SABBAKKANNORI roore hasiissannowa hadhe diinaggaabbe soqqantannote Yihowa Farciꞌraasine giddo batinyu mine assiꞌrinokki roduuwaati. Insa giddo mitu wole gobba haꞌre lowo diro soqqamino. Kuri roduuwa wole gobba haꞌre soqqamanno gede kaaꞌlinonsari maati? Wole gobbara haꞌre soqqame mayi roso afiꞌrino? Insa haꞌrinowa hiittoo heeshsho heeꞌrino? Kuri lawishsha ikkanno roduuwi giddo haammata hasaawinsoommo. Ati lowo hagiirre aannoha sabbakate looso albinni roore loosate halchitanni noottate mine assiꞌroottakki rodootiro, insa coyiꞌrinori kaaꞌlannoheta dihuluullammeemmo. Hige baalunku Maganu manni insa lawishsha wodana asse hedansa kaaꞌlitannonsa.

Mine assiꞌroottakki rodoo ikkoottahura wole gobbara hadhe soqqama dandaattakkiha lawannohe? Xa 75 diriti Aniita yinanni rodoo, wole gobba hadhe soqqama dandiitannokkiha lawinose. Ise lophitinote Ingilizete gobbara suwisaancho ikkitinohu 18 diriti heedheeti. Aniita togo yitino: “Mannaho Yihoware rosiisa baxeemmaha ikkirono, wole gobbara haꞌre soqqama dandeemma yee horo hede diegennoomma. Wole gobbaha mitto afoo nafa dirosoomma; qoleno wole afoo rosa dandeemmakkiha lawinoe. Hakko daafira, Giiliyaadi Rosi Mine roseemma gede koyinsieta lowo geeshsha waajjoomma. Waagaho kiirrannikkiti ani konne koyishsha afiꞌraꞌya dhagge ikkitinoe. Ikkollana togo yee hedumma, ‘Yihowa dandaatta yii geeshsha woꞌnaaleemma.’ Kuni 50 diri albaanni ikkinoreeti. Hakka warinni kayise Jaappaanete misiyoone ikke soqqamanni noomma.” Aniita ledde togo yitino: “Mito wote wedellu meya roduuwira muushshi yee, ‘Tenne hagiirsiissanno soqqansho soqqama hasidhiniro borsaꞌne bayidhine harunseꞌꞌe!’ yeemma. Insa giddo lowo roduuwi hatto assanna laꞌꞌaꞌya hagiirsiissinoe.”

Wole gobba haꞌre soqqaminori batinyu roduuwi hakkiira haꞌrate umi qara lame wodana ikkino. Ikkina, insa jawaante afiꞌrinohu hiittoonniiti?

Xa 64 diriti Moriini togo yitino: “Naggi yaanni harummati guma afidhino heeshsho heeꞌranna wole manna kaaꞌla hasiꞌrumma.” Ise 20 diro ikkiseta, sabbakkannori roore hasiissannowa soqqamate Kanaadaho Kubeeki yinanniwa hadhu. Ise ledde togo yitino: “Gedensaanni Giiliyaadi Rosi Mine eꞌꞌe roseemma gede koyinsie; ikkollana jaallaꞌyawiinni baxxe afoommakki gobba haꞌra waajjumma. Qoleno, dhibbu waadanni noosi annaꞌya amadde noota amaꞌya agure haꞌra yaadoomma. Tenne hajo daafira haammata hashsha wiꞌlanni Yihowa huucciꞌroomma. Tenne anniꞌyaranna amaꞌyara  hasaawummata, insa konni koyishshira sumuu yeemma gede jawaachishie. Qoleno, songonke baxillunni kae annaꞌyanna amaꞌya towaattanni noota laumma. Yihowa [insa] towaatanni noota laꞌꞌaꞌya, Isi aneno towaatannoe yee addaxxeemma gede assitinoe. Tenne laummati haꞌrate kaumma!” Moriini 1979 kayisse Galchimi Afirikira 30 saꞌꞌanno diro misiyoone ikkite soqqantino. Xaa yannara Moriini Kanaadaho amase towaaxxitanni heedhenni baxxitino suwisaancho ikkite soqqantanni no. Ise wole gobbara soqqantu yannare qaagge togo yitino: “Yihowa duuchanka wote hasiisinoere hasiꞌre noomma yannara uyinoe.”

Xa 65 diro ikkinoseti Wendii, Awustiraaliyaho suwisaancho ikkite soqqama hanaffinohu anje heedheeti. Ise hakka warita qaagge togo yitino: “Manna ille qase laꞌꞌa waajjeemma daafira egennoommakki manna hasaawisa qarra ikkitinoe. Ikkollana, suwisaancho ikkaꞌya duuchunku gari manna hasaawisa roseemma gede kaaꞌlitinoehura, waajjeemmakkita ikkumma. Gedensaanni, waajja qeeloommata huwatumma. Suwisaancho ikkaꞌya Yihowa addaxxa rosiissinoe daafira, wole gobbara haꞌre soqqama dandeemma yee heda hanafumma. Qoleno, albaanni 30 saꞌꞌanno diro misiyoone ikkite Jaappaanete soqqantino rodoo, Jaappaane haꞌne mitu sasu agani geeshsha soqqammeemmo gede koyissue. Ise ledo soqqamaꞌya wole gobbara haꞌre soqqamate nooe hasatto lexxitanno gede assitino.” Wendii 1986 Awustiraaliyaho soojjaatoonni 1,770 km xeertidhe noote Vanaatu yinanni giddicho hadhino.

