1. Maatewoosi 28:18-20 kultanno garinni, Yesuusi rosaanosi maa assitara hajajino?

 YESUUSI reyotenni kaihu gedensaanni, rosaanosi Galiilaho gamba yite noowa marino. Insara mitto lowo geeshsha hasiisanno coye kulinonsa. Kulinonsari maati? Yesuusi kulinonsari Maatewoosi 28:18-20 no.—Qummeeshsha nabbawi.

2. Konni birxichira hiikkuri xaꞌmuwa xiinxallineemmo?

² Yesuusi rosaanosi manna rosaano assitanno gede hajajino hajajo, xaa yannara ninke baalunkuno wonsha hasiissannonkete. Konnira, Yesuusi uyinonke loosi ledo xaadooshshe afidhinota sase xaꞌmuwa xiinxallineemmo. Umihunni, Maganu haaro rosaano maa assitara hasiꞌrannoro rosiinseemmotano agurranna wolere maa assa hasiissannonke? Layinkihunni, songote giddo noo halashshaano baalanti Qullaawu Maxaafi rosaano ayyaanaamittetenni lophitanno gede kaaꞌla dandiitannohu hiittoonniiti? Sayikkihunni, ayyaanaamittetenni qiiddinori ammanate roduuwinke manna rosaano assate looso wirro loossanno gede kaaꞌla dandiineemmohu hiittoonniiti?

3. Yesuusi manna rosaano assineemmo gede hajaji woyite, wolere maa assinammora hajajinonke?

³ Yesuusi hajajo digoꞌlitinote. Hajajosi mannaho rosiisa hasiissannonke. Kayinni manna rosaano assineemmo woyite dea hasiissannonkekkiri no. Yesuusi, ‘hajajoommoꞌnere baala rosiissensa’ diyiino. Hatteentenni isi, “hajajoommoꞌnere baala assitanno [“agadhitanno,” NW] gede rosiissensa” yiino. Tenne hajajo agadhate  Qullaawu Maxaafi rosaancho rosiisa calla ikkikkinni hajajosi ma garinni agadhannoro kaaꞌlano hasiissannonke. (Soq. 8:31) Hatto assa hasiissannonkehu mayiraati?

4. Hajajo agadhate yaa mayyaate? Lawishsha kuli.

⁴ Hajajo ‘agadhate’ yaa hajajamate yaate. Mittu manchi Kiristoosi hajajo agadhanno woy hajajamano gede rosiisate kaaꞌlannonkeha aane noo lawishsha laꞌno. Mittu makiina kada rosiisanno manchi rosaanosi tiraafikete higge agadhitanno gede rosiisannohu hiittoonniiti? Balaxe rosiisaanchu rosaanosira tiraafikete higge kifilete giddo rosiisannonsaha ikkara dandaanno. Ikkollana, rosaanosi tenne higge agadhitanno gara rosiisate wolereno assa hasiissannosi. Rosaanchu makiina kadannonna rosinore harunsate woꞌnaalanno woyite rosiisaanchisi ledosi ofolle biddishsha aannosi. Konni lawishshinni maa rosa dandiineemmo?

5. (a) Yohaannisi 14:15 nna 1 Yohaannisi 2:3 kultanno garinni, Qullaawu Maxaafi rosaanonke maa assitano gede rosiisa hasiissannonke? (b) Rosaanonke kaaꞌla dandiineemmo gara leellishanno lawishsha kuli.

⁵ Mannaho Qullaawa Maxaafa xiinxallinseemmo woyite, Maganu maa assinammora hasiꞌrannoro rosiinseemmonsa. Kayinni kawiinni sainore assa hasiissannonke. Qullaawu Maxaafi rosaanonke rossinore barru baala loosu aana hosiissanno gede rosiisa hasiissannonke. (Yohaannisi 14:15; 1 Yohaannisi 2:3 nabbawi.) Qullaawu Maxaafi rosaanonkera dancha lawishsha ikkine, rosu mine, loosu basewa woy boohaartanno woyite xinta ikkinoha Qullaawu Maxaafi halaale loosu aana hosiissanno gara leellisha dandiineemmo. Qullaawu Maxaafi biddishsha harunsanke ninke umonke gawajjotenni gatissinonke gara woy dancha doorsha doodhineemmo gede kaaꞌlitinonke gara kullammonsara dandiineemmo. Qullaawu Maxaafi rosaanonke qullaawu ayyaani massagannonsa gede, insa albaanni Yihowa huucca dandiineemmo.—Yoh. 16:13.

