1-2. Mittu sokkaasinchi Yesuusi waamma mule xaadino meentira maa kulino? Yesuusi konne meento mayyee hajajino?

 NIISAANI 16 33 M.D. baasa dadillinohu Magano waajjanno meenti, Yesuusi Kiristoosi reeshsha madaarrihunni lamu barri gedensaanni soodimaro kae waammanniwa mari. Insa reeshshaho shitto buurara maranno woyite, waammate giddo noori nookkita lae maalaꞌli! Mittu sokkaasinchi kuri meentira Yesuusi reyotenni kainota kulinsahu gedensaanni, “[Isi] kiꞌne balaxe Galiila haꞌrinona hakko affinannisi” yiinsa.—Mat. 28:1-7; Luq. 23:56; 24:10.

² Kuri meenti waammatewiinni haꞌranni heeꞌreenna, Yesuusi insawa mare togo yee hajajinsa: “Hadhine Galiila saꞌanno gede roduuwiꞌyara kulle. ‘Hakkiicho affinanniena yiino’ yiiyyensa.” (Mat. 28:10) Yesuusi reyotenni kaihu gedensaanni balaxe rosaanosi gambooshshe dagganno gede kulino; isi hakko gambooshshiwa lowo geeshsha hasiisanno biddishsha aansaraati.

3-4. Yesuusi Maatewoosi 28:19, 20 noo hajajo uyinohu, soqqamaasinesira calla diꞌꞌikkino yineemmohu mayiraati? (Aaniidi qoolira noo misile lai.)

³ Maatewoosi 28:16-20 nabbawi. Yesuusi, hakko gambooshshiwa rosaanosi hatte yannara loossannoha mitto lowo geeshsha hasiisanno looso kulinonsa; konne looso xaa yannarano loonsanni heeꞌnoommo. Hakko gambooshshiwa Yesuusi togo yee hajajinonsa: “Hadhine gosa baala . . . cuuꞌinanni rosaanoꞌya assensa. Hajajoommoꞌnere baala assitanno gede rosiissensa!”

⁴ Yesuusi baalanti harunsaanosi sabbakkara hasiꞌranno. Isi manna rosaano assitanno gede hajajinohu 11 ammanantino soqqamaasinesi calla diꞌꞌikkino. Tenne mayinni anfeemmo? Yesuusi Galiilu ilaalira ‘manna rosaano asse’ yee hajaji woyite  hakkiicho noori soqqamaasinesi callateni? Sokkaasinchu meento ‘Galiilaho affinannisi’ yiinonsata qaango. Konni daafira, hakko gambooshshe ammanamino meentino haꞌrikkinni digatino. Ikkollana wolu mannino dayinoha ikkara dandaanno. Soqqamaasinchu Phaawuloosi Yesuusi “onte xibbe roortino rosaanora” leellinota borreessino. (1 Qor. 15:6) Yesuusi insara leellinohu mamaati?

5. Layinki Qorontoosi 15:6 noo hedonni maa ronseemmo?

⁵ Phaawuloosi coyiꞌrinohu, Maatewoosi 28 kulloonnihu Galiilaho assinoonni gambooshshi daafiraati yineemmo gede assannonkehu gari korkaati no. Umihunni, Yesuusi rosaano giddo rooru Galiilu mannaati. Hakko daafira, batinye manna Yerusaalamete katamira mittu manchi mine gamba yaanno gede assantenni, Galiilaho noo ilaalira gamba assa woyyitanno. Layinkihunni, hakkuyira albaanni Yesuusi reyotenni kaihu gedensaanni Yerusaalamete katamira 11 soqqamaasinesi ledo mittu manchi mine gamba yiino. Yesuusi sabbakatenna manna rosaano assate looso soqqamaasinera calla aate hedinoha ikkoommero, tenne hakko Yerusaalamete gamba yitu woyite kulansara dandaanno; hatto ikkiro, soqqamaasinesino ikko wolu labballinna meenti Galiilaho noo ilaala saꞌanno gede dikulannonsa.—Luq. 24:33, 36.

6. Maatewoosi 28:20 noo hedo Yesuusi manna rosaano asse yee hajajino hajajo yannankerano wonsha hasiissannonketa leellishshannohu hiittoonniiti? Xaa yannara kuni loosi mageeshshi geeshsha halaꞌlino?

