1. Yihowa yannankera mayi ikkannota masaalino?

 YIHOWA yannanke daafira togo yee masaalino: ‘Hakka waro, tonnu manni mittu Yihudichiwa mare, uddanosi handaara amade, “Maganu kiꞌne ledo noota macciishshinoommona, ninkeno ledoꞌne haꞌneemmo” yaanno.’ (Zak. 8:23) Lawishshu yaattonni ‘Yihudicha’ yinihu, Maganu qullaawu ayyaaninni buurino mannaati. Insa “Maganu Israeeleno” yinoonni. (Gal. 6:16, NW) “Tonnu manni” yiniri, uullate aana hegerera heeꞌrate hexxo noonsareeti. Insa Yihowa buurantinore maassiꞌranni noota affino daafira, ledonsa Magano magansiꞌra lowo ayirrinyi gede assite laꞌanno.

2. “Tonnu manni” buurantinori ‘ledo haꞌrannohu’ hiittoonniiti?

² Yannankera noo buuramaasine baalante suꞌma afa dandiinannikkiha ikkirono, b uullate aana heeꞌrate hexxo noonsari ‘ledonsa haꞌra’ dandiitanno. Hiittoonni? Qullaawu Maxaafi, ‘tonnu manni mittu Yihudichi uddano handaara amade “Maganu kiꞌne ledo noota macciishshinoommona, ninkeno ledoꞌne haꞌneemmo” yaannota’ kulanno. Kowiicho kulloonnihu mitto Yihudicha calla ikkirono, “kiꞌne ledo” yitanno yaatto, qummeeshshu mittu manchire calla kulanni nookkita leellishshanno. Hakko daafira, Yihudichu mitto mancho calla ikkikkinni, buuramino Kiristaana baala riqiwanno. Buurantinokkiri buuramino Kiristaani ledo mitteenni Yihowara soqqantanno. Ikkollana, Massagaanchinsa Yesuusa ikkino daafira, buuramino Kiristaana massagaanonsa gede assite dilaꞌanno.—Mat. 23:10.

3. Konni birxichira hiikkuri xaꞌmuwara dawaro afiꞌneemmo?

³ Xaa yannarano Maganu manni mereero buuramino Kiristaani noo daafira, mitootu togo yite heddara dandiitanno:  (1) Buuramino Kiristaani insaneeto ma garinni laꞌꞌa hasiissannonsa? (2) Qaagooshshu Ayyaani yannara timanna woyine qamasanno manna ma garinni laꞌꞌa hasiissannonke? (3) Timanna woyine qamasanno manni kiiro lexxituro mitiiꞌma hasiissannonkeni? Konni birxichira kuri xaꞌmuwara dawaro afiꞌneemmo.

4. Buurantinori 1 Qorontoosi 11:27-29 nooha hiikkonne qorowishsha seekkite heda hasiissannonsa? Mayira?

⁴ Buurantinori 1 Qorontoosi 11:27-29 noo qorowishsha seekkite heda hasiissannonsa. (Qummeeshsha nabbawi.) Mittu buuramino Kiristaanchi “hasiisinosikkiha” qamasara dandaannohu hiittoonniiti? Kuni Kiristaanchi, Yihowaha keeraancho seera harunsikkinni Qaagooshshu Ayyaanira shiqino timanna woyine qamasannoha ikkiro, ‘hasiisinosikkiha’ qamasanni no. (Ibi. 6:4-6; 10:26-29) Buuramino Kiristaani, “Maganu Kiristoosi widoonni” aannonsaha iimi baꞌraaꞌra adhate ammaname heeꞌra hasiissannonsata afino.—Fil. 3:13-16.

