1-2. (a) Lowo miliyoone ikkanno manni Mootichu Hurbaate ayirrisate gamba yaanno woyite Yihowa maa laˈˈanno? (Aaniidi qoolira noo misile lai.) (b) Konni birxichira maa xiinxallineemmo?

HANNI alamete doyichora noohu lowo miliyoone ikkanno manni Mootichu Hurbaate ayirrisate gamba yaanno woyite Yihowara mayi macciishshamannosiro hedi. Isi baalanka manna xaphoomunni calla ikkikkinni, konne gambooshshe dayinoha mitto mittonka mancho laˈˈanno. Lawishshaho isi ammanante diru kiiro konne ayyaana ayirrisate daggannore laˈˈanno. Insa giddo mitootu konne ayyaana ayirrissannohu buutote darti giddo heedhe ikkara dandaanno. Mitootu wole gambooshshe ganyite daggannokkiha ikkirono, Qaagooshshu Ayyaana gata hasiissannonsakki gambooshshi gede assite laˈanno. Konni albaanni Qaagooshshu Ayyaana dagge egentinokkiri konni ayyaani daafira afate quqquxante dagganno woyite Yihowa insano laˈˈanno.

² Yihowa batinyu manni Qaagooshshu Ayyaana daanno woyite hagiidhannoti egennantinote. (Luq. 22:19) Ikkollana, Yihowa roore illachishannohu konne ayyaana ayirrisate daanno manni batinyi aana diˈˈikkino. Hatteentenni Yihowa konne ayyaana dagganno gede assinonsa korkaati aana illachishanno. Konni birxichira, aante noo xaˈmora dawaro afiˈneemmo: Qaagooshshu Ayyaana calla ikkikkinni Yihowa baxxannosirira qixxeessinoha lamalate gambooshshe haˈneemmohu mayiraati?

3-4. (a) Gambooshshe haˈneemmohu mayiraati? (b) Gambooshshe haˈranke hiikku akati noonketa leellishshanno? (c) Umi Qorontoosi 11:23-26 kultanno garinni, Qaagooshshu Ayyaana gata hasiissannonkekkihu mayiraati?

³ Gambooshshe haˈneemmo gede assannonkehu qaru korkaati, togo assa magansiˈranke kifile ikkaseeti. Qoleno gambooshshunniwa  Yihowa rosiisannonke. Naaxxaleessu manni rosa hasiissannonsata diammananno. (3 Yoh. 9) Ninke kayinni Yihowawiinninna isi horoonsiˈranni noo dirijjitewiinni rosate quqquxammeemmo.—Isa. 30:20; Yoh. 6:45.

⁴ Gambooshshe haˈranke umonke heeshshi assineemmore ikkinoommota yaano rosate qixxaamboommore ikkinoommota leellishshanno. Qaagooshshu Ayyaana haˈneemmohu kuni gata hasiissannonkekki ayyaana ikkino daafira calla ikkikkinni Yesuusi “Kunninni ane qaagge” yee hajajinonke hajajora umonke heeshshi assine hajajammeemmo daafiraati. (1 Qorontoosi 11:23-26 nabbawi.) Kuni gambooshshi, albillittete daafira noonke hexxo kaajjishanno; hattono Yihowa mageeshshi geeshsha baxannonkero qaangeemmo gede assannonke. Ikkollana Yihowa jawaantenna shesho afiˈnammora hasiˈrannohu dirunni mitte hinge assinannihu konni gambooshshi widoonni calla diˈˈikkino. Konnira isi lamalate kiiro gambooshshe qixxeessinonke; hattono konne gambooshshe haˈneemmo gede hajajinonke. Umonke heeshshi assa kuri gambooshshuwa haˈneemmo gede kakkayissannonke. Lamalate kiiro kuri gambooshshuwa haˈratenna gambooshsheho qixxaawate lowo saate sayinseemmo.

