1-2. Mittu sokkaasinchi Yesuusi waamma mule xaadino meentira maa kulino? Yesuusi konne meento mayyee hajajino?

NIISAANI 16 33 M.D. baasa dadillinohu Magano waajjanno meenti, Yesuusi Kiristoosi reeshsha madaarrihunni lamu barri gedensaanni soodimaro kae waammanniwa mari. Insa reeshshaho shitto buurara maranno woyite, waammate giddo noori nookkita lae maalaˈli! Mittu sokkaasinchi kuri meentira Yesuusi reyotenni kainota kulinsahu gedensaanni, “[Isi] kiˈne balaxe Galiila haˈrinona hakko affinannisi” yiinsa.—Mat. 28:1-7; Luq. 23:56; 24:10.

² Kuri meenti waammatewiinni haˈranni heeˈreenna, Yesuusi insawa mare togo yee hajajinsa: “Hadhine Galiila saˈanno gede roduuwiˈyara kulle. ‘Hakkiicho affinanniena yiino’ yiiyyensa.” (Mat. 28:10) Yesuusi reyotenni kaihu gedensaanni balaxe rosaanosi gambooshshe dagganno gede kulino; isi hakko gambooshshiwa lowo geeshsha hasiisanno biddishsha aansaraati.

3-4. Yesuusi Maatewoosi 28:19, 20 noo hajajo uyinohu, soqqamaasinesira calla diˈˈikkino yineemmohu mayiraati? (Aaniidi qoolira noo misile lai.)

³ Maatewoosi 28:16-20 nabbawi. Yesuusi, hakko gambooshshiwa rosaanosi hatte yannara loossannoha mitto lowo geeshsha hasiisanno looso kulinonsa; konne looso xaa yannarano loonsanni heeˈnoommo. Hakko gambooshshiwa Yesuusi togo yee hajajinonsa: “Hadhine gosa baala . . . cuuˈinanni rosaanoˈya assensa. Hajajoommoˈnere baala assitanno gede rosiissensa!”

⁴ Yesuusi baalanti harunsaanosi sabbakkara hasiˈranno. Isi manna rosaano assitanno gede hajajinohu 11 ammanantino soqqamaasinesi calla diˈˈikkino. Tenne mayinni anfeemmo? Yesuusi Galiilu ilaalira ‘manna rosaano asse’ yee hajaji woyite  hakkiicho noori soqqamaasinesi callateni? Sokkaasinchu meento ‘Galiilaho affinannisi’ yiinonsata qaango. Konni daafira, hakko gambooshshe ammanamino meentino haˈrikkinni digatino. Ikkollana wolu mannino dayinoha ikkara dandaanno. Soqqamaasinchu Phaawuloosi Yesuusi “onte xibbe roortino rosaanora” leellinota borreessino. (1 Qor. 15:6) Yesuusi insara leellinohu mamaati?

5. Layinki Qorontoosi 15:6 noo hedonni maa ronseemmo?

⁵ Phaawuloosi coyiˈrinohu, Maatewoosi 28 kulloonnihu Galiilaho assinoonni gambooshshi daafiraati yineemmo gede assannonkehu gari korkaati no. Umihunni, Yesuusi rosaano giddo rooru Galiilu mannaati. Hakko daafira, batinye manna Yerusaalamete katamira mittu manchi mine gamba yaanno gede assantenni, Galiilaho noo ilaalira gamba assa woyyitanno. Layinkihunni, hakkuyira albaanni Yesuusi reyotenni kaihu gedensaanni Yerusaalamete katamira 11 soqqamaasinesi ledo mittu manchi mine gamba yiino. Yesuusi sabbakatenna manna rosaano assate looso soqqamaasinera calla aate hedinoha ikkoommero, tenne hakko Yerusaalamete gamba yitu woyite kulansara dandaanno; hatto ikkiro, soqqamaasinesino ikko wolu labballinna meenti Galiilaho noo ilaala saˈanno gede dikulannonsa.—Luq. 24:33, 36.

6. Maatewoosi 28:20 noo hedo Yesuusi manna rosaano asse yee hajajino hajajo yannankerano wonsha hasiissannonketa leellishshannohu hiittoonniiti? Xaa yannara kuni loosi mageeshshi geeshsha halaˈlino?