6. Mannu Yesuusi hajajo agadhanno gede rosiisate wolere maa assa hasiissannonke?

⁶ Mannu Yesuusi hajajo agadhanno gede rosiisate wolere maa assa hasiissannonke? Qullaawu Maxaafi rosaanonkera manna rosaano assate hasattonsa lexxitanno gede kaaꞌla hasiissannonke. Mite rosaano sabbaka waajjitara dandiitanno. Konnira, rosaanonke ammanansa kaajjishiꞌrate Qullaawu Maxaafi halaale seekkite wodanchitanno gede kaaꞌlineemmo woyite, cincineemmore ikka hasiissannonke; hatto assinummoro rossinori wodanaho coanno daafira sabbakate kakkaꞌanno. Rosaanonke dancha duduwo wolu mannira kulate hasattonsa lexxitanno gede kaaꞌlate, maa assa dandiineemmo?

7. Rosaanchinkera dancha duduwo wolootaho kulate hasattosi lexxitanno gede kaaꞌla dandiineemmohu hiittoonniiti?

⁷ Qullaawu Maxaafi rosaanchonke aante noo xaꞌmuwa xaꞌma dandiineemmo: “Maganu Mangiste sokka macciishshakki heeshshokki woyyaabbanno gede assitinohu hiittoonniiti? Wolootuno tenne sokka macciishsha hasiissannonsa yite hedatto? Insa kaaꞌlate maa assa dandaatto?” (Law. 3:27; Mat. 9:37, 38) Rosaanchoho Rosiisate Horoonsiꞌneemmo Borro giddo noo tiraaktuwa leellishisi; hattono fiixisi, jaallasi woy ledosi loossannori nabbawa baxxanno tiraakte dooranno gede assi. Hakkiinni rosaanchoho mite tiraaktuwa uyisi. Tiraakte hayyotenni elanno gara rosiisisi. Rosaanchinke cuuaminokki halashshaancho ikke soqqamanno gede fajjinisihu gedensaanni, soqqansho ledosi fulle sabbakanno gara rosiisa hasiissannonketi egennantinote.—Ros. 4:9, 10; Luq. 6:40.

8. Rosaanonke Maganonna manna albinni roore baxa hasiissannonsahu mayiraati? (“ Qullaawu Maxaafi Rosaanonke Albinni Roore Magano Baxxanno Gede Kaaꞌla Dandiineemmohu Hiittoonniiti?” yitanno saaxineno lai.)

⁸ Yesuusi, mannu ‘hajajosi baalanta agadhano gede rosiisse’ yee hajajinonketa deꞌnoonke.  Yesuusi hajajino hajajo Maganonna manna baxi yitannota baalanta roortannota lame hajajono amaddannote; tini lamenti hajajo sabbakatenna manna rosaano assate loosi ledo xaado afidhinote. (Mat. 22:37-39) Mayi xaadooshshe afidhino? Sabbankeemmo gede assannonkehu qaru coyi Maganohonna mannaho noonke baxilleeti. Mite Qullaawu Maxaafi rosaano sabbakate daafira heddanno woyite waajjitara dandiitanno. Ikkirono, Yihowa kaaꞌlonni sunu sununni manna waajjitukkinni sabbaka dandiitannota kulle jawaachinshammonsara dandiineemmo. (Far. 18:1-3; Law. 29:25) Konni birxichira noo saaxinera rosaanchinkera Maganoho noosi baxilli lexxanno gede kaaꞌlate, maa assa hasiissannonkero kulloonni. Qoleno, songo Qullaawu Maxaafi rosaano albinni roore baxille leellishshanno gede kaaꞌlate maa assa dandiitanno?