5. Umonsa heeshshi assanno manni Yihowa koyisinonsa koyishsha adhannohu mayiraati?

⁵ Diru kiiro, batinyu umonsa heeshshi assanno manni Yihowa koyisinonsa koyishsha adhe isiwiinni rosate daanno. (Isa. 50:4) Insa umo Qaagooshshu Ayyaana daggu gedensaanni wole gambooshshuwano daa hanaffanno. (Zak. 8:20-23) Ninke insa ledo ‘kaaˈlaanchinkenna gatisaanchinke’ Yihowa rosonna biddishsha rosanke tashshi assitannonke. (Far. 40:17) Ee, Yihowanna lowo geeshsha baxannonkehu Beettisi Yesuusi koyissinonke koyishsha adhine insawiinni rosa sainori dino!—Mat. 17:5; 18:20; 28:20.

6. Mitto mancho umosi heeshshi assasi Qaagooshshu Ayyaana daanno gede kaaˈlitinosihu hiittoonniiti?

⁶ Diru kiiro, Yesuusi Reyo Qaagooshshira dandaaminke deerrinni batinye manna koyisate woˈnaaleemmo. Batinyu manni konne koyishsha adhansanni lowo horo afiˈrino. Hanni mitto lawishsha laˈno. Lowo diri albaanni, mittu manchi Qaagooshshu Ayyaaniha koyishshu woraqata adhinoha ikkirono, koyisisi rodiira konne ayyaana daa dandaannokkita kulinosi. Ikkollana Qaagooshshu Ayyaana ayirrinsanni hawarro, hakku rodii koyisi mancho Gambooshshu Addaraashe eanna laino. Konni manchira wosinsinoonnisi gari dhagge ikkinosi; konnira isi lamalate gambooshshenke haˈra hanafino. Isinni kuni manchi hakko diro gambooshshe sase hige calla hosino. Isi baalanka gambooshshe haˈrate murciˈranno gede assinosiri maati? Umosi heeshshi asse hedosi biddi assiˈrasiiti. Hakko mancho koyisi rodii “isi lowo geeshsha umosi heeshshi assannoho” yee coyiˈrino. Konne mancho minisira abbinohu Yihowa ikkinoti dihuluullissannote; isi xa cuuamino rodooti.—2 Sam. 22:28; Yoh. 6:44.

7. Gambooshshunniwa ronseemmorinna Qullaawu Maxaafi giddo nabbambeemmori umonke heeshshi assate kaaˈlannonkehu hiittoonniiti?

⁷ Gambooshshunniwa ronseemmorinna Qullaawu Maxaafi giddo nabbambeemmori umonke heeshshi assineemmo gede kaaˈlannonke. Qaagooshshu Ayyaanira albaanni noo lamallara, duucha woyite gambooshshuwanke Yesuusi lawishshanna isi heeshshosi wodote kakkalo asse oye umosi heeshshi assino gara xawissanno. Qoleno Qaagooshshu Ayyaanira albaanni noo barruwa giddo, Yesuusi reyonna kao daafira kultannota Qullaawu Maxaafi xagge nabbambeemmo gede jawaachinshoonninke. Kuri gambooshshuwawa ronseemmori, hattono tenne xagge giddo nabbambeemmori Yesuusita wodote kakkalo albinni roore naandeemmo gede assannonke. Tini, Yesuusi lawishsha harunsine umonke heeshshi assineemmo gedenna shota ikka hooggunkerono nafa Yihowa fajjo assate kaaˈlitannonke.—Luq. 22:41, 42.

8. Yesuusi worbimma leellishinohu hiittoonniiti?

⁸ Yesuusi lawishsha harunsine worbuulle ikkate sharrammeemmo. Hanni Yesuusi reyara albaanni noo barruwa giddo worbimma leellishino gara hedi. Isi shiima yanna gedensaanni diinnasi shollishshannosita, gantannositanna shitannosita afino. (Mat. 20:17-19) Ikkirono, isi reyo diwaajjino. Yesuusi amandannisi yanna iillituta, Geetesemaane yinannite kaashshu basera ledosi noo soqqamaasinera “Kaˈe haˈnona; sayise aannoehu kuneeti dayino” yiinonsa. (Mat. 26:36, 46) Olu uduunne adhino manni amadasira dayi yannara, Yesuusi albansaanni sae uurre ayimmasi xawisino; hattono olamaasine soqqamaasinesi agurtanno gede kulinonsa. (Yoh. 18:3-8) Addaho, Yesuusi kaajja worbimma leellishino! Yannankerano buuramino Kiristaanino ikko wolu geˈreewi wido ikkitinori Yesuusi gede worbimma leellishshanno. Hiittoonni?