⁶ Hanni xa sayikkiha qara korkaata laꞌno. Yesuusi manna rosaano asse yee hajajino hajajo wonsha hasiissannonsari umi xibbi diri Kiristaana calla diꞌꞌikkino. Tenne mayinni anfeemmo? Yesuusi harunsaanosi manna rosaano assitanno gede hajaji gedensaanni, “[Alamete] goofimarchi geeshsha ani kiꞌne ledo noommo” yiinonsa. (Mat. 28:20) Yesuusi yiinte gede, harunsaanosi xaa yannara lowo manna rosaano assitanni no. Diru dirunku 300,000 meddi yaanno manni cuuame Yihowa Farciꞌraasinenna Yesuusi Kiristoosi rosaano ikkanno! Tini dhaggete!

7. Konninni aanchine maa ronseemmo? Mayira?

⁷ Batinyu Qullaawa Maxaafa xiinxallanno manni ayyaanaamittetenni lophe cuuamanni no. Ikkollana, mitu ninke ledo Qullaawa Maxaafa ganyite xiinxallitannori Kiristoosi rosaano ikka waajjitanno. Insa Qullaawa Maxaafa xiinxalla baxxannoha ikkirono, ayyaanaamittetenni lophite cuuamate disharrantanno. Ati Qullaawa Maxaafa xiinxallisatto manchi nooheha ikkiro, isi rosinore loosu aana hosiisaranna Kiristoosi rosaancho ikkara hasiꞌrattoti egennantinote. Konni birxichira, Qullaawa Maxaafa xiinxallinseemmo manchi Yihowa baxanno gedenna ayyaanaamittetenni lophanno gede kaaꞌla dandiineemmo gara ronseemmo. Tenne hajo daafira hasaawa hasiissannonkehu mayiraati? Korkaatuno iso xiinxallisa agura hasiissannonkeronna teꞌee mura hasiissannonke woyiti noo daafiraati.

8. Qullaawa Maxaafa xiinxallinseemmo manni Yihowa baxanno gede kaaꞌla mito woyite qarra ikkitankera dandiitannohu mayiraati?

⁸ Yihowa mannu baxe soqqamasira hasiꞌranno. Hakko daafira, Qullaawa Maxaafa xiinxallinseemmo manchi Yihowa isi daafira lowo geeshsha hedannotanna baxannosita huwatanno gede kaaꞌla hasiissannonke. Qoleno, Yihowa ‘buxoho anna’ ikkinotanna “gunnootaho” agaraancho ikkinota huwattanno gede kaaꞌla hasiissannonke. (Far. 68:5) Qullaawu Maxaafi rosaanchinke Yihowa baxannosita huwatiro isino Yihowa baxara dandaanno. Mite Qullaawu Maxaafi rosaanonke anninsa baxillunni lossinonsakki daafira, Yihowa baxillaanchu Anni gede assite laꞌꞌa qarra ikkitansara dandiitanno. (2 Xim. 3:1, 3) Hakko daafira, Qullaawa Maxaafa xiinxallisatto woyite, Yihowata dhagge ikkitanno akatta seekkite kuli. Qullaawa Maxaafa xiinxallisatto manchi, baxillaanchu Maganinke isi hegere heeshsho afiꞌrara  hasiꞌrannotanna tenne heeshsho afiꞌrate sharramanno woyite kaaꞌlannosita huwatanno gede kaaꞌlisi. Wolere maa assa dandiineemmo?

9-10. Qullaawa Maxaafa xiinxallinseemmo woyite hiikkuri maxaaffa horoonsiꞌra hasiissannonke? Mayira?

⁹ “Qullaawu Maxaafinni Maa Ronseemmo?” nna “Maganu Baxilli Giddo Heedhe” yitanno maxaaffa horoonsidhe. Kuri maxaaffa qixxeessinoonnihu roorenkanni Qullaawu Maxaafi rosaanonke Yihowa baxxanno gede kaaꞌlinammonsaraati. Lawishshaho, Maa Ronseemmo? yaanno maxaafira nooti umi fooliishsho aante noo xaꞌmuwara dawaro qoltanno: Maganu ninke daafira hedannohonso kaajjadoho? Qarru iillannonke woyite maganoho mayi macciishshamannosi? Yihowa jaala ikka dandiinanni? Maganu Baxilli Giddo Heedhe yaanno maxaafi kayinni, Qullaawu Maxaafiha xintu seera harunsa heeshsho biddi assiꞌratenna albinni roore Yihowawa shiqate kaaꞌlitannonke gara huwatate kaaꞌlannonke. Kuri maxaaffa horoonsidhe wole manna xiinxallisoottoha ikkiro nafa, xiinxallisattora albaanni rosaanchokki heddanni seekkite qixxaawi.