9. Makiina kada rosiisiꞌranno rosaanchi, kaaꞌlannosi roso rosannohu hiitte doogganniiti?

⁹ Hanni xaano makiina kada rosiisiꞌranno rosaanchi lawishsha hedde. Rosaanchu qajeelsannosihu mule ofolle heeꞌreenna makiina kadanno woyite, isi rosannohu hiitte doogganniiti? Isi rosannohu rosiisaanchu yaannosire macciishshenna makiina qorophite kaddannore woloota laeeti. Lawishshaho, rosiisaanchu rosaanchisira mittu makiina kadanni noo manchi wolootu iso saꞌe hadhanno gede shaqqillunni doogo aanna leellishannosiha ikkara dandaanno. Woy mittu makiina kadanni noo manchi wole makiina kadanni nooha makiinisi caabbichi ille amadannosikki gede caabbicho ajishanna leellishasira dandaanno. Rosaanchu makiina kadanno woyite konni lawishshinni kaaꞌlannosiha kaajja roso rosanno.

10. Qullaawu Maxaafi rosaanchi ayyaanaamittetenni lophanno gede kaaꞌlannosiri maati?

¹⁰ Hatteente gede mittu heeshshote doogo aana haꞌra hanafinohu Qullaawu Maxaafi rosaanchi, rosiisaanchisiwiinni calla ikkikkinni dancha lawishsha ikkitannote Yihowa soqqamaasinewiinnino rosanno. Qullaawu Maxaafi rosaano ayyaanaamittete lophitanno gede lowo geeshsha kaaꞌlannonsari maati? Kiristaanu gambooshshenke haꞌransaati. Hatto yineemmohu mayiraati? Gambooshshunniwa rossannori egennonsa lexxitanno, ammanansa kaajjitannonna Yihowara noonsa baxilli lexxanno gede assannonsa. (Soq. 15:30-32) Qoleno, Qullaawu Maxaafi rosiisaanchi rosaanchosi songote giddo alba isite gedee heeshsho heedhino roduuwi ledo egensiisara dandaanno. Qullaawu Maxaafi rosaano dancha lawishsha ikkitanno roduuwi songote giddo baxille leellishshanna laꞌannoha ikkara dandaanno. Hanni aante noo lawishshuwa laꞌno.

11. Qullaawu Maxaafi rosaano songote giddo maa laꞌara dandiitanno? Tini kaaꞌlitansara dandiitannohu hiittoonniiti?

¹¹ Mitte qaaqquulle callase lossidhannoti Qullaawu Maxaafi rosaancho, songote giddo isente gede qaaqquulle callase lossidhanno rodoo laꞌino. Qullaawu Maxaafi rosaancho, tini rodoo shiimmaadda qaaqquullese adhite Gambooshshu Addaraashe daate sharrantino gara laꞌe jawaattino. Mittu sijaara aga agurate sharrammanni noohu Qullaawu Maxaafi rosaanchi, sijaara aga agurino rodii ledo egennamino. Kuni rodii Yihowara noosi baxilli lexxanno gede assiꞌrasi, Maganu hajajo agadhanno gede kakkayissinosita kulinosi. (2 Qor. 7:1; 4:7) Roduu rosaanchoho sijaara aga agurino gara kulisihu gedensaanni, “Atino agura dandaatto” yiinosi; hakkiinni rosaanchu jawaatino; hattono agura dandaannota ammanino. Mitte wedellitte Qullaawu Maxaafi rosaancho, Yihowara soqqamase heeshshose hagiirraame assitinoseta mitte wedellitte rodoo laꞌino. Qullaawu Maxaafi rosaancho rodoo hagiirraame ikkitino gara laꞌe, ise hagiirraame ikkitanno gede assinoseri maatiro ledde afa hasidhino.