9. (a) Gambooshshe ganye haˈrate worbimma hasiissannonkeha ikkara dandaanno yineemmohu mayiraati? (b) Ninke lawishshi ammanansanni kainohunni usuramino roduuwanke jawaachishara dandaannohu hiittoonniiti?

⁹ Ganyine gambooshshe haˈrate, fonqolo ikkannori iillinkerono worbimma leellisha hasiissannonkeha ikkara dandaanno. Mitu roduuwinke dadillisannori, hexxo mudhitanno gede assannori woy fayyimmate qarri iillinsarono gambooshshe hadhanno. Woloota kayinni maatensa woy gashshaano darte iillishshunsarono gambooshshe haˈratenni worbuulle ikkitinota leellishshanno. Ninke lawishshi ammanansanni kainohunni usurante noo roduuwanke mageeshsha jawaachishannonsaro hanni hedi. (Ibi. 13:3) Ninke fonqolo ikkannori iillanni heeˈreennanke Yihowara soqqammanni heeˈnoommota macciishshitanno woyite, ammanansa, worbimmansanna ammanamansa kaajjitanno. Soqqamaasinchu Phaawuloosi tenne huwatino. Isi Roomaho usurame noo yanna baalantera, roduuwisi Maganoho ammanante soqqantanni noota afasi tashshi assitinosi. (Fil. 1:3-5, 12-14) Phaawuloosi usurunni tidhamara albaanni woy tidhamihu gedensaanni Ibiraawootu Kiristaanira sokka borreessino. Isi hatte sokka giddo, ammanamino Kiristaani ‘roduuwu gede ikke baxamanna’ mitteenni gamba yaa agurannokki gede jawaachishinonsa.—Ibi. 10:24, 25; 13:1.

10-11. (a) Qaagooshshu Ayyaanira ayeoo koyisa hasiissannonke? (b) Efesooni Sokka 1:7 togo assineemmo gede kakkayisannonkeha hiikkonne korkaata kultannonke?

¹⁰ Fiixanke, ledonke loossannorenna olliichonke Qaagooshshu Ayyaanira koyinseemmo woyite worbimma leellinsheemmo. Konne manna koyinseemmohu mayiraati? Yihowanna Yesuusi assitinonkerira galata qoˈla hasiˈneemmo daafira, woloota Qaagooshshu Ayyaanira koyinseemmo. Insano Yihowa wodote kakkalo widoonni uyinonke ‘eltonni’ horo afiˈra dandiitanno gara rossara hasiˈneemmo.—Efesooni Sokka 1:7 nabbawi; Aju. 22:17.

¹¹ Mitteenni gamba yine worbimma leellinsheemmo woyite, Yihowanna Yesuusi leellishshinoha mitto muxxe akata leellinshanni heeˈnoommo.

12. (a) Gambooshshuwanke Yihowaranna Yesuusira noonke baxilli lexxanno gede assitannohu hiittoonniiti? (b) Layinki Qorontoosi 5:14, 15 Yesuusi lawishsha harunsine maa assineemmo gede jawaachishshannonke?

¹² Yihowaranna Yesuusira noonke baxilli gambooshshe haˈneemmo gede assannonke. Gambooshshunniwa ronseemmori qole Yihowaranna Beettisira noonke baxilli lexxanno gede assanno. Duucha woyite gambooshshunniwa insa ninkera assitinonkere ronseemmo. (Rom. 5:8) Roorenkanni Qaagooshshu Ayyaani Yihowanna Yesuusi wodo naaddannokkirira nafa taalle nookki baxille leellishshinota qaangeemmo gede assannonke. Insa leellishshinonke baxillira galata qoˈlate, barru baala heeshshonkenni Yesuusi lawishsha harunsate sharrammeemmo. (2 Qorontoosi 5:14, 15 nabbawi.) Qoleno wodaninke Yihowa wodo uyinonke daafira iso guwisiˈneemmo gede kakkayisannonke. Yihowa guwisiˈra dandiineemmo doogga giddo mitte, gambooshshunniwa giddonkenni kaˈne dawaro qolate.