⁶ Hanni xa sayikkiha qara korkaata laˈno. Yesuusi manna rosaano asse yee hajajino hajajo wonsha hasiissannonsari umi xibbi diri Kiristaana calla diˈˈikkino. Tenne mayinni anfeemmo? Yesuusi harunsaanosi manna rosaano assitanno gede hajaji gedensaanni, “[Alamete] goofimarchi geeshsha ani kiˈne ledo noommo” yiinonsa. (Mat. 28:20) Yesuusi yiinte gede, harunsaanosi xaa yannara lowo manna rosaano assitanni no. Diru dirunku 300,000 meddi yaanno manni cuuame Yihowa Farciˈraasinenna Yesuusi Kiristoosi rosaano ikkanno! Tini dhaggete!

7. Konninni aanchine maa ronseemmo? Mayira?

⁷ Batinyu Qullaawa Maxaafa xiinxallanno manni ayyaanaamittetenni lophe cuuamanni no. Ikkollana, mitu ninke ledo Qullaawa Maxaafa ganyite xiinxallitannori Kiristoosi rosaano ikka waajjitanno. Insa Qullaawa Maxaafa xiinxalla baxxannoha ikkirono, ayyaanaamittetenni lophite cuuamate disharrantanno. Ati Qullaawa Maxaafa xiinxallisatto manchi nooheha ikkiro, isi rosinore loosu aana hosiisaranna Kiristoosi rosaancho ikkara hasiˈrattoti egennantinote. Konni birxichira, Qullaawa Maxaafa xiinxallinseemmo manchi Yihowa baxanno gedenna ayyaanaamittetenni lophanno gede kaaˈla dandiineemmo gara ronseemmo. Tenne hajo daafira hasaawa hasiissannonkehu mayiraati? Korkaatuno iso xiinxallisa agura hasiissannonkeronna teˈee mura hasiissannonke woyiti noo daafiraati.

8. Qullaawa Maxaafa xiinxallinseemmo manni Yihowa baxanno gede kaaˈla mito woyite qarra ikkitankera dandiitannohu mayiraati?

⁸ Yihowa mannu baxe soqqamasira hasiˈranno. Hakko daafira, Qullaawa Maxaafa xiinxallinseemmo manchi Yihowa isi daafira lowo geeshsha hedannotanna baxannosita huwatanno gede kaaˈla hasiissannonke. Qoleno, Yihowa ‘buxoho anna’ ikkinotanna “gunnootaho” agaraancho ikkinota huwattanno gede kaaˈla hasiissannonke. (Far. 68:5) Qullaawu Maxaafi rosaanchinke Yihowa baxannosita huwatiro isino Yihowa baxara dandaanno. Mite Qullaawu Maxaafi rosaanonke anninsa baxillunni lossinonsakki daafira, Yihowa baxillaanchu Anni gede assite laˈˈa qarra ikkitansara dandiitanno. (2 Xim. 3:1, 3) Hakko daafira, Qullaawa Maxaafa xiinxallisatto woyite, Yihowata dhagge ikkitanno akatta seekkite kuli. Qullaawa Maxaafa xiinxallisatto manchi, baxillaanchu Maganinke isi hegere heeshsho afiˈrara  hasiˈrannotanna tenne heeshsho afiˈrate sharramanno woyite kaaˈlannosita huwatanno gede kaaˈlisi. Wolere maa assa dandiineemmo?

9-10. Qullaawa Maxaafa xiinxallinseemmo woyite hiikkuri maxaaffa horoonsiˈra hasiissannonke? Mayira?

⁹ “Qullaawu Maxaafinni Maa Ronseemmo?” nna “Maganu Baxilli Giddo Heedhe” yitanno maxaaffa horoonsidhe. Kuri maxaaffa qixxeessinoonnihu roorenkanni Qullaawu Maxaafi rosaanonke Yihowa baxxanno gede kaaˈlinammonsaraati. Lawishshaho, Maa Ronseemmo? yaanno maxaafira nooti umi fooliishsho aante noo xaˈmuwara dawaro qoltanno: Maganu ninke daafira hedannohonso kaajjadoho? Qarru iillannonke woyite maganoho mayi macciishshamannosi? Yihowa jaala ikka dandiinanni? Maganu Baxilli Giddo Heedhe yaanno maxaafi kayinni, Qullaawu Maxaafiha xintu seera harunsa heeshsho biddi assiˈratenna albinni roore Yihowawa shiqate kaaˈlitannonke gara huwatate kaaˈlannonke. Kuri maxaaffa horoonsidhe wole manna xiinxallisoottoha ikkiro nafa, xiinxallisattora albaanni rosaanchokki heddanni seekkite qixxaawi.