Wendii xaano Vanaatu heedhanno; ise tirote biirora soqqantanno. Ise togo yitino: “Gaxarrate, gaamonna songuwa xintantanna laꞌꞌa lowo geeshsha hagiirsiissannoe. Kuri giddichuwa giddo loonsannihu Yihowa loosira shiimare assaꞌya anera lowo qoossooti.”

Xa 65 diro ikkinoseti Kumiko, suwisaancho ikkite soqqantanno jaalase Neppaali gobba haꞌno yituse yannara Jaappaanete woꞌma yanna suwisaancho ikkite soqqantanni no. Kumiko togo yitino: “Ise marro marro higge haꞌno yitinoeha ikkirono, ani giwumma. Ani haaro afoo rosanna haaro qooxeessa haꞌre heeꞌra rosa yaadoomma. Qoleno, wole gobba haꞌrate hasiisanno woxe afiꞌra qarra ikkitinoe. Tenne baala hedanni heeꞌreenna makeenu dano iilliteennae hospitaalete goxumma. Hakko heeꞌre togo yee hedumma: ‘Albillittete mayi tuncu yaannoero afoommari nooni? Baro buutote dhibbi amadeennae wole gobba haꞌre soqqama hoogammara dandeemma. Wole gobbara mitto dirono ikka soqqama didandeemma?’ Yihowa tenne asseemma gede kaaꞌlaera laalaate huucciꞌrumma.” Kumiko hospitaaletenni fultuhu gedensaanni Neppaali gobba laꞌꞌate hadhu; hakkuyi gedensaanni isenna suwisaancho ikkitino jaalase hatte gobba haꞌri.

 Kumiko Neppaali soqqantuha umiha tonne diro qaagge togo yitino: “Duumu Baari lamewa beehamihu gede yaadoomma qarri giddoonni furcho faꞌnantue. Sabbakkannori roore hasiissannowa haꞌra lowo geeshsha hagiidheemma gede assitinoe. Mitte maate ledo Qullaawu Maxaafi hasaawa hasaambeemmo wote, qachu manni duucha wote onte woy lee ikke daye macciishshanno. Qaaqquullu nafa Qullaawu Maxaafire xawissanno tiraakte oyeemmansa gede ayirrinyunni xaꞌmidhanno. Konni danchu qooxeessira soqqama lowo geeshsha hagiirsiissannote.”

Kuri mine assiꞌrinokkiri worbuullu roduuwira fonqolo ikkanno coyi iillinonsati egennantinote. Ikkina, insa fonqolo qeelinohu hiittoonniiti?

Kanaadaho ilantinoti Dayani togo yitino: “Umi adda maatenkewiinni baxxe xeertowa haꞌra qarra ikkitinoe.” Xa isera 62 diro ikkinose; ise misiyoone ikkite Ayivoriyi Koosti (xa Koti Di Vuyari yinanni) gobbara 20 diro soqqantino. Ise togo yitino: “Soqqameemma qooxeessiꞌra heeꞌranno manna baxeemma gede kaaꞌlaera Yihowa huucciꞌrumma. Giiliyaadi Rosi Mini rosiisaanonke giddonni Roduu Jaaki Redferdi, soqqantinanni qooxeessira laꞌinanniri, roorenkanni lowo geeshsha buxino manna laꞌinanni wote, umi qara dadillitinannihanna massinanniha ikkara dandaanno yee kulinonke. Isi togo yiino: ‘Buximansa laꞌinoonte. Manna, hattono albansanna illensa laꞌe. Insa Qullaawu Maxaafi halaale kultinanninsa wote mayite qoltannoro wodanche.’ Ani tenne assoomma; tini lowo atoote afiꞌreemma gede assitinoe! Mannaho sheshifachishshannota Maganu Mangiste sokka kuleemmansa wote albinsa xawanna laeemma!” Dayani wole gobbara hadhe soqqamate kaaꞌlinoseri woluri maati? Ise togo yitino: “Qullaawa Maxaafa xiinxalliseemma manna jaala assiꞌreemma; qoleno insa Yihowara ammaname soqqamanna laeemma wote lowo geeshsha hagiidheemma. Soqqameemma gobba qaeꞌya assiꞌrumma. Yesuusi qaale einonte gede ayyaanaamittete amuuwa, annuwa, meyanna labbaa roduuwa afiꞌroomma.”—Maq. 10:29, 30.