 ¹⁰ Ikkollana Qullaawu Maxaafi rosaanchikki, Maa Ronseemmo? nna Maganu Baxilli Giddo Heedhe yitanno maxaaffa giddo nookki hajo xaꞌmara dandaanno. Aleenni kulloonni maxaaffa xiinxallissanni heedhenni, hatte hajo daafira xawissanno borro umisinni nabbawanno gede jawaachishattosira dandaatto.

11. Xiinxallo huuccattotenni hanafanna jeefisa hasiissannonkehu mamootinni kayinseeti? Rosaanchu ledo tenne hajo daafira hasaawa dandiineemmohu hiittoonniiti?

¹¹ Xiinxallo huuccattotenni hanaffe. Mitto mancho Qullaawa Maxaafa xiinxallisa hananfummoro keeshshinummokkinni yaano boode lamala giddo xiinxallo huuccattotenni hanafanna jeefisa danchate. Qullaawu Maxaafi rosaanchi, Maganu Qaale wodancha dandiineemmohu qullaawu ayyaani kaaꞌlinkero calla ikkinota huwatanno gede kaaꞌla hasiissannonke. Mitu roduuwi, Qullaawu Maxaafi rosaanchi xiinxallote yannara huuccatto assiꞌra hasiissannota huwatanno gede kaaꞌlate, Yaiqoobi 1:5 noota “Kiꞌne giddo egenno xeꞌinosihu heeꞌriro, Magano huucciꞌro” yitanno hedo nabbabbannosi. Hakkiinni insa, “Hayyo afiꞌrate maa assa hasiissannonke?” yite xaꞌmitanno. Roore woyite rosaanchu, ‘Magano huucciꞌra hasiissannonke’ yee qolanno.

12. Faarso 139:2-4 noo hedo horoonsidhe Qullaawu Maxaafi rosaanchi huucciꞌranno gara woyyessiꞌranno gede kaaꞌla dandaattohu hiittoonniiti?

¹² Qullaawu Maxaafi rosaanoꞌne huuccatto assidhanno gara rosiissensa. Rosaanchiꞌnera, Yihowa wodaninni huucciꞌnoonni huuccatto macciishshannota kullesi. Callootinke huucciꞌneemmo woyite giddonketa wole agurina mannaho hasaaphineemmokkire nafa Yihowara hasaapha dandiineemmota kullesi. Qoleno, ninke kuꞌla hoongummorono, Yihowa giddonketa afino. (Faarso 139:2-4 nabbawi.) Hattono Qullaawu Maxaafi rosaanchinke, gara ikkitinokki hedonna gade aguranno gede kaaꞌlasira Magano huucciꞌranno gede jawaachinshammosira dandiineemmo. Lawishshaho, mittu manchi mito geeshsha xiinxallinoha ikkirono, Magano magansiꞌrannokki manni ayirrisanno ayyaana baxannoha ikkara dandaanno. Isi konne ayyaana ayirrisa soꞌro ikkitinota afinoha ikkirono, ayyaanu yannara assinanniri baxisasira dandaanno. Hatto ikkiro, giddosita Yihowara hasaaphanno gedenna Maganu baxannore calla baxanno gede kaaꞌlasira Iso huucciꞌranno gede jawaachinshammosira dandiineemmo.—Far. 97:10.

13. (a) Qullaawu Maxaafi rosaano mulenni gambooshshe daa hanaffanno gede koyisa hasiissannonkehu mayiraati? (b) Qullaawu Maxaafi rosaanchi gambooshshunniwa borsannokki gede kaaꞌla dandiineemmohu hiittoonniiti?

¹³ Qullaawu Maxaafi rosaanoꞌne mulenni gambooshshe daa hanaffanno gede koyissensa. Rosaanchu Kiristaanu gambooshshiwa macciishshannorinna laꞌꞌannori Yihowara noosi baxilli lexxanno gedenna ayyaanaamittetenni lophanno gede kaaꞌlasira dandaanno. Mangistete Addaraashenkera Maa Maa Assinanni? yitanno viidiyo leellishshinisihu gedensaanni, gambooshshe ledoꞌne haꞌranno gede koyissesi. Dandaamannoha ikkiro, gambooshshe daanno gara injeessesi. Xiinxallissinanni yannara addi addi halashshaano koyisaꞌne kaaꞌlitannosi. Hatto assaꞌne, rosaanchu songote roduuwi ledo egennamanno gede assitannosi; tini qolte, gambooshshunniwa borsannokki gede kaaꞌlitannosi.