 ¹⁰ Ikkollana Qullaawu Maxaafi rosaanchikki, Maa Ronseemmo? nna Maganu Baxilli Giddo Heedhe yitanno maxaaffa giddo nookki hajo xaˈmara dandaanno. Aleenni kulloonni maxaaffa xiinxallissanni heedhenni, hatte hajo daafira xawissanno borro umisinni nabbawanno gede jawaachishattosira dandaatto.

11. Xiinxallo huuccattotenni hanafanna jeefisa hasiissannonkehu mamootinni kayinseeti? Rosaanchu ledo tenne hajo daafira hasaawa dandiineemmohu hiittoonniiti?

¹¹ Xiinxallo huuccattotenni hanaffe. Mitto mancho Qullaawa Maxaafa xiinxallisa hananfummoro keeshshinummokkinni yaano boode lamala giddo xiinxallo huuccattotenni hanafanna jeefisa danchate. Qullaawu Maxaafi rosaanchi, Maganu Qaale wodancha dandiineemmohu qullaawu ayyaani kaaˈlinkero calla ikkinota huwatanno gede kaaˈla hasiissannonke. Mitu roduuwi, Qullaawu Maxaafi rosaanchi xiinxallote yannara huuccatto assiˈra hasiissannota huwatanno gede kaaˈlate, Yaiqoobi 1:5 noota “Kiˈne giddo egenno xeˈinosihu heeˈriro, Magano huucciˈro” yitanno hedo nabbabbannosi. Hakkiinni insa, “Hayyo afiˈrate maa assa hasiissannonke?” yite xaˈmitanno. Roore woyite rosaanchu, ‘Magano huucciˈra hasiissannonke’ yee qolanno.

12. Faarso 139:2-4 noo hedo horoonsidhe Qullaawu Maxaafi rosaanchi huucciˈranno gara woyyessiˈranno gede kaaˈla dandaattohu hiittoonniiti?

¹² Qullaawu Maxaafi rosaanoˈne huuccatto assidhanno gara rosiissensa. Rosaanchiˈnera, Yihowa wodaninni huucciˈnoonni huuccatto macciishshannota kullesi. Callootinke huucciˈneemmo woyite giddonketa wole agurina mannaho hasaaphineemmokkire nafa Yihowara hasaapha dandiineemmota kullesi. Qoleno, ninke kuˈla hoongummorono, Yihowa giddonketa afino. (Faarso 139:2-4 nabbawi.) Hattono Qullaawu Maxaafi rosaanchinke, gara ikkitinokki hedonna gade aguranno gede kaaˈlasira Magano huucciˈranno gede jawaachinshammosira dandiineemmo. Lawishshaho, mittu manchi mito geeshsha xiinxallinoha ikkirono, Magano magansiˈrannokki manni ayirrisanno ayyaana baxannoha ikkara dandaanno. Isi konne ayyaana ayirrisa soˈro ikkitinota afinoha ikkirono, ayyaanu yannara assinanniri baxisasira dandaanno. Hatto ikkiro, giddosita Yihowara hasaaphanno gedenna Maganu baxannore calla baxanno gede kaaˈlasira Iso huucciˈranno gede jawaachinshammosira dandiineemmo.—Far. 97:10.

13. (a) Qullaawu Maxaafi rosaano mulenni gambooshshe daa hanaffanno gede koyisa hasiissannonkehu mayiraati? (b) Qullaawu Maxaafi rosaanchi gambooshshunniwa borsannokki gede kaaˈla dandiineemmohu hiittoonniiti?

¹³ Qullaawu Maxaafi rosaanoˈne mulenni gambooshshe daa hanaffanno gede koyissensa. Rosaanchu Kiristaanu gambooshshiwa macciishshannorinna laˈˈannori Yihowara noosi baxilli lexxanno gedenna ayyaanaamittetenni lophanno gede kaaˈlasira dandaanno. Mangistete Addaraashenkera Maa Maa Assinanni? yitanno viidiyo leellishshinisihu gedensaanni, gambooshshe ledoˈne haˈranno gede koyissesi. Dandaamannoha ikkiro, gambooshshe daanno gara injeessesi. Xiinxallissinanni yannara addi addi halashshaano koyisaˈne kaaˈlitannosi. Hatto assaˈne, rosaanchu songote roduuwi ledo egennamanno gede assitannosi; tini qolte, gambooshshunniwa borsannokki gede kaaˈlitannosi.

