yihowa baxannoseta ammana qarra ikkitinoseta coyidhino. Ise cuuantuhu gedensaanni nafa lowo diro hatto yite hedanni keeshshitino. Ikkirono, ise wodote daafira hiincitino; tini Yihowa baxannoseta ammantanno gede kaaꞌlitinose. c

¹⁶ Ise woꞌnaalshi rodoo kaaꞌlinosihu hiittoonniiti? Isi togo yee borreessino: “Anje noommo waro teeda baꞌino misilla laꞌꞌate rosicho agura qarra ikkitinoe. Muli yannara wirro laꞌꞌa hanafoommo. Hakkiinni songote cimeeyye kaaꞌlo xaꞌmiroommo; hattono konne rosicho agurate sharramoommo. Cimeeyye Maganu baxannoetanna maarannoeta kulte jawaachishshinoe. Ikkirono mito woyite, waagu dinoe hattono Yihowa dibaxannoe yee hedeemmo. [Tenne rodoo] woꞌnaalshi lowo geeshsha kaaꞌlinoe. Maganu gatona yaaera didandaanno yee hedaꞌya, Beettisi kakkalo ane cubbo diwate diꞌꞌikkitanno yee heda ikkitinota wodanchoommo. Waagu dinoe yee hedeemmo yanna baalantera nabbawe hiinceemmo gede, konne woꞌnaalsha mure haaꞌre mule wodhoommo.”

17. Phaawuloosi quwa sae isonooto bushiishinokkihu hiittoonniiti?

 ¹⁷ Togoo woꞌnaalshi soqqamaasincho Phaawuloosi qaangeemmo gede assannonke. Isi Kiristaancho ikkara albaanni shota ikkinokki cubbo loosino. Phaawuloosi loosino cubbo qaaginoha ikkirono, quwa sae tenne daafira calla dihedino. (1 Xim. 1:12-15) Isi wodote kakkalo isi umisira uyinoonnisi elto gede asse hedino. (Gal. 2:20) Phaawuloosi quwa sae isonooto dibushiishino; hatteentenni Yihowara soqqamate dandiire baala assino.

18. Konni birxichira maa ronsoommo?

¹⁸ Konni birxichira maa ronsoommo? (1) Qaagate dandoonke Yihowa uyinonke eltooti; albi heeshshonke aye geeshshano dancha ikkituro, haaro alamere kayinni hakkiinni saꞌinota dancha heeshsho heeꞌneemmo. (2) Wolootu xissiissannonkeha ikkara dandaanno, gatona yinummoro kayinni, Yihowara soqqamate illachisha dandiineemmo. (3) Ninkeneeto quwa saꞌne bushiisha Yihowara hagiirrunni soqqammeemmokki gede assitankera dandiitanno. Konnira Phaawuloosi gede ninkeno, Yihowa gatona yaannonketa addaxxa hasiissannonke.

19. Haaro alamera alba assinoommore hendanni diqurtineemmo yineemmohu mayiraati?

¹⁹ Hegere heeshsho heeꞌrate hexxo noonke. Maganu abbannote haaro alamera alba assinoommore hendanni diqurtineemmo. Qullaawu Maxaafi hatte yanna daafira kulanni, “sainore baala hambanni” yaanno. (Isa. 65:17) Hanni hedi: Ninke giddo Yihowara lowo diro soqqantinori mitu roduuwi xa geedhitino; ikkirono, ninke baalunku haaro alamera wirro wedella ikkineemmo. (Iyo. 33:25) Konnira, ninke baalunku albi heeshshonke quwa saꞌne heda hoogate murciꞌno. Hatteentenni albillittete yannanna Yihowara soqqamate illachinsho.