5. Buurantinori insaneeto ma garinni laꞌꞌa hasiissannonsa?

⁵ Yihowa ayyaani, soqqamaanosi naaxxaleeyye ikkitukkinni umonsa heeshshi  assitannore ikkitanno gede kaaꞌlannonsa. (Efe. 4:1-3; Qol. 3:10, 12) Hakko daafira, buurantinori woloota roortinohu gede assite diheddanno. Insa buurantinore ikkitino daafira calla Yihowa wole soqqamaasinera aanno ayyaaninni roorinoha aannonsakkita affino. Qoleno insa Qullaawu Maxaafi halaale wolu manninni roore seekkine huwantoommo yite diheddanno. Hattono wole mancho, ‘Atino buuramoottohana timanna woyine qamasa hasiissannohe’ diyitanno. Hatteentenni umonsa heeshshi assite manna iimi heeshshora koyisannohu Yihowa ikkinota ammantanno.

6. Umi Qorontoosi 4:7, 8 kultanno garinni, buuramino Kiristaani maa qoropha hasiissannonsa?

⁶ Buurantinori iimi heeshshora woshshama kaajja qoosso ikkitinota affinoha ikkirono, wolu manni baxxino garinni ayirrisansara dihasidhanno. (Fil. 2:2, 3) Qoleno Yihowa buurinsa woyite wolu manni afanno gede assinokkita huwattanno. Hakko daafira, mittu Kiristaanchi qullaawu ayyaaninni buuraminota mitootu bayichonko ammana hoogguro dhagge diassiꞌranno. Hatteentenni isi Qullaawu Maxaafi, Maganu baxxitino qoosso uyinoe yaanno manna bayichonko ammana gara ikkitinokkita kulannota huwatanno. (Aju. 2:2) Qoleno buurantinori mannu baxxino garinni illachishansara hasidhannokki daafira, wolootu ledo egennantanno woyite buurantinore ikkansa dikultanno. Hattono buuramansa kulte dinaaxxitanno.—1 Qorontoosi 4:7, 8 nabbawi.

7. Buurantinori maa assitannokki gede qoropha hasiissannonsa? Mayira?

⁷ Buuramino Kiristaani baxxitino gaamo wido ikkitinohu gede assite hedde, buurantinori ledo calla hosa dihasiissannonsa. Insa woshshattonsa daafira hasaawate woy uminsata Qullaawu Maxaafi xiinxallo gaamo kalaqiꞌrate yite wole buuramino Kiristaana hasidhanni dihadhanno. (Gal. 1:15-17) Buurantinori togoo coye assitannoha ikkiro, songote mittimma baꞌara dandiitanno. Hattoo assooti, Maganu manni mereero salaamenna mittimma heedhanno gede assannohu qullaawu ayyaani ledo sumuu diyaanno.—Rom. 16:17, 18.

8. Qaagooshshu Ayyaanira shiqanno timanna woyine qamassannore lainohunni maa qoropha hasiissannonke? (Lekkaalliidi qaagiishshano lai.)

⁸ Ikkina, buuramino roduuwa ma garinni laꞌꞌa hasiissannonke? Mittu manchi buuraminoha Kiristoosi rodoo ikkiro nafa, iso quwa  sae jaja gara diꞌꞌikkitino. (Mat. 23:8-12) Qullaawu Maxaafi songote cimeeyye daafira kulanni, ammanatenni insa lambeemmo gede jawaachishannonkeha ikkirono, aye manchono massagaanchinke gede assine laꞌneemmo gede dikulannonke. (Ibi. 13:7) Qullaawu Maxaafi mitootaho“erote ayirrinyi” hasiisannonsata kulanno. Ikkollana togoo ayirrinyi hasiisannonsahu, buurantinohura ikkikkinni “garunni gashshitanno” daafiranna “qaale kultanninna rosiissanni daafurtanno” daafiraati. (1 Xim. 5:17) Buurantinore hasiisannokki garinni guwinsiro woy baxxino garinni illachinshinsaro saalfattara dandiitanno. c Roore busha kayinni, baxxino ayirrinye uyineemmonsaha ikkiro, naaxxitanno gede assinammonsara dandiineemmo. (Rom. 12:3) Kiristoosi roduuwi giddo mittuno togoota shota ikkitinokki soꞌro loosanno gede assine guficho ikka hasiꞌneemmokkiti egennantinote!—Luq. 17:2.