14. Qullaawu Maxaafi rosaanchi ayyaanaamittetenni lophanno gede kakkayisasira dandaannori maati?

¹⁴ Mixonke Qullaawu Maxaafi rosaanchi ayyaanaamittetenni lophanno gede kaaˈlate. (Efe. 4:13) Mittu manchi ninke ledo Qullaawa Maxaafa xiinxallate maahoyye yaanno woyite, xiinxallo iso kaaˈlitannosi gara calla hedara dandaanno. Yihowara noosi baxilli lexxanni haˈranno woyite kayinni, songote miillano ikko wole manna kaaˈla dandaanno gara hedasi digattanno. (Mat. 22:37-39) Hasiissanno  yannara, Maganu Mangiste looso woxunni kaaˈla dandaannota kulate badhera higginoonte.

15. Qullaawu Maxaafi rosaanchinke qarru tuncu yaannosi woyite maa assannoro qajeelsa dandiineemmohu hiittoonniiti?

¹⁵ Qullaawu Maxaafi rosaanchi qarru tuncu yaannosi woyite maa assa dandaannoro rosiisi. Lawishshaho, hanni mittu cuuaminokki halashshaancho ikkino rosaanchikki, songoˈnera noohu wolu rodii koffi assinosita kulinohe yine hendo. Mittoho kaaˈlite coyiˈrattonte, Qullaawu Maxaafi tenne hajo daafira mayyaannoro mayira dileellishattosi? Rosaanchikki koffi assinosi mancho gatona yee saˈˈara dandaanno; hatto assa qarrissusiro kayinni, rodiisi ledo araaramate shaqqillunninna baxillunni hasaawe kawa kaˈaa higinore tirara dandaanno. (Maatewoosi 18:15 ledo heewisiisi.) Rosaanchikki, hakkonne rodoo mayyee hasaawisa dandaannoro qixxaawanno gede kaaˈlisi. JW Layibirere, Yihowa Farciˈraasine Borro Xiinxallate Kaaˈlitanno Birosherenna jw.org^® horoonsiˈre tenne hajo lainohunni kaaˈlitanno amaale afiˈra dandaanno gara leellishshesi. Cuuamara albaanni seekke qajeelasi, cuuami gedensaanni songote ledo sumuu yee heeˈranno gede kaaˈlitannosi.

16. Xiinxallinseemmo woyite wole halashshaano koyisa maaho kaaˈlitanno?

¹⁶ Xiinxallissinanni yannara songoˈne giddonni wole roduuwa woy towaanyote yannara woradu aliidi laˈˈaancho koyisse. Hatto assa maaho kaaˈlitanno? Aleenni kullireno agurranna, mite halashshaano Qullaawu Maxaafi rosaanchoˈne kiˈnenni roore kaaˈlitanno doogo heedhara dandiitanno. Lawishshaho, rosaanchiˈne sijaara agurate woˈnaalinoha ikkirono, agura qarrissinosiha ikkara dandaanno. Hatto ikkiro, lowo yanna sharrami gedensaanni tenne busha gade agura dandiino rodoo xiinxallote koyisse. Kuni rodii, rosaancho kaaˈlitannosi amaale amaalasira dandaanno. Lowo woˈnaalshi noosi rodii ledo xiinxallisa waajjishiˈnero, hakko barra isi xiinxallisanno gede koyissinara dandiitinanni. Afidhini tunceenya baala horoonsidhine, Qullaawu Maxaafi rosaanchi wolootu woˈnaalshinni horo afiˈranno gede kaaˈle. Qara mixonke, xiinxallinseemmo manni ayyaanaamittetenni lophanno gede kaaˈlate.

17-18. Rosaanchokki xiinxallisa agurattoronna teˈee murattora albaanni ma heda hasiissannohe?

