YERUSAALAMETE Qullaawu Maxaafi Gobba yinanni Doni Mini giddo 700-600 K.A, noo yanna giddo aanasi borro borreessinoonni kinchi no. Konne kincho anfoonnihu Israeelete Hebirooni yinanni base mule noohu waammate godi giddooti. Kinchu aana borreessinoonni borro togo yitanno: “Kagaavi beetto Kagaafi, Chiveyoti Yahiwe rumosi.” Tini borro Qullaawu Maxaafi adda ikkinota leellishshannohu hiittoonniiti? Tini borro Ibiraawootu Afii fidalenni YHWH yine borreessinoonniha, Yihowa yinanniha Maganu suꞌma hunda seekkine egenninoonnitanna mannu barru baala horoonsiꞌrannota leellishshanno. Wole waammate godi giddo anfoonniti kinchu aana borreessinoonni borro leellishshannonte gede, hakko godi giddo xaadde maaxantannori duucha woyite Maganu suꞌma mannu suꞌmuwa ledo godu girgiddira borreessitanno.

Joorjiyu Yuniversitera loossannoti Dokiteri Richeeli Naabulise hundi borruwa daafira togo yitino: “Togoo borruwara YHWH yinanni suꞌmi duuchawa heeꞌrasi lowore rosiissannonke. . . . Tini hundi borro YHWH yinanni suꞌmi Israeelenna Yihudu mannira lowore ikkinota leellishshanno.” Tini, Qullaawu Maxaafi giddo Ibiraawootu fidalenni borreessinoonnihu YHWH yinannihu Maganu suꞌmi lowo kume ikkitanno basera heeꞌrasi gara ikkitinota leellishshanno. Duucha woyite mannu suꞌmi ledo Maganu suꞌmano borreessinanni.

Kinchu aana borreessinoonniti “Chiveyoti Yahiwe” yitanno hedo “Olantote Mootichi Yihowa” yitanno tiro afidhino. Tini, Maganu suꞌma calla ikkikkinni “Olantote Mootichi Yihowa” yinanni yaatto hunda rosantinota ikkitinota leellishshara dandiitanno. Hattono Qullaawu Maxaafi giddo Ibiraawootu Afiite Qullaawa Borrora 283 hinge “Olantote Mootichi Yihowa” yine qummi assinoonniti gara ikkase leellishshanno; roore anga tini yaatto noohu Isayaasi, Ermiyaasinna Zakkaariyaasi maxaafiraati.