Xa 46 diro ikkinoseti Ani yinanni rodoo sabbakate loosonke agamboonnite mitte Iisiyu gobbara soqqantanno. Ise togo yitino: “Sabbakanni keeshshummate haammata gobbuwara ani lophoommahunni baxxino garinni lophinohunna baxxino akatta afiꞌrinohu meya roduuwi ledo heeꞌroomma. Tini, mito wote mereeronke koffi assannorinna dadillisanno coyi kalaqamanno gede assitino. Hattoo yannara, ledoꞌya galanno roduuwiwa roore shiqatenna budensa albinni roore egennate woꞌnaaleemma. Qoleno, manna baxeemmatanna quwa saeemmakkita ikkate sharramoomma. Tenne assate sharramaꞌya batinyu manni ledo dancha jaalooma kalaqiꞌre uyinoonnie looso looseemma gede kaaꞌlitinoehura hagiidhoomma.”

 Jarmanete ilantinoti xa 53 diro ikkinoseti Ute yinanni rodoo 1993 Madagaskaari giddichora misiyoone ikkite soqqantanno gede sonkoonnise. Ise togo yitino: “Umi qara hatte gobba afoonna quficho afidhino ayyare rosa qarra ikkitinoe, hattono shekkeere, ameebunna irkiꞌraano daꞌmuullanni daano dhibbi waadannae heeꞌroomma. Ikkollana lowo kaaꞌlo afiꞌroomma. Hakko heeꞌrannohu meya roduuwi, insa qaaqquullinna Qullaawa Maxaafa rosiiseemma manni insa afoo roseemma gede kaaꞌlinoe. Misiyoone ikkite ledoꞌya soqqantanno rodoo dhiwamumma wote baxillunni kaꞌe towaattinoe. Ikkollana, baalunkunni roore Yihowa kaaꞌlinoe. Yaachishannoere baala ganye huuccattotenni isira kuꞌleemma. Hakkiinnino, huuccattoꞌyara dawaro qola geeshsha, boode barruwa woy aganna cince agareemma. Yihowa qarra ikkinoeha baalanka coye tirino.” Ute Madagaskaari soqqantanna xa 23 diri ikkinose.

Sabbakkannori roore hasiissannowa haꞌre soqqamannohu wolu roduuwinte gede mine assiꞌrinokkihu hattoowa haꞌre soqqamanno roduuwino lowo atoote afiꞌrinota coyiꞌrino. Insa afiꞌrino atooti giddo mitu maati?

Xa 73 diro ikkinoseti Jarmanete gobbati Hayidii yinanni rodoo 1968 kayisse Ayivoriyi Koosti (xa Koti Di Vuyari yinanni) gobbara soqqantanni keeshshitino. Ise togo yitino: “Baalunku coyinni roore lowo geeshsha hagiidheemma gede assinoe coyi ayyaanaamittete oosoꞌya ‘halaalaancho heeshsho heedhanna’ laꞌꞌaꞌyaati. Qullaawa Maxaafa xiinxallisoomma manni giddo mitu xa suwisaanonna songote cimeeyye ikkino. Insa giddo batinyu Iliile woy Amaama yee woshshannoe. Kuri cimeeyye giddo mittu cimeessi, minaamasinna oosonsa ane maatensa miila gede asse laꞌꞌanno. Konni daafira Yihowa beetto, beettiꞌya beettonna sase beettiꞌya ooso uyinoe.”—3 Yoh. 4.

Xa 72 diro ikkinoseti Kanaadu gobbati Kaareni yinanni rodoo Galchimi Afirikira 20 saꞌꞌanno diro misiyoone ikkite soqqantino. Ise togo yitino: “Misiyoone ikke soqqamaꞌya albinni roore umiꞌya horo agureemmata, manna baxeemmatanna cinceemmata ikka rosiissinoe. Qoleno, addi addi gobba roduuwi ledo soqqamaꞌya halashshe hedate kaaꞌlitinoe. Mittoricho loosa dandiinanniti addi addi doogo noota rosoomma. Xa alame woꞌmate heedhannota muxxe jaalla afiꞌra lowo atooteeti! Heeshshonkenna uyinoonninke loosi soorraminoha ikkirono, jaaloominke kayinni disoorramino.”

Xa 79 diro ikkinoseti Ingilizete gobbati Margareeti yinanni rodoo Laoosi gobbara misiyoone ikkite soqqantino. Ise togo yitino: “Wole gobbara soqqamaꞌya, Yihowa addi addi dana afiꞌrinonna babbaxxino garinni lophino manna dirijjitesiwa abbanno gara umiꞌya heeshshonni laeemma gede assitinoe. Kuni woꞌnaalshi ammanaꞌya lowo geeshsha jawaachishino. Tini, Yihowa dirijjitesi massaganni nootanna hedinore wonshannota woꞌmunni woꞌma ammaneemma gede assitinoe.”

Ee, wole gobbara haꞌre soqqamannohu mine assiꞌrinokki roduuwi wongeelu loosira lowore assanni no. Insa galantanninsareeti. (Eje. 11:40) Qoleno, insa kiiro lexxitanni no. (Far. 68:11) Atino heeshshokki giddo mitore biddi assidhe, konni birxichira hasaawinsoonnihu diinaggaawe soqqamannohu meya roduuwi faale haꞌra dandaatta ikka? Hatto assattaha ikkiro, Yihowa “shaqqado ikkinota” qamasse laꞌꞌattati dihuluullissannote.—Far. 34:8.