¹⁷ Qullaawu Maxaafi rosaanchinke heeshshosi biddi assiˈranni nookkiha ikkiro, ‘Xiinxallisa agurummoro woyya ikka?’ yine heda hasiissannonke. Hatto yitine murtinara albaanni, rosaanchoho mageeshshi dandoo noosiro buuxa hasiissannoˈne. Baalunku manni ayyaanaamittetenni taalo lopha hoogara dandaanno. Hakko daafira kiˈneneeto togo yitine xaˈme: ‘Qullaawu Maxaafi rosaanchiˈya wolqasi assitu geeshsha ayyaanaamittetenni lophanni no? Rosinore loosu aana hosiisa hanafino?’ (Mat. 28:20) Mittu manchi rahe Yesuusi rosaancho ikka hoogiro nafa, sunu sununni heeshshosi biddi assiˈra hasiissannosi.

¹⁸ Ikkollana, mittu Qullaawa Maxaafa xiinxallanni keeshshino manchi, xiinxallo naadannokkiha ikkiro maa assa hasiissannonke? Hanni  konne lawishsha hendo: Qullaawu Maxaafi rosaanchikki Maa Ronseemmo? yaanno maxaafa xiinxalle gudinoha, wole agurina Maganu Baxilli Giddo Heedhe yaanno maxaafa xiinxalla hanafinoha ikkara dandaanno; ikkirono, isi mittono songote gambooshshe wole agurina Qaagooshshu Ayyaana nafa daye diegennino! Qoleno isi, gari korkaati noosikkiha xiinxallo hosanno. Hatto ikkiro, rosaanchikki ledo xawisse hasaawa hasiissannohe. *

19. Qullaawu Maxaafi xiinxallosi naadannokki rosaancho mayyaa dandiineemmo? Togoo woyite heda hasiissannonkeri maati?

¹⁹ Qullaawu Maxaafi rosaanchoˈne, ‘Yihowa Farciˈraasincho ikkattokki gede roore guficho ikkinoheri maati?’ yitine xaˈmitine hanafa dandiitinanni. Isi, ‘Qullaawa Maxaafa xiinxalla baxisannoe; kayinni horo Yihowa Farciˈraasincho diˈˈikkeemmo’ yee qolara dandaanno. Isi seeda yanna xiinxallanni keeshshihu gedensaannino hatto yee hedannoha ikkiro, xiinxallisa aguraˈne woyyate. Wole widoonni kayinni, rosaanchiˈne tenne hajo daafira hasaawissinannisi woyite, badhera qolanni noosiri maatiro kulaˈnera dandaanno. Lawishshaho, minunni mine haˈre sabbaka horo didandeemmo yee hedinoha ikkara dandaanno. Ayyaanaamittetenni lophannokki gede guficho ikkinosiri maatiro huwattiniro, albinni roore kaaˈlitinasira dandiitinanni.

20. Soqqamaasinete Looso 13:48 noo hedo huwatanke rosaanchonke xiinxallisa agura hasiissannonkeronna teˈee murate kaaˈlitannonkehu hiittoonniiti?

²⁰ Mite Qullaawu Maxaafi rosaano Hiziqeeli wari Israeele gedeeti. Yihowa insa daafira coyiˈranni Hiziqeelira togo yiino: “Ati coyiˈratto qaale wonshitannokki daafira, gingilaate gananni danchu qaalinni baxillu sirba sirbanno sirbaancho ikkoottonsa.” (Hiz. 33:32) Rosaanchinkera xaate iso xiinxallisa agurreemmota kula waajjishankera dandaanno. Ikkollana, “gatte noo yanna harancho” ikkitinota qaaga hasiissannonke. (1 Qor. 7:29) Ayyaanaamittetenni lophannokki rosaancho xiinxallinsanni yannanke guda agurre, “gara ikkitinoti wodanu dooˈˈo noonsata” leellishino manna hasa hasiissannonke.—Soqqamaasinete Looso 13:48 nabbawi, NW. *

21. Tayixehu diru qummeeshshi mayyaanno? Kuni qummeeshshi malinoho yineemmohu mayiraati?

²¹ Tayixehu diru qummeeshshi manna rosaano assate looso woyyino garinni loonseemmo doogo hedate kaaˈlannonke. Kuni qummeeshshi Yesuusi Galiilaho noo ilaalira qixxeessinohu kaajju gambooshshiwa coyiˈrinota aante noo hedo amadino: “Hadhine gosa baala . . . cuuˈinanni rosaanoˈya asse.”—Mat. 28:19.