12. Songote giddo noohu mittu mittunku halashshaanchi Qullaawu Maxaafi rosaano kaaꞌla dandaanno yineemmohu mayiraati?

¹² Qullaawu Maxaafi rosaano addi addite  ammantino halashshaano ledo egennantanno woyite, insa lawishshinni Kiristoosi, ‘Maganonna manna baxxe’ yee hajajino hajajo agadhitanno gara rossanno. (Yoh. 13:35; 1 Xim. 4:12) Aleenni laꞌnummonte gede Qullaawu Maxaafi rosaanchi alba isite gedee heeshsho heeꞌrino halashshaanchiwiinnino rosa dandaanno. Rosaanchu, kuri lawishshuwanni biddi assiꞌra hasiissannosire biddi assiꞌre Kiristoosi rosaancho ikka dandaannota huwatanno. (Mar. 30:11) Songote giddo noohu mittu mittunku halashshaanchi Qullaawu Maxaafi rosaano ayyaanaamittetenni lophitanno gede addi addi doogganni kaaꞌla dandaanno. (Mat. 5:16) Ati gambooshshe daggannore Qullaawu Maxaafi rosaano jawaachishate maa assa dandaatto?

13-14. Yesuusi hexxo mudhitino soqqamaanosi kaaꞌlinohu hiittoonniiti?

¹³ Ayyaanaamittetenni qiiddino roduuwanke sabbakatenna manna rosaano assate looso wirro loossanno gede kaaꞌla hasiꞌneemmo. Yesuusi hexxo mudhitino soqqamaasinesi jawaachishino gari ninkeno xaa yannara maa assa dandiineemmoro leellishanno.

¹⁴ Yesuusa shinara kaꞌne heeꞌneenna, ‘soqqamaasinesi baala iso agurte xooqqino.’ (Maq. 14:50; Yoh. 16:32) Yesuusi soqqamaanosi hexxo mudhitu yannara maa assino? Reyotenni kaihunni shiima yanna gedensaanni isi mite harunsaanosi, “Waajjitinoonte! Hadhine . . . [reyotenni kaoommota] roduuwiꞌyara kulle” yiino. (Mat. 28:10) Yesuusi soqqamaanosi facci asse diagurino. Insa agurte xooqqinosiha ikkiro nafa ‘roduuwaꞌya’ yiinonsa. Yihowa gede Yesuusino maarannohonna gatona yaannoho.—2 Mot. 13:23.

15. Soqqama agurtinori daafira mayi macciishshamannonke?

¹⁵ Ninkeno soqqansho fula agurtino roduuwinkeri lowo geeshsha yaachishannonke. Insa roduuwankeeti; lowo geeshsha banxeemmonsa! Kuri roduuwi alba leellishshino baxille dihambeemmo; insa giddo mitu lowo diro soqqantinore ikkitara dandiitanno. (Ibi. 6:10) Insa qalli assitannonke! (Luq. 15:4-7) Yesuusi lawishsha harunsine insara hendeemmota leellisha dandiineemmohu hiitte doogganniiti?

16. Ayyaanaamittetenni qiiddino roduuwinkera hendeemmota leellisha dandiineemmohu hiittoonniiti?

¹⁶ Gambooshshe dagganno gede faasiiqqine koyissensa. Yesuusi hexxo mudhitino soqqamaasinesi jawaachishino doogga giddo mitte, gambooshshe dagganno gede koyiseeti. (Mat. 28:10b; 1 Qor. 15:6) Hatteente gede ninkeno xaa yannara ayyaanaamittetenni qiiddinori gambooshshe dagganno gede koyisa dandiineemmo. Insa gambooshshe dagga geeshsha duucha hinge koyisa hasiissannonkeha ikkara dandaanno. Yesuusi, rosaanosi koyisinonsa gambooshshe dagguta hagiidhinoti dihuluullissannote.—Maatewoosi 28:16 nna Luqaasi 15:6te ledo heewisiisi.