13. Yihowanna Yesuusira noonke baxilli mageeshshihoro leellisha dandiineemmohu hiittoonniiti? Xawisi.

¹³ Yihowaranna Yesuusira yine mite coyibba facci asse aguratenni insa mageeshshi geeshsha banxeemmoro leellisha dandiineemmo. Gambooshshe haˈrate yine duucha woyite babbaxxitino coyibba facci assine agurreemmo. Mite songuwa gambooshshe assidhannohu loosu saate gedensaanni hawarrooti; tenne yannara qole daafursankera dandaanno. Wole gambooshshe assiˈneemmohu qole wolu manni fooliishshirannohu Qidaame woy Sambatu barraati. Yihowa daafurre heeˈne nafa gambooshshe haˈneemmo woyite laˈˈanno? Ee laˈˈanno! Isinni Yihowa fonqolo ikkannore qeelle gambooshshe haˈrate sharrameemmo woyite, isira leellinsheemmo baxille roore naadanno.—Maq. 12:41-44.

14. Yesuusi umisi horo agure baxille leellishatenni dancha lawishsha ikkinonkehu hiittoonniiti?

¹⁴ Yesuusi umisi horo agure baxille leellishe dancha lawishsha ikkinonke. Isi rosaanosira yee reyate calla ikkikkinni, heeshshote noo yannarano umisi injonni roore insa horo balaxisiisate maahoyye yiino. Lawishshaho isi daafure woy baasa yaade noo yannara nafa harunsaanosi hasaawisino. (Luq. 22:39-46) Hattono Yesuusi harunsaanosi assitannosiri aana ikkikkinni, isi insara assa dandaanno coyi aana illachishino. (Mat. 20:28) Yesuusi gede, Yihowaranna roduuwinkera noonke baxilli kaajjado ikkiro,  Qaagooshshu Ayyaananna wole duuchanta songote gambooshshuwa haˈrate dandaaminkere baala assineemmo.

15. Roorenkanni ayeoo kaaˈlate aana illachisha hasiissannonke?

¹⁵ Ninke addu Kiristaani maamari miilla ikkate qoosso afiˈnoommo; qoleno wolootuno konni maamari miilla ikkitanno gede koyisate dandaaminkere baala assineemmo. Ikkirono roorenkanni ‘ammanate’ roduuwanke ikke heeˈrenni ayyaanaamittensa shoshshoggitino roduuwanke kaaˈlate aana illachinsheemmo. (Gal. 6:10) Kuri roduuwa gambooshshuwanke roorenkanni Qaagooshshu Ayyaana daanno gede jawaachinshe banxeemmonsata leellinsheemmo. Yihowanna Yesuusi gede, ayyaanaamittetenni shoshshoggitinori baxillaanchu Anninkenna Allaalaanchinke Yihowawa higganno woyite tashshi yaannonke.—Mat. 18:14.

16. (a) Mimmito jawaachisha dandiineemmohu hiittoonniiti? (b) Tini Yesuusi Yohaannisi 3:16te coyiˈrinore qaagate dancha yannaati yineemmohu mayiraati?

¹⁶ Dagganno lamallara, dandaamiˈne deerrinni Dotteessa 19, 2019nni Arbete hawarro ayirrinseemmohu Qaagooshshu Ayyaanira lowo manna koyisate sharramme. (“ Manna Koyisatto?” yitanno saaxine lai.) Woˈmante yannara baalanta Yihowa qixxeessinonke gambooshshuwa ganyine haˈrate mimmito jawaachinsho. Tenne alame goofimarchi gambisanni daanno woyite, umonke heeshshi assate, hattono worbimmanna baxille leellishate gambooshshe haˈra hasiissannonke. (1 Tes. 5:8-11) Yihowanna Yesuusi leellishinonkeha taalle nookki baxille mageeshshi geeshsha naandeemmoro woˈmu wodaninkenni leellinsho!—Yohaannisi 3:16 nabbawi.