14. Qullaawu Maxaafi rosaanchi ayyaanaamittetenni lophanno gede kakkayisasira dandaannori maati?

¹⁴ Mixonke Qullaawu Maxaafi rosaanchi ayyaanaamittetenni lophanno gede kaaꞌlate. (Efe. 4:13) Mittu manchi ninke ledo Qullaawa Maxaafa xiinxallate maahoyye yaanno woyite, xiinxallo iso kaaꞌlitannosi gara calla hedara dandaanno. Yihowara noosi baxilli lexxanni haꞌranno woyite kayinni, songote miillano ikko wole manna kaaꞌla dandaanno gara hedasi digattanno. (Mat. 22:37-39) Hasiissanno  yannara, Maganu Mangiste looso woxunni kaaꞌla dandaannota kulate badhera higginoonte.

15. Qullaawu Maxaafi rosaanchinke qarru tuncu yaannosi woyite maa assannoro qajeelsa dandiineemmohu hiittoonniiti?

¹⁵ Qullaawu Maxaafi rosaanchi qarru tuncu yaannosi woyite maa assa dandaannoro rosiisi. Lawishshaho, hanni mittu cuuaminokki halashshaancho ikkino rosaanchikki, songoꞌnera noohu wolu rodii koffi assinosita kulinohe yine hendo. Mittoho kaaꞌlite coyiꞌrattonte, Qullaawu Maxaafi tenne hajo daafira mayyaannoro mayira dileellishattosi? Rosaanchikki koffi assinosi mancho gatona yee saꞌꞌara dandaanno; hatto assa qarrissusiro kayinni, rodiisi ledo araaramate shaqqillunninna baxillunni hasaawe kawa kaꞌaa higinore tirara dandaanno. (Maatewoosi 18:15 ledo heewisiisi.) Rosaanchikki, hakkonne rodoo mayyee hasaawisa dandaannoro qixxaawanno gede kaaꞌlisi. JW Layibirere, Yihowa Farciꞌraasine Borro Xiinxallate Kaaꞌlitanno Birosherenna jw.org^® horoonsiꞌre tenne hajo lainohunni kaaꞌlitanno amaale afiꞌra dandaanno gara leellishshesi. Cuuamara albaanni seekke qajeelasi, cuuami gedensaanni songote ledo sumuu yee heeꞌranno gede kaaꞌlitannosi.

16. Xiinxallinseemmo woyite wole halashshaano koyisa maaho kaaꞌlitanno?

¹⁶ Xiinxallissinanni yannara songoꞌne giddonni wole roduuwa woy towaanyote yannara woradu aliidi laꞌꞌaancho koyisse. Hatto assa maaho kaaꞌlitanno? Aleenni kullireno agurranna, mite halashshaano Qullaawu Maxaafi rosaanchoꞌne kiꞌnenni roore kaaꞌlitanno doogo heedhara dandiitanno. Lawishshaho, rosaanchiꞌne sijaara agurate woꞌnaalinoha ikkirono, agura qarrissinosiha ikkara dandaanno. Hatto ikkiro, lowo yanna sharrami gedensaanni tenne busha gade agura dandiino rodoo xiinxallote koyisse. Kuni rodii, rosaancho kaaꞌlitannosi amaale amaalasira dandaanno. Lowo woꞌnaalshi noosi rodii ledo xiinxallisa waajjishiꞌnero, hakko barra isi xiinxallisanno gede koyissinara dandiitinanni. Afidhini tunceenya baala horoonsidhine, Qullaawu Maxaafi rosaanchi wolootu woꞌnaalshinni horo afiꞌranno gede kaaꞌle. Qara mixonke, xiinxallinseemmo manni ayyaanaamittetenni lophanno gede kaaꞌlate.

17-18. Rosaanchokki xiinxallisa agurattoronna teꞌee murattora albaanni ma heda hasiissannohe?