17. Ayyaanaamittetenni qiiddinori gambooshshe dagganno woyite maa assa hasiissannonke?

¹⁷ Anga fantine hadhensa. Yesuusi rosaanosi ledo xaadi woyite, anga fane haaꞌrinonsa; Yesuusi insa isiwa daggara agarikki insawa mare hasaawisinonsa. (Mat. 28:18) Ayyaanaamittetenni qiiddinori Gambooshshu Addaraashe dagguro maa assineemmo? Insa dagganno woyite anga fanne haaꞌra hasiissannonke. Umi qarra ‘mayine hasaawinseemmo ikka?’ yine komo yinammora dandiineemmo. Ikkirono, insa komo yitanno gede assinummokkinni, daggino daafira lowo geeshsha hagiidhinoommota kula dandiineemmo.

18. Ayyaanaamittetenni qiiddinore jawaachisha dandiineemmohu hiittoonniiti?

¹⁸ Jawaachishshensa. Yesuusi rosaano alame baalate sabbakara uyinoonninsa loosi wolqansara aleenni ikkinohu gede assite heddinoha ikkara dandaanno. Yesuusi harunsaanosi  woꞌmanka woyite “ani kiꞌne ledo noommo” yee jawaachishinonsa. (Mat. 28:20) Tini rosaanosi kaaꞌlitinonsa? Ee. Insa muleenni diinaggaabbe “rosiisanna dancha duduwo kula” hanaffino. (Soq. 5:42) Ayyaanaamittetenni qiiddino roduuwirano jawaante hasiissannonsa. Insa wirro sabbaka waajjitara dandiitanno. Insa soqqansho fultanno woyite calloota ikkitinokkita kulle jawaachinshammonsara dandiineemmo. Soqqansho fulate qixxaabbanno woyite ledonsa fula dandiineemmo. Insa wirro sabbaka hanaffanno woyite kaaꞌlinoommonsa daafira hagiidhitannoti dihuluullissannote. Ayyaanaamittetenni qiiddinore roduuwinke gede assine laꞌneemmonsaha ikkiro, insa wirro jawaattanno; tini songo hagiidhitanno gede assitanno.

19. Maa assa hasiꞌneemmo? Mayira?

¹⁹ Manna rosaano assate looso loosa hasiissannonkehu mamari geeshshaati? Tini alame baꞌa geeshshaati. [Mat. 28:20; Amaaru afii Qullaawu Maxaafi (NW) qaalla tiro hunda nooha “Alamete goofimarcho” yaannoha lai.] Ikkina, konne Yesuusi uyinonke looso hattee yanna geeshsha loosa dandiineemmo? Ee, hatto assate murciꞌnoommo! Yannanke, wolqankenna woxenke mararrummokkinni horoonsiꞌne “gara ikkitinoti wodanu dooꞌꞌo noonsa” manna hanseemmo. (Soq. 13:48, NW) Hatto assineemmoha ikkiro Yesuusi lawishsha harunsinanni heeꞌnoommo. Yesuusi, “Ane sagale soyinoehu haja wonshatenna loososi guutate” yiino. (Yoh. 4:34; 17:4) Ninkeno hatto assa hasiꞌneemmo. Yesuusi uyinonke looso umo fushsha hasiꞌneemmo. (Yoh. 20:21) Ayyaanaamittetenni qiiddinorinna wolootuno konne looso ninke ledo goofimarchu geeshsha loossara hasiꞌneemmo.—Mat. 24:13.

20. Layinki Qorontoosi 4:7 kultanno garinni, Yesuusi uyinonke looso umo fushsha dandiineemmo yineemmohu mayiraati?

²⁰ Yesuusi uyinonke looso umo fushsha shota ikkitinokkiti egennantinote. Ikkirono, konne looso loonseemmohu callootinke diꞌꞌikkino. Yesuusi kiꞌne ledo noommo yee qaale eino. Manna rosaano assineemmo woyite ‘Maganu ledo loonsanni’ heeꞌnoommo. (1 Qor. 3:9) Hakko daafira, konne looso umo fushsha dandiineemmo. Konne looso loosanna wolootuno hatto assitanno gede kaaꞌla ninkera lowo ayirrinyeeti; qoleno lowo hagiirre afiꞌneemmo!—2 Qorontoosi 4:7 nabbawi.