9. Buuramino Kiristaana ayirrinseemmota leellisha dandiineemmohu hiittoonniiti?

⁹ Yihowa buurinore ayirrinseemmota leellisha dandiineemmohu hiittoonniiti? Insa buurantinohu hiittoonniitiro dixaꞌmineemmonsa. Tini ninke laꞌanno hajo diꞌꞌikkitino; qoleno tenne hajo afate qoosso dinonke. (1 Tes. 4:11; 2 Tes. 3:11) Buuramino Kiristaanchi annanna ama, galtesi woy wole fiixasino buuraminohu gede assine heda dihasiissannonke. Iimi woshshatto maatetewiinni ragiꞌnannire diꞌꞌikkitino. Kuni Yihowa koyishshaati. (1 Tes. 2:12) Qoleno woloota koffi assara dandaannore dixaꞌmineemmo. Lawishshaho, buuramino Kiristaanchi galte uullate aana gannatete isiweelo heedhannota heddanno woyite mayi macciishshamannosero xaꞌma dihasiissannonke. Yihowa haaro alamera ‘woꞌmunku halcho wonshannota’ addaxxa dandiineemmo.—Far. 145:16.

10. ‘Woloota bokkeessa’ qorophanke agarooshshe ikkitannonkehu hiittoonniiti?

¹⁰ Buuramino Kiristaana wolu manninni roorsine laꞌꞌa hooganke ninkeneetira agarooshshe ikkitannonke. Hiittoonni? Qullaawu Maxaafi mitu buuramino Kiristaani ammanama hoogara dandaannota kulanno. (Mat. 25:10-12; 2 Phe. 2:20, 21) ‘Wole manna bokkeessa’ woy jaja qorophineemmoha ikkiro, buuramaasineno ikko wole Yihowara lowo diro soqqantinore woy egennantino roduuwa diharunsineemmo. (Yih. 16) Tini, insa ammanama hoogguro woy halaalu mininni fulturo, ammananke baꞌannokki gedenna Yihowara soqqama agurreemmokki gede kaaꞌlitannonke.

11. Qaagooshshu Ayyaani yannara timanna woyine qamasanno manni kiiro ma ikkitanni no?

¹¹ Konni albaanni lowo diro Qaagooshshu Ayyaani yannara timanna woyine qamasanno manni kiiro ajjanni daggino. Muli diri kawa kayinni, tini kiiro diru dirunku lexxitanni no. Ikkina tennera mitiiꞌma hasiissannonkeni? Dihasiissannonke. Hanni qaaga hasiissannonketa mite hedo laꞌno.

12. Qaagooshshu Ayyaaniwa timanna woyine qamasanno manni kiiro daafira mitiiꞌma hasiissannonkekkihu mayiraati?

¹² Yihowa “isire ikkitinore afino.” (2 Xim. 2:19) Qaagooshshu Ayyaani yannara timanna woyine qamassannore kiirtanno roduuwi, addanka buuraminohu hiikkonneetiro afa didandiitanno; Yihowa kayinni afanno. Qamassinore kiirranni woyite buurantinoha laweennansa beebba qamassannoreno kiirranni.  Lawishshaho, alba qamasanno manni giddo mitootu gedensoonni agurtino. Mitu kayinni Kiristoosi ledo iima moonkeemmo yite heddanno gede assinonsahu surrete qarra ikkara dandaanno. Konni daafira, uullate aana gattino buuramaasine kiiro mageeshshitero woꞌmunni woꞌma dianfoommo.