¹⁷ Qullaawu Maxaafi rosaanchinke heeshshosi biddi assiꞌranni nookkiha ikkiro, ‘Xiinxallisa agurummoro woyya ikka?’ yine heda hasiissannonke. Hatto yitine murtinara albaanni, rosaanchoho mageeshshi dandoo noosiro buuxa hasiissannoꞌne. Baalunku manni ayyaanaamittetenni taalo lopha hoogara dandaanno. Hakko daafira kiꞌneneeto togo yitine xaꞌme: ‘Qullaawu Maxaafi rosaanchiꞌya wolqasi assitu geeshsha ayyaanaamittetenni lophanni no? Rosinore loosu aana hosiisa hanafino?’ (Mat. 28:20) Mittu manchi rahe Yesuusi rosaancho ikka hoogiro nafa, sunu sununni heeshshosi biddi assiꞌra hasiissannosi.

¹⁸ Ikkollana, mittu Qullaawa Maxaafa xiinxallanni keeshshino manchi, xiinxallo naadannokkiha ikkiro maa assa hasiissannonke? Hanni  konne lawishsha hendo: Qullaawu Maxaafi rosaanchikki Maa Ronseemmo? yaanno maxaafa xiinxalle gudinoha, wole agurina Maganu Baxilli Giddo Heedhe yaanno maxaafa xiinxalla hanafinoha ikkara dandaanno; ikkirono, isi mittono songote gambooshshe wole agurina Qaagooshshu Ayyaana nafa daye diegennino! Qoleno isi, gari korkaati noosikkiha xiinxallo hosanno. Hatto ikkiro, rosaanchikki ledo xawisse hasaawa hasiissannohe. b

19. Qullaawu Maxaafi xiinxallosi naadannokki rosaancho mayyaa dandiineemmo? Togoo woyite heda hasiissannonkeri maati?

¹⁹ Qullaawu Maxaafi rosaanchoꞌne, ‘Yihowa Farciꞌraasincho ikkattokki gede roore guficho ikkinoheri maati?’ yitine xaꞌmitine hanafa dandiitinanni. Isi, ‘Qullaawa Maxaafa xiinxalla baxisannoe; kayinni horo Yihowa Farciꞌraasincho diꞌꞌikkeemmo’ yee qolara dandaanno. Isi seeda yanna xiinxallanni keeshshihu gedensaannino hatto yee hedannoha ikkiro, xiinxallisa aguraꞌne woyyate. Wole widoonni kayinni, rosaanchiꞌne tenne hajo daafira hasaawissinannisi woyite, badhera qolanni noosiri maatiro kulaꞌnera dandaanno. Lawishshaho, minunni mine haꞌre sabbaka horo didandeemmo yee hedinoha ikkara dandaanno. Ayyaanaamittetenni lophannokki gede guficho ikkinosiri maatiro huwattiniro, albinni roore kaaꞌlitinasira dandiitinanni.

20. Soqqamaasinete Looso 13:48 noo hedo huwatanke rosaanchonke xiinxallisa agura hasiissannonkeronna teꞌee murate kaaꞌlitannonkehu hiittoonniiti?

²⁰ Mite Qullaawu Maxaafi rosaano Hiziqeeli wari Israeele gedeeti. Yihowa insa daafira coyiꞌranni Hiziqeelira togo yiino: “Ati coyiꞌratto qaale wonshitannokki daafira, gingilaate gananni danchu qaalinni baxillu sirba sirbanno sirbaancho ikkoottonsa.” (Hiz. 33:32) Rosaanchinkera xaate iso xiinxallisa agurreemmota kula waajjishankera dandaanno. Ikkollana, “gatte noo yanna harancho” ikkitinota qaaga hasiissannonke. (1 Qor. 7:29) Ayyaanaamittetenni lophannokki rosaancho xiinxallinsanni yannanke guda agurre, “gara ikkitinoti wodanu dooꞌꞌo noonsata” leellishino manna hasa hasiissannonke.—Soqqamaasinete Looso 13:48 nabbawi, NW. c

21. Tayixehu diru qummeeshshi mayyaanno? Kuni qummeeshshi malinoho yineemmohu mayiraati?

²¹ Tayixehu diru qummeeshshi manna rosaano assate looso woyyino garinni loonseemmo doogo hedate kaaꞌlannonke. Kuni qummeeshshi Yesuusi Galiilaho noo ilaalira qixxeessinohu kaajju gambooshshiwa coyiꞌrinota aante noo hedo amadino: “Hadhine gosa baala . . . cuuꞌinanni rosaanoꞌya asse.”—Mat. 28:19.