XIINXALLOTE BIRXICHO 4
“Maganu Ayyaani Ninke Ayyaani Ledo . . . Farciꞌranno”
“Maganu Ayyaani ninke ayyaani ledo Maganu ooso ikkanke farciꞌranno.” —ROM. 8:16.
FAARSO 25 Baxxino Jajja
GUULCHO a
Yihowa Phenxeqosxete barra gamba yiinohu 120 meddi yaanno Kiristaanira qullaawa ayyaanasi maalaꞌlisanno garinni dirrisino (Gufo 1-2 lai)
1-2. Sajjiina sasu M.D. Phenxeqosxete barra hiikku maalaꞌlisanno coyi ikkino?
BARRU Sambata soodooti. Yerusaalamete katamira 33 M.D. Phenxeqosxete ayyaana ayirrinsanni heeꞌnoonni. Mite 120 ikkitanno rosaano minu aana minnoonni minira gamba yite no. (Soq. 1:13-15; 2:1) Yesuusi shiimu barrira albaanni, insa mitte baxxitino elto adhitanno daafira Yerusaalametenni fultannokki gede hajajinonsa. (Soq. 1:4, 5) Hakkiinni mayi ikkiyya?
2 “Hedeweelcho lowo hombobolatte gede ikke luulu iiminni dayi; insa noo mineno woꞌmi.” Hakkiinni, “giirate buwani arrawo lawannori” rosaanote umira dirrinsata, “baalunkura qullaawu ayyaani woꞌminsa.” (Soq. 2:2-4) Tenne dhagge ikkitanno doogonni, Yihowa hakko gamba yiino mannira qullaawa ayyaanasi dirrisinonsa. (Soq. 1:8) Insa qullaawu ayyaaninni buurantinore b umi Kiristaana ikkitino, qoleno iima Yesuusi ledo gashshate hexxo afidhino.
MITTU MANCHI BUURAMANNO WOYITE MAYI IKKANNO?
3. Phenxeqosxete barra gamba yitinori qullaawu ayyaaninni buurantinota huluullantannokkihu mayiraati?
3 Ati Yerusaalamete minu aana minnoonni minira gamba yitino rosaano ledo noottoha ikkoommero hakko barra ikkinore horo dihawatto. Giirate arrawo lawannori umoho dirriheta, maalaletenni wole afoo coyiꞌra hanafitto. (Soq. 2:5-12) Hatto ikkiro, qullaawu ayyaaninni buuramoottota horo dihuluullamatto. Ikkina, ayyaanunni buurantinori baalunku buurantinohu mittu garinni woy mitte yannara ikkinoni? Diꞌꞌikkino. Tenne mayinni anfeemmo?
4. Umi xibbi diro buurantinori baalu buurantinohu mitte yannaraatini? Xawisi.
4 Hanni insa buurantino yanna laꞌno. Sajjiina sasu M.D. Phenxeqosxete barra buuraminohu 120 meddi yaanno Kiristaana calla diꞌꞌikkino. Gedensoonni hakko barranni 3,000 meddi yaanno manni Yesuusi qaale einoha qullaawa ayyaana adhino. Insa buurantinohu cuuantu yannaraati. (Soq. 2:37, 38, 41) Ikkollana hakkuyi gedensaanni buuramino Kiristaani baalunku buuraminohu cuuami woyite diꞌꞌikkino. Samaariyu manni buuraminohu, cuuamihunni boode yanna gedensaanniiti. (Soq. 8:14-17) Qornelewoosinna minisi manni kayinni qullaawu ayyaaninni buuraminohu cuuamara nafa albaanniiti.—Soq. 10:44-48.
5. 2 Qorontoosi 1:21, 22 kultanno garinni mittu manchi qullaawu ayyaaninni buuramanno woyite mayi ikkanno?
5 Hanni mittu manchi qullaawu ayyaaninni buuramanno woyite mayi ikkannoro laꞌno. Buurantinori giddo mitootu umi qara Yihowa doorinonsata ammane adha qarra ikkitansara dandiitanno. Insa ‘Yihowa ane doorinoehu mayiraati ikka’ yite huluullantannoha ikkara dandaanno. Wolootu kayinni hatto yite heda hooggara dandiitanno. Ikkollana, soqqamaasinchu Phaawuloosi mittu manchi qullaawu ayyaaninni buuramanno woyite ikkannore kulanni togo yiino: “Kiristoosa ammaꞌnitineenna hexxo uyinoꞌnehunni Qullaawu Ayyaaninni sumudantinoonni. c . . . Qullaawu Ayyaani iqqinkera uyinoonninke tajeeti.” (Efe. 1:13, 14) Hakko daafira, Yihowa qullaawu ayyaanisinni insa buurantinota woꞌmunni woꞌma xawisannonsa. Konni garinni insa albillitte uullate aana ikkikkinni iima afidhannote hegere heeshshora qullaawu ayyaani taje (woy qawude) ikkanno.—2 Qorontoosi 1:21, 22 nabbawi.
6. Buuramino Kiristaani iimi baꞌraarshansa adhate maa assa hasiissannonsa?
6 Mittu manchi qullaawu ayyaaninni buuramiro, iimira haꞌrasi horo digattanno yaateni? Deeꞌni. Kuni Kiristaanchi iimira haꞌrara dooraminota huluullamannokkiha ikkirono, togo yitanno amaale qaaga hasiissannosi: “Roduuwaꞌya! Woshshamaꞌnenna dooramaꞌne huluullissannokkita assiꞌrate albinni roore jawaatte; tenne coyibba assa agura hoogginiro, horonta diubbinanni.” (2 Phe. 1:10, NW) Konni daafira buuramino Kiristaanchi iimira haꞌrate dooraminoha woy woshshaminoha ikkirono, baꞌraarshasi adhannohu ammanaminoha ikke heeꞌriro callaati.—Fil. 3:12-14; Ibi. 3:1; Aju. 2:10.
MITTU MANCHI BUURAMINOTA AFANNOHU HIITTOONNIITI?
7. Buuramino Kiristaani iimira woshshaminota afannohu hiittoonniiti?
7 Ikkina mittu manchi iimira woshshaminota afannohu ma garinniiti? Phaawuloosi ‘qullaawoota ikkara woshshaminohura’ Roomaho heeꞌranno roduuwira coyiꞌrinori tenne xaꞌmora dawaro ikkanno. Isi togo yiinonsa: “‘Anna Annaanna’ yitine woshshidhinanniha oosichimmate Ayyaana adhitinoonni ikkinnina, galagaltine waajjatenni heedhinanni gede borojjimmate ayyaana diadhitinoonni. Maganu Ayyaani ninke ayyaani ledo Maganu ooso ikkanke farciꞌranno.” (Rom. 1:7; 8:15, 16) Konni daafira, buuramino Kiristaanchira Maganu qullaawu ayyaanisinni iimira woshshaminota kulannosi.—1 Tes. 2:12.
8. Umi Yohaannisi 2:20, 27 noo hedo buuramino Kiristaanira buuraminota buuxisannonsahu wolu manchi hasiisannonsakkita leellishshannohu hiittoonniiti?
8 Yihowa buuramino Kiristaani iimira woshshamansa hili geeshsha nafa huluullamannokki gede assanno. (1 Yohaannisi 2:20, 27 nabbawi.) Wolu Kiristaaninte gede buurantinori songote widoonni Yihowawiinni rosa hasiissannonsati egennantinote. Ikkollana insara buurantinota buuxisannonsahu wolu manchi dihasiisannonsa. Yihowa kalqete alame giddo taalle nookki wolqasi yaano qullaawa ayyaanisi horoonsiꞌre buuramansa woꞌmunni woꞌma buuxxanno gede assinonsa!
‘LAYINKIMEESHSHO ILANTINO’
9. Efesooni Sokka 1:18 kultanno garinni mittu manchi buuramanno woyite mayi soorramanno?
9 Yannankera noote roore Yihowa soqqamaanora mittu manchi qullaawu ayyaaninni buuramanno woyite ikkannore afa qarra ikkitansara dandiitanno. Mayira? Korkaatuno insa qullaawu ayyaaninni dibuurantino. Maganu mannu ooso kalaqinohu iima heedhara ikkikkinni uullate aana hegerera heedharaati. (Kal. 1:28; Far. 37:29) Ikkollana Yihowa mitootu iima heedhara doorino. Hakko daafira Maganu mitto mancho qullaawu ayyaaninni buuranno woyite, hedosinna hexxosi gudisidhe soorrantanno gede assanno; hakkunni gedensaanni isi iima heeꞌrate hexxanno.—Efesooni Sokka 1:18 nabbawi.
10. ‘Layinkimeeshsho ilamate’ yaa mayyaate? (Lekkaaliidi qaagiishshano lai.)
10 Mittu manchi buuramanno woyite “layinkimeeshsho” d woy iiminni ilamanno. Qoleno Yesuusi, qullaawu ayyaaninni buuraminokki manchira ‘layinkimeeshsho ilamate’ yaa mayyaatero woꞌmunni woꞌma xawisa dandiinannikkita coyiꞌrino.—Yoh. 3:3-8.
11. Mittu manchi buuramanno woyite hedosi soorrantanno gara xawisi.
11 Mittu Kiristaanchi buuramanno woyite hedanno gari soorramannohu hiittoonniiti? Buurantinori Yihowa iimira koyisansara albaanni, uullate aana hegerera heeꞌrate hexxo noonsareeti. Insa Yihowa bunshe baala hune uulla gannate assanno yanna quqquxante agadhitanni keeshshitino. Qoleno fiixinsanna jaallansa reyotenni kaꞌeenna insanni xaaddanno yanna heddinoha ikkara dandaanno. Ikkollana insa buurantu gedensaanni heddanno gari soorramanno. Mayira? Kuni ikkinohu, uullate aana heeꞌrate hexxo giwissinonsa daafira diꞌꞌikkino. Woy iillinonsa qarri caacceesseennansanna yaachisheennansa diꞌꞌikkino. Uullate aana hegerera heeꞌra ceeꞌmishshannota ikkitanno yite hedeweelcho heddino daafirano diꞌꞌikkino. Hatteentenni, Yihowa qullaawu ayyaanisinni hedonsanna hexxonsa soorrantanno gede assinohuraati.
12. Umi Pheexiroosi 1:3, 4 kultanno garinni, buurantinorira hexxonsa daafira mayi macciishshamannonsa?
12 Buuramino manchi tenne ayirrado qoosso afiꞌrate ikkado diꞌꞌikkoommo yee hedara dandaanno. Ikkollana, Yihowa doorinosita hili geeshsha nafa dihuluullamanno. Hatteentenni iima heeꞌrate noosi hexxo hedanno woyite baasa hagiidhanno.—1 Pheexiroosi 1:3, 4 nabbawi.
13. Buurantinori uullate aani heeshshonsa ma garinni laꞌanno?
13 Ikkina buurantinori reya halchitanno yaateni? Soqqamaasinchu Phaawuloosi tenne xaꞌmora dawaro qolino. Isi mannimmansa dukkanu ledo lawisanni togo yiino: “Reyannoha heeshsho egemmitanno gede, uddiꞌnammora ikkinnina mullootu heeꞌnammora halchineemmokki daafira, xa dukkanu giddo heeꞌneemmo ninke ayirreennanke urranni heeꞌnoommo.” (2 Qor. 5:4) Buurantinori xaa heeshsho ceeꞌmite rakke reya dihasidhanno. Hatteentenni insa mitto mittonka barra jaallansanna fiixinsa ledo Yihowara hagiirrunni soqqamate horoonsidhanno. Insa loossannori ikkireno ikkiro, albillitte woꞌmitannota ayirrado hexxonsa horo dihabbanno.—1 Qor. 15:53; 2 Phe. 1:4; 1 Yoh. 3:2, 3; Aju. 20:6.
YIHOWA ATE BUURINOHE?
14. Mittu manchi qullaawu ayyaaninni buuraminota leellishshannokki coyibba hiikkuriiti?
14 Miteekkite ‘Anino qullaawu ayyaaninni buuramoommo ikka?’ yite huluullantanni noottoha ikkara dandaanno. Hatto ikkiro hanni aante noo xaꞌmuwa hedi: Yihowa fajjo assate lowo geeshsha laalaatatto? Sabbakate looso baxxino garinni diinaggaabbe loossanni noottoha lawannohe? ‘Maganunniha goꞌlino coye’ wodanchate Qaalesi seekkite xiinxalla baxatto? (1 Qor. 2:10) Yihowa soqqanshokki baxxino garinni maassiꞌranni nooha lawannohe? Manna ayyaanaamittetenni kaaꞌla lubbora baxatto? Heeshshokki giddo Yihowa duucha doogganni kaaꞌlinohe? Kuri xaꞌmuwara mittoreno huluullamittokkinni ee yite qolattoha ikkiro, iimi heeshshora woshshamootto yaateni? Deeꞌni, hatto yaa diꞌꞌikkino. Mayira? Korkaatuno buurantinorino ikko buurantinokkiri Maganu soqqamaano baala hatto yite heddara dandiitanno. Qoleno, hexxonsa ikkitutano ikkituro, Yihowa qullaawu ayyaanisinni baalanti soqqamaanosi kuri coyibba assitanno gede mittu gari wolqa aansara dandaanno. Isinni, ‘Qullaawu ayyaaninni buuramoommo ikka?’ yite huluullamattoha ikkiro, tini umise buuramoottokkita leellishshanno. Yihowa iimira hadhanno gede doorinonsari buuramansa dihuluullantanno! Korkaatuno insa tenne affino!
Yihowa qullaawa ayyaanasi horoonsiꞌre Abirihaami, Saara, Daawitinna Cuuaanchu Yohaannisi maalaꞌlinannire assitanno gede wolqa uyinonsa; ikkirono, qullaawu ayyaanisinni insa iimira hadhanno gede didoorinonsa (Gufo 15-16 lai) e
15. Maganu ayyaana adhino manni baalunku iimira haꞌranno yaa ikkinokkita mayinni anfeemmo?
15 Qullaawu Maxaafi, Maganu ayyaana adhinoha batinye ammanate manna kulanno; ikkirono insara iimira haꞌrate hexxo dinonsa. Daawiti qullaawu ayyaaninni massagamanno manchooti. (1 Sam. 16:13) Qullaawu ayyaani, Yihowaha hawa gede huwantannikki coye wodanchanno gedenna mito Qullaawu Maxaafi gafa borreessanno gede assinosi. (Maq. 12:36) Ikkirono, soqqamaasinchu Pheexiroosi ‘Daawiti iimira haꞌrinokkita’ coyiꞌrino. (Soq. 2:34) Cuuaanchu Yohaannisirano, ‘qullaawu ayyaani woꞌminosi.’ (Luq. 1:13-16) Yesuusi, Yohaannisi geeshsha ikkanno manchi nookkita coyiꞌrinoha ikkirono, Yohaannisi iimira hadhannori wido ikkinokkita xawisino. (Mat. 11:10, 11) Yihowa qullaawa ayyaanasi horoonsiꞌre kuni manni maalaꞌlinannire assanno gede wolqa uyinonsa; ikkirono, qullaawu ayyaanisinni insa iimira hadhanno gede didoorinonsa. Hatto yaa kayinni insa iimira haꞌre gashshanno gede dooramino manni geeshsha ammanantinore diꞌꞌikkitino yaateni? Hatto yaa diꞌꞌikkino. Yihowa insa Gannate ikkitanno uullara heedhanno gede reyotenni kayisannonsa yaate.—Yoh. 5:28, 29; Soq. 24:15.
16. Xaa yannara rooriiditi Maganu soqqamaasine hiikkonne baꞌraaꞌra afidhanno yanna quqquxante agadhitanno?
16 Xaa yannara uullate aana nooti rooriiditi Maganu soqqamaasine iimira haꞌrate hexxo noonsare diꞌꞌikkitino. Insa Abirihaami, Saara, Cuuaanchu Yohaannisinna wolu Qullaawu Maxaafi giddo kulloonni manni gede, Maganu Mangiste hunda uullate aana hegerera heeꞌrate quqquxante agadhitanno.—Ibi. 11:10.
17. Aananno birxichira hiikkuri xaꞌmuwara dawaro afiꞌneemmo?
17 Xaano Maganu manni mereero buuramino Kiristaani noo daafira, huluullitannonke xaꞌmuwa heedhara dandiitanno. (Aju. 12:17) Lawishshaho, buuramino Kiristaani insaneeto ma garinni laꞌꞌa hasiissannonsa? Songonke giddo mittu manchi Qaagooshshu Ayyaanira timanna woyine qamasa hanafiro, iso ma garinni laꞌꞌa hasiissannonke? Iimira haꞌrate hexxo noonke yaanno manni kiiro lexxituro, tini ninke mitiinsitannonkeni? Aane noo birxichira, kuri xaꞌmuwara dawaro afiꞌneemmo.
a Yihowa 33 M.D. ayirrinsoonnihu Phenxeqosxete ayyaaninni kayise, mitu Kiristaanira iima Beettisi ledo gashshate hexxo uyinonsa. Ikkina, kuni Kiristaani tenne dhaggete hexxora dooraminota afannohu hiittoonniiti? Mittu manchi iimi heeshshora dooramanno woyite mayi ikkanno? Konni birxichira kuri afate quqquxxanno xaꞌmuwara dawaro afiꞌneemmo. Birxichu xintaminohu Arfaasa 2016nnite Agarooshshu Shae aanaati.
b HARANCHO XAWISHSHA: Yihowa qullaawu ayyaanisinni mitto mancho iima Yesuusi ledo gashshanno gede dooranno woyite, hakku manchi qullaawu ayyaaninni buuramino yinanni. Maganu ayyaanisinni, hakko manchira balaxe hexxo woy “taje” aannosi. (Efe. 1:13, 14) Togoo Kiristaani qullaawu ayyaani insa hexxo iimira haꞌra ikkitinota ‘farciꞌrinonsata’ woy xawise kulinonsata coyiꞌra dandaanno.—Rom. 8:16.
c HARANCHO XAWISHSHA: Sumuda. Yihowa buuramino manchira sumuda sumudannohu hakku manchi reyara shiima yannara albaanni woy bayiru qarri hanafara boode yanna gatte heedheennaati.—Efe. 4:30; Aju. 7:2-4; Dotteessa 2016te Agarooshshu Shaera nooha “Nabbawaano Xaꞌmitanno Xaꞌmo” yaanno birxicho lai.
FAARSO 27 Maganu Ooso Ayirrinyi Leellanno
e MISILETE XAWISHSHA: Ammanankenni kainohunni usurammoommorino ikko, faajjete sabbakate wolapho noonkeri, Maganu Mangiste gashshooti hunda uullate aana heeꞌrate quqquxamme agadha dandiineemmo.