13. Qullaawu Maxaafi bayiru qarri hanafanno woyite uullate aana gattanno buuramaasine mageeshsha ikkitannoro kulanno?

¹³ Yesuusi buurantinore iimira haaꞌre haꞌrara daanno woyite insa uullate aana duuchawa heedhanno. (Mat. 24:31) Qullaawu Maxaafi goofimarchu barruwara uullate aana gattanno buuramaasine shiima ikkitannota kulanno. (Aju. 12:17) Ikkollana, bayiru qarri hanafanno woyite uullate aana heedhanno buuramaasine mageeshsha ikkitannoro dikulanno.

14. Roomu Sokka 9:11, 16 noo hedo Yihowa buurantinore dooranno gari daafira maa rosiissannonke?

¹⁴ Buurantinore dooranno yanna murannohu Yihowaati. (Rom. 8:28-30) Yihowa buuramaasine doora hanafinohu Yesuusi reyotenni kaihu gedensaanniiti. Umi xibbi diro Kiristaanu songo giddo noori baalunku buurantinoreeti yaa dandiinanni. Hakkuyi gedensaanni noo dirrara kayinni, ninke Kiristaanaho yaannohu rooru manni kaphu Kiristaanaati. Ikkirono, Yihowa tenne dirra giddo boode addu Kiristaana buurino. Yesuusi insa boddoonu giddo mudhino qamade gede ikkitinota coyiꞌrino. (Mat. 13:24-30) Yihowa goofimarchu barruwarano, 144,000 d  wido ikkitannore doora diagurino. Maganu mito manna goofimarchu barri jeefora doora hasiꞌrannoha ikkiro, assinori gara ikkasi horo dihuluullammeemmo. (Roomu Sokka 9:11, 16 nabbawi.) e Yesuusi coyiꞌrino lawishshira kulloonni loosaasine gede ikkineemmokki gede qoropha hasiissannonke. Insa, mootichinsa hawarro dagge loossinorirano insa ledo taalo baatinonsa daafira gunguntino.—Mat. 20:8-15.

15. Buuramino Kiristaani baalu Maatewoosi 24:45-47 kulloonnihu “ammanaminohunna wodanaamu borojjichi” wido ikkinoni? Xawisi.

¹⁵ Iimira haꞌrate hexxo noonsari baalu “ammanaminohunna wodanaamu borojjichi” wido diꞌꞌikkitino. (Maatewoosi 24:45-47 nabbawi.) Umi xibbi dirinte gede, Yihowanna Yesuusi yannankerano boode roduuwa horoonsidhe batinye manna itissanni no. Umi xibbi diro, Yihowa Giriikete Afiita Qullaawa Borro borreessiisate boode buuramino Kiristaana calla horoonsiꞌrino. Yannankerano, hasiissanno yannara Maganu mannira ayyaanaamittete sagale shiqishanno gede dooraminohu boode buuramino Kiristaana callaho.

16. Konni birxichira maa rosootto?

¹⁶ Konni birxichira maa ronsoommo? Yihowa rooriidite mannu oosora uullate aana hegerera heeꞌrate hexxo uyinonsa; boodu Kiristaanira kayinni iima Yesuusi ledo gashshate hexxo uyinonsa. Yihowa baalante soqqamaanosira yaano ‘Yihudichunni’ lawinsoonnirirano ikko lawishshunni kulloonnihu ‘tonnu mannira’ baꞌraarsha aannonsa; qoleno lamenti gaamo mittu gari seera harunsitaranna ammanante heedhara hasiꞌranno. Baalunku umonsa heeshshi assa hasiissannonsa. Hattono mittimmatenni Yihowara soqqama hasiissannonsa. Qoleno songote giddo salaame heedhanno gede assate sharrama hasiissannonsa. Goofimarchu gambisanni daanno woyite, ninke baalunku “mitte hoshsha” ikkine Kiristoosi harunsatenna Yihowara soqqamate murciꞌno.—Yoh